Mar 1 | KxfSCKXF | STEP | Hǒomî̌ ta̤sǎlě̤we̤kè akòshî̌ dǒ a shôbǐǐlṳ̌ bǎ Cǒmara aphû̌khû Yeshǔ Khrǐ awe̤akè.

Mark 1

Pwa̤jushi Khûyṳ̂ha tîwî̌tòwò wǐ klè̌

(Matè̌ 3:1-12; Lǔka 3:1-18; Yṳ̂ha 1:19-28)

1 Hǒomî̌ ta̤sǎlě̤we̤kè akòshî̌ dǒ a shôbǐǐlṳ̌ bǎ Cǒmara aphû̌khû Yeshǔ Khrǐ awe̤akè. 2 Ta̤sǎlě̤we̤kènu kòyò wě̤ nǎ a dǒ piwi̤pèshè Khûyashǎya alî̤kû, dě Cǒmara hî̌ kû̌,

“Kè̌mò̌, a mî̌ pwa̤sû bǎ he ta̤we̤ta̤kè tôpwa̤hǒ, pô̤̌khô a gǔ ma̤lîma̤bò nǎ wǐ bǎ naklè̌ lǎ̤hè ayanudě, he nohè wǐ a dǒ nalô̤mô̤̌ hǒ, ^a 3 Kòyò tôpwa̤ yî̤̌gǔhtò̌ dǒ gǎshashigǎ lǒ̤seměkhû̌ dě a hî̌ kû̌, ‘tîwî̌tòwò nǎ lô̌khô klè̌ dǒ Běcǎ aya. Ma̤cǒma̤nò̤ lô̌khô Běcǎ lǎ̤hèklè̌ aya tôbô nî̌꤮.’” ^b

4 Dě pwa̤ shôbǐǐ bǎ kòyò ta̤we̤ta̤kè tôpwa̤nu a hè htohǒ. A mî̌ pwa̤jushi Khûyṳ̂ha nu hǒ. A hǎhtò̌cû̌ dǒ gǎshashigǎ lǒ̤seměkhû̌ dě a shôbǐǐlṳ̌ ^{▼▼kòyò tokhlǒkhlǒ nu ahî̌ kû̌ “dǒhtû̌ǐ”} bǎ kòyò kû̌ yò̤lǎ̤plǎdî̌ lô̌khô sîsǎphlǒ dě ju lô̌khô sînǎ̤ kû̌ shi dě Cǒmara plûkè bǎ sî ta̤sǔ nutokhlǒ pě. 5 Kòyò ô̌ bǎ Yǔda gǎkû nutokhlǒ kû̌ Wî̤̌yarǔshôle akû nutokhlǒ hèdû̌wî̤ dǒ Khûyṳ̂ha a ô̌ dě asî hè olò̤wǎ̤lò̤ lô̌khô ata̤sǔ tokhlǒ dě Khûyṳ̂ha ju bǎ asî shi dǒ Jòda shilô̤̌mǒ̤kû. 6 Khûyṳ̂ha kûsô̌htò̌nṳ̌ jejû dǒ kòyò bǒ kû̌ tîsî̌budû̌ ashû̌, dě a è̌mě sèwò̤̌ sǎto̤phě. Dě a ǎpwǎ dèpǒ̤ kû̌ wè̌khû̌shi. ^d 7 Dě a shôbǐǐlṳ̌ bǎ kòyò dě a hî̌ kû̌, “Kòyò gǔ hè dǒ henô̌kò pě tôpwa̤ numî̌, a ta̤pô̤ta̤phǎ shû̌sho khlo kû̌ he pě. He pǒ̤jogo bôphlǔ bǎ pwǎ a khò̌phěpli̤ pwǎnu he gwǎ kû̌ a tô̤̌. 8 He ju sî kû̌ shi bǎbǎkǎlè a gǔ ju sî kû̌ Yôla Plò̌shǐ Běcǎ pě,” Khûyṳ̂ha hî̌ pô̤̌nu.

