Mark 12

Yô̤̌sǎkhěkhô̌ dǒ kòyò hè khò̌ǎ sîpî̌phǎ tokhlǒ

(Matè̌ 21:33-46; Lǔka 20:9-19)

1Yeshǔ sahtò̌ dô̌kènè bǎ pwa̤shû̌gǎ ikǒlǒkòdû̌ tokhlǒ kû̌ pwa̤sû̌ǐ ta̤sû̌ta̤tòwò asara tokhlǒ kû̌ Yǔdaphû̌ ikǒlǒkòdû̌ tokhlǒ kû̌ yô̤̌sǎkhěkhô̌ tokhlǒ pô̤̌o, “Bǎtaplǎ, kòyò ô̌ tôpwa̤, a shǒǐ tûû̌ a sîpî̌mṳ̌ tôlǎ̤ dǒ ahǔklakû dě a te̤we̤bǐ tûû̌ bò a sîpî̌phǎnu, dě a khǔ ahǎkû tôkû dǒ a lǎ̤yî̤̌hǎhtò̌ kû̌ sîpî̌shi, dě a shǒhtò̌ gôjôhǐphû̌ dǒ kòyò lǎ̤ô̌pǒ̤kè̌ kû̌ sîpî̌phǎnu tômè. Htodě ano khò̌ǎ kûmṳ̂̌ kû̌ pwa̤khò̌ǎ tokhlǒ dě a hǎhtò̌cû̌kè dǒ gǎshǔshawa̤ tôgǎ. ^a 2Bǎ sîpî̌sǎ mi ashěkhǎnu, sîpî̌phǎ běcǎ nohèlò̤ a jû̌ tôpwa̤ dǒ pwa̤khò̌ǎ nutokhlǒ a ô̌ dě a nohè phî̌genṳ̌ sîpî̌sǎ pwǐ a tô nǐ̤bǎ tokhlǒ. 3Pwa̤khò̌ǎ hǔkla tokhlǒ pṳ̂̌ lû̌û dě apo̤plè jû̌ nutôpwa̤ dě a plûge koyoklǐkè pwǎ lû̌û. 4Htodě sîpî̌phǎběcǎ nohè tèplè̌sô̌ a jû̌ dǒ ashǔshawa̤ tôpwa̤ dǒ asî ô̌ dě asî po̤ lû̌û ikǒ htodě ma̤sòwò̤̌ bò lû̌û. 5Sîpî̌phǎ běcǎ nohè pô̤̌ a jû̌ dǒ nô̌kò tôpwa̤, dě asî ma̤sikè lû̌û. Sîpî̌phǎ běcǎ plûhè dû̌wî̤ ashǔshawa̤ tokhlǒ. Asî po̤plèkè kòyò tokhlǒkhlǒ, ma̤sikè kòyò tokhlǒkhlǒ.

6“Sîpî̌phǎ běcǎ nohèpô̤̌ kòyònu a ô̌kè pepwǎtǒ̤ aphû̌khû dǒ a mô̤ǐ nutôpwa̤ pwǎ. Dǒnô̌kògutṳ̌ dě a gènè̤ kû̌, ‘he gǔ nohè he phû̌pwa̤khû nî̌ a bè̌dubè̌nǎ̤ khlopě kǎlè,’ a gènè̤ dě a nohè lû̌û dǒ pwa̤khò̌ǎ nutokhlǒ a ô̌.

7“Bǎbǎkǎlè pwa̤khòǎ tokhlǒnu a hî̌bǎǐ tû̌ lû̌û tôpwa̤ kû̌ tôpwa̤ dě a hî̌ lô̌khô kû̌, ‘kòyò hǒtôpwa̤ mî̌ sîpî̌phǎběcǎ aphû̌khû dǒ a glè̌ nǐ̤bǎ û̌tě̤û̌ca nutôpwa̤ hǒ. Cû̌! cû̌ma̤si wô̤̌wô̤̌kèyǎ tǎ꤮! A û̌tě̤û̌ca tokhlǒnu a gǔ htûhtò̌bòkè pata pě.’ 8A hî̌ lô̌khô dě asî pṳ̂̌ ma̤sikè sîpî̌phǎ běcǎ aphû̌khû dě a wîhǎhtò̌kè lû̌û dǒ sîpî̌phǎ we̤khlo,” Yeshǔ hî̌khěkhô̌ bǎ asî pô̤̌nu.

