Luke 21

Pwa̤mǒ̤khwè̌ a ta̤ma̤lṳ

(Matè̌ 12:41-44)

1Bǎ Yeshǔ kè̌htò̌ akha, a kè̌shǐ kòyòdû̌yò̤̌ tokhlǒ hè shû̌nṳ̌ lô̌khô a ta̤ma̤lṳ tokhlǒ dǒ lǎ̤bè̌ô̌plǒ rutǒkû dǒ ta̤lṳhtò̌hô akû. 2Htodě a kè̌shǐ pwa̤mǒ̤khwè̌ hǎwǐ̤shèwè̤ tôpwa̤ hè shû̌nṳ̌ ru tilili̤ ginǐ̤bǎ. 3Dě Yeshǔ hî̌ kû̌, “He hî̌ mî̌ca꤮ sî, pwa̤mǒ̤khwè̌ nutôpwa̤ shû̌nṳ̌ dû̌khlo kû̌ kòyò shǔshawa̤ tokhlǒhǒ. 4Ma̤titèhî̌dě lǒ̤꤮ bò a hèshû̌nṳ̌ ru nutokhlǒmî̌, a ô̌lǒô̌kè shû̌lě dě a hèshû̌nṳ̌ pwǎ lô̌khô ata̤ ô̌ kûmṳ̂̌kashǎ nutokhlǒ pwǎ. Bǎbǎkǎlè pwa̤mǒ̤khwè̌ tôpwa̤ nî̌ a hǎwǐ̤shèwè̤ bǎbǎkǎlè a hèshû̌nṳ̌ bòmǔtegle ta̤ dǒ a ô̌ kû̌ lû̌ûnu.”

Yeshǔ hî̌kû̌ ta̤lṳhtò̌hô glè̌ lò̤tě̤pro̤ pě awe̤akè

(Matè̌ 24:1-2; Makǔ 13:1-2)

5Yeshǔ akhôphijǎ akla tokhlokhlǒnu, a hî̌bǎdô̌nè kè̌khî lû̌û kû̌ ta̤lṳhtò̌hô dǒ kòyò tîwî̌tòwò wî̤ a kû̌ lě̤dû̌pwe̤htû lǒ̤bò tokhlǒ kû̌ tě̤ta̤ dǒ kòyò lṳhtò̌ kû̌ Cǒmara nutokhlǒ akhû̌akhî awî̤tè̤̌sǐ lî꤮ asî hî̌ǐ kè̌khî lû̌û pô̤̌nu bǎbǎkǎlè Yeshǔ hî̌ asî kû̌, 6“Lǒ̤꤮ bò ta̤ dǒ sî kè̌shǐ khònò̤̌ tokhlǒnu, kòyò glè̌ hèma̤ lò̤tě̤pro̤kè bò a pě. Lǒ̤ nî̌ a ô̌ icu jò pe lû̌û tômè̌꤮ tô̤̌, shěkhǎ hètǒ̤ tôni̤ pě.”

Ta̤pò̤̌ta̤sha kû̌ ta̤ma̤jî̌ma̤jû̌

(Matè̌ 24:3-14; Makǔ 13:3-13)

7Asî gwè̌ kû̌, “Sara, ta̤ nutokhlǒ nî̌ a glè̌ htûhtò̌ bǎkhòtè pě? Shěkhǎ glè̌ hètǒ̤ pěnu ta̤cô̌klǐcô̌sè amè̤̌mî̌ca tôcǒcǒ glè̌ ô̌lṳ̌htò̌wǐ pě ya?”

8Yeshǔ hî̌shěshu asî kû̌, “Pô̤̌khô kòyò glè̌ lô̌ǐplò̤ǐlòhô cû̌nṳ̌ tǎ̤ sî tǎ̤mǎ̤nu, ô̌sèrèsòklò lô̌khô sînǎ̤ nî̤̌꤮. Kòyò dǒ a glè̌ hè dǒkôǐ lòhô lô̌khô anǎ̤ kû̌ hemi̤ pěnu a ô̌ wô̤̌lî pě, dě a glè̌ dǒkôǐ lòhôlò̤ ǐtû̌ lô̌khô anǎ̤ kû̌, ‘he mî̌ Khrǐ hǒ,’ dě ‘shěkhǎ phǔtǒ̤ hǒ,’ pô̤̌nu pě bǎbǎkǎlè gû̌kû̌ tǎ̤ lôkhô asîkò tǎ̤mǎ̤ nî̤̌꤮. 9Bǎ sî ganǎ̤de ta̤shěta̤pè̤̌ kû̌ ta̤shû̌shushû̌shǎ ô̌htò̌ akhanu, ǐsha bǎyô̤ tǎ̤ lô̌khô tǎ̤mǎ̤ nî̤̌꤮. Ma̤titè̤̌hî̌dě ta̤ lǒ̤꤮ bònu, a bǎ ô̌htûhtò̌ bòwǐ khlo pě bǎbǎkǎlè hǎkhû̌gutṳ̌ hètǒ̤nu mè̤̌khôtô̤.”