Yeshǔ ju anǎ̤ kû̌ shi awe̤akè kû̌ ta̤tili̤tôlô̌ awe̤akè

(Matè̌ 3:13-17; Lǔka 3:21-22)

9 Bǎ Khûyṳ̂ha ju bǎ kòyò tokhlǒ kû̌ shi akhanu, Yeshǔ ô̌ dǒ Wî̤̌na̤sôrè̤̌ Galilè̤̌gǎ dě a hè dǒ Jòda shilô̤̌mǒ̤ bǎ Khûyṳ̂ha ô̌ dě Khûyṳ̂ha ju bǎ lû̌ûshi dǒ Jòda shilô̤̌kû. 10 Bǎ a ô̌ dǒ shilǎ̤ dě a ihtǒhtǒ kû̌ a kè̌shǐ mǒkhû̌ lûmôkè dě Yôla Plò̌shǐ Běcǎ dǒ asô̌sô̌kû̌ htû̌lǐ̤ nu a hèlò̤ dǒ lû̌lô̤. 11 Dě Cǒmara ô̌ dǒ mǒkhû̌, dě a hî̌bǎlò̤ lû̌ kû̌, “Na mî̌ hephû̌pwa̤khû dǒ he mô̤ǐyǎ dě a ma̤mô̤ he sǎphlǒ tôpwa̤,” a hî̌ pô̤̌nu. ^e

(Matè̌ 4:1-11; Lǔka 4:1-13)

12 A hî̌hto pô̤̌nu kû̌, tôplǎnô̤̌ Yôla Plò̌shǐ Běcǎ sûcû̌ lû̌û dǒ lǒ̤mî̌shô̌kla. 13 Yeshǔ ô̌ bǎ lǒ̤mî̌shô̌kla nu asalǐ̤shi, dě ani̤lǐ̤shi akûnu, hǎkhû̌tana hè tili̤tôlô̌ lû̌û. Yeshǔ ô̌plǒ kû̌ ta̤phû̌ta̤wè̤, ta̤mi̤ta̤mò̤̌ tokhlǒ bǎnu, dě mǒkhû̌ tanaphû̌ tokhlǒ hè kè̌ǐ ma̤ǐ yǎ.

Běcǎ Yeshǔ akhôphijǎ dǒ a kaǎ wǐlǒ nutokhlǒ

(Matè̌ 4:12-17; Lǔka 4:14-15)

14 Bǎ kòyò pṳ̂̌ dǒlò̤tě̤ Khûyṳ̂ha dǒ apô̤kû akhanu, Yeshǔ cû̌ dǒ Galilè̤̌gǎ dě a shôbǐǐlṳ̌ bǎ kòyò kû̌ Cǒmara a ta̤sǎlě̤we̤kè bǎnu. 15 Dě a hî̌ kû̌, “Ta̤shěta̤khǎ hètǒ̤hǒ. Cǒmara ashiagǎ phǔhtò̌hǒ dě yò̤lǎ̤plǎdî̌ lô̌khô sîsǎphlǒ dě yṳ̌ǎ mò̌ lô̌khô ta̤sǎlě̤we̤kè nu.” ^f

(Matè̌ 4:18-22; Lǔka 5:1-11)

16 Htodě Yeshǔ cû̌ dǒ Galilè̤̌ shikoǒdû̌htu dě a cû̌kè̌shǐ Khûshǐmṳ̂ kû̌ apṳ̌ Khûîdru. Dě bǎnuakha asî shěǎtò̤̌phû̌ kû̌ tǐ̤ dǒ shikoǒdû̌kû, ma̤titè̌hî̌dě a pṳ̂̌ǎpwǎ lô̌khô ahǔphushǎ kû̌ tò̤̌phû̌ pwǎ. 17 Dě Yeshǔ hî̌ asî kû̌, “Cû̌ gû̌ kû̌ hekò. He gǔ sû̌ǐtòwòǐ sî pô̤̌khô sî gǔ kaǎnǔ kòyò pô̤̌ sî pṳ̂̌ǎnṳ̌ tò̤̌phû̌nu.” 18 Dě tôplǎnô̤̌ asî bè̌kè a tǐ̤ ^{▼▼Gǎ tôhtô kaǎ kû̌ ji} dě a gû̌kû̌ Yeshǔ kò.

