Mark 2
Yeshǔ ma̤hǎmǎbǎ kòyò nǎ̤sitôkhô
(Matè̌ 9:1-8; Lǔka 5:17-26)
1Nô̌kò ginǐ̤suni̤nu Yeshǔ gesô̌ dǒ Wî̤̌kaperanò̤ akû dě kòyò tokhlǒ ganǎ̤de lô̌khô kû̌ a ô̌ dǒ hǐdǒkû. 2Pô̤̌nudě kòyò hè tîdî̌tòshò̌ dû̌ tûlû̌shû̌lě dě bǎ takhakhlo pwǎnu dě agûlǎ̤ ô̌ pe tûkû꤮ tô̤̌. Yeshǔ shôbǐǐlṳ̌ sû̌ǐtòwòǐlò̤ bǎ asî kû̌ Cǒmara alě̤ayô̤̌ tokhlǒ. 3Bǎnu akha pwa̤khû sò̌lǐ̤ ò̌hènṳ̌ kòyònǎ̤ si tôkô̌ke dǒ Yeshǔ a ô̌ tôpwa̤. 4Bǎbǎkǎlè kòyò ô̌dû̌ tûlû̌shû̌lě akhû̌akhî, asî hènṳ̌phǔjò pe dǒ Yeshǔ a ô̌ tô̤̌ dě a htò̌ ma̤phlô gukhû̌tadǎkhû̌ bǎ Yeshǔ ô̌ akhû̌nu dě a jèlò̤tě̤ kòyò sitôkô̌ke nutôpwa̤ kû̌ hujǒ. 5Bǎ Yeshǔ kè̌shǐ asî a ta̤yṳ̌ta̤nǎ̤ ô̌ pô̤̌nu dě a hî̌ kòyò si tôkô̌ke nutôpwa̤ kû̌, “He phû̌pwa̤khû he plûkè na ta̤sǔ hǒ,” a hî̌ lû̌ pô̤̌nu. 6Bǎnu akha pwa̤sû̌ǐ ta̤sû̌ta̤tòwò asara tokhlǒ hǎnòò̌ lô̌khô bǎnu dě a gènè̤ lô̌khô dǒ a sǎphlǒkû kû̌, 7“Kòyò hǒtôpwa̤ a cû̌ hî̌tǒ̤ pô̤̌o ma̤titè? A hî̌bǎsǔ hî̌bǎplěkè Cǒmara hǒ. Mò̌pè tôpwa̤ glè̌ plûkè jò ta̤sǔ pě? Pwa̤ plûkè jò ta̤sǔ mî̌ Cǒmara tôpwa̤nô̤̌ pwǎ.” 8Tôplǎnô̤̌ Yeshǔ sî̌ya asî ta̤gènè̤ dǒ sǎphlǒkû dě a hî̌ asî kû̌, “Sî cû̌gènè̤ tǒ̤ lô̌khô dǒ sî sǎphlǒkû pô̤̌numî̌ ma̤titè? 9He hî̌ kòyò sitôkhô tôpwa̤ kû̌, ‘he plûkè na ta̤sǔta̤plě hǒ’ mè̤̌tô̤̌dě ‘ihtǒ phî̌nṳ̌ na khlô̌lǎ̤danu dě cû̌ mò̌’ hî̌mò̌mî̌ ayûkhlo bǎtè tocǒya? 10Bǎbǎkǎlè Kòyòphû̌khû mî̌ he, ma̤pô̤̌ sî gǔ sî̌ya lô̌khô kû̌ dǒ hǎkhû̌nu, he ô̌ kû̌ ta̤siwi̤sòwò̤ dǒ he bǎ plûkè kòyò ta̤sǔta̤plě tokhlǒnudě, he gǔ dǔlè̌lṳ̌ bǎ sî,” a hî̌ htopô̤̌nudě, a hî̌ kòyò sitôkô̌ke tôpwa̤ kû̌, 11“He hî̌ na, ihtǒ tûlûnṳ̌ na khlô̌lǎ̤da nudě gemò̌ dǒ na hǐnu.” 12Dě taplǎnô̤̌ a ihtǒ tûlûnṳ̌ a khlô̌lǎ̤da dě a hǎhtò̌cû̌ dǒ kòyò lǒ̤bò a lô̤mô̤̌. Kòyò pṳ̂̌tôpwa̤ ǒò̌ kiti̤kaabò dě htû̌sò̌htò̌ lô̌khô Cǒmara dě a hî̌ lô̌khô kû̌, “Ta̤ma̤anǎ̤ pô̤̌onu, pa kè̌shǐbǎnô̌ tôkhò̌꤮ tô̤̌,” a hî̌ lô̌khô pô̤̌nu.Yeshǔ kaǎ Khûle̤wǐ
