Mar 11 | KxfSCKXF | STEP | Bǎ asî hètǒ̤phǔ kû̌ Wî̤̌yarǔshôle bǎ Dobetaphake kû̌ do Betanǐ dohtu òlǐbakhôlô kòshî̌ akhanu, Yeshǔ nohè wǐ akhôphijǎ sò̌ginǐ̤.

Mark 11

Yeshǔ cû̌nṳ̌ dǒ Wî̤̌yarǔshôle akû

(Matè̌ 21:1-11; Lǔka 19:28-40; Yṳ̂ha 12:12-19)

1 Bǎ asî hètǒ̤phǔ kû̌ Wî̤̌yarǔshôle bǎ Dobetaphake kû̌ do Betanǐ dohtu òlǐbakhôlô kòshî̌ akhanu, Yeshǔ nohè wǐ akhôphijǎ sò̌ginǐ̤. 2 Dě a hî̌ asî kû̌, “Hènṳ̌ wǐ lô̌khô do dǒ alô̤mô̤̌nu tôdo, sî hè nṳ̌nṳ̌ kû̌ sî gǔ kè̌shǐ mǐû̌lǎpha tôlô tôdo dǒ kòyò dò̌nô̌ yǎ tôkhò̌꤮ tô̤̌ tôdo pě. Sî glè̌ kè̌shǐ kòyò comě lò̤ǎ ashǎ bǎnu pě dě bôphlǔ a dě cî̌ge a bǒo nî̌꤮. 3 Kòyò tôpwa̤pwa̤ kè̌ gwè̌ sî kû̌, ‘sî cû̌ bôphlǔ tǒ̤ mǐû̌lǎphanu ma̤titè?’ Dě, ‘Běcǎ lǎ̤lṳ̂ no yǎ, a nohto lû̌û pě dě a sûgephwè sô̌ tûû̌ pě,’ hî̌shěshu lû̌û pô̤̌nu nî̌꤮” Yeshǔ hî̌ asî pô̤̌nu.

4 Bǎnu akha asî cû̌kè̌shǐ mǐû̌lǎpha dǒ kòyò comě ô̌phǔ a kû̌ hǐtakha kòshî̌ dě a ihtǒô̌ dǒ klè̌kû tôdo. Dě asî cû̌ bôphlǔ lû̌pli̤. 5 Kòyò ihtǒô̌ bǎ akòshî̌ nutokhlǒ gwè̌ asî kû̌, “Sî cû̌ bôphlǔ tǒ̤ mǐû̌lǎpha pli̤ ma̤titè?” 6 Dě asî hî̌shěshu pô̤̌ Yeshǔ nohî̌ asî nu dě kòyò nutokhlǒ plûcî̌kè asî. 7 Asî cî̌geǐ mǐû̌lǎpha nu dǒ Yeshǔ a ô̌ dě asî dahtò̌ lô̌khô a jekhlo dǒ mǐû̌lǎpha wǎ̤tě̤khû̌ dě Yeshǔ htò̌dò̌ yǎ. 8 Kòyò saprṳ̂saphǎ dalò̤ lô̌khô a jekhlo tokhlǒ dǒ klè̌dakû htodě dǒ ashǔshawa̤ tokhlǒ cû̌ pě̤geǐ sǒphò dǒ alǎô̌ tokhlǒ dǒ khôdukhû̌ dě dalò̤sô̌ dǒ klè̌dakû. 9 Dě kòyò cû̌ wǐ lô̌khô dǒ alô̤mô̤̌ tokhlǒ, tokhlǒ dě a gû̌cû̌kû̌ lô̌khô dǒ nô̌kò dě a kaǎgǔ lô̌khô kû̌, ^a

“Htû̌sò̌htò̌ lô̌khô Cǒmara!”