9Htodě Yeshǔ gwè̌ asî kû̌, “Kè̌ ma̤pô̤̌nudě sîpî̌phǎ běcǎ nutôpwa̤ nî̌ a gǔ ma̤ hî̌tè pě? A hè ma̤sikè pwa̤khò̌ǎ hǔkla nutokhlǒ dě a gǔ plû khò̌ǎ tèplè̌sô̌ kû̌ kòyò dǒ ashǔshawa̤ tokhlǒ pě.” 10Htodě Yeshǔ hî̌ sô̌ asî kû̌, “Lî̤plò̌shǐkû hî̌ kû̌,

‘pwa̤ma̤htò̌ hǐ dě lǒ̤ dǒ asî wîkè lû̌û nutômè nî̌ a htûhtò̌ lǒ̤ dǒ alṳ̂dû̌lǒ dě ama̤měma̤gle hǐ nutômè pě. ^b 11Hǒonumî̌ Běcǎ Cǒmara ma̤ta̤ pwǎ, dě a ma̤ta̤ numî̌ a cô̌klǐcô̌sè.’ ^c

lî̤plò̌shǐkû hî̌ pô̤̌omî̌ sî dô̌nô̌ gû̌ kòyò tôkhò̌꤮ tô̤̌ ya? Sî dô̌ bǎ lò̤tṳ̌ pwǎ.”

12Yǔdaphû̌ ikǒlǒkòdû̌ tokhlǒnu, a sî̌ya kû̌ Yeshǔ hî̌khěkhô̌ asî kû̌ pwa̤wîkè lǒ̤ nutômè mî̌ asî hǒ akhû̌akhî, a kè̌lǎ lô̌khô klè̌klò dǒ a glè̌ pṳ̂̌ Yeshǔ, bǎbǎkǎlè asî ǐsha kòyò saprṳ̂saphǎ nutokhlǒ alǎ̤ dě asî hǎhtò̌cû̌ tephekè pwǎ Yeshǔ alǎ̤.

Kòyò gwè̌ Yeshǔ kû̌ tôbǎ ǐ ta̤kûta̤mṳ̂̌ ya, mè̤̌tô̤̌mî̌ tôbǎ ǐ tô̤̌ ya awe̤akè

(Matè̌ 22:15-22; Lǔka 20:20-26)

13Kòyò nohè Pharishè̌phû̌ tokhlǒ kû̌ Khwǐherû a kòyò tokhlǒ dǒ Yeshǔ a ô̌ dǒ a gǔ hè kè̌lǎ pṳ̂̌ lô̌khô Yeshǔ a ta̤hî̌bǎsǔ tokhlǒ. 14Asî hè dǒ Yeshǔ a ô̌ dě a hî̌ lô̌khô lû̌û kû̌, “Saradû̌꤮ pa sî̌ya kû̌ na mî̌ kòyòcǒkòyòtè̤ dě a hî̌bǎcǒpwǎ ata̤hî̌bǎ tôpwa̤. Na ǐsha kòyò lǎ̤ tôpwǎ̤꤮ tô̤̌, na kè̌dû̌kè̌pî̌tî̌ kòyò tôpwǎ̤꤮ tô̤̌. Na sû̌ǐtòwòǐ kòyò ta̤tě̤ta̤mè̤̌ numî̌, na sû̌ǐ bǎ kòyò pô̤̌ Cǒmara sǎyṳ no sû̌ǐ na nu hǒ. Pô̤̌nudě pa ǐ ta̤kûta̤mṳ̂̌ dǒ khwǐ Kè̌sha a ô̌ numî̌ atô ya? mî̌ atô tô̤̌ ya? 15Pa tô ǐ a ya? Mî̌ pa tô ǐ tô̤̌ ya? Shôbǐǐ kè̌mò̌ pa.”

