Luke 3
Pwa̤jushi Khûyṳ̂ha a ta̤shôbǐǐlṳ̌
(Matè̌ 3:1-12; Makǔ 1:1-8; Yṳ̂ha 1:19-28)
1Bǎ khwǐdû̌ Tiberǐ pǒ̤ta̤ behtò̌ shǐyè̤̌ně akhanu, Pò̌tiyapǐlǎ htûhtò̌ khwǐdû̌ dǒ Yǔdagǎ. Dě pwa̤pǒ Galilè̤̌gǎ mî̌ Khwǐherû. Dě Khwǐherû apṳ̌ Khûphǐlǐpǔ mî̌ pwa̤pǒ Itǔriya̤gǎ kû̌ Tarakûnǐtǐgǎ. Khwǐlushanǐya̤ dě a pǒǐ Abǐlṳgǎ. 2Pwa̤shû̌gǎ adû̌lǒ mî̌ pha Anǎ kû̌ pha Kayaphǎ. Bǎnuakha Phashakhrǐ aphû̌khû Khûyṳ̂ha ô̌ dǒ gǎshashigǎ lǒ̤sîměkhû̌ dě Cǒmara shôbǐǐlṳ̌ lò̤bǎ alě̤ayô̤̌ dǒ Khûyṳ̂ha a ô̌. 3Pô̤̌nu akhû̌akhî, do ô̌phǔ te̤we̤ lǒ̤꤮ bò bǎ Jòda shilô̤̌mǒ̤ kòshî̌ tokhlǒnu, Khûyṳ̂ha cû̌lè shôbǐǐlṳ̌ bǎ kòyò kû̌ yò̤lǎ̤plǎdî̌ lô̌khô sînǎ̤ dě ju lô̌khô sînǎ̤ kû̌ shi dě Cǒmara plûkè sî ta̤sǔ nutokhlǒ pě. 4Pô̤̌ Cǒmara alě̤ayô̤̌ wě̤ nǎ hto dǒ piwi̤pèshè Khûyashǎya alî̤kûnu, dě a hî̌ kû̌, a “Kòyò tôpwa̤ yî̤̌gǔhtò̌ dǒ gǎshashigǎ lǒ̤seměkhû̌ dě a hî̌ kû̌, ‘tîwî̌tòwò nǎ lô̌khô klè̌ dǒ Běcǎ aya. Ma̤cǒma̤nò̤ lô̌khô Běcǎ lǎ̤hèklè̌ aya tôbô nî̌. 5Lô̤̌te̤kû lò̤꤮ bò tokhlǒnu, bǎ sǒbǐbò, khômǔkhôlô kû̌ khôplǔkhû̌ tokhlǒnu, bǎ ma̤gunò̤bò. Ma̤cǒbò klè̌ dǒ a tugǔtegwe nutokhlǒ. Dě bǎ ma̤sî̌bò klè̌ dǒ a tiphwǐtûphrû nutokhlǒ. 6Kòyò pṳ̂̌꤮ tôpwa̤ gǔ kè̌shǐ bò Cǒmara rû̌htò̌ pwa̤ma̤hǎplǎge Kòyòphû̌khû nutôpwa̤ pě.’” 7Kòyò tokhlǒ glè̌ hè ju lô̌khô anǎ̤ kû̌ shi dě a hèjûgrû dǒ Khûyṳ̂ha a ô̌. Dě Khûyṳ̂ha hî̌ asî kû̌, “Wṳ̂̌sasî! mò̌pè tôpwa̤ dǐsè̌rè̌ sî kû̌ sî gǔ hǎplǎbò̌ kû̌ Cǒmara a ta̤cî̌htò̌ dǒ a gǔ hèlò̤pě nuya? b 8Sî kè̌ yò̤lǎ̤plǎdî̌ mè̤̌mî̌ca sî nǎ̤ kè̌hî̌dě dǔlè̌lṳ̌ lô̌khô sî ta̤ô̌htûpwa̤ tokhlǒ kû̌ sî ta̤bè̌ sî