(Matè̌ 9:9-13; Lǔka 5:27-32)
13Yeshǔ hǎhtò̌cû̌ tîkhîsô̌ dǒ Galǐlè̤̌ shikoǒ kòshî̌ dě kòyò saprṳ̂saphǎ hè ô̌te̤we̤ bò kè yǎ dě a sahtò̌ sû̌ǐtòwòǐ sô̌ asî bǎnu. 14Bǎ a cû̌ akhanu, a kè̌shǐ PhaAlaphè̌ aphû̌ Khûle̤wǐ. A mî̌ pwa̤kwita̤kûta̤mṳ̂̌ tôpwa̤. A kè̌shǐ Le̤wǐ hǎnòò̌ dǒ lǎ̤kwi ta̤kûta̤mṳ̂̌ hǐkû dě Běcǎ Yeshǔ hî̌ yǎ kû̌, “Gû̌kû̌ hekò,” dě Khûle̤wǐ ihtǒ gû̌cû̌kû̌ akò. 15Bǎ Yeshǔ kû̌ akhôphijǎ ǎdî lṳmṳ̌hǎta̤ǎ dǒ Khûle̤wǐ hǐ akha, pwa̤kwi ta̤kûta̤mṳ̂̌ tokhlǒ kû̌ pwa̤ma̤sǔphû̌ tokhlǒ ǎ ô kû̌ asî, ma̤titè̌hî̌dě kòyò dǒ a gû̌ Yeshǔ akò tokhlǒnu, a sô̌sô̌pwǎ kû̌ pwa̤ma̤sǔphû̌nu a ô̌dû̌pe. 16Bǎ Pharishè̌phû̌ dǒ a sû̌ǐ ta̤sû̌ta̤tòwò asara nutokhlǒ kè̌shǐ Yeshǔ ǎcuôcu kû̌ pwa̤ma̤sǔphû̌ tokhlǒ kû̌ pwa̤kwi ta̤kûta̤mṳ̂̌ tokhlǒ akhanu, a gwè̌ Yeshǔ akhôphijǎ tokhlǒ kû̌, “Ma̤titèdě a cû̌ ǎcuôcu tǒ̤ kû̌ pwa̤kwi ta̤kûta̤mṳ̂̌ kû̌ pwa̤ma̤sǔphû̌ nutokhlǒ ma̤titè?” A gwè̌ lô̌khô pô̤̌nu. 17Bǎ Yeshǔ ganǎ̤de asî gwè̌ pô̤̌o akhanu, a hî̌shěshu asî kû̌, “Kòyò dǒ a ô̌shû̌ô̌mô̤ tokhlǒnu, a lǎ̤lṳ̂ bǎ ta̤khû̌saradû̌ tô̤̌. Kòyò dǒ ashǐasha tokhlǒnu mî̌ a lǎ̤lṳ̂bǎ nò ta̤khû̌saradû̌ pwǎ. He hè kaǎge kòyò dǒ acǒatè̤ nutokhlǒ mè̤̌tô̤̌. He hè kaǎgepwǎ pwa̤ma̤sǔphû̌ nutokhlǒ pwǎ.”Kòyò gwè̌ Yeshǔ dǔǎshǎ awe̤akè
(Matè̌ 9:14-17; Lǔka 5:33-39)
18Bǎnu akha Khûyṳ̂ha akhôphijǎ kû̌ Pharishè̌phû̌ tokhlǒ a dǔǎdǔô lô̌khô. Dě kòyò tokhlǒkhlǒ hè gwè̌ Yeshǔ kû̌, “Khûyṳ̂ha akhôphijǎ kû̌ Pharishè̌phû̌ akhôphijǎ tokhlǒ dǔǎ shǎǎshǎô, bǎbǎkǎlè nakhôphijǎ tokhlǒdě a dǔǎ gû̌ kòyò shǎǎshǎô tô̤̌ ma̤titè?” A hè gwè̌ lû̌ pô̤̌nu. 19Běcǎ Yeshǔ hî̌shěshu asî kû̌ yô̤̌sǎkhěkhô̌ tômû dě a hî̌ kû̌, “Bǎ khòmò̤̌phû̌khû ô̌cu pe kû̌ akhô shǐpwǎ̤shǐmè̤ akhanu, akhô shǐpwǎ̤shǐmè̤ nutokhlǒ cû̌dǔǎdǔô jò hî̌tè? Bǎ khòmò̤̌phû̌khû cû̌kè khôtô̤̌, a kè̌ ô̌cupe kû̌ asû̌akhô tokhlǒ hî̌nu, asî dǔǎ jò shǎǎshǎô tô̤̌. 