Bǎbǎ asî hè hî̌bǎ khô̌yò pwǎ nu, Yeshǔ sî̌ya dě a hî̌shěshu asî kû̌, “Pô̤̌khô sî gǔ kè̌lǎ pṳ̂̌nṳ̌ he ta̤hî̌bǎsǔ tokhlǒ dě sî hè gwè̌khǐgwè̌khô̌ cǎ he ma̤titè ya? Hèǐ kè̌kè̌ he sî ruyî̌ Denari nutôbǎ,” a hî̌ asî pô̤̌nu. 16Dě asî hèǐ lû̌û ruyî̌ Denari tôbǎ dě a gwè̌ asî kû̌, “Hǒomî̌ mò̌pè ikǒ yô̤ ya? A wě̤ mò̌pè ami̤ya?”

Dě asî hî̌shěshu lû̌û kû̌, “Rṳ̂̌me̤ khwǐdû̌ a ikǒyô̤ kû̌ khwǐ ami̤.”

17Htodě Yeshǔ hî̌ asî kû̌, “Khwǐdû̌ Kè̌sha ata kè̌hî̌dě ǐ kû̌ khwǐdû̌nu, Cǒmara ata kè̌hî̌dě ǐ kû̌ Cǒmara nu” Yeshǔ hî̌ asî pô̤̌nu dě asî ǒò̌ kiti̤kaa bò Yeshǔlǎ̤.

Kòyò gwè̌ Yeshǔ kû̌ ta̤si ihtǒhtûpwa̤ getîkhî sô̌

(Matè̌ 22:23-33; Lǔka 20:27-40)

18Sadukè̌phû̌ sîtokhlǒ lǎ̤klô hî̌ lô̌khô kû̌ kòyò sihto nu kòyò htûpwa̤ jò sô̌ pě tôkhò̌꤮ tô̤̌ pô̤̌nu. Dě asî hè dǒ Yeshǔ a ô̌ dě gwè̌ lû̌û kû̌, ^d 19“Saradû̌꤮, Khûmṳ̂shě wě̤nǎ ta̤mǎlò̤ tômû dǒ paya dě a hî̌ kû̌, kòyò tôpwa̤pwa̤ kè̌ sikè amalǎ̤ dě aphû̌ kè̌ ô̌ tôpwǎ̤ tô̤̌ nu, pô̤̌khô khlilè gǔ ô̌kè nudě, a pṳ̌pwa̤khû bǎ phî̌sô̌ akhi ô̌kènu, a hî̌ pô̤̌nu. ^e 20Tôplǎnu pṳ̌wè̤̌ pwa̤khû ô̌ susô̌tôpwa̤. A wè̤̌pwǎ̤lǒ tôpwa̤ phî̌ ama dě bǎ a sikè akhanu aphû̌ ô̌kè tôpwǎ̤꤮ tô̤̌. 21Dě ahǒlǎ̤ tôpwa̤ phî̌ sô̌ akhinu dě a sikèsô̌ dě aphû̌ali̤ ô̌kè tôpwǎ̤꤮ tô̤̌. Apṳ̌ supwa̤tôpwa̤ nî̌ ama̤ sô̌sô̌ bò pô̤̌nu. 22Pṳ̌wè̤̌ susô̌tôpwa̤ nî̌ ama̤ sô̌sô̌ bò lû̌û pô̤̌nu, dě asî susô̌tôpwa̤ nǐ̤ cubò lû̌û ama tôpwa̤ nô̤̌ dě a sikè bò, aphû̌ô̌ lô̌khô tôpwǎ̤꤮ tô̤̌ dě dǒnô̌kògutṳ̌nu pwa̤mǒ̤ nutôpwa̤ gû̌ sikè pô̤̌ lû̌ûkò. 23Pô̤̌nudě htû̌꤮ kòyò si tokhlǒ ihtǒhtûpwa̤sô̌ alṳmṳ̌ni̤ pě tôni̤nu, pwa̤mǒ̤ hǒtôpwa̤ gǔ htû bǎtè tôpwa̤ ama pěya? Ma̤titèhî̌dě asî pṳ̌wè̤̌ susô̌tôpwa̤ phî̌cubò lû̌û pwa̤mǒ̤ hǒtôpwa̤ pwǎ.”