19 Dě Yeshǔ cû̌ sělě pô̤̌ dǒ alô̤mô̤̌ tîkî̌phû̌ dě a kè̌shǐ Phasebedè̌ aphû̌khû Khûya̤kû kû̌ apṳ̌ Khûyṳ̂ha shò̌bǐma̤wô̌ ǐ lô̌khô a tǐ̤ dǒ sǒkhlikû. 20 Yeshǔ kè̌shǐshǐ kû̌ a kaǎ asî dě asî hǎhtò̌cû̌ kû̌ Yeshǔ kò. Dě apha Sebedè̌ kû̌ pwa̤ma̤dakǎǎ tokhlǒ ô̌kè tûû̌ lô̌khô bǎ a sǒkhlikû nupwǎ.

Yeshǔ wṳ̂̌hǎhtò̌pè̤̌kè khînǎkhîno ô̌ dǒ kòyòlô̤

(Lǔka 4:31-37)

21 Htodě Yeshǔ kû̌ akhôphijǎ tokhlǒ cû̌tǒ̤ dǒ Wî̤̌kaperanò̤ dě bǎ Yǔdaphû̌ lṳmṳ̌dǔ tini̤nu, a cû̌nṳ̌ dǒ ta̤cabahǐkû dě a cû̌nṳ̌ sû̌ǐtòwòǐ bǎ kòyò bǎnu. 22 Dě kòyò tokhlǒ ǒò̌ kiti̤kaa bò Yeshǔ a ta̤sû̌ǐtòwòǐ nutokhlǒ. A sû̌ǐtòwò sô̌sô̌kû̌ kòyò dǒ a ô̌ kû̌ a ta̤siwi̤sòwò̤ nutokhlǒ sû̌ǐ nutô̤̌ a sû̌ǐ khô̌ kû̌ pwa̤sû̌ǐ ta̤sû̌ta̤tòwò asara nutokhlǒ. ^h 23 Bǎnukha kòyòpha dǒ khînǎ ma̤bǎ yǎ tôpwa̤nu, a hènṳ̌ sumṳ̌htò̌ dǒ ta̤cabahǐkû. 24 Dě a yî̤̌gǔhtò̌ kû̌, “Ǒ Wî̤̌na̤sôrè̤̌phû̌ Yeshǔ, na sǎyṳ ma̤ pa hî̌tè? Na glè̌ hè ma̤pî̌ma̤lṳ̂̌ ma̤si mè̤mè̤̌ kèbò pa pěya? Na mî̌ mò̌pè numî̌ he sî̌ya pwǎ, na mî̌ Cǒmara aphû̌khû plò̌shǐ tôpwa̤.”

25 Bǎbǎkǎlè Yeshǔ sǎhtǎ shěshǔ khînǎkhîno kû̌, “Sǔtukǔ ô̌ mò̌ lô̌khô, hǎhtò̌kèmò̌ dǒ kòyòpha nutôpwa̤ akûnu.” 26 Dě khînǎkhîno ô̌ dǒ pwa̤khû tôpwa̤ akû tôdo nî̌ a yî̤̌kǒyî̤̌sa cî̌tî̤gî̌tugu dě a hǎhtò̌cû̌kè dǒ pwa̤khû nutôpwa̤ akû.

