Mar 3 | KxfSCKXF | STEP | Yeshǔ genṳ̌ sô̌ dǒ ta̤cabahǐkû dě bǎnu tûkûnî̌, kòyò cǔgô̌si ô̌ tôpwa̤.

Mark 3

Kòyò cǔgô̌si tôkhô tôpwa̤

(Matè̌ 12:9-14; Lǔka 6:6-11)

1 Yeshǔ genṳ̌ sô̌ dǒ ta̤cabahǐkû dě bǎnu tûkûnî̌, kòyò cǔgô̌si ô̌ tôpwa̤. 2 A tô kû̌ lṳmṳ̌dǔ akhû̌akhî, Pharishè̌phû̌ tokhlǒkhlǒ nî̌ a sǎyṳ pṳ̂̌ Běcǎ Yeshǔ ata̤sǔ dě a ô̌pǒ̤ kè̌ lû̌ kû̌ lṳmṳ̌dǔ numî̌ a ma̤hǎmǎbǎ kòyò cǔgô̌si tôkhô nutôpwa̤ pě ya, tô̤̌ ya? pô̤̌nu. 3 Dě Yeshǔ hî̌ kòyò cǔgô̌si tôkhô nutôpwa̤ kû̌, “Hè dǒ lô̤mô̤̌.”

4 Htodě a gwè̌ asî kû̌, “Pa ta̤sû̌ta̤tòwò hî̌ pa kû̌ bǎ Yǔdaphû̌ a lṳmṳ̌dǔ akhanumî̌, pa tôbǎ ma̤wô̌ kòyò ya? Mè̤̌tô̤̌mî̌ pa tôbǎ ma̤pò̤̌ma̤sha kòyò ya? Pa tôbǎ ma̤hǎplǎge kòyò tôpwa̤pwa̤ a yôla htûpwa̤ ya? Mè̤̌tô̤̌mî̌ pa tôbǎ ma̤si kòyò ya?” Bǎbǎkǎlè asî dò̌tûklû̌ bòkè pwǎ.

5 A bǎsha jî̌ Yeshǔ asǎphlǒ, ma̤titè̌hî̌dě asî nò̌kudu bò pṳ̂̌dǐpṳ̂̌pwa̤, ta̤sǎyṳgwèbǎǐ kòyònu a ô̌ jò tîkî̌ tô̤̌ akhû̌akhî, Yeshǔ kè̌ asî dě a sǎphlǒdû̌ tûlû̌shû̌lě dě a hî̌ kòyò cǔgô̌si tôkhô nutôpwa̤ kû̌, “Yṳ̂̌htò̌ na cǔgô̌nu,” dě a yṳ̂̌htò̌ acǔgô̌, dě acǔgô̌ wô̌tîkhî bò sô̌. 6 Pharishè̌phû̌ tokhlǒ hǎhtò̌cû̌ tephekè dě taplǎnô̤̌ asî cû̌ô̌cu kû̌ kòyò dǒ a gû̌kû̌ Khwǐherû akò nutokhlǒ dě asî cû̌ ô̌cu hî̌bǎplǒ kè̌khî lû̌û kû̌ tôbǎ ma̤si Yeshǔ hî̌tè awe̤akè.

Kòyò saprṳ̂saphǎ gû̌ Yeshǔ akò

7 Yeshǔ kû̌ akhôphijǎ tokhlǒ hǎhtò̌cû̌ tephekè dǒ Galilè̤̌ shikoǒdû̌ dě kòyò dǒ Galilè̤̌gǎ kû nutokhlǒ gû̌ wô̤̌ gû̌ asîkò. Tokhlǒkhlǒ numî̌ dǒ Yǔdagǎkû, 8 Tokhlǒkhlǒ numî̌ dǒ Wî̤̌yarǔshôle, tokhlǒkhlǒ numî̌ dǒ Idǔmègǎ kû̌ dǒ Jòda shilô̤̌mǒ̤ lô̤̌bò̌ tôgǎ, tokhlǒkhlǒ numî̌ a ô̌ te̤we̤bò lô̌khô bǎ Wî̤̌tǔrǔ kû̌ Wî̤̌shǐdṳ̂ nutokhlǒ gû̌bò asî kò. Lǒ̤bò kòyò tokhlǒ numî̌ kòyò dǒ a ganǎ̤debǎ bò Yeshǔ ma̤ ta̤cô̌klǐcô̌sè nutokhlǒ dě a gû̌cû̌kû̌ asîkò pwǎ. 9 Yeshǔ hî̌ akhôphijǎ tokhlǒ kû̌ pô̤̌khô kòyò saprṳ̂dû̌ nutokhlǒ gǔ hè tîdî̌tòshò̌ a tô̤̌ ayanu, a notîwî̌tòwò nǎ asî sǒkhli tôbǎ. ^a 10 Yeshǔ ma̤hǎmǎ hto dû̌wî̤ bǎ kòyòsî ata̤sha tokhlǒ hǒ akhû̌akhî, dě a cû̌ hî̌ akhôphijǎ pô̤̌o, dě kòyò dǒ ashǐasha ô̌pe tokhlǒnu, a lè̤̌ tidǐtòshò̌hètô lû̌û dě glè̌ hè tô̌bǎ bò lû̌ akhû̌akhîdě a noma̤ kòyò pô̤̌nu pwǎ. 11 Nǎ ma̤bǎ kòyò tokhlǒnu, a kè̌shǐ Yeshǔ bǎkhò̌tè bǎbǎ, a lòkhǔpo̤ dǒ Yeshǔ a lô̤mô̤̌ dě a kaǎgǔ lô̌khô kû̌, “Na mî̌ Cǒmara aphû̌khû tôpwa̤,” a hî̌ lô̌khô pô̤̌nu. 12 Dě a sǎhtǎ khînǎ nutokhlǒ kû̌, “He mî̌ mò̌pènu shôbǐǐlṳ̌ tǎ̤ kòyò tôpwǎ̤꤮ tǎ̤mǎ̤ nî̌꤮.”

Yeshǔ rû̌htò̌ akhôphijǎ shǐsò̌ginǐ̤.

(Matè̌ 10:1-4; Lǔka 6:12-16)

13 Htodě Yeshǔ htò̌ dǒ khôlôlô̤ dě a kaǎ kòyò dǒ atô lû̌sǎphlǒ nutokhlǒ dǒ a ô̌ dě asî hè lô̌khô dǒ lû̌ûô̌. 14 Yeshǔ rû̌htò̌ akhôphijǎ shǐsò̌ginǐ̤ dě a hî̌ asî kû̌, “He rû̌htò̌ sî kû̌ sî tôbǎ ô̌ kû̌ he htokhôtô̤̌ he gǔ no hǎhtò̌cû̌ sî pě dě sî bǎ cû̌ shôbǐǐ bǎ kòyò kû̌ Cǒmara alě̤ayô̤̌ pě. Dě a kaǎ tûû̌ asî hǒo shǐsò̌ginǐ̤ ami̤ kû̌ pwa̤nophû̌. ^{▼▼lî̤ta̤bělô̤ dǒwǐkha tokhlǒkhlǒnu, a kaǎ ǐtûû̌pô̤̌ asî hǒo shǐsò̌ginǐ̤ ami̤ kû̌ pwa̤nophû̌, lî̤ hǒtôplônu a wě̤nṳ̌lû̌û tô̤̌.} 15 Htokhôtô̤̌ he gǔ ǐ sî ta̤siwi̤sòwò̤ dǒ sî gǔ wṳ̂̌hǎhtò̌pè̤̌kè khînǎ nutokhlǒ pě.” 16 Yeshǔ rû̌htò̌ akhôphijǎ shǐsò̌ginǐ̤ tokhlǒ numî̌ kwè̌ mò̌pè hî̌ dě, Khûshǐmṳ̂ (dǒ Yeshǔ kaǎsatèplè̌ lû̌mi̤ kû̌ Khûpetarǔ) 17 Phasebedè̌ aphû̌pwa̤khû Khûya̤kû kû̌ apṳ̌ Khûyṳ̂ha, dě Yeshǔ kaǎsatèplè̌ asîmi̤ kû̌ Khûbaanî̤ke. Amûasǎ mî̌ shî̌lî̌ a phû̌pwa̤khû tokhlǒ. ^{▼▼pwa̤sî̌pwa̤jò̌ tokhlǒkhlǒ hî̌ kû̌, shî̌lî̌ a phû̌pwa̤khû amûasǎ mî̌, asî sǎphlǒdû̌phwè akhû̌akhî, pwa̤sî̌pwa̤jò̌ tokhlǒkhlǒ dě a hî̌ kû̌, asî shôbǐǐ bǎ kòyò hî̌nu, a ô̌ kû̌ a ta̤siwi̤sòwò̤ jò, a hî̌ pô̤̌nu.} 18 Khûîdru, Khûphǐlǐpǔ, Khûbatòlòmè̌, Khûmatè̌, Khûtû̌mǎ, PhaAlaphè̌ aphû̌khû Khûya̤kû, Khûtadè̌, Khûshǐmṳ̂ dǒ a mô̤ǐtûû̌ ashiagǎ nu tôpwa̤, 19 Kû̌ Khûyǔda Isakariyû dǒ a shaǎlò̤kè Yeshǔ nutôpwa̤.

