Mar 6 | KxfSCKXF | STEP | Yeshǔ hǎhtò̌cû̌kè bǎnu dě a kû̌ akhôphijǎ tokhlǒ getîkhî sô̌ lô̌khô dǒ adoashô̌ sô̌ tûû̌ bǎ Wî̤̌na̤sôrè̤̌ nutôwî̤̌.

Mark 6

Wî̤̌na̤sôrè̤̌phû̌ yṳ̌ǎ Yeshǔ tô̤̌

(Matè̌ 13:53-58; Lǔka 4:16-30)

1 Yeshǔ hǎhtò̌cû̌kè bǎnu dě a kû̌ akhôphijǎ tokhlǒ getîkhî sô̌ lô̌khô dǒ adoashô̌ sô̌ tûû̌ bǎ Wî̤̌na̤sôrè̤̌ nutôwî̤̌. 2 Bǎ lṳmṳ̌dǔ akhanu, Yeshǔ sahtò̌ sû̌ǐtòwòǐ ta̤ dǒ ta̤cabahǐkû. Kòyò saprṳ̂saphǎ ganǎ̤de a ta̤sû̌ǐtòwòǐ dě a ǒò̌ kiti̤kaa lǒ̤꤮ bò dě a hî̌ lô̌khô kû̌.

“A ta̤sî̌ta̤jò̌ hǒonu kû̌ ata̤ma̤ cô̌klǐcô̌sè lǒ̤꤮ bò tokhlǒ numî̌ a cû̌nṳ̌bǎ tǒ̤ bǎtèya? A ta̤sî̌ta̤jò̌ dǒ a nǐ̤bǎ tokhlǒ numî̌ ta̤sî̌jò̌ bǎtè̌tôcǒ ya? Htodě a cû̌ma̤ jò tǒ̤ ta̤cô̌klǐcô̌sè hǒtokhlǒ numî̌ hî̌tè ya? 3 A mî̌ pwa̤ma̤jòhǐ nutôpwa̤ yahî̌? Dě a mî̌ Mǒ̤ma̤rǐ aphû̌pwa̤khû yahî̌? Apṳ̌ tokhlǒ numî̌ Khûya̤kû, Khûyûse, Khûyǔda, kû̌ Khûshǐmṳ̂ nutokhlǒ mî̌ amè̤̌yahî̌? Dě a pṳ̌pwa̤mǒ̤ tokhlǒ numî̌ a ô̌ pwǎ bǎ dokû pwǎ amè̤̌bǎtô̤̌ya?” Asî hî̌ lô̌khô pô̤̌nudě, asî sǎkhě Yeshǔ dě gòyòmò̤̌mô̤ lû̌ tô̤̌.

4 Dě Yeshǔ hî̌ asî kû̌, “Kòyò dǒ a bè̌dubè̌nǎ̤ ǐtûû̌ piwi̤pèshè tô̤̌ tokhlǒ numî̌ adokûphû̌ tûû̌, akhlialè tûû̌ kû̌ a hǐphû̌phòphû̌ tûû̌ tokhlǒ pwǎ.” ^a 5 Asî yṳ̌ǎ tô̤̌ akhû̌akhî Yeshǔ ma̤jò pe ata̤ma̤ cô̌klǐcô̌sè nutokhlǒ tocǒ꤮ tô̤̌, a ma̤jò pwǎtǒ̤ a dò̌htò̌ acǔde dǒ kòyò shǐsha nutokhlǒ alô̤ pwǎ, dě a ma̤hǎmǎ bǎ kòyòshǐkòyòsha tokhlǒ tîkî̌phû̌nô̤̌ pwǎ. 6 Dophû̌shô̌phû̌ tokhlǒ yṳ̌nǐ̤nǎ̤nǐ̤ yǎ tô̤̌ akhû̌akhî a ǒò̌ kiti̤kaa jòjî̌꤮ tô̤̌.