“Kòyò dǒ a hè kû̌ Běcǎ ami̤ tôpwa̤nu, Cǒmara ǐshowî̤ pû yǎ nî̌! ^b”

10 “Kòyò dǒ a glè̌ hè pǒǐ pa sô̌sô̌kû̌ papha khwǐ côphǎ Khûdawi̤ dǒ awǐnu tôpwa̤nu, Cǒmara gǔ ǐshowî̤ pû yǎ nî̌!”

“Htû̌sò̌htò̌ lô̌khô Cǒmara dǒ a ô̌ dǒ mǒkhû̌ agûlǎ̤htò̌yô̤̌lǒ nutôpwa̤!” Asî gòyò̤̌mò̤̌mô̤ lô̌khô Yeshǔ pô̤̌nu.

11 Yeshǔ cû̌tǒ̤ dǒ Wî̤̌yarǔshôle akû akhanu, a cû̌nṳ̌ dǒ ta̤lṳhtò̌hô we̤kû dě a cû̌lè kè̌ te̤we̤bò ta̤pṳ̂̌tocǒ. Lṳmṳ̌ glè̌ lò̤tě̤hǒ akhû̌akhî a kû̌ akhôphijǎ shǐsò̌ginǐ̤ hǎhtò̌cû̌kè dǒ do Betanǐ.

Yeshǔ ǐshokè dǐshimṳ̌ tômṳ̌

(Matè̌ 21:18-19)

12 Dǒ nô̌kò tôni̤nu bǎ Yeshǔ kû̌ akhôphijǎ ô̌ dǒ do Betanǐ hǎhtò̌ge dǒ klè̌lô̤ akha, Yeshǔ sǎǎshǎ. 13 Dě a kè̌shǐcû̌lṳ̌ dǐshimṳ̌ dǒ alǎ toho tômṳ̌. Mî̌ asǎ ô̌ ya a gènè̤ dě a cû̌tǒ̤ dǒ dǐshimṳ̌ ô̌, bǎbǎkǎlè bǎ a cû̌tǒ̤ dǒ dǐshimṳ̌ ô̌ akhanu, a kè̌shǐ asǎ tôphlǒ꤮ tô̤̌, ashěakhǎ tôsǎ khôtô̤̌ akhû̌akhî a ô̌ còcè̌ alǎ pwǎ. 14 Yeshǔ hî̌ dǐshimṳ̌ nutômṳ̌ kû̌, “Tôpwǎ̤ bǎ ǎnṳ̌ pû nasǎ tǎ̤mǎ̤ nî̌꤮” a hî̌ pô̤̌onu akhôphijǎ tokhlǒ ganǎ̤de lô̌khô.

Yeshǔ cû̌ dǒ ta̤lṳhtò̌hô

(Matè̌ 21:12-17; Lǔka 19:45-48; Yṳ̂ha 2:13-22)

15 Bǎ asî cû̌tǒ̤ dǒ Wî̤̌yarǔshôle akhanu, Yeshǔ cû̌nṳ̌ dǒ ta̤lṳhtò̌hôkû dě a cû̌nṳ̌ sahtò̌ wṳ̂̌hǎhtò̌kè kòyò shaǎpwî̤ǎ tě̤ta̤ bǎnu tokhlǒ dě a nṳ̌shò̌ lò̤tě̤klokè kòyò lǎ̤htû̌tèlè̌ ru a dîjowǎ̤ nutokhlǒ kû̌ gògǒ dǒ kòyò lǎ̤hǎnòò̌ shaǎ kû̌ htû̌lǐ̤ nutokhlǒ. 16 Kòyò ô̌ bǎ ta̤lṳhtò̌hô we̤kû nudě kòyò glè̌ jocû̌khô̌ a tě̤ta̤ dǒ ashǔshawa̤ tûkû akha Yeshǔ dǐjo cû̌khô̌ kòyò tôpwǎ̤꤮ tô̤̌. 17 Htodě a sû̌ǐtòwòǐ asî kû̌, “Dǒ lî̤plò̌shǐkûnu, Cǒmara hî̌ kû̌,