24Yeshǔ hî̌shěshu asî kû̌, “Sî yṳ̌nǎ̤sǔ bòkèhǒ, sî sî̌ya mè̤mè̤̌ gû̌ kòyò lî̤plò̌shǐ kû̌ Cǒmara a ta̤pô̤ta̤phǎ ma̤jò ta̤ tokhlǒ tô̤̌. 25Ma̤titèhî̌dě htû̌꤮ kòyò si ihtǒhtûpwa̤sô̌ pěnu kòyò phî̌phû̌phî̌ma, kòyò phî̌phû̌phî̌wṳ̂ ô̌ petô̤̌, asî glè̌ sô̌sô̌bò pô̤̌ mǒkhû̌ tanaphû̌ nutokhlǒ pě. 26Khûmṳ̂shě wě̤mǎnǎ ta̤htûpwa̤ gesô̌ awe̤akè dǒ a lî̤běkû bǎ mî̌gè̌ jôjǔ ta̤dô̌nè nu tôshǒ, he gènè̤ kû̌ sî dô̌ bǎ hto hǒ. Bǎ lî̤kûnu, Cǒmara hî̌ Khûmṳ̂shě hî̌tè dě, ‘he mî̌ PhaAbraha a Cǒmara, PhaIsè̌ a Cǒmara, kû̌ Phaya̤kò a Cǒmara,’ ^fKhûmṳ̂shě wě̤nǎ pô̤̌nu. 27Cǒmara mî̌ kòyòsi tokhlǒ a Cǒmara mè̤̌tô̤̌, kòyò htûpwa̤ tokhlǒ a Cǒmara. Sî yṳ̌nǎ̤sǔ bò mǔte̤gle kèhǒ,” a hî̌ Sadukè̌phû̌ sîtokhlǒ pô̤̌nu.

Ta̤mǎlò̤ dǒ alṳ̂dû̌lǒ tômû

(Matè̌ 22:34-40; Lǔka 10:25-28)

28Bǎnuakha pwa̤sû̌ǐ ta̤sû̌ta̤tòwò asara ô̌ bǎnu tôpwa̤ dě a ganǎ̤de asî htè̌ lû̌û. A kè̌shǐ kû̌ Yeshǔ hî̌ geshěshu jò sadukè̌sî akhû̌akhî, a gwè̌ Yeshǔ kû̌, “Ta̤mǎlò̤ lǒ̤꤮ bò akla numî̌ alṳ̂dû̌lǒ mî̌ bǎtè tômûya?”

29Dě Yeshǔ hî̌shěshu lû̌û kû̌, “Ta̤mǎlò̤ dǒ alṳ̂dû̌lǒ mî̌ titè dě, ‘Ǒ꤮ Isôrělaphû̌ sî, gana̤de lô̌khô Běcǎ ô̌ pwǎtǒ̤ pa Běcǎ Cǒmara tôpwa̤ nô̤̌ pwǎ. ^g 30Dě mô̤ lǒ̤sû̌lǒ̤sò̌ sî Cǒmara kû̌ sî sǎphlǒ lǒ̤꤮ bò, mô̤ lǒ̤sû̌lǒ̤sò̌ a kû̌ sî ta̤ô̌htûpwa̤ lǒ̤꤮ bò, mô̤ lǒ̤sû̌lǒ̤sò̌ a kû̌ sî ta̤gènè̤ lǒ̤꤮ bò, mô̤ lǒ̤sû̌lǒ̤sò̌ a kû̌ sîta̤khû̌ta̤ǎ lǒ̤꤮ bò,’ ^h hǒonumî̌ ta̤mǎlò̤ awǐlǒ tômû dǒ alṳ̂dû̌lǒ nuhǒ. 31Ta̤mǎlò̤ ginǐ̤mûtômû mî̌, ‘sî bǎ mô̤ǐlò̤ sî hǐphòwò̤shî̌ tokhlǒ pô̤̌ sî mô̤ǐlò̤ tûû̌ sînǎ̤nu.’ ⁱ Ta̤mǎlò̤ dǒ alṳ̂dû̌lǒ pô̤̌o dǒ ashǔshawa̤ numî̌ a ô̌ petô̤̌.”