10Yeshǔ hî̌ pô̤̌ kû̌, “Kòyò khliphû̌ tocǒ kû̌ tocǒ glè̌ sǎkhě lû̌û pě. Shigǎ tôgǎ kû̌ tôgǎ glè̌shěpě̤ lû̌û pě. 11Tanahtû̌de glè̌ ô̌htò̌ta̤lǎ̤ pṳ̂̌kû dǒ hǎkhû̌nu tûkû hto tûkû pě. Gǎwǐ̤gǎko kû̌ ta̤shawǎ̤nṳ̌ tokhlǒ glè̌ ô̌htò̌ dǎshidǎgǎ wô̤̌lî dǒ gûlǎ̤ pṳ̂̌꤮ tûkû pě. Ta̤tirǐsò̌ ǐsha tokhlǒ kû̌ ta̤ma̤nǎ dǒ a cô̌klǐcô̌sè tokhlǒ ô̌lṳ̌htò̌ dǒ mǒlǎ̤ pě.

12“Bǎbǎkǎlè bǎ ta̤hǒtokhlǒ htûhtò̌ khôtô̤̌ akhanu, dǒ hemi̤ akhû̌akhîdě kòyò glè̌ pṳ̂̌ sî kòyò glè̌ ma̤jî̌ma̤jû̌ sî pě, kòyò glè̌ sûcû̌ sî dǒ ta̤cabahǐkû pě dě kòyò glè̌ cî̌htò̌ sî pě, kòyò glè̌ dǒtě̤ sî dǒ apô̤kû pě. Htodě kòyò glè̌ sûcû̌sî dǒ Khwǐ kû̌ côphǎ tokhlǒ a lô̤mô̤̌ pě. 13Hǒomî̌ amè̤̌kû̌ sî glè̌ nǐ̤bǎ ta̤shěta̤khǎwô̌ dǒ sî glè̌ shôbǐǐlṳ̌wǐ bǎ kòyò kû̌ hewe̤hekè nu hǒ. 14Bè̌gû̌bè̌gè̌ nǎ wǐ tǎ̤ sî sǎphlǒ kû̌ sî glè̌ hî̌bǎ hǎplǎ tûû̌ sînǎ̤ hî̌tè pěnu tǎ̤mǎ̤ nǐ̤꤮. ^a 15Ma̤titè̤̌hî̌dě, ta̤hî̌bǎjò kû̌ ta̤sî̌ta̤jò̌ dǒ kòyò sǎkhě sîtokhlǒ glè̌ hî̌ge shěshu jò pe sî tôpwǎ̤꤮ tô̤̌ tokhlǒ, he glè̌ ǐ sî pě. 16Sî pṳ̌wè̤̌, mǒ̤pha, khlilè, khô tokhlǒ glè̌ shaǎlò̤kè sîmi̤ pě. Asî glè̌ ma̤si sî tokhlǒkhlǒ pě. 17Dǒ hekhû̌hekhî dě kòyò pṳ̂̌꤮ tôpwa̤ glè̌ sǎkhě bò sî pě. 18Bǎbǎkǎlè bǎ sî khǔlṳ tôbô pwǎ pěnu, a hǎmǎkè pè̤̌ tô̤̌. 19Ô̌měô̌gle lô̌khô dě sî glè̌ ma̤hǎplǎkè tûû̌ sînǎ̤ pě.