sǎphlǒsǔshi. Hî̌htôhî̌lò̤ tǎ̤ sînǎ̤ kû̌, ‘pa mî̌ PhaAbraha akhlialè’ nutǎ̤mǎ̤. He hî̌ sî, Cǒmara ma̤htûhtò̌ jò lǒ̤ tokhlǒ kû̌ PhaAbraha aphû̌ mî̌ a ma̤jò pwǎ. c 9Kû tôbǎ ô̌ dǒ sǒ kòshî̌ dě kòyò gǔ gû̌gǎ sǒmṳ̌ tokhlǒ pě, dě kòyò gǔ cô̌tṳ̌yǎ tǒ̤dǒ akhò̌wǐ̤ pě, sǒmṳ̌ tômṳ̌mṳ̌ dǒ asǎaphô wî̤ǎ tô̤̌nu, kòyò gǔ gû̌gǎ a pě dě kòyò wînṳ̌kè a dǒ mî̌kû pě.” d 10Dě kòyò saprṳ̂ gwè̌ Khûyṳ̂ha kû̌, “Kè̌ hî̌ pô̤̌nudě pa tôbǎ ma̤hî̌tè?” 11Dě a hî̌shěshu asî kû̌, “Kòyò dǒ aje ô̌ ginǐ̤pṳ̌ bǎ ǐ pè̤̌ kòyò dǒ aje ô̌ gû̌ kòyò tôpṳ̌꤮ tô̤̌ nutokhlǒ. Htodě kòyò dǒ a lǎ̤ǎlǎ̤ô ô̌ tokhlǒnu, dǐǎdǐôpè̤̌ kòyò.” 12Pwa̤kwi ta̤kûta̤mṳ̂̌ tokhlǒ gǔ ju gû̌ lô̌khô anǎ̤ kû̌ shi dě a hè dǒ Khûyṳ̂ha a ô̌ dě a hè gwè̌ lû̌û kû̌, “Sara, pa tôbǎ ma̤hî̌tè?” e 13Dě a hî̌shěshǔ asî kû̌, “Kwi lô̌khô ta̤kûta̤mṳ̂̌ pô̤̌ kòyò nokwi sînu, kwilǒ tǎ̤ kòyò nokwi sî nu tǎ̤mǎ̤.” 14Kliphû̌ tokhlǒ gwèpô̤̌ lû̌û kû̌, “Palè? Pa tôbǎ ma̤hî̌tè?” Dě a hî̌shěshu asî kû̌, “Bǎ ǎbî̌ma̤nò kòyòru kòyòhta tô̤̌. Kè̌bî̌kè̌phô̌phô̌ tǎ̤ kòyò tôpwǎ̤꤮ tǎ̤mǎ̤. Sǎphlǒtô lô̌khô kû̌ khû̌kǎ dǒ sî nǐ̤bǎ nutokhlǒ.” 15Kòyò saprṳ̂ kè̌shu dě gènè̤ lô̌khô Khûyṳ̂ha kû̌, “Mî̌ Khrǐ dǒ Cǒmara rû̌htò̌ a dǒ a gǔ hè ma̤hǎplǎge kòyòhǎkhû̌phû̌ numî̌ a pwǎhò̌.” 16Pô̤̌nu akhû̌akhî Khûyṳ̂ha hî̌ asî pṳ̂̌꤮ tôpwa̤ kû̌, “He ju sî kû̌ shi, bǎbǎkǎlè kòyò dǒ a ta̤pô̤ta̤phǎ shû̌sho khlo he tôpwa̤nu a gǔ hè pě. He bôphlǔ bǎpwǎ a khò̌phěpli̤ pwǎnu he gwǎkû̌ a tô̤̌. A gǔ hè ju sî kû̌ Yôla Plò̌shǐ Běcǎ kû̌ mî̌ pě. ▼▼“mî̌” yô̤̌mûyô̤̌sǎ mî̌, ta̤cî̌htò̌ mî̌ amè̤mè̤, ta̤ma̤mṳ̂̌plî mî̌ amè̤mè̤.
