Luke 5

Yeshǔ akhôphijǎ dǒ awǐlǒnu tokhlǒ

(Matè̌ 4:18-22; Makǔ 1:16-20)

1Tôni̤akha bǎ Yeshǔ ihtǒ ô̌ dǒ Gînesarè̌ shikoǒdû̌htu akhanu, kòyò tokhlǒ sǎyṳ ganǎ̤de lô̌khô Cǒmara alě̤ayô̤̌ dě a hè tidǐtòshò̌ ô̌wô̤̌ dǒ Yeshǔ a ô̌. ^a 2Yeshǔ kè̌shǐ sǒkhli dǒ kòyò ge bè̌ a dǒ shihtu ginǐ̤bǎ. Pwa̤maǎtò̤̌phû̌ tokhlǒ hǎhtò̌cû̌kè dǒ sǒkhlikû dě asî cû̌ cǔbò ǐtûû̌ lô̌khô atǐ̤. 3Yeshǔ cû̌htò̌nṳ̌ dǒ Khûshǐmṳ̂ a sǒkhlikû dě a no sǒcû̌ sǒkhli nu dǒ shiyô̤̌kû tîkî̌, htodě Yeshǔ hǎnòò̌lò̤ dǒ sǒkhlikû dě a sû̌ǐlò̤ kòyò saprṳ̂ nutokhlǒ.

4Bǎ asû̌ǐ htonu, a hî̌ Khûshǐmṳ̂ kû̌, “Khlònṳ̌yô̤̌ na sǒkhli dǒ shiyô̤̌nu. Pô̤̌khô sî gǔ pṳ̂̌nǐ̤ lô̌khô tò̤̌phû̌ ayanudě, jotě̤ lô̌khô sî tǐ̤ nutokhlǒ.”

5Khûshǐmṳ̂ hî̌shěshu yǎ kû̌, “Sara, pa jolò̤tě̤hto tanǎ̤mǒ̤shî̌ hǒ dě tò̤̌phû̌nǐ̤ tôbǎ tô̤̌, bǎbǎkǎlè pô̤̌ na hî̌nu he gǔ jolò̤tě̤ tǐ̤ pě.” ^b

6Asî jolò̤tě̤ tǐ̤ dě tò̤̌phû̌ nǐ̤ dû̌wî̤ pwǐtènu tǐ̤ glè̌ hǎgwekè tònò̤̌hǒ. ^c 7Pô̤̌nu akhû̌akhî, asî kaǎ pô̤̌ lô̌khô akhô ô̌ dǒ sǒkhlikû dǒ ashǔshawa̤ tôbǎ tokhlǒ gǔ hè ma̤jè̌ kû̌ asî. Akhô tokhlǒ hè ma̤jè̌ kû̌ asî dě a pṳ̂̌nṳ̌ lô̌khô tò̤̌phû̌ dǒ sǒkhlikû dě a be kû̌ sǒkhli ginǐ̤bǎ, dě tǒ̤dǒ sǒkhli ginǐ̤bǎ phǔlò̤cǔ kè nu.

8Bǎ Khûshǐmṳ̂ Petarǔ kè̌shǐ ta̤ma̤anǎ̤ pô̤̌o akha, a dô̌gînî̤û̌lò̤ dǒ Yeshǔ a khò̌pô̤̌kòshǐ dě a hî̌ kû̌, “Běcǎ, hǎhtò̌cû̌ tephekè kû̌ he, he mî̌ kòyò pwa̤ma̤sǔphû̌ pwǎ.” 9A kû̌ akhô dǒ a ô̌ kû̌ lû̌û tokhlǒ pṳ̂̌nǐ̤ dû̌wî̤ tò̤̌phû̌ akhû̌akhî, asî ǒò̌ kiti̤kaa bò lô̌khô. 10Pwa̤ma̤wô̤̌wô̤̌ kû̌ Khûshǐmṳ̂ ta̤ tokhlǒmî̌ Phasebedè̌ aphû̌khû, Khûya̤kû kû̌ Khûyṳ̂ha pwǎ. Asî mî̌mî̌ a ǒò̌ kiti̤kaa gû̌ lû̌û.

Yeshǔ hî̌ Khûshǐmṳ̂ kû̌, “Ǐsha tǎ̤mǎ̤, sahtò̌ khò̌tôni̤ tǒ̤ahèpě, na gǔ htû kòyò dǒ a cû̌kaǎhè kòyò dǒ Cǒmara a ô̌ sô̌sô̌kû̌ na pṳ̂̌tò̤̌phû̌ nu pě.” 11Asî bè̌kè sǒkhli dǒ shihtu dě, bè̌kè bò ta̤ dǒ a ô̌ kû̌ asî nutokhlǒ htodě asî gû̌kû̌ Yeshǔ akò. Dě asî htûhtò̌ Běcǎ Yeshǔ Khrǐ akhôphijǎ tokhlǒ.