‘hehǐ mî̌ kòyò bǎ kaǎ yǎ kû̌ kòyò pṳ̂̌꤮ tocǒ lǎ̤cubucaba ahǐ’ ^c

Bǎbǎkǎlè sî cû̌ no htûhtò̌ bòkè a kû̌ ‘pwa̤ǎhǔ lǎ̤ô̌û̌hǐ agûlǎ̤ hǒ.’” ^d

18 Pwa̤shû̌gǎ ikǒlǒkòdû̌ tokhlǒ kû̌ pwa̤sû̌ǐ ta̤sû̌ta̤tòwò asara tokhlǒ ganǎ̤de Yeshǔ hî̌ pô̤̌o dě asî kè̌lǎ klè̌klò dǒ a gǔ ma̤si Yeshǔ. Kòyò saprṳ̂saphǎ tokhlǒ ǒò̌ kiti̤kaa lǒ̤bò Yeshǔ a ta̤sû̌ǐtòwòǐ akhû̌akhî, asî htû ikǒlǒkòdû̌ nutokhlǒ ǐsha lô̌khô Yeshǔ agûlǎ̤.

19 Bǎ lṳmṳ̌ lò̤tě̤ akhanu, Yeshǔ kû̌ akhôphijǎ tokhlǒ hǎhtò̌gekè dǒ wî̤̌khlo.

Phî̌nṳ̌ ta̤sû̌ǐ tocǒ dǒ dǐshimṳ̌ tômṳ̌ a ô̌

(Matè̌ 21:20-22)

20 Nô̌kòtôni̤ lṳmṳ̌wî̤sò akhanu, asî hǎhtò̌cû̌ wô̤̌wô̤̌sô̌ klè̌ nutôbô dě dǐshimṳ̌ dǒ Yeshǔ ǐshokè yǎ nutômṳ̌ nî̌ asî kè̌shǐ kû̌ akhwesi sabô tǒ̤dǒ akhò̌wǐ̤. 21 Dě Khûpetarǔ gènè̤htò̌nṳ̌sô̌ Yeshǔ ǐshokè sǒmṳ̌nu dě a hî̌ lû̌û kû̌, “Sara꤮ kè̌mò̌ dǒnu, dǐshimṳ̌ dǒ na ǐshokè lû̌û nutôsǒ a khwesikè hǒ.”

22 Dě Yeshǔ hî̌shěshu asî kû̌, “Yṳ̌ǎ Cǒmara nu. 23 He hî̌cǒcǒ sî, kòyò tôpwa̤pwa̤ a kè̌ hî̌ khôlô nutômè kû̌, ‘sǒ cû̌ tephekè dǒ shidû̌shite̤we̤ akûnu,’ dě a kè̌ sǎphlǒ wò̌wè̌ tô̤̌ dě a kè̌ yṳ̌ǎ mè̤̌mî̌ca hî̌nu, a gǔ htûhtò̌ bǎ lû̌û pô̤̌ a hî̌ nu pě. ^e 24 Pô̤̌nu akhû̌akhî he hî̌ sî, sî kwita̤ dǒ pha Cǒmara a ô̌ titètè̌ bǎbǎnu yṳ̌ǎ kû̌ sî nǐ̤bǎhǒ, dě sî gǔ nǐ̤bǎ mè̤̌mî̌ca pě. 25 Bǎ sî ihtǒ kwicaba akhanu, sî kè̌ pṳ̂̌mě kòyò tôpwa̤pwa̤ ata̤sǔ kè̌hî̌dě plûkè ata̤sǔnu. Sî kè̌ plûkè mò̌mî̌, sîpha ô̌ dǒ mǒkhû̌ nutôpwa̤ plûkè nô̌ sî ta̤sǔ pô̤̌nu pě.” ^f 26 (“Bǎbǎkǎlè sî kè̌ plûkè kòyò ta̤sǔ tô̤̌ kè̌hî̌dě, sîpha ô̌ dǒ mǒkhû̌ nutôpwa̤ plûkè nô̌ sî ta̤sǔ tô̤̌.”) ^{▼▼lî̤ hǒtôplô nu a ô̌ nṳ̌dô̌kû̌ dǒ lî̤ dǒ kòyò wě̤ kû̌ cǔde dǒ awǐlǒ akhanu tôbǎ akû tô̤̌.}

