Mar 16 | KxfSCKXF | STEP | Bǎ Yǔdaphû̌ a lṳmṳ̌dǔ tûlû̌kè hto nutôwô̤nu, do Magadalǎphû̌ Mǒ̤ma̤rǐ, Khûya̤kû amǒ̤ Mǒ̤ma̤rǐ kû̌ Mǒ̤salû pwî̤nṳ̌ lô̌khô shinumû̌ dě a glè̌ cû̌plṳ̌ lô̌khô Běcǎ Yeshǔanǎ̤.

Mark 16

Yeshǔ htûpwa̤ gesô̌

(Matè̌ 28:1-8; Lǔka 24:1-12; Yṳ̂ha 20:1-10)

1 Bǎ Yǔdaphû̌ a lṳmṳ̌dǔ tûlû̌kè hto nutôwô̤nu, do Magadalǎphû̌ Mǒ̤ma̤rǐ, Khûya̤kû amǒ̤ Mǒ̤ma̤rǐ kû̌ Mǒ̤salû pwî̤nṳ̌ lô̌khô shinumû̌ dě a glè̌ cû̌plṳ̌ lô̌khô Běcǎ Yeshǔanǎ̤. 2 Tôshô̌bě akû awǐlǒ nutini̤ bǎ lṳmṳ̌wî̤sò lṳmṳ̌ khǐpô̤lô̤pe akhanu, asî hè lô̌khô dǒ lṳ̌khû̌. 3 Bǎ asî hè dǒ klè̌lô̤ akhanu, asî hî̌ kè̌khî lû̌û kû̌, “Mò̌pè glè̌ htû̌toklo tephekè bǎ pa lǒ̤bědû̌ dǒ kòyò htû̌toklobǐ kû̌ lṳ̌kû nutômè ya?” Ma̤titèhî̌dě lǒ̤běnu tômè mî̌ adû̌môti̤ lîlè.

4 Bǎbǎkǎlè bǎ asî kè̌cû̌ akhanu, a kè̌shǐ kû̌ kòyò shò̌toklo tephenǎkè hto lǒ̤bědû̌ nutômè hǒ. 5 Bǎ asî nṳ̌ dǒ lṳ̌kû akhanu, a kè̌shǐ pwa̤khûphû̌sǎ sô̌ jebû tôpwa̤ hǎnòò̌ dǒ lṳ̌kû cǔtômû nutôkhô dě asî sǎgònò̤̌ bòkè.

6 Dě a hî̌ asî kû̌, “Sǎgònò̤̌ lô̌khô tǎ̤mǎ̤꤮, sî kè̌lǎǐ Na̤sôrè̤̌phû̌ Yeshǔ dǒ kòyò htǎsihtò̌kè lû̌û dǒ nò̌dò̌htǔlô̤ nutôpwa̤ pwǎ numî̌ he sî̌ganǎ̤. A ihtǒhtûpwa̤ gesô̌ hǒ. A ô̌pe bǒo tô̤̌. Hèkè̌mò̌ lô̌khô, hǒomî̌ agûlǎ̤ dǒ kòyò bè̌nṳ̌ yǎ alǎ̤nuhǒ. 7 Geshôbǐǐ pû Khûpetarǔ kû̌ Yeshǔ akhôphijǎ dǒ ashǔshawa̤ nutokhlǒ kû̌ Yeshǔ cû̌ ô̌nǎwǐ hto sî dǒ Galilè̤̌gǎ kû nu hǒ. Pô̤̌ a hî̌nǎ hto sînu sî gǔ kè̌shǐ tûû̌ a bǎnu pě.” ^a

8 Asî ǒò̌ kiti̤kaa dě anǎ̤ gònò̤̌gòglè bò akhû̌akhî, asî khlèhǎhtò̌kè dǒ lṳ̌kû. Asî ǐsha tûlû̌shû̌lě dě bǎ a hǎhtò̌cû̌ akhanu, a hî̌bǎ pe kòyò tôpwǎ̤꤮ tô̤̌.

Yeshǔ ô̌lṳ̌htò̌ bǎ anǎ̤ kû̌ Magadalǎ dokûphû̌ Mǒ̤ma̤rǐ

(Matè̌ 28:9-10; Yṳ̂ha 20:11-18)

9 Yeshǔ ihtǒ htûpwa̤ gesô̌ bǎ tôshô̌bě akû awǐlǒ nutini̤ ^{▼▼Tôshô̌bě akû asakhû̌lû̌lǒ nutini̤ mî̌ amè̤̌kû̌ khònò̤̌ pwa̤yṳ̌ǎ Khrǐphû̌ tokhlǒ hî̌ kû̌ lṳmṳ̌dǔ nutini̤ hǒ.} lṳmṳ̌wî̤sò nutôwô̤. Htodě dǒnô̌kònu a cû̌dǔlè̌lṳ̌ wǐ anǎ̤ kû̌ Magadalǎ dokûphû̌ Mǒ̤ma̤rǐ. Dě Mǒ̤ma̤rǐ nutôpwa̤ nî̌ a mî̌ pwa̤mǒ̤ dǒ Yeshǔ wṳ̂̌hǎhtò̌pè̤̌kè bǎ lû̌û khînǎkhîno susô̌tôdo dǒ alô̤ nutôpwa̤ hǒ. 10 Pô̤̌nudě, Mǒ̤ma̤rǐ cû̌ shôbǐǐlṳ̌ bǎ kòyò dǒ a cû̌cukhacu kû̌ Yeshǔ nutokhlǒ kû̌ Yeshǔ ô̌lṳ̌htò̌ bǎ lû̌û awe̤akè. Bǎnuakha asî sǎplǎ̤sǎyṳ dě ô̌yî̤̌ô̌hǎ pepwǎ lô̌khô. 11 Asî ganǎ̤de Mǒ̤ma̤rǐ shôbǐǐ bǎ asî kû̌, “Yeshǔ htûpwa̤ pwǎ, he kè̌shǐ sanǎ̤ a kû̌ henǎ̤,” a shôbǐǐ bǎ asî pô̤̌nu bǎbǎkǎlè asî yṳ̌ǎtô̤̌.