32Pwa̤sû̌ǐ ta̤sû̌ta̤tòwò asara nutôpwa̤ hî̌shěshu Yeshǔ kû̌, “Sara꤮ na hî̌ numî̌ atôtǐ jî̌jî̌, na hî̌ kû̌ Cǒmara ô̌ pwǎtǒ̤ tôpwa̤꤮ nô̤̌, Cǒmara dǒ ashǔshawa̤nu a ô̌ pe tôpwǎ̤꤮ tô̤̌ na hî̌ numî̌ amè̤̌mî̌ca hǒ. ^j 33Pa bǎ mô̤ lǒ̤sû̌lǒ̤sò̌ pa Cǒmara kû̌ pa sǎphlǒ lǒ̤꤮ bò, kû̌ pa ta̤gènè̤ lǒ̤꤮ bò kû̌ pakhû̌paǎ lǒ̤꤮ bò. Htokhôtô̤̌ pa bǎ mô̤ǐ kòyò dǒ ashǔshawa̤ tokhlǒ pô̤̌ pa mô̤ǐlò̤ tûû̌ panǎ̤nu mî̌ awô̌khlo pekû̌ lǒ̤꤮ bò pa shû̌gǎ ta̤phû̌ta̤wè̤ tokhlǒ kû̌ mî̌, lǒ̤bò pa ma̤lṳhtò̌ ta̤ dǒ ashǔshawa̤ tokhlǒ numî̌ he sî̌ya,” ^k a hî̌shěshu lû̌û pô̤̌nu.

34Yeshǔ kè̌shǐ kû̌ kòyò nutôpwa̤ hî̌shěshu jò dě a hî̌ lû̌û kû̌, “Na phǔ genṳ̌ phǔtînî̤̌꤮ bǎ dǒ Cǒmara a shilǎ̤gǎkû hǒ,” a hî̌hto lû̌û dě dǒnô̌kònu kòyò gwè̌bǔ pe Yeshǔ tôpwǎ̤꤮ tô̤̌. ^l

Khrǐ mî̌ mò̌pè phû̌ya

(Matè̌ 22:41-46; Lǔka 20:41-44)

35Bǎ Yeshǔ sû̌ǐtòwòǐ kòyò dǒ ta̤lṳhtò̌hôkû akhanu, a gwè̌ kòyò kû̌, “Pwa̤sû̌ǐ ta̤sû̌ta̤tòwò asara tokhlǒ a hî̌ kû̌ Khrǐ dǒ ama̤hǎplǎge kòyò tôpwa̤ numî̌ akhlialè lò̤ dǒ Khûdawi̤, a hî̌ pô̤̌nu mè̤̌tô̤̌ya? 36Ma̤titèhî̌dě Khwǐdawi̤ anǎ̤sanǎ̤ nî̌ Yôla Plò̌shǐ Běcǎ htû̌bǎ asǎphlǒ dě a nohî̌ lû̌û kû̌,

‘Běcǎ Cǒmara hî̌ he Běcǎ Me̤shǐya kû̌, “Hǎnòò̌ dǒ he cǔtômû nutôkhô, hǎnòò̌ tǒ̤dǒ he ma̤pè̤̌ bò hto lǒ̤꤮ bò pwa̤sǎkhwè̌ he hè olò̤wǎ̤lò̤ bòkè dǒ na ô̌ pě nu nî̌꤮.”’ ^m

37Khûdawi̤ anǎ̤sanǎ̤ kaǎ Khrǐ dǒ ama̤hǎplǎge kòyò tôpwa̤ kû̌, ‘Běcǎ’ akaǎ lû̌û akhû̌akhî, a cû̌ htû jò Khwǐdawi̤ aphû̌khû hî̌tè?”

Kòyò saprṳ̂saphǎ tokhlǒ sǎlě̤sǎlò̤ gana̤de lô̌khô Yeshǔ a ta̤sû̌ǐtòwòǐ.

