Mark 5

Yeshǔ ma̤hǎmǎ bǎ kòyòpha tôpwa̤ dǒ khînǎ dò̌ yǎnu

(Matè̌ 8:28-34; Lǔka 8:26-39)

1Yeshǔ kû̌ akhôphijǎ tokhlǒ cû̌tǒ̤ dǒ shikoǒdû̌ lô̤̌bò̌ Garasaphû̌ tokhlǒ a shigǎkû nu. 2Bǎ a ô̌ dǒ sǒkhlikû hǎhtò̌ akhanu, kòyòpha dǒ khînǎ dò̌ yǎ tôpwa̤nu a ô̌ dǒ lṳ̌kû hǎhtò̌ dě a hǎhtò̌cû̌ kè̌shěshu kû̌ Yeshǔ. 3Kòyòpha hǒtôpwa̤ nî̌ a cû̌ô̌ pwǎ bǎ khokû kòyò lǎ̤lǔǐlṳ̌ lṳ̌gûlǎ̤ nu pwǎ. Dě kòyò comě pè̤̌ lû̌ tôpwǎ̤꤮ tô̤̌, kòyò comě yǎ kû̌ sǒpli̤tè̤glè kǎlè a pè̤̌tô̤̌. 4Kòyò comě taga lû̌cǔde kû̌ sǒpli̤tè̤glè bǎbǎkǎlè a htò̌tṳ̌kè. Akhò̌lôpô̤̌ dě kòyò comě kû̌ sǒpli̤tè̤glè, bǎbǎkǎlè a cî̌tṳ̌kè pwǎ. Dě kòyò dǒ a ma̤pè̤̌ lû̌ nu, a ô̌ tôpwǎ̤꤮ tô̤̌. 5Bǎ a ô̌ dǒ khokû lṳ̌gûlǎ̤ akha, kû̌ bǎ a ô̌ dǒ shô̌kû akhanu, a yî̤̌kǒyî̤̌sa dě a ma̤shama̤htò taga tûû̌ sô̌ bò anǎ̤ kû̌ lǒ̤ pṳ̂̌taplǎ.

6Bǎ a kè̌shǐcû̌ tûcû pepwǎ Yeshǔ akhanu, a khlè̌hètô dǒ lû̌ô̌ dě a hè dô̌gînî̤lò̤ dǒ alô̤mô̤̌. 7Dě a kaǎgǔhtò̌ dě a hî̌ kû̌, “Ta̤dû̌ta̤htû gutṳ̌ Cǒmara aphû̌khû Yeshǔ꤮ na glè̌ hèma̤ kwè̌꤮ he titè? Olò̤ he dǒ Cǒmara ami̤kû kû̌, ma̤jî̌ma̤jû̌ tǎ̤ he tǎ̤mǎ̤ nî̌꤮.” 8Ma̤titèmî̌ Yeshǔ hî̌hto lû̌ kû̌, “Khînǎkhîno, hǎhtò̌cû̌ tephekè dǒ pwa̤khû nutôpwa̤ alô̤,” a hî̌hto lû̌ pô̤̌nu hǒ.

9Yeshǔ gwè̌ yǎ kû̌, “Nami̤ kû̌ mò̌pè?”

Dě a hî̌shěshu kû̌, “Hemi̤ kû̌ Lě̤ku, ▼

▼Lě̤ku amûasǎ mî̌ ô̌wô̤̌ô̌plṳ̂

ma̤titè̌hî̌dě pa ô̌wô̤̌ô̌plṳ̂,” a hî̌shěshu pô̤̌nu. 10Pô̤̌khô Yeshǔ gǔ wṳ̂̌hǎhtò̌kè asî tô̤̌nu, dě nohǎhtò̌cû̌ô̌kè asî dǒ gǎkhlo tô̤̌nu, asî kwisǎyṳ gutṳ̌glǎ Yeshǔ.