Yeshǔ ma̤hǎmǎbǎ kòyòpha akrôǎ tôpwa̤

(Matè̌ 8:1-4; Makǔ 1:40-45)

12Tôplǎnu bǎ Yeshǔ ô̌ dǒ wî̤̌tîwî̤̌ akhanu, pwa̤ akrôǎ ô̌ bělô̤ tôpwa̤. Bǎ a kè̌shǐ Yeshǔ akhanu, a dô̌gînî̤lò̤ dǒ Yeshǔ a khò̌pô̤̌kòshǐ, dě a kwisǎyṳ lû̌û kû̌, “Běcǎ, na kè̌ sǎphlǒô̌ ma̤hǎmǎbǎ he ta̤sha numî̌ na ma̤bǎ jò pwǎ.”

13Yeshǔ yṳ̂̌hè acǔde dě a tô̌bǎ lû̌û dě a hî̌ lû̌û kû̌, “He sǎphlǒô̌ pwǎ,” a hî̌ htodě “Ta̤sha! hǎmǎkèmò̌,” a hî̌ pô̤̌ pô̤̌nu, dě taplǎnô̤̌ ta̤sha hǎmǎkè pwǎ.

14Yeshǔ mǎnǎ lû̌û ayô̤̌ kû̌, “Shôbǐǐlṳ̌ bǎ tǎ̤ kòyò tôpwǎ̤ tǎ̤mǎ̤ nî̌꤮. Cû̌ dǔlè̌lṳ̌ nanǎ̤ dǒ pwa̤shû̌gǎ nutôpwa̤ a ô̌ nu nî̌꤮. Htodě na ta̤sha hǎmǎkènu, pô̤̌khô a gǔ htûhtò̌ ta̤khòlṳ̌ dǒ kòyò pṳ̂̌꤮ tôpwa̤ a lô̤mô̤̌ nudě lṳhtò̌pû ta̤lṳta̤tòhtò̌ pô̤̌ Khûmṳ̂shě a ta̤mǎlò̤ ô̌nu nî̌꤮.” ^d

15A nohî̌lṳ̌ bǎ kû̌ kòyò tôpwǎ̤꤮ tô̤̌ bǎbǎkǎlè Běcǎ Yeshǔ awe̤akè nî̌, kòyò lî̤̌꤮ shôbǐǐ lṳ̌peshecû̌ yî̤khlo kû̌ a gûlǎ̤lî̤ nu hǒ, dě kòyò tokhlǒ sǎyṳ ganǎ̤de lô̌khô a ta̤hî̌bǎ, htodě a sǎyṳ nohè ma̤hǎmǎ lô̌khô a ta̤shǐta̤sha dě a hèjûgrû dǒ lû̌ûô̌. 16Bǎbǎkǎlè Yeshǔ hǎhtò̌cû̌ sǎlalakè dǒ gǎshashigǎ lǒ̤seměkhû̌ dě cû̌ kwicaba bǎnu.

Yeshǔ ma̤hǎmǎbǎ kòyò sitôkô̌ke

(Matè̌ 9:1-8; Makǔ 2:1-12)

17Tôni̤akha bǎ Yeshǔ sû̌ǐtòwòǐlò̤ kòyò akhanu, Pharishè̌phû̌ tokhlǒ kû̌ pwa̤sû̌ǐ ta̤sû̌ta̤tòwò asara tokhlǒ hǎnòò̌ ô̌ lô̌khô bǎnu. Asî numî̌ a ô̌ bò lô̌khô, do ô̌ dǒ Galilè̤̌gǎkû kû̌ dǒ Yǔda gǎkû nutokhlǒ kû̌ dǒ Wî̤̌yarǔshôle akû hè. Pô̤̌khô Yeshǔ gǔ ma̤hǎmǎ bǎ kòyòshǐkòyòsha tokhlǒnudě Běcǎ Cǒmara a ta̤pô̤ta̤phǎ ô̌cu kû̌ lû̌û. 18Kòyò tokhlǒ ò̌hènṳ̌ kòyònǎ̤ si tôkô̌ke tôpwa̤, dě asî ò̌hè sada kû̌ lǎ̤da. Dě pô̤̌khô a gǔ dò̌lò̤nǐ̤ lû̌û dǒ Yeshǔ alô̤mô̤̌ nudě, a jî̌pwǐ̤ jonṳ̌ lû̌û dǒ hǐdǒkû. 19Bǎbǎkǎlè kòyò ô̌dû̌ tûlû̌shû̌lě akhû̌akhî, asî ò̌nṳ̌ jò petô̤̌. Pô̤̌nudě asî ò̌ htò̌ lû̌û dǒ hǐgukhû̌ tadǎkhû̌ dě htò̌ma̤phlô lô̌khô hǐgukhû̌ dě jèlò̤tě̤ sada lǎ̤da dǒ kòyò tûprṳ̂taphǎ aklǎmakû bǎ Yeshǔ alô̤mô̤̌nu.