Yeshǔ kû̌ Belǎsebulǎ

(Matè̌ 12:22-32; Lǔka 11:14-23, 12:10)

20 Hǒtaplǎdě Yeshǔ ge dǒ hǐ. Kòyò hè ô̌wô̤̌ bò tîkhîsô̌ lû̌û tǒ̤dǒ asî ǎlǎôlǎ pe jò shǎǎ tô̤̌. 21 Bǎ a pṳ̌wè̤̌mǒ̤pha ganǎ̤de ta̤ma̤anǎ̤ pô̤̌o akhanu, asî hǎhtò̌cû̌ dě a gǔ cû̌ cî̌ge lû̌û ma̤titè̌hî̌dě asî hî̌ lû̌yô̤ kû̌, “A sô̌sô̌ kû̌ a kimwi,” asî hî̌ lû̌ pô̤̌nu.

22 Htodě pwa̤sû̌ǐ ta̤sû̌ta̤tòwò asara ô̌ dǒ Wî̤̌yarǔshôle tokhlǒ hèlò̤ dě a hî̌ lô̌khô kû̌, “Khînǎkhîno Belǎsebulǎ ô̌ dǒ Yeshǔ akû, dě a nǐ̤bǎ khînǎ ikǒlǒkòdû̌ nutokhlǒ a ta̤siwi̤sòwò̤ dě a wṳ̂̌hǎhtò̌bò̌ pwǎ khînǎ nutokhlǒ pwǎ.” ^d