Hǒtaplǎdě Yeshǔ hǎhtò̌cû̌gǎ do dǒ a ô̌ te̤we̤bò bǎnu tôdohto tôdo dě sû̌ǐtòwòǐ bǎ kòyò.

Yeshǔ nohǎhtò̌cû̌ akhôphijǎ shǐsò̌ginǐ̤

(Matè̌ 10:5-15; Lǔka 9:1-6)

7 Htodě a kaǎ plǒbò a khôphijǎ shǐsò̌ginǐ̤ dě a nohǎhtò̌cû̌ lû̌û tôprṳ̂ kû̌ sò̌ginǐ̤ pô̤̌nu. Htodě pô̤̌khô asî gǔ wṳ̂̌hǎhtò̌pè̤̌kè khînǎkhîno ayanudě, a ǐ pè̤̌ asî ta̤siwi̤sòwò̤.

8 Yeshǔ mǎcû̌nṳ̌ akhôphijǎ tokhlǒ a yô̤̌sǎ kû̌, “Sî hǎhtò̌cû̌klè̌ dě phî̌cû̌nṳ̌ tǎ̤ tocǒ tǎ̤mǎ̤ nî̌꤮, phî̌cû̌nṳ̌ tǎ̤ mû̌, khûkhi, kû̌ ru khûkhi nutokhlǒ tǎ̤mǎ̤ nî̌꤮. Phî̌nṳ̌ pwǎtǒ̤ nò̌htô̌ nu nô̤̌ nî̌꤮. 9 Dò̌cû̌nṳ̌ lô̌khô khò̌phě nu bǎbǎkǎlè phî̌cû̌lǒ tǎ̤ je ginǐ̤pṳ tǎ̤mǎ̤ nî̌꤮. 10 Sî kè̌ cû̌nṳ̌ ô̌ dǒ hǐ tômèmè akû hî̌dě, sî kè̌ hǎhtò̌cû̌ mò̌ dǒ do hǒtôdo akû nò̌khôtô̤̌ nu, tûlû̌ ô̌ sělě lô̌khô bǎ hǐnu nî̌꤮. 11 Do tôdodo dǒ a kè̌ sǎyṳ kaǎshǔ sî tô̤̌ dě a kè̌ ganǎ̤de sîyô̤̌ tô̤̌ kè̌hî̌dě bǎ sî hǎhtò̌cû̌kè akhanu, tuphlǔlò̤tě̤kè hǎkumṳ̌ dǒ sî khǎlǎlô̤ nutokhlǒ, sî kè̌ ma̤pô̤̌nu mî̌ asô̌sô̌kû̌ sî dǔlè̌lṳ̌kè kû̌ ta̤ma̤nǎǐ tôcǒ dǒ Cǒmara gǔ cî̌htò̌ asî pě nuhǒ.” ^b

12 A khôphijǎ tokhlǒ hǎhtò̌ cû̌lè shôbǐǐlṳ̌ bǎ kòyò tokhlǒ kû̌ a tô kû̌ yò̤lǎ̤plǎdî̌ lô̌khô anǎ̤, a cû̌lè shôbǐǐ bǎ kòyò pô̤̌nu. 13 Asî wṳ̂̌htò̌nṳ̌kè dû̌wî̤ khînǎkhîno dě a plṳ̌nṳ̌ dû̌wî̤ bǎ kòyòshǐkòyòsha tokhlǒ kû̌ htǒshi dě a ma̤hǎmǎ dû̌wî̤ bǎ asî. ^c

Pwa̤jushi Khûyṳ̂ha ata̤si awe̤akè

(Matè̌ 14:1-12; Lǔka 9:7-9)