20Bǎ kòyò kaǎcû̌ tephekè khòmò̤̌phû̌khû pě akhanu, asî glè̌ dǔǎdǔô lô̌khô pě. 21“Kòyò shò̌phǎdǎ gò̌pwǐyò̤̌ kû̌ gò̌pwǐsa dǒ a sutǔ nò̌khôtô̤̌ nu a ô̌ tôpwǎ̤ tô̤̌. Kè̌ shò̌phǎdǎ pô̤̌numî̌ gò̌pwǐsa nî̌ a gǔ htò̌sutǔkè dě a lě̤ cî̌sutǔ hǎyè̌ lè̤̌kè pô̤̌ gò̌pwǐyò̤̌nu pě. 22Kòyò tènṳ̌ sîpî̌ shisî̌yô̤̌sa dǒ shiôkobě ali̤kûnu a ô̌ tôpwǎ̤ tô̤̌. ▼▼shiko nu kòyò ma̤ yǎ kû̌ ta̤mi̤ta̤mò̤̌ abě.
Kòyò kè̌ tènṳ̌ pô̤̌nudě shisî̌yô̤̌ nî̌ a ma̤ hǎphò̌kè shiôkobě ali̤ tômè pě, dě shisî̌yô̤̌ gǔ lò̤gǔlò̤wṳ̂̌kèbò bò pě. Shisǐyô̤̌ asanu kòyò bǎ tènṳ̌ pwǎ dǒ shikoběsa akû pwǎ.” Yeshǔ mî̌ lṳmṳ̌dǔ a Běcǎ
(Matè̌ 12:1-8; Lǔka 6:1-5)
23Bǎ lṳmṳ̌dǔ ▼▼Yǔdaphû̌ lṳmṳ̌dǔ mî̌ khònò̤̌ pwa̤yṳ̌ǎ khrǐphû̌sî kaǎ yǎ kû̌ Mô̤gètè̤
nutini̤ akhanu, Yeshǔ kû̌ akhôphijǎ tokhlǒ cû̌nṳ̌bò̌ kòyò bǔjû̌ hǔklakhû̌ tokhlǒ, dě akhôphijǎ tokhlǒ phû̌ǎ cû̌ kòyò bǔjû̌sǎ. c 24Dě Pharishè̌phû̌ tokhlǒ hî̌ Yeshǔ kû̌, “Kè̌mò̌, ta̤ma̤ dǒ asî tôbǎ ma̤ tô̤̌ dǒ lṳmṳ̌dǔ tokhlǒnu, asî cû̌ma̤tǒ̤ lô̌khô aya pô̤̌nu ma̤titè?” 25Dě a hî̌shěshu asî kû̌, “Dǒ awǐkha bǎ Khûdawi̤ kû̌ asû̌akhô tokhlǒ sǎǎsǎô jî̌ lû̌û dě a lǎ̤ǎlǎ̤ô ô̌ tô̤̌ akhanu, a ma̤kwè̌ titè numî̌ sî dô̌ nô̌ gû̌ kòyò tô̤̌ ya? 26Asî cû̌nṳ̌ lô̌khô dǒ Cǒmara ahǐkû dě mû̌ dǒ kòyò lṳhtò̌ kû̌ Cǒmara tokhlǒ numî̌ a ô̌ bǎnu, dě a ǎnǐ̤ pwǎtǒ̤ pwa̤shû̌gǎ tokhlǒ pwǎ bǎbǎkǎlè Khûdawi̤ kû̌ akhôphijǎ tokhlǒ cû̌nṳ̌phî̌ǎ bǎ tô̤̌ya? Bǎnukha numî̌ atô kû̌ Khûabyata htû pwa̤shû̌gǎ ikǒlǒkò.” d 27Běcǎ Yeshǔ hî̌ asî kû̌, “Kòyò numî̌ lṳmṳ̌dǔ aya mè̤̌tô̤̌, lṳmṳ̌dǔ numî̌ kòyò lǒ̤bò aya. 28Kòyòphû̌khû nî̌ lṳmṳ̌dǔ a Běcǎ cǒ tôpwa̤hǒ,” a hî̌shěshu asî pô̤̌nu.
Copyright information for
KxfSCKXF