Yeshǔ dǐsè̌rè̌ kòyò saprṳ̂dû̌ tokhlǒ kû̌ pwa̤sû̌ǐ ta̤sû̌ta̤tòwò asara nutokhlǒ awe̤akè

(Matè̌ 23:1-36; Lǔka 20:45-47)

38Bǎ Yeshǔ sû̌ǐtòwòǐ kòyò akhanu, a hî̌ kû̌, “Sè̌rè̌ lô̌khô sînǎ̤ kû̌ pwa̤sû̌ǐ ta̤sû̌ta̤tòwò asara nutokhlǒ nî̌꤮. Asî nutokhlǒ mî̌ a bè̌dû̌bè̌htû lô̌khô anǎ̤ dě a sǎyṳ sô̌ lô̌khô jejû gòpwè̤htû tokhlǒ dě bǎ a kè̌shǐ kû̌ kòyò dǒ klǎkû akhanu, a sǎyṳ nohî̌bǎ bè̌dubè̌nǎ̤ kòyò kû̌ anǎ̤. 39Htokhôtô̤̌ dǒ ta̤cabahǐkû nubǎbǎ, dǒ pwèkû nubǎbǎ, asî sǎyṳ hǎnòò̌ lô̌khô gûlǎ̤ dǒ kòyò bè̌dubè̌nǎ̤ a nutokhlǒ pwǎ. 40Pô̤̌khô asî gǔ pǒ̤sigwî̌ yǒsaphǎ pwa̤mǒ̤khwè̌ tokhlǒ ahǐ ta̤kǐta̤kû̌, asî lô̌ǐplò̤ǐ, htotô̤̌ pô̤̌khô kòyò gǔ gana̤de dě kè̌shǐ asî ta̤sǔ tô̤̌ ayanu, a kwicaba htûgipi̤ bǎ kòyò. Dě asî ma̤pô̤̌nu akhû̌akhî, asî glè̌ tṳ̌bǎkhòbǎ jî̌ khlo kòyò ta̤cî̌htò̌ pě.”

Pwa̤mǒ̤khwè̌ tôpwa̤ a ta̤ma̤lṳ aru

(Lǔka 21:1-4)

41Yeshǔ hǎnòò̌ ô̌ phǔ bǎ kòyò lǎ̤bè̌ô̌plǒ rutǒkû gûlǎ̤ alômô̤̌ akhanu dě a kè̌ kòyò tokhlǒ hè shû̌nṳ̌ ru akha, kòyò dû̌yò̤̌htò̌sa saprṳ̂saphǎ hè shû̌nṳ̌ dû̌wî̤ ru. 42Bǎbǎkǎlè pwa̤mǒ̤khwè̌ dǒ a hǎwǐ̤shèwè̤ ô̌ tôpwa̤ dě a hè shû̌nṳ̌ kû̌ kò ru tilili̤ ginǐ̤bǎ dǒ apwî̤ gònò̤ pwǎ kû̌ ru tôbǎ nupwǎ.

43Dě Yeshǔ kaǎplǒ akhôphijǎ tokhlǒ dǒ a ô̌ dě a hî̌ asî kû̌, “He hî̌cǒcǒ sî, lǒ̤꤮ bò kòyò dǒ a hèshû̌nṳ̌ ru dǒ lǎ̤shû̌nṳ̌ rutǒkû nu, pwa̤mǒ̤khwè̌ nutôpwa̤ shû̌nṳ̌ dû̌lǒkhlo kòyò hǒ. 44Ma̤titè̤̌hî̌dě lǒ̤꤮ bò a hèshû̌nṳ̌ ru nutokhlǒmî̌, a ô̌lǒô̌be shû̌lě dě a hèshû̌nṳ̌ pwǎ lô̌khô ata̤ ô̌ kûmṳ̂̌kashǎ nutokhlǒ pwǎ. Bǎbǎkǎlè pwa̤mǒ̤khwè̌ tôpwa̤ numî̌ a hǎwǐ̤shèwè̤, a ô̌lǒô̌be tô̤̌ bǎbǎkǎlè a hèshû̌nṳ̌ bòkè aru dǒ a lǎ̤ǎ kû̌ a ta̤htûpwa̤ aya nuhǒ.”