11Bǎnukha, htô̌ tôprṳ̂ konû̌ǎ te̤we̤phǔ ashǎ bǎ khôlôlô̤nu. 12Khînǎkhîno nutokhlǒ kwisǎyṳ Yeshǔ kû̌, “Nocû̌nṳ̌ ô̌ pû pa dǒ htô̌ nutokhlǒ akû dě plûnṳ̌ pû pa dǒ htô̌ nutokhlǒ akû nî̌,” a kwisǎyṳ lû̌ pô̤̌nu. 13Htodě Yeshǔ nohǎhtò̌cû̌ asî, dě asî hǎhtò̌cû̌kè dǒ kòyòpha nutôpwa̤ anǎ̤lô̤ dě a cû̌nṳ̌ô̌kè dǒ htô̌ nutûprṳ̂ akû. Htô̌ nutûprṳ̂ mî̌ a ô̌ a do ginǐ̤rǐ dě a pě̤lò̤tě̤kè dǒ gòpò̤̌lô̤ dě a lò̤tě̤cǔ sikè bò dǒ shidû̌shite̤we̤kû.

14Pwa̤kè̌pǒ̤ htô̌ nutokhlǒ khlè̌ge shôbǐǐlṳ̌ peshe cû̌ bǎ bò kòyò dǒ Wî̤̌kû kû̌ dophû̌shô̌phû̌ tokhlǒ akû kû̌ ta̤we̤ta̤kè hǒtokhlǒ. Dě a ma̤kwè̌ anǎ̤ hî̌tènu kòyò hèkè̌ lô̌khô bǎnu. 15Dě asî hè dǒ Yeshǔ a ô̌ dě a kè̌shǐ kòyòpha dǒ khînǎ hǎhtò̌cû̌kè dǒ akû nutôpwa̤ hǎnòò̌ bǎnu dě a kuhtò̌sô̌htò̌ wô̌gesô̌ aje dě asǎphlǒ wô̌tîkhî sô̌. Kòyò tokhlǒ kè̌shǐ yǎ dě a ǐsha bò lû̌lǎ̤. 16Kòyò dǒ a kè̌shǐ khînǎkhîno hǎhtò̌cû̌kè dǒ kòyòpha nutôpwa̤ akû kû̌ htô̌ nutokhlǒ ma̤kwè̌ anǎ̤ hî̌tè nu, asî cû̌ shôbǐǐ bǎ bò kòyò dǒ ashǔshawa̤. 17Kòyò tokhlǒ sahtò̌ kwisǎyṳ Yeshǔ kû̌ a gǔ hǎhtò̌cû̌ tephekè kû̌ asî gǎkû bǎnu.

18Bǎ Yeshǔ nṳ̌ dǒ sǒkhlikû akhanu, kòyòpha dǒ khînǎ hǎhtò̌cû̌kè dǒ akû nutôpwa̤ kwisǎyṳ lû̌ kû̌, “Khòsǎdô kaǎcû̌ nṳ̌dô̌ he.” 19Bǎbǎkǎlè Yeshǔ kaǎnṳ̌ yǎ tô̤̌, a hî̌ lû̌ kû̌, “Tô̤̌, ge dǒ na hǐnu dě gehî̌lṳ̌ bǎ pû na pṳ̌wè̤̌mǒ̤pha kû̌ Běcǎ ma̤wô̌ bǎ jò na hî̌tènu kû̌ a ta̤sǎyṳgwèbǎǐ na hî̌tè nu nî̌꤮,” a hî̌hto lû̌ pô̤̌nudě, 20Kòyò dǒ khînǎ hǎhtò̌cû̌kè dǒ lû̌kû nutôpwa̤ hǎhtò̌cû̌ dě a sahtò̌ cû̌ shôbǐǐ bǎ kòyò pṳ̂̌todo dǒ gǎtôgǎ kòyò kaǎ kû̌ “Dekapòlǐ ▼

▼Dekapòlǐ mî̌ Wî̤̌shǐ (10) ô̌cuô̌plǒ lû̌û ami̤

” akû dě Yeshǔ ma̤ bǎ kwè̌꤮ a hî̌tènu kû̌ kòyò lǒ̤꤮ bò ǒò̌ kiti̤kaa bò kwè̌ hî̌tènu a cû̌ shôbǐǐlṳ̌ bǎ bò kòyò bǎnu.