23 Dě Yeshǔ kaǎ asî dǒ a ô̌ dě a hî̌ asî kû̌ yô̤̌sǎkhěkhô̌ tokhlǒ pô̤̌o, “Hǎkhû̌tana cû̌ wṳ̂̌htò̌bò̌ jò tîkhîsô̌ tûû̌ anǎ̤ hî̌tè? 24 Shigǎphû̌ kû̌ shigǎphû̌ kè̌ shěpě̤ tûû̌ kè̌khîsô̌mò̌ lû̌û dě ashiagǎ ô̌měô̌gle pe tô̤̌ dě a gǔ lò̤tě̤pro̤kè pě. 25 Hǐphû̌phòphû̌ kè̌ to̤klî̌ tûû̌ kè̌khîsô̌mò̌ lû̌ dě hǐphû̌phòphû̌ ô̌ plǒcujò sělě pe lû̌ tô̤̌. 26 Pô̤̌nudě hǎkhû̌tana kè̌ shě tûû̌ sô̌mò̌ anǎ̤ dě a siwi̤sòwò̤ tokhlǒnu, a ô̌měô̌gle jòtô̤̌. A siwi̤sòwò̤ tokhlǒ ô̌ pe tô̤̌. 27 Bǎbǎkǎlè bǎ kòyò tôpwa̤ cû̌nṳ̌ dǒ hǎkhû̌tana dǒ asô̌sô̌kû̌ kòyòshû̌ kòyòsho tôpwa̤ hǐkû akhanu, a kè̌ nṳ̌ comě wǐmò̌ lû̌û tô̤̌ nu, a nṳ̌ phî̌sigwî̌ jò atě̤ta̤ tôkhò̌꤮ tô̤̌. A comě hto lû̌û dě a phî̌sigwî̌ jò nô̌ lû̌û tě̤ta̤ pwǎ. 28 He hî̌cǒcǒ sî, kòyòhǎkhû̌phû̌ a ta̤sǔ tokhlǒ kû̌ lǒ̤bò a hî̌bǎ phû̌mò̤̌ Cǒmara tokhlǒnu Cǒmara gǔ plûkè bò alô̌khôsî ta̤sǔ pě. 29 Bǎbǎkǎlè kòyò dǒ a pîjî̌ǐsho Yôla Plò̌shǐ Běcǎ nu Cǒmara plûkè bǎ ata̤sǔ tîkî̌꤮ tô̤̌. A ta̤sǔ nu a gǔ ô̌mějò tûjû̌pwa̤ talakhǎ pě.” ^e

30 Yeshǔ cû̌hî̌tǒ̤ pô̤̌o ma̤titè̌hî̌dě, “Khînǎkhîno ô̌ dǒ lû̌kû,” asî hî̌ lô̌khô pô̤̌nu.

Yeshǔ amǒ̤ kû̌ apṳ̌wè̤̌ tokhlǒ

(Matè̌ 12:46-50; Lǔka 8:19-21)

31 Yeshǔ amǒ̤ kû̌ a pṳ̌pwa̤khû tokhlǒ hèô̌ ihtǒ dǒ hǐdòkû̌ dě a nocû̌kaǎ kòyò kû̌ Yeshǔ. 32 Dě kòyò saprṳ̂saphǎ hǎnòò̌ ô̌ te̤we̤ prṳ̂phǎ bò kû̌ Yeshǔ. Kòyò hî̌ Yeshǔ kû̌, “Kè̌mò̌ dǒnu, namǒ̤ kû̌ na pṳ̌pwa̤khû na pṳ̌pwa̤mǒ̤ ^{▼▼lî̤ta̤bě dǒwǐkha tokhlǒkhlǒnu “na pṳ̌pwa̤mǒ̤” lî̤phlǒ hǒonu a wě̤nṳ̌bǎ tô̤̌.} tokhlǒ ô̌bò dǒ hǐdòkû̌nu dě a gwè̌lǎ lô̌khô na.”

33 Dě Yeshǔ hî̌shěshu asî kû̌, “Hemǒ̤ kû̌ he pṳ̌pwa̤khû tokhlǒmî̌ mò̌pè?”

34 A kè̌ te̤we̤bò kòyò hǎnòò̌plǒ te̤we̤ lû̌ nutokhlǒ dě a hî̌ kû̌, “Hǒo, kòyò dǒ a ô̌ bǒo tokhlǒ numî̌ hemǒ̤ kû̌ he pṳ̌pwa̤khû tokhlǒ amè̤̌ hǒ. 35 Kòyò dǒ a ma̤tôta̤ pô̤̌ Cǒmara a ta̤sǎyṳ nutokhlǒmî̌ he pṳ̌pwa̤khû tokhlǒ kû̌ hemǒ̤ hǒ,” a hî̌ pô̤̌nu.