20Bǎ Yeshǔ kè̌shǐ asî a ta̤yṳ̌ta̤nǎ̤ akhanu, a hî̌ kòyòsha nutôpwa̤ kû̌, “Khòmò̤̌꤮ he plûkè na ta̤sǔta̤plě tokhlǒ hǒ.”

21Pwa̤sû̌ǐ ta̤sû̌ta̤tòwò asara tokhlǒ kû̌ Pharishè̌phû̌ tokhlǒ hî̌bǎ kè̌khîlû̌û kû̌, “Kòyò hǒtôpwa̤ hî̌bǎsǔ Cǒmara hǒ. Mò̌pè tôpwa̤ gǔ plûkè jò ta̤sǔ ya? Pwa̤ plûkè jò ta̤sǔ mî̌ Cǒmara tôpwa̤pwǎ̤꤮ nô̤̌ pwǎ.”

22Yeshǔ sî̌ganǎ̤ asî hî̌bǎ kè̌khîlû̌û nutokhlǒ dě a gwè̌ asî kû̌, “Sî cû̌gènè̤ tǒ̤ lô̌khô dǒ sî sǎphlǒkû pô̤̌numî̌ ma̤titè? 23Kè̌ hî̌ kû̌, ‘plûkè na ta̤sǔta̤plě hǒ,’ mè̤̌tô̤̌dě ‘ihtǒ dě cû̌mò̌,’ kè̌ hî̌mò̌kû̌ bǎtè tocǒ ayûkhlo? 24Bǎbǎkǎlè Kòyòphû̌khû mî̌ he, pô̤̌khô sî gǔ sî̌ganǎ̤ lô̌khô kû̌, dǒ hǎkhû̌nu, he ô̌ kû̌ ta̤siwi̤sòwò̤ dǒ he plûkèbǎ kòyò ta̤sǔta̤plě tokhlǒnudě, he gǔ dǔlè̌lṳ̌ bǎ sî,” a hî̌hto pô̤̌nu dě a hî̌ kòyò sitôkô̌ke nutôpwa̤ kû̌, “He hî̌ na, ihtǒ tûlûnṳ̌ na khlô̌lǎ̤da nudě gemò̌ dǒ na hǐnu.” 25Tôplǎnô̤̌ kòyòpha nutôpwa̤ ihtǒ tûlûnṳ̌ a khlô̌lǎ̤da dǒ kòyò tûprṳ̂taphǎ alô̤mô̤̌ dě hǎhtò̌gekè dǒ ahǐ dě a htû̌sò̌htò̌ Cǒmara. 26Kòyò ǒò̌ kiti̤kaabò pṳ̂̌꤮ tôpwa̤. Dě asî htû̌sò̌htò̌ lô̌khô Cǒmara dě a hî̌ lô̌khô kû̌, “Hǒtôni̤, pa kè̌shǐ ta̤cô̌klǐcô̌sè tokhlǒ hǒ!”

Yeshǔ kaǎ Khûle̤wǐ

(Matè̌ 9:9-13; Makǔ 2:13-17)

27A ma̤hto pô̤̌nu dě, Yeshǔ hǎhtò̌cû̌kè, dě a cû̌kè̌shǐ kû̌ pwa̤kwita̤kûta̤mṳ̂̌ tôpwa̤ dǒ ami̤ kû̌ Khûle̤wǐ. Dě a hǎnòò̌ ô̌ dǒ lǎ̤kwi ta̤kûta̤mṳ̂̌ hǐkû. Dě Yeshǔ hî̌ lû̌û kû̌, “Gû̌kû̌ hekò dě htû he khôphijǎ.” 28Khûle̤wǐ bè̌kèbò ta̤ pṳ̂̌꤮ tocǒ dě a ihtǒ gû̌cû̌kû̌ Yeshǔ akò.