Pwa̤mǒ̤ dǒ a ta̤sha ô̌ tôpwa̤ kû̌ phijǎ pwa̤mǒ̤phû̌ tôpwa̤ si awe̤akè

(Matè̌ 9:18-26; Lǔka 8:40-56)

21Bǎ Yeshǔ getîkhîsô̌ dǒ shikoǒdû̌ lô̤̌bò̌ tôkhô kû̌ sǒkhli akhanu, kòyò saprṳ̂saphǎ hè ô̌plǒô̌cu ô̌wô̤̌ dǒ shikoǒdû̌ htu nu. 22Dě ta̤cabahǐ ikǒlǒkòdû̌ tôpwa̤, ami̤ kû̌ Phaya̤irǔ hèkè̌shǐ Yeshǔ dě a dô̌gînî̤lò̤ dǒ akhò̌lô̤pô̤̌ kòshî̌. 23Dě a kwisǎyṳ lû̌ kû̌, “He phû̌pwa̤mǒ̤ tôpwa̤ glè̌ sihǒ dě pô̤̌khô ata̤sha gǔ hǎmǎkè dě a gǔ ô̌htûpwa̤ nu, cû̌ dò̌htò̌ pû bǎ he na cǔde dǒ alô̤.” 24Dě Yeshǔ gû̌ge kû̌ yǎ.

Kòyò saprṳ̂saphǎ tîdî̌tòshò̌ cû̌ bò kû̌ Yeshǔ akò. 25Bǎnu akla pwa̤mǒ̤ dǒ a khòbǎ ta̤shasǐlò̤ dǒ ayî̤ shǐginǐ̤něnu a ô̌ tôpwa̤. 26Ta̤khû̌sara pṳ̂̌pwa̤ kè̌ǐma̤ǐ lû̌û bǎbǎkǎlè a yǎkhè̌ tô̤̌. A yabǎ tûû̌ anǎ̤ dě aruahta hǎbòkè bǎbǎkǎlè a yǎkhè̌hè lû̌ tô̤̌, ata̤sha nî̌ sǔ htûhtò̌ kû̌ sǔ a ma̤shû̌hè pwǎ. 27A ganǎ̤de Yeshǔ awe̤akè dě a tîdî̌hènṳ̌ dǒ kòyò ô̌wô̤̌ô̌prṳ̂kla dě a hètǒ̤ dǒ Yeshǔ nô̌kò dě a hètô̌ lû̌ jejû. 28A hî̌ anǎ̤ kû̌, “He kè̌ tô̌bǎ pwǎ ajejû nupwǎ mî̌ he ta̤shasǐlò̤ nî̌ a gǔ hǎmǎ pě,” a hî̌ dě, 29Taplǎnô̤̌ a sǐlò̤ ô̌kǔ dě a sî̌ya tûû̌ anǎ̤ kû̌ ata̤sha nu a hǎmǎkèhǒ.

30Hǒtaplǎdě Yeshǔ sî̌ya lò̤tûû̌ anǎ̤ kû̌ a ta̤pô̤ta̤phǎ hǎhtò̌cû̌kè dǒ anǎ̤lô̤. A htû̌tiwǐ anǎ̤ dǒ kòyò ô̌wô̤̌ô̌prṳ̂kla dě, a gwè̌ kòyò kû̌, “Mò̌pè tô̌bǎ he jejû ya?”

31Dě akhôphijǎ hî̌shěshu lû̌ kû̌, “Na kè̌shǐ tûû̌ kû̌ kòyò ô̌ te̤we̤plǒte̤we̤phǎ tîdî̌tòshò̌ bò na hǒ dě ma̤titèdě na cû̌gwè̌ tǒ̤ kû̌, ‘mò̌pè tô̌bǎ he jejû ya hî̌tè?’”

32Pô̤̌khô a gǔ kè̌shǐ kòyò dǒ a hè tô̌bǎ lû̌ nutôpwa̤ dě a kè̌le̤kè̌ge pe tûû̌. 33Dě pwa̤mǒ̤ nutôpwa̤ nî̌ bǎ a hètô̌bǎ lû̌ jejû akha, ta̤htûhtò̌ anǎ̤ kû̌ a hî̌tènu a sî̌yahèlò̤ ǐtûû̌ anǎ̤ akhû̌akhî, a ǐsha gònò̤̌gòglè dě a hèdô̌gînî̤û̌lò̤ dǒ Yeshǔ lô̤mô̤̌ dě a shôbǐǐlṳ̌ cǒtè̤ bò Yeshǔ. 34Dě Yeshǔ hî̌ lû̌ kû̌, “Phû̌pwa̤mǒ̤꤮, na ta̤yṳ̌ta̤nǎ̤ nî̌, a ma̤hǎmǎkè na ta̤shahǒ, gemô̤mô̤ gewô̌wô̌ pû nî̌꤮, na ta̤sha hǒo a hǎmǎ lò̤tûû̌hǒ.”