27 Kòyò lǒ̤bò ô̌bǎ ta̤cabahǐkû nutokhlǒ ǒò̌ kiti̤kaa bòkè dě a hî̌ ǐtû̌ kè̌khî lû̌û kû̌, “Hǒomî̌ titèya? Hǒomî̌ ta̤sû̌ǐtòwòǐ asa ya? Asô̌sô̌kû̌ a ô̌ kû̌ a ta̤siwi̤sòwò̤dû̌ nu. A hî̌bǎhtò̌ pwǎ ayô̤̌ kû̌ a wṳ̂̌htò̌cû̌kè khînǎkhîno phû̌mò̤̌ tokhlǒ pwǎ dě a ganǎ̤de jò̌꤮ lû̌ûyô̤̌,” asî hî̌ pô̤̌nu. 28 Hǒtaplǎdě Yeshǔ awe̤akè mi̤lṳ̌hǔsǎ cû̌phwè bò dǒ Galilè̤̌gǎ kû nu pṳ̂̌꤮ tûkû.

Yeshǔ ma̤hǎmǎ dû̌wî̤ bǎ kòyò ta̤shǐta̤sha

(Matè̌ 8:14-17; Lǔka 7:38-41)

29 Tôplǎnô̤̌ Yeshǔ kû̌ akhôphijǎ tokhlǒ hǎhtò̌cû̌kè dǒ ta̤cabahǐkûnu htodě asî hǎhtò̌cû̌ lô̌khô dǒ Khûshǐmṳ̂ kû̌ Khûîdru ahǐ. Khûya̤kû kû̌ Khûyṳ̂ha cû̌ kû̌ asî. 30 Bǎnu akha Khûshǐmṳ̂ a mipwǎ̤pwa̤mǒ̤ shǐshanǎ̤gû̌ dě hǎmôô̌ pwǎ dǒ lǎ̤mi̤kû pwǎ. Dě taplǎnô̤̌ asî shôbǐǐlṳ̌ kû̌ Yeshǔ. 31 Ma̤hî̌nudě Yeshǔ cû̌ dǒ lû̌ô̌ dě a cû̌pṳ̂̌ lû̌cǔde dě a cî̌ihtǒ lû̌û. Dě a ta̤sha hǎmǎkè dě a ihtǒ ma̤ǎma̤ô bǎ asî lǎ̤ǎ.

32 Bǎ lṳmṳ̌hǎlò̤ akhanu, kòyò bǎnu tokhlǒ kaǎhèǐ kòyò dǒ ashǐasha tokhlǒ kû̌ khînǎkhîno dò̌ yǎ nutokhlǒ dǒ Yeshǔ a ô̌. 33 Wî̤̌kûphû̌ pṳ̂̌dǐpṳ̂̌pwa̤ hè ô̌cuô̌plǒ bò lô̌khô dǒ takha kòshî̌. 34 Htodě ta̤shǐta̤sha titètè̌꤮ bǎbǎ Yeshǔ ma̤hǎmǎ jò bò. Dě a ma̤hǎmǎbǎ dû̌wî̤ kòyò tokhlǒ a ta̤shǐta̤sha dě a wṳ̂̌hǎhtò̌pè̤̌kè dû̌wî̤ khînǎkhîno tokhlǒ, bǎbǎkǎlè Yeshǔ mî̌ mò̌pènu khînǎkhîno tokhlǒ sî̌ya akhû̌akhî, Yeshǔ nohî̌bǎ asî tômû̌꤮ tô̤̌.

Yeshǔ hǎhtò̌cû̌ caba

35 Bǎ lṳmṳ̌shî̌ wî̤sò lṳmṳ̌khǐ pô̤lô̤̌ pepwǎ akhanu, Yeshǔ ihtǒ cû̌kwicaba dǒ gûlǎ̤ bǎ kòyò ô̌ tôpwǎ̤꤮ tô̤̌ tûkû. 36 Dě Khûshǐmṳ̂ kû̌ kòyò dǒ a ô̌plǒ kû̌ lû̌ tokhlǒ cû̌ kè̌lǎ lû̌û. 37 Bǎ asî kè̌shǐ Yeshǔ akhanu, asî hî̌ lû̌ kû̌, “Kòyò kè̌lǎsǔ bò na,” a hî̌ lû̌ pô̤̌nu.

