Luk 23:27-42 | KxfSCKXF | STEP | Kòyò gû̌cû̌plṳ̂ gû̌cû̌phǎ gû̌bò Yeshǔ akò, dě dǒ kòyò aklanu, pwa̤mǒ̤ dǒ a sǎplǎ̤nǎ̤bǎ tokhlǒnu, a ô̌pa bǎnu, dě a hǎsihǎô̌ lô̌khô.

Luke 23:27-42

27 Kòyò gû̌cû̌plṳ̂ gû̌cû̌phǎ gû̌bò Yeshǔ akò, dě dǒ kòyò aklanu, pwa̤mǒ̤ dǒ a sǎplǎ̤nǎ̤bǎ tokhlǒnu, a ô̌pa bǎnu, dě a hǎsihǎô̌ lô̌khô. 28 Yeshǔ htû̌ti̤wǐ̤cû̌ tô asî dě a hî̌cû̌ asî kû̌, “Wî̤̌yarǔshôle phû̌pwa̤mǒ̤ sî꤮, hǎ tǎ̤ heya tǎ̤mǎ̤, hǎǐ tûû̌ lô̌khô dǒ sîya kû̌ sîphû̌sîli̤ tokhlǒ ayanu. 29 Ma̤titè̌hî̌dě, ta̤jî̌ta̤jû̌ alṳmṳ̌ni̤ lṳmṳ̌sa tokhlǒ glè̌ hètǒ̤ pě dě kòyò glè̌ hî̌ lô̌khô kû̌, ‘pwa̤mǒ̤shôdôphû̌ kû̌ pwa̤mǒ̤ dǒ aphû̌ ô̌nô̌ kû̌ lô̌khô tôpwa̤ tô̤̌, kû̌ pwa̤mǒ̤ dǒ a dǐûnû̌ bǎ phijǎ taplǎ tô̤̌ tokhlǒ glè̌ nǐ̤bǎ ta̤ǐshowî̤ pě!’ kòyò glè̌ hî̌ lô̌khô pô̤̌ hǒo pě. 30 Bǎnukhapě

‘Kòyò glè̌ hî̌ lô̌khô khôlô tokhlǒ pě kû̌, “Lò̤tě̤pro dǒ pakhû̌bǒo!” htotô̤̌ a glè̌ hî̌ lô̌khô khôlôphû̌ tokhlǒ kû̌, “Ô̌ tûdûbǐ pa nî̌꤮!”’ ^a 31 He dǒ asô̌sô̌kû̌ sǒsǐso nu, asî kè̌ ma̤jî̌ma̤jû̌ he pô̤̌o kè̌hî̌dě, kòyò dǒ ashǔshawa̤ dǒ a sô̌sô̌ lô̌khô pwǎ kû̌ sǒkhwe tokhlǒnu, asî glè̌ ma̤jî̌ma̤jû̌khlo pěpě.”

32 Asî cî̌cû̌ kòyò sò̌ginǐ̤ dǒ a ma̤sǔ shigǎ a ta̤sû̌ta̤tòwò dǒ a glè̌ ma̤si htò̌ kû̌ Yeshǔ nu. 33 Asî cû̌tǒ̤ dǒ gûlǎ̤ tûkû dǒ kòyò kaǎyǎ kû̌, ikǒkhwǐ gûlǎ̤ nu. Htodě asî htǎsihtò̌ kòyò sò̌ginǐ̤ dǒ a ma̤sǔ shigǎ a ta̤mǎlò̤ kû̌ Yeshǔ dǒ a nò̌dò̌htǔlô̤. Tôpwa̤ dě a htǎsihtò̌ lû̌û dǒ Yeshǔ cǔtômû tôkhô, tôpwa̤ dě a ma̤si htò̌ lû̌û dǒ cǔcôcî̌ tôkhô. 34 Yeshǔ hî̌ kû̌, “Pha꤮, plûkè asî ta̤sǔ nî̌꤮, ma̤titè̌hî̌dě asî ma̤ta̤ pô̤̌nu, a sî̌ya khôtô̤̌.” Dě kliphû̌ tokhlǒ bèpè̤̌ lû̌û kû̌ Yeshǔ je nudě asî bǒ lô̌khô ta̤bèbwǐ tacǒ dǒ je dǒ alò̤tě̤tô bǎtè tôpwa̤ tô phî̌ bǎtè tôpwa̤ tô phî̌ pô̤̌nupwǎ. ^b

35 Kòyò tokhlǒ ihtǒ kè̌ lô̌khô pepwǎ bǎnu akha, kòyò dǒ a htû ikǒlǒkò tokhlǒ pijî̌ǐsho ma̤yǒma̤lè sǎyǎ̤ lô̌khô Yeshǔ, dě a hî̌ takǎ lô̌khô kû̌, “A mî̌ a ma̤hǎplǎ jò pwǎ tû̌ kòyò nî. A kè̌ mè̤̌mî̌ca Khrǐ dǒ Cǒmara rû̌htò̌ a nutôpwa̤ kè̌hî̌dě, noma̤hǎplǎkè tû̌ mò̌ anǎ̤nu tǎ.” ^c

36 Kliphû̌ nutokhlǒ bǎbǎ, a ma̤yǒma̤lè bò lû̌û. Asî cû̌ dǒ Yeshǔ a ô̌ dě a cû̌dǐô lû̌û shisî̌yô̤̌shî̌. ^d 37 Dě asî hî̌ lû̌û kû̌, “Na kè̌ mè̤̌mî̌ca Yǔdaphû̌ tokhlǒ akhwǐ kè̌hî̌dě ma̤hǎplǎkè tû̌ mò̌ nanǎ̤ ta.”

38 Dǒ a ikǒkhû̌nu, kòyò wě̤htò̌ kû̌, “A mî̌ Yǔdaphû̌ tokhlǒ akhwǐ.”

39 Kòyò dǒ a ma̤sǔ shigǎ a ta̤sû̌ǐtòwòǐ dě kòyò ma̤sihtò̌ pa lû̌û kû̌ Yeshǔ sò̌ginǐ̤ akla tôpwa̤ nu a pîjî̌ǐsho Yeshǔ kû̌, “Na mî̌ Khrǐ mè̤̌tô̤̌ ya? Ma̤hǎplǎkè tû̌ mò̌ nanǎ̤nu, dě ma̤hǎplǎkè pa dô̌ pa!”

40 Bǎbǎkǎlè kòyò ma̤sǔ shigǎ a ta̤mǎlò̤ dǒ ashǔshawǎ̤ tôpwa̤ sǎhtǎ lû̌û dě a hî̌ lû̌û kû̌, “Na ǐsha Cǒmara tô̤̌ ya? Na mî̌ na khòbǎ ta̤cî̌htò̌ sô̌sô̌sî lû̌û nî. 41 Pa hǒsò̌ginǐ̤ khòbǎ ta̤cî̌htò̌ pô̤̌ ma̤sǔhto nutokhlǒ akhû̌akhî, atôabǎ pwǎ. Bǎbǎkǎlè a nu, a ma̤sǔ ta̤ tocǒ꤮ tô̤̌.”

42 Htodě a hî̌ Yeshǔ kû̌, “Ǒ꤮ Yeshǔ꤮, bǎ na hèpǒ pô̤̌ Khwǐ tôpwa̤ akhanu, gènè̤htò̌bǎ pûdô̌ he pě nî̌꤮.”