Yeshǔ hî̌kû̌ kòyò glè̌ ma̤tě̤pro̤kè Wî̤̌yarǔshôle pě awe̤akè

(Matè̌ 24:15-21; Makǔ 13:14-19)

20“Bǎ sî kè̌shǐ kû̌ kli tokhlǒ hète̤we̤bǐ Wî̤̌yarǔshôle pě akhanu, sî bǎ sî̌ya kû̌ yikhôtô̤̌pě nu mî̌, kòyò glè̌ ma̤pò̤̌kè a pě. 21Bǎnukha, kòyò ô̌dǒ Yǔdagǎkû tokhlǒ bǎ hǎhtò̌khlè̌cû̌ ô̌ dǒ khôlôlô̤ pě. Kòyò ô̌ dǒ wî̤̌dû̌wî̤̌htûkû tokhlǒnu, a bǎ hǎhtò̌cû̌kè pě, dě kòyò ô̌ dǒ wî̤̌kû tô̤̌ tokhlǒnu cû̌genṳ̌ tǎ̤ dǒ wî̤̌kû tǎ̤mǎ̤ nî̌. 22Ma̤titè̌hî̌dě, pô̤̌ lî̤plò̌shǐ wě̤nǎ ta̤cî̌htò̌ alṳmṳ̌ni̤ lṳmṳ̌sa awe̤akè glè̌ lǒhtò̌behtò̌ pě aya pwǎ. ^b 23Lṳmṳ̌ni̤ lṳmṳ̌sha bǎnukha pě mî̌, pwa̤mǒ̤ mǒ̤do tokhlǒ kû̌ mǒ̤ dǒ a ô̌ kû̌ phû̌pî̌tî̌ dǒ a ônû̌ pe tokhlǒnu, kòyò glè̌ sǎyṳ gwèbǎǐ jî̌ asî pě. Ta̤jî̌ta̤jû̌ glè̌ hè bǎ shigǎ nutôgǎ pě dě Cǒmara a ta̤cî̌htò̌ glè̌ tǒ̤bǎ dǒ kòyò nutômṳ̌ akhû̌ pě. 24Kòyò glè̌ ma̤si asî tokhlǒkhlǒ kû̌ dòdǔ pě, dě tokhlǒkhlǒnu, kòyò glè̌ pṳ̂̌cî̌cû̌kè asî dǒ gǎpṳ̂̌tôgǎ dǒ hǎkhû̌ bǎnu pě. Yǔdaphû̌ mè̤̌tô̤̌ tokhlǒ glè̌ ma̤jî̌ma̤jû̌ pè̤̌ǎpè̤̌ô Wî̤̌yarǔshôlephû̌ tokhlǒ pě, dě a glè̌ pǒǐ tǒ̤dǒ asî Yǔdaphû̌ mè̤̌tô̤̌ tokhlǒ ashěakhǎ lǒhtò̌behtò̌ taplǎ pě.

Kòyòphû̌khû glè̌ hè gesô̌ awe̤akè

(Matè̌ 24:29-31; Makǔ 13:24-27)

25“Ta̤ma̤mǎnǎ khô̌ tokhlǒ glè̌ ô̌lṳ̌htò̌lṳ̌ dǒ lṳmṳ̌kû, lakû, shǎ sîtokhlǒ akû pě, dǒ hǎkhû̌ nu, shi kû̌ shidû̌tewe̤ akû tokhlǒ pěpǒ tewe̤ hèdû̌ akhû̌akhî, shigǎ pṳ̂̌tôbǎ glè̌ ta̤tirǐsò̌ ǐsha bò dě a glè̌ htò̌shepe̤ lǒ̤bò asî pě. ^c 26Ta̤hǒo tokhlǒ glè̌ htûhtò̌ bò hǎkhû̌ tôběbò pě, htotô̤̌ Cǒmara glè̌ ma̤guyṳ̌kacè̌ lǒ̤꤮ bò mǒlǎ̤ a ta̤pô̤ta̤phǎ nutokhlǒ pě akhû̌akhî, kòyò tokhlǒ glè̌ tirǐsò̌ ǐsha lǒ̤bò pě. 27Htodě asî glè̌ kè̌shǐ lô̌khô Kòyòphû̌khû glè̌ hèlò̤ dǒ poǒlṳ̌kla pě, dě he glè̌ ô̌lǒbe kû̌ he ta̤pô̤ta̤phǎ kû̌ he ta̤bwǐdû̌sîrîhtû dǒ ashû̌asho hǒnutokhlǒ pě. ^d 28Bǎ ta̤hǒotokhlǒ sahtò̌ma̤hǒ akhapěnu, ihtǒ lô̌khô dě bôtômò̤̌ lô̌khô sî ikǒ, ma̤titè̌hî̌dě, yî̤khôtô̤̌ pěmî̌ Cǒmara glè̌ ma̤hǎplǎge hǒ sî pě.”