29Hǒtaplǎdě, Khûle̤wǐ ma̤nǐ̤ pwèdû̌ tôpwè dǒ ahǐ, dě a ma̤bǎ Yeshǔ aya. Dě a mǎhènǐ̤ asû̌akhô dǒ a kwi ta̤kûta̤mṳ̂̌ tokhlǒ kû̌ shǐpwǎ̤shǐmè̤ dǒ ashǔshawa̤ tokhlǒ, dě a hèǎplṳ̂ǎphǎbò kû̌ lû̌û. 30Pharishè̌phû̌ tokhlǒ kû̌ pwa̤sû̌ǐ ta̤sû̌ta̤tòwò asara sî aprṳ̂ kla tokhlǒkhlǒ bè̌bò ta̤sǔ dǒ Běcǎ Yeshǔ akhôphijǎ tokhlǒ akhû̌ dě a hî̌ kû̌, “Sî cû̌ ǎcuôcu kû̌ pwa̤kwi ta̤kûta̤mṳ̂̌ tokhlǒ kû̌ pwa̤ma̤sǔphû̌ nutokhlǒ ma̤titè?” Asî gwè̌ lô̌khô pô̤̌nu. ^e

31Yeshǔ hî̌shěshu asî kû̌, “Kòyò dǒ a ô̌shû̌ô̌mô̤ tokhlǒnu, a lǎ̤lṳ̂ bǎ ta̤khû̌saradû̌ tô̤̌. Kòyò dǒ ashǐasha tokhlǒnu mî̌ a lǎ̤lṳ̂bǎ nò ta̤khû̌saradû̌ pwǎ. 32He hè kaǎge kòyò dǒ acǒatè̤ nutokhlǒ mè̤̌tô̤̌. Pô̤̌khô pwa̤ma̤sǔphû̌ tokhlǒ gǔ yò̤lǎ̤plǎdî̌ lô̌khô asǎphlǒ nudě, he hè kaǎge asî pwǎ.”

Kòyò gwè̌ ta̤dǔǎshǎ awe̤akè

(Matè̌ 9:14-17; Makǔ 2:18-22)

33Pharishè̌phû̌ tokhlǒ kû̌ pwa̤sû̌ǐ ta̤sû̌ta̤tòwò asara tokhlǒ hî̌ Yeshǔ kû̌, “Khûyṳ̂ha akhôphijǎ tokhlǒ kû̌ Pharishè̌phû̌ akhôphijǎ tokhlǒ dǔǎ shǎǎshǎô dě kwicaba taga bǎbǎkǎlè nakhôphijǎ tokhlǒdě a dǔǎdǔô gû̌ kòyò tô̤̌ ya.”

34Běcǎ Yeshǔ hî̌shěshu asî kû̌ yô̤̌sǎkhěkhô̌ tômû dě a hî̌ kû̌, “Bǎ khòmò̤̌phû̌khû ô̌cu pe kû̌ akhô shǐpwǎ̤shǐmè̤ akhanu, kòyò no dǔǎdǔô mò̌ shǐpwǎ̤shǐmè̤ tokhlǒ mî̌ anǐ̤jò ya? 35Tôni̤ni̤ pěnu kòyò gǔ kaǎcû̌ tephekè khòmò̤̌phû̌khû pě. Bǎnuakha pědě asî gǔ dǔǎdǔô lô̌khô pě.”

36Yeshǔ hî̌ bǎ pô̤̌ asî kû̌ yô̤̌sǎkhěkhô̌ tôtô̤̌ dě a hî̌ kû̌, “Kòyò cî̌hǎyè̌ jesa dě kòyò shò̌phǎdǎ kû̌ jeyò̤̌ nu a ô̌ tôpwǎ̤ tô̤̌. Kè̌ ma̤pô̤̌nu hî̌dě jesanu a gǔ hǎyè̌kè pě, htokhôtô̤̌ hugò̌pwǐsa kû̌ hugò̌pwǐyò̤̌ nu agwǎatô pe lû̌û tô̤̌. 37Kòyò tènṳ̌ sîpî̌ shisî̌yô̤̌sa dǒ shiôkobě ali̤kûnu a ô̌ tôpwǎ̤ tô̤̌. Kòyò kè̌ tènṳ̌ pô̤̌nu hî̌dě shisî̌yô̤̌ sa nî̌ a glè̌ kôphô̌htò̌ shiôkobě ali̤ tômè pě, dě shisî̌yô̤̌ gǔ lò̤gǔlò̤wṳ̂̌kèbò pě, dě shiko gǔ hǎphò̌kè pě. 38Kòyò tôbǎ tènṳ̌ pwǎ shisî̌yô̤̌ sa dǒ shiôkoběsa akû pwǎ. 39Htodě kòyò dǒ a ô bǎ hto shisî̌yô̤̌ alî̤ tokhlǒnu a sǎyṳ ô pe shisî̌yô̤̌ sa tôpwǎ̤ tô̤̌. ‘Shisǐyô̤̌ alî̤ nî̌ a wǐkhlo kû̌ asa,’ a hî̌ bǎ asî pô̤̌nu.”