38 Dě Yeshǔ hî̌shěshu asî kû̌, “Pa cû̌ pô̤̌ dǒ doshǐshawa̤ dǒ a ô̌ te̤we̤bò lô̌khô bǒo tokhlǒ tǎ꤮, dě he gǔ shôbǐǐlṳ̌ sû̌ǐtòwòǐ bǎ asî kû̌ Cǒmara alě̤ayô̤̌. He hè bǒo numî̌ ta̤we̤ta̤kè hǒohǒ,” a hî̌ asî pô̤̌nu. 39 Dě a cû̌lè te̤we̤bò Galilè̤̌gǎ tôgǎlǎ̤ dě a cû̌ shôbǐǐlṳ̌, sû̌ǐtòwòǐ bǎ kòyò kû̌ Cǒmara alě̤ayô̤̌ dǒ Galilè̤̌phû̌ tokhlǒ a ta̤cabahǐkû pṳ̂̌꤮ tûkû, dě a wṳ̂̌hǎhtò̌pè̤̌kè bǎ kòyò khînǎkhîno tokhlǒ. ⁱ

Yeshǔ ma̤hǎmǎbǎ kòyòpha dǒ a ta̤sha akrôǎ ô̌ dǒ bělô̤ tôpwa̤

(Matè̌ 8:1-4; Lǔka 5:12-16)

40 Htodě kòyò dǒ ta̤sha akrôǎ ô̌ dǒ bělô̤ ô̌ tôpwa̤, dě a hè dô̌gîni̤lò̤ dǒ Yeshǔ alô̤mô̤̌ dě a kwisǎyṳhtò̌ lû̌ kû̌, “Na kè̌ sǎphlǒô̌ ma̤hǎmǎbǎ he ta̤sha numî̌ na ma̤bǎ jò pwǎ,” a hî̌ lû̌ pô̤̌nu.

41 Yeshǔ gwèbǎǐ lû̌û, htodě ayṳ̂̌hè acǔde dě a tô̌bǎhto lû̌û dě a hî̌ lû̌ kû̌, “He sǎphlǒô̌ pwǎ,” a hî̌ htodě “Ta̤sha, hǎmǎkèmò̌!,” a hî̌ pô̤̌ pô̤̌nu. 42 Hǒtaplǎnu, taplǎnô̤̌ kòyòpha nutôpwa̤ ta̤sha akrôǎ nu abǎkè dě aphěayî̌ aplîsîlî̌ gesô̌.

43 Dě Yeshǔ plûcû̌kè yǎ tôplǎnô̤̌ dě a mǎtě̤tě̤mè̤̌mè̤̌ cû̌nṳ̌ ayô̤̌ kû̌, 44 “Shôbǐǐlṳ̌ bǎ tǎ̤ kòyò tôpwǎ̤ tǎ̤mǎ̤ nî̌꤮. Cû̌ dǔlè̌lṳ̌kè nanǎ̤nu dǒ pwa̤shû̌gǎ nutôpwa̤ a ô̌ nu nî̌꤮, htodě pô̤̌khô kòyò pṳ̂̌꤮ tôpwa̤ gǔ kè̌shǐ ayanu, lṳhtò̌ ta̤lṳta̤tòhtò̌ pô̤̌ Khûmṳ̂shě a ta̤mǎlò̤ ô̌nu nî̌,” a mǎcû̌nṳ̌ ayô̤̌ pô̤̌nu. ^j 45 Bǎbǎkǎlè a hǎhtò̌cû̌ shôbǐǐlṳ̌ bǎ bò kòyò akhû̌akhî, Yeshǔ cû̌nṳ̌ lṳ̌ lîtîklî̌ pe dǒ wî̤̌kû tô̤̌, a bǎ cû̌ô̌ pwǎ dǒ wî̤̌khlo dǒ gûlǎ̤sǔtukǔ tokhlǒnu pwǎ htokhôtô̤̌dě kòyò ô̌ dǒ gûlǎ̤ pṳ̂̌tûkû hètǒ̤ bò dǒ aô̌.