35Bǎ Yeshǔ hî̌bǎpepwǎ akhanu, kòyò tokhlǒ ô̌ dǒ Phaya̤irǔ dǒ a htû ta̤cabahǐ ikǒlǒkòdû̌ nutôpwa̤ ahǐ dě ahè, dě a hèpwe̤ǐ bǎ Phaya̤irǔ kû̌, “Naphû̌mǒ̤ sikèhǒ. Dě sî cû̌ma̤shû̌shǎ ma̤dǐdòpe tǎ̤ sara tǎ̤mǎ̤?”

36Bǎbǎkǎlè Yeshǔ ganǎ̤de asî ata̤hî̌bǎ tô̤̌. A hî̌ ta̤cabahǐ ikǒlǒkòdû̌ nutôpwa̤ kû̌, “Bǎyô̤ tǎ̤mǎ̤, tûlû̌ yṳ̌ǎ henu nî̌꤮.”

37Htodě a kaǎnṳ̌ pwǎtǒ̤ Khûpetarǔ, Khûya̤kû kû̌ apṳ̌ Khûyṳ̂ha nô̤̌pwǎ. A kaǎnǐ̤ kòyò dǒ ashǔshawa̤ tôpwǎ̤꤮ tô̤̌. 38Asî cû̌tǒ̤ dǒ ta̤cabahǐ ikǒlǒkòdû̌ nutôpwa̤ ahǐ dě a kè̌shǐ kòyò ma̤pwe̤nǎ̤sǎgô̌ pi̤ti̤pṳ̂tṳ̂ tokhlǒ, kòyòhǎkòyòwô tokhlǒ. 39Bǎ a nṳ̌ dǒ hǐdǒkû akha, a hî̌ asî kû̌, “Sîhǎsîwô ma̤pwe̤nǎ̤sǎgô̌ pi̤ti̤pṳ̂tṳ̂ ma̤titè? Phijǎpwa̤mǒ̤phû̌ nutôpwa̤ nî̌ a si bǎtô̤̌ a hǎmôô̌nṳ̌ shepe̤ pwǎ.” 40Dě asî sǎyǎ̤ bò Yeshǔ.

Htodě Yeshǔ wṳ̂̌hǎhtò̌kè bò kòyò nutokhlǒ dǒ akhlo dě a kaǎnǐ̤ phijǎpwa̤mǒ̤phû̌ nutôpwa̤ amǒ̤apha kû̌ akhôphijǎ sò̌su dě a genṳ̌ dǒ phijǎphû̌ nutôpwa̤ a ô̌. 41Dě a pṳ̂̌mě phijǎphû̌ nutôpwa̤ acǔde dě a hî̌ lû̌ kû̌, “Tali takumi” (amûasǎ mî̌, “Ǒ phijǎpwa̤mǒ̤phû̌꤮ he hî̌ na ihtǒmò̌꤮.”) 42Dě taplǎnô̤̌ phijǎpwa̤mǒ̤phû̌ a ô̌ shǐginǐ̤ně nutôpwa̤ ihtǒcû̌ dě asî ǒò̌ kiti̤kaa jî̌꤮ lô̌khô. 43Dě Yeshǔ mǎnǎ tě̤tě̤mè̤̌mè̤̌ asî kû̌, tôbǎ shôbǐǐlṳ̌ tǎ̤ kòyò tôpwǎ̤꤮ tǎ̤mǎ̤, htodě a hî̌ asî kû̌, “Dǐǎ pè̤̌ phijǎpwa̤mǒ̤phû̌ nutôpwa̤ lǎ̤ǎlǎ̤ô tocǒcǒ nî̌꤮.”