14 Yeshǔ ami̤ mi̤lṳ̌hǔsǎ akhû̌akhî Khwǐherû ^{▼▼Khwǐherû hǒtôpwa̤ numî̌ Khwǐherû Atipa.} Ganǎ̤de bò a ma̤ ta̤ nutokhlǒ awe̤akè. Htokhôtô̤̌ kòyò tokhlǒkhlǒ hî̌ lô̌khô kû̌, “Yeshǔ mî̌ pwa̤jushi Khûyṳ̂ha si ihtǒhtûpwa̤sô̌ pwǎ, ma̤hî̌nudě a ma̤jò ta̤cô̌klǐcô̌sè nutokhlǒ pwǎnu.” ^e

15 Tokhlǒkhlǒ dě a hî̌ kû̌, “A mî̌ piwi̤pèshè Khûělǐya pwǎ.”

htokhôtô̤̌ tokhlǒkhlǒ dě a hî̌ kû̌, “A mî̌ piwi̤pèshè akhô̌ tôpwa̤ dǒ asô̌sô̌kû̌ piwi̤pèshè dǒ awǐnu akla tôpwa̤pwa̤ pwǎ,” a hî̌ lô̌khô pô̤̌nu.

16 Bǎ Khwǐherû ganǎ̤de Yeshǔ ma̤ ta̤cô̌klǐcô̌sè akhanu, a hî̌ kû̌, “Khûyṳ̂ha dǒ he nopě̤tṳ̌kè agô̌bô kû̌ he kliphû̌ nutôpwa̤ htûpwa̤ge tîkhî sô̌ hǒ,” a hî̌ pô̤̌nu.

17 Dǒ awǐkhanu mî̌ Khwǐherû nocû̌pṳ̂̌ comě akliphû̌ tokhlǒ kû̌ Khûyṳ̂ha dě a nodǒlò̤tě̤kè dǒ apô̤kû numî̌ Mǒ̤heròdǐ akhû̌khî hǒ. Mǒ̤heròdǐ mî̌ khwǐ Herṳ̂ akhi, apṳ̌ Khûphǐlǐpu ama dě Khûyṳ̂ha hî̌dǐdò taga Khwǐherû kû̌ a tô phî̌nǐ̤ apṳ̌ Khûphǐlǐpǔ ama tô̤̌. ^f 18 Khûyṳ̂ha hî̌ Khwǐherû kû̌, “Na phî̌ gesô̌ na khinu a khlè̌khô̌kè kû̌ Cǒmara ta̤sû̌ta̤tòwò hǒ.” 19 Pô̤̌nu akhû̌akhîdě khwǐ ama Mǒ̤heròdǐ nu a pṳ̂̌mě gutṳ̌glǎ Khûyṳ̂ha ta̤sǔ dě a sǎyṳ ma̤sikè lû̌û bǎbǎkǎlè a ma̤jò tocǒ꤮ tô̤̌. 20 Ma̤titèhî̌dě Khwǐherû nî̌ a kè̌dû̌ ǐtûû̌ Khûyṳ̂ha, ma̤titè̌hî̌dě a sî̌ya kû̌ a mî̌ kòyò dǒ acǒatè̤ plò̌shǐ tôpwa̤ akhû̌akhî, a tagabǐ ǐ lû̌û. Bǎ khwǐ ganǎ̤de Khûyṳ̂ha hî̌bǎ akhanu, a bǎyô̤ bǎbǎ a sǎyṳ ganǎ̤de lû̌ ata̤hî̌bǎ pwǎ.