17A hǒonu asô̌sô̌kû̌ kòyò tôpwa̤ dǒ a khǎbòkè bǔsû̌ kû̌ bǔshò̌ nu. A bǔshò̌ tokhlǒnu a gǔ gǎplǒ dǒ a phòkû pě, bǎbǎkǎlè bǔsû̌ tokhlǒnu a gǔ shû̌ukè kû̌ mî̌ dǒ a pǐ̤jò tôkhò̌꤮ tô̤̌ nutôphǎ akû pě.” 18Khûyṳ̂ha shôbǐǐlṳ̌ bǎ kòyò ta̤sǎlě̤we̤kè dǒ aklè̌aklò acǒcǒ dě a ǐkhû̌ǐǎ kòyò saprṳ̂ nutokhlǒ. 19Bǎbǎkǎlè Khwǐherû cû̌phî̌ sô̌ tûû̌ akhi Mǒ̤heròdǐ akhû̌akhî, Khûyṳ̂ha hî̌ lû̌û kû̌ a ma̤ta̤ numî̌ a sǔ. Htokhôtô̤̌ dǒ awǐkhanu mî̌ Khwǐherû ma̤ ta̤phû̌mò̤̌shǐhtô tokhlǒ akhû̌akhî, a bè̌pô̤̌ lû̌û ta̤sǔ kû̌ hǒonu. g 20Tǒ̤ hǒo htokhôtô̤̌, Khwǐherû ma̤ ta̤phû̌mò̤̌shǐhtô dû̌khlopô̤̌ ta̤tocǒ mî̌ adǒlò̤tě̤kè Khûyṳ̂ha dǒ apô̤kû nuhǒ. Khûyṳ̂ha ju bǎ Yeshǔ shi
(Matè̌ 3:13-14; Makǔ 1:9-11)
21Bǎ kòyò saprṳ̂ ju htobò anǎ̤ kû̌ shi akhanu, Běcǎ Yeshǔ ju gû̌ kòyò shi dǒ nô̌kò. Bǎ a kwicaba akhanu, mǒkhû̌ lûmô htò̌. 22Htodě Yôla Plò̌shǐ Běcǎ ma̤ anǎ̤ pô̤̌ htû̌lǐ̤ dě a hè lò̤ô̌ dǒ alô̤. Bǎnuakha alě̤pwe̤htò̌ dǒ mǒkhû̌ tômû dě a hî̌ kû̌, “Na mî̌ hephû̌pwa̤khû dǒ he mô̤ǐyǎ dě a ma̤mô̤ he sǎphlǒ tôpwa̤.” hYeshǔ akhlialè kòshî̌gutṳ̌ tokhlǒ
(Matè̌ 1:1-17)
23Bǎ Yeshǔ sahtò̌ sû̌ǐ kòyò akhanu, a ně phǔbe sushi hǒ. Kòyò gènè̤tò̤̌ lû̌û kû̌ Phayṳ̂tǎ aphû̌ pwǎ. Khûyṳ̂tǎ mî̌ Khûhelǐ aphû̌, 24Khûhelǐ aphamî̌ Khûmatǎ, Khûmatǎ aphamî̌ Khûle̤wǐ, Khûle̤wǐ aphamî̌ Khûmè̤lakhǐ, Khûmè̤lakhǐ aphamî̌ Khûyane̤, Khûyane̤ aphamî̌ Khûyṳ̂tǎ, 25Khûyṳ̂tǎ aphamî̌ Khûmǎtati, Khûmǎtati aphamî̌ Khûamṳ̂, Khûamṳ̂ aphamî̌ Khûna̤u, Khûna̤u aphamî̌ Khûesalǐ, Khûesalǐ apha mî̌ Khûna̤gè, 26Khûnagè̌ apha mî̌ Khûmatǎ, Khûmatǎ aphamî̌ Khûmǎtati, Khûmǎtati aphamî̌ Khûseme̤i, Khûseme̤i aphamî̌ Khûyûsǎ, Khûyûsǎ aphamî̌ Khûyǔda, 27Khûyǔda aphamî̌ Khûjûana, Khûjûana aphamî̌ Khûrěsa, Khûrěsa aphamî̌ Khûserǔbabelǎ, Khûserǔbabelǎ aphamî̌ Khûshalatiěla, Khûshalatiěla aphamî̌ Khûne̤rǐ, 28Khûne̤rǐ aphamî̌ Khûmè̤lakhǐ, Khûmè̤lakhǐ aphamî̌ Khûèdǐ, Khûèdǐ aphamî̌ Khûkûsama, Khûkûsama aphamî̌ Khûèlamada, Khûèlamada aphamî̌ Khûè̌ra, 29Khûè̌ra aphamî̌ Khûyṳ̂shǔ, Khûyṳ̂shǔ aphamî̌ Khûěliyasa, Khûěliyasa aphamî̌ Khûjûrima, Khûjûrima aphamî̌ Khûmatǎ, Khûmatǎ aphamî̌ Khûle̤wǐ, 30Khûle̤wǐ aphamî̌ Khûsumiû, Khûsumiû aphamî̌ Khûyǔda, Khûyǔda aphamî̌ Khûyṳ̂tǎ, Khûyṳ̂tǎ aphamî̌ Khûjûnǎ̤, Khûjûnǎ̤ aphamî̌ Khûeleyǎ̤kima, 31Khûeleyǎ̤kima aphamî̌ Khûmè̤̌lè̤̌ya, Khûmè̤̌lè̤̌ya aphamî̌ Khûmè̤̌na, Khûmè̤̌na aphamî̌ Khûma̤tǎ̤ta, Khûma̤tǎ̤ta aphamî̌ Khûna̤ta, Khûna̤ta aphamî̌ Khûdawi̤, 32Khûdawi̤ aphamî̌ Khûyeshè̌, Khûyeshè̌ aphamî̌ Khûò̌be, Khûò̌be aphamî̌ Khûbò̌sa, Khûbò̌sa aphamî̌ Khûsalǎ, Khûsalamû aphamî̌ Khûnashû, 33Khûnashû aphamî̌ Khûamǐnadǎ, Khûamǐnadǎ aphamî̌ Khûè̌dômǐ, Khûè̌dômǐ aphamî̌ Khûarani̤, Khûarani̤ aphamî̌ Khûhesarû, Khûhesarû aphamî̌ Khûpharè̌, Khûpharè̌ aphamî̌ Khûyǔda, 34Khûyǔda aphamî̌ Khûya̤kò, Khûya̤kò aphamî̌ KhûIsè̌, KhûIsè̌ apha mî̌ Khûabraha, Khûabraha aphamî̌ Khûterǎ, Khûterǎ apha mî̌ Khûnahû, 35Khûnahû aphamî̌ Khûsèrû, Khûsèrû aphamî̌ Khûrakò, Khûrakò aphamî̌ Khûphalè̌, Khûphalè̌ aphamî̌ Khûèbè̌ra, Khûèbè̌ra apha mî̌ Khûsalǎ, 36Khûsalǎ aphamî̌ Khûkěna, Khûkěna aphamî̌ Khûaraphasa, Khûarapha aphamî̌ Khûshemǎ, Khûshemǎ aphamî̌ Khûnṳ̂̌a, Khûnṳ̂̌a aphamî̌ Khûlamè̌, 37Khûlamè̌ aphamî̌ Khûmatǔshelǎ, Khûmatǔshelǎ aphamî̌ Khûěnò̌, Khûěnò̌ aphamî̌ Khûyarè̌, Khûyarè̌ aphamî̌ Khûmahalè̤le̤lǎ, Khûmahalè̤le̤lǎ aphamî̌ Khûkena, 38Khûkena aphamî̌ Khûěnṳ̂̌, Khûěnṳ̂̌ aphamî̌ Khûshetǎ, Khûshetǎ aphamî̌ Khûada mè̤̌hǒ Cǒmara aphû̌khû nutôpwa̤ hǒ.
Copyright information for
KxfSCKXF