Yeshǔ ô̌lṳ̌htò̌ bǎ akhôphijǎ sò̌ginǐ̤.

(Lǔka 24:13-35)

12 Dǒnô̌kònu akhôphijǎ sò̌ginǐ̤ hǎhtò̌cû̌ dǒ dolǎ̤shô̌kû akha asî kè̌shǐ Yeshǔ htû̌tèplè̌khô̌kè bǎ anǎ̤ dě a dǔlè̌lṳ̌ bǎ asî sò̌ginǐ̤. 13 A khôphijǎ nusò̌ginǐ̤ ge shôbǐǐ bǎ akhôphijǎ dǒ ashǔshawa̤ tokhlǒ bǎbǎkǎlè asî yṳ̌ǎ lô̌khô kòyò sò̌ginǐ̤ ayô̤̌ tô̤̌.

Yeshǔ ô̌lṳ̌htò̌ bǎ akhôphijǎ shǐtôpwa̤

(Matè̌ 28:16-20; Lǔka 24:36-49; Yṳ̂ha 20:19-23; Pwa̤nophû̌ 1:6-8)

14 Dǒ nô̌kòpě tôplǎ dě bǎ akhôphijǎ shǐtôpwa̤ ǎshǎ akhanu, a dǔlè̌lṳ̌ bǎ sô̌ asî kû̌ anǎ̤. Kòyò dǒ a kè̌shǐ Yeshǔ si ihtǒ htûpwa̤ gesô̌ tokhlǒ shôbǐǐ bǎ asî bǎbǎkǎlè asî ikǒpwǐ̤ dě a yṳ̌ǎ lô̌khô kòyò yô̤̌tô̤̌ akhû̌akhî, Yeshǔ sǎhtǎ asî.

15 Dě a hî̌ asî kû̌, “Cû̌ dǒ hǎkhû̌ pṳ̂̌tôbě dě cû̌lè shôbǐǐ padô̌pû, lǒ̤bò kòyò pṳ̂̌tôpwa̤ kû̌ ta̤sǎlě̤we̤kè nu nî̌꤮. ^c 16 Kòyò dǒ a yṳ̌ǎ ta̤sǎlě̤we̤kè nudě a ju anǎ̤ kû̌ shi tôpwa̤pwa̤ nî̌ a gǔ nǐ̤bǎ ta̤ma̤hǎplǎge pě. Bǎbǎkǎlè kòyò dǒ a yṳ̌ǎ tô̤̌ tokhlǒnu a gǔ khòbǎ ta̤cî̌htò̌ pě. 17 Kòyò dǒ a yṳ̌ǎ tokhlǒnu he gǔ ǐ asî ta̤siwi̤sòwò̤ dǒ a gǔ ma̤jò lô̌khô ta̤cô̌klǐcô̌sè tokhlǒ pě. Asî gǔ wṳ̂̌htò̌bò̌ lô̌khô khînǎkhîno tokhlǒ kû̌ hemi̤ pě, asî gǔ hî̌bǎ jò yô̤̌sǎ dǒ asî hî̌bǎ jò nô̌꤮ tô̤̌ nutokhlǒ pě. 18 Asî glè̌ pṳ̂̌ wṳ̂̌phǔmò̤̌ tokhlǒ bǎbǎ, a glè̌ cû̌ǎbǎ ôbǎ ta̤wè̤̌ta̤htòshi dǒ ama̤si jònu tokhlǒ bǎbǎ, a ma̤pò̤̌ma̤sha nô̌ asî tocǒ꤮ tô̤̌. Asî kè̌ dò̌htò̌ acǔde dǒ kòyòshǐkòyòsha tokhlǒ alô̤ hî̌nu, asî ta̤shǐta̤sha gǔ hǎmǎkè bò pě.”

Cǒmara kaǎ gehtò̌ Yeshǔ dǒ mǒkhû̌

(Lǔka 24:50-53; Pwa̤nophû̌ 1:9-11)

19 Běcǎ Yeshǔ hî̌bǎhto kû̌ akhôphijǎ tokhlǒ dě Cǒmara kaǎ gehtò̌kè yǎ dǒ mǒkhû̌ dě a htò̌hǎnòò̌ dǒ Cǒmara cǔtômû tôkhô. ^d 20 Yeshǔ akhôphijǎ tokhlǒ cû̌lè shôbǐǐlṳ̌ bǎ kòyò kû̌ Cǒmara alě̤ayô̤̌ dǒ ta̤lǎ̤ pṳ̂̌꤮ tûkû. Pô̤̌khô kòyò gǔ yṳ̌nǐ̤nǎ̤nǐ̤ lô̌khô kû̌ ta̤sǎlě̤we̤kè dǒ asî shôbǐǐ bǎ kòyò numî̌ a mè̤̌mî̌ca ayanu, Běcǎ ǐ lò̤ asî dǒ a gǔ ma̤jò lô̌khô ta̤ma̤ ta̤cô̌klǐcô̌sè tokhlǒ pṳ̂̌tocǒ. ^{▼▼kòyò wě̤ lî̤phě dǒ꤮ wǐkha dǒ kòyò nǎla̤ǐ a tokhlǒ kû̌ lî̤bě dǒ ashǔshawa̤ tokhlǒnu, Makǔ 16:8-20 hǒonu kòyò kè̌shǐ a ô̌patôkǔ tô̤̌.}