Kòyò gwè̌ Yeshǔ ta̤siwi̤sòwò̤ awe̤akè

(Matè̌ 21:23-27; Lǔka 20:1-8)

27 Yeshǔ kû̌ akhôphijǎ tokhlǒ cû̌tǒ̤ tîkhîsô̌ dǒ Wî̤̌yarǔshôle dě bǎ Yeshǔ cû̌ dǒ ta̤lṳhtò̌hôkû akhanu, pwa̤shû̌gǎ ikǒlǒkòdû̌ tokhlǒ kû̌ pwa̤sû̌ǐ ta̤sû̌ta̤tòwò asara tokhlǒ, kû̌ Yǔdaphû̌ ikǒlǒkòdû̌ tokhlǒ hè dǒ a ô̌, 28 Dě asî gwè̌ Yeshǔ kû̌, “Na cû̌ma̤tǒ̤ ta̤pô̤̌o tokhlǒ numî̌, na cû̌ma̤ kû̌ mò̌pè a ta̤siwi̤sòwò̤ ya? Na gǔ ma̤ta̤ tokhlǒ ayanu mò̌pè noma̤ na ya?”

29 Yeshǔ hî̌shěshu asî kû̌, “He gwè̌ gûmṳ̂̌lǎ sî ta̤hî̌bǎ tômû, dě hî̌shěshu mò̌ he, dě he ma̤ ta̤nu tokhlǒ kû̌ mò̌pè a ta̤siwi̤sòwò̤ pěnu he glè̌ pwe̤ǐlṳ̌ bǎ sî pě. 30 Pwa̤jushi Khûyṳ̂ha ju bǎ kòyò shi numî̌ Cǒmara ǐ lû̌û ta̤siwi̤sòwò̤ ya? Mè̤̌tô̤̌dě kòyòhǎkhû̌phû̌ ǐ lû̌û ya? shôbǐǐ bǎ kè̌kè̌ he.”

31 Dě asî htè̌ kè̌khî tû̌ lû̌û kû̌, “Pa kè̌ hî̌mò̌ kû̌, ‘Cǒmara ǐ yǎ’ kè̌hî̌dě, a glè̌ gwè̌ pa kû̌, ‘kè̌hî̌pô̤̌nudě sî yṳ̌ǎ yǎ tô̤̌ ma̤titè?’ pô̤̌nu pě. 32 Dě pa kè̌ hî̌ a kû̌, ‘kòyòhǎkhû̌phû̌ ǐ yǎ’ kè̌hî̌dě, ǐsha kòyò saprṳ̂saphǎ hǒtokhlǒ alǎ̤lǎ̤.” (Ma̤titèhî̌dě kòyò pṳ̂̌꤮ tôpwa̤ yṳ̌ǎ bò kû̌ Khûyṳ̂ha mî̌ piwi̤pèshè mè̤̌mî̌ca tôpwa̤.)

33 Pô̤̌nu akhû̌akhî asî hî̌shěshu Yeshǔ kû̌, “Pa sî̌yatô̤̌.”

Dě Yeshǔ hî̌shěshu asî kû̌, “Kè̌hî̌pô̤̌nudě he ma̤ta̤ tokhlǒ kû̌ mò̌pè a ta̤siwi̤sòwò̤ yanu he shôbǐǐlṳ̌ nô̌ sî tô̤̌.”