Phǐnǐ̤ ta̤sû̌ǐ dǒ dǔshimṳ̌ tômṳ̌ a ô̌

(Matè̌ 24:32-35; Makǔ 13:28-31)

29Yeshǔ hî̌khěkhô̌ bǎ asî kû̌, “Gènè̤kè̌ lô̌khô dǐshimṳ̌ tômṳ̌ kû̌ sǒmṳ̌ titètè̌꤮ bǎbǎ nu. 30Sî kè̌shǐ kû̌ alǎ dô̌jǎhtò̌hǒ hî̌nu, sî sî̌ya kû̌ gǎgû̌kha phǔhè hǒ. 31Pô̤̌nudě bǎ sî kè̌shǐhǒ ta̤hǒo tokhlǒ htûhtò̌hǒ akhapěnu, sî̌ya lô̌khô kû̌ Cǒmara glè̌ hè pǒshipǒgǎ phǔhtò̌ hǒ nî̌꤮.

32“He hî̌cǒcǒ꤮ sî, kòyò lǒ̤꤮ bò dǒ a ô̌htûpwa̤ khònò̤̌tôhtu tokhlǒ sibò nò̌khôtô̤̌nu, ta̤hǒotokhlǒ glè̌ htûhtò̌ bò pě. 33Mǒkhû̌ kû̌ hǎkhû̌ glè̌ hǎmǎkè pě bǎbǎkǎlè helě̤heyô̤̌ nu a hǎmǎkè pè̤̌ takhò̌꤮ tô̤̌.

Pa bǎ sòklò

34“Sè̌rè̌ lô̌khô sînǎ̤ nî̌. Bǎ sî ǎmuômu akha sî ma̤bǐma̤ô̌ tǎ̤ nutokhlǒ bǎbǎ, sî gènè̤ lô̌khô kû̌ sî ta̤ô̌htûpwa̤ dǒ hǎkhû̌hǒo tôhtu tokhlǒnu bǎbǎ, Ma̤hǎbòkè tǎ̤ sî ta̤shěta̤khǎ kû nutokhlǒ tǎ̤mǎ̤ nî̌. Hî̌pěmî̌ Kòyòphû̌khû mî̌ he glè̌ hètǒ̤tîkhî dǒ sî ô bǎ sî gènè̤htò̌tǒ̤ tô̤̌ nutôni̤ nutôsa pě. 35Ma̤titè̌hî̌dě ta̤jî̌ta̤jû̌ ashěkhǎnu asô̌sô̌kû̌ tǐ̤ tôpṳnu pě. A glè̌ hèpṳ̂̌nǐ̤ lǒ̤bò kòyò ô̌ dǒ hǎkhû̌ hǒotôbě nutokhlǒ pě. 36Pô̤̌khô sî glè̌ hǎplǎkè wô̌wô̌bǎbǎ kè kû̌ ta̤ glè̌ htûhtò̌ pě, htotô̤̌ pô̤̌khô sî glè̌ ihtǒ dǒ Kòyòphû̌khû mî̌he a lô̤mô̤̌ pě nudě, sòklò dě kwicaba lô̌khô pṳ̂̌꤮ taplǎ nî̌꤮.”

37Yeshǔ sû̌ǐtòwòǐ lò̤ kòyò dǒ ta̤lṳhtò̌hôkû pṳ̂̌꤮ tôni̤. Dě bǎ lṳmṳ̌lò̤ ashěakhǎnu, a cû̌htò̌ dǒ khôlô dǒ kòyò kaǎ kû̌ òlǐbakhôlô hǒonu tômè alô̤, dě a ô̌ bǎnu tǒ̤shǔ lṳmṳ̌lî. ^e 38Kòyò tokhlǒ sǎyṳ hèganǎ̤de lô̌khô a ta̤shôbǐǐlṳ̌ tokhlǒ dě a hè wi̤sò bò dǒ ta̤lṳhtò̌hôkû.