21 Bǎ Khwǐherû ô̌lò̤ alṳmṳ̌ni̤ hètǒ̤sô̌ akhanu, ashěakhǎ wô̌bǎ kû̌ Mǒ̤heròdǐ gǔ ma̤sikè Khûyṳ̂ha. Khwǐ ma̤ pwè bǎ a ô̌lò̤ alṳmṳ̌ni̤ dě a dǐǎdǐô kli ikǒlǒkòdû̌ tokhlǒ, shigǎ ikǒlǒkòdû̌ tokhlǒ, kû̌ kòyò htû ikǒlǒkòdû̌ dǒ Galilè̤̌gǎ kû nutokhlǒ. 22 Bǎ Khwǐherû ama Mǒ̤heròdǐ aphû̌pwa̤mǒ̤phû̌ hènṳ̌ kalǐkapò̤ akhanu, a ma̤ sǎphlǒmô̤ sǎphlǒtô Khwǐherû kû̌ ashǐpwǎ̤shǐmè̤ lǒ̤bò akhû̌khî, Khwǐherû hî̌ phijǎpwa̤mǒ̤phû̌ nu tôpwa̤ kû̌, “Na sǎlě̤sǎyṳ titètè̌nu hî̌ he, he gǔ ǐ na pě.” 23 Htodě a olò̤ dě a wṳ̂̌dò ayô̤̌sǎ kû̌ a ta̤hî̌bǎ pô̤̌nu dě “Na kwi he titètè̌꤮ bǎbǎ he gǔ ǐ na pě, na kwi jò heshihegǎ taklama bǎbǎ, he ǐbò̌ na pě,” a olò̤ pô̤̌nu.

24 Dě phijǎpwa̤mǒ̤phû̌ nutôpwa̤ khlè̌hǎhtò̌ dǒ akhlo dě hǎhtò̌gwè̌ amǒ̤ kû̌, “Mǒ̤꤮ he tôbǎ kwi khwǐ titèya?”

“Kwi pwa̤jushi Khûyṳ̂ha a ikǒnu” amǒ̤ hî̌shěshu lû̌û pô̤̌nu.

25 Dě a tṳplṳ̌te̤wě̤ khlè̌genṳ̌ tîkhîsô̌ dǒ khwǐ ô̌ dě “He sǎyṳ nobè̌nṳ̌ na pwa̤jushi Khûyṳ̂ha a ikǒ dǒ dîbalětaa dû̌kû dě hèǐ he khònò̤̌” a hî̌ lû̌ pô̤̌nu.

26 Khwǐ nî̌ a sǎphlǒmô̤ pe tîkî̌꤮ tô̤̌ bǎbǎkǎlè a olò̤ hto dǒ shǐpwǎ̤shǐmè̤ tûprṳ̂taphǎ a lô̤mô̤̌ hǒ akhû̌akhî, ayô̤̌ dǒ a olò̤ hto kû̌ phijǎpwa̤mǒ̤phû̌ nu, a sǎyṳ ma̤pî̌kè tô̤̌. 27 Pô̤̌nudě taplǎnô̤̌ a nocû̌phî̌ akliphû̌ pwa̤ô̌pǒ̤ta̤ nutôpwa̤ kû̌ Khûyṳ̂ha a ikǒ dě akliphû̌ nutôpwa̤ cû̌ dǒ kò lǎ̤dǒô̌ kòyò apô̤kû dě a cû̌pě̤tṳ̌ ge Khûyṳ̂ha agô̌bô. 28 Htodě a bè̌nṳ̌ Khûyṳ̂ha a ikǒnu dǒ balětaa akû dě a hèǐ kû̌ phijǎpwa̤mǒ̤ nutôpwa̤ dě phijǎpwa̤mǒ̤ ǐ kû̌ amǒ̤. 29 Jushi Khûyṳ̂ha akhôphijǎ ganǎ̤de dě asî hèphî̌kè a nǎ̤glǒ ô̌kènu dě ge lǔǐkè lû̌ dǒ lṳ̌khû̌.

Yeshǔ dǐǎdǐô kòyò a pwa̤yè̤̌rǐ

(Matè̌ 14:13-21; Lǔka 9:10-17; Yṳ̂ha 6:1-14)

30 Pwa̤nophû̌ tokhlǒ geô̌plǒ te̤we̤bò Yeshǔ dě asî shôbǐǐ bǎbò lû̌û kû̌ lǒ̤꤮ bò asî ma̤hto ta̤nutokhlǒ awe̤akè kû̌ asî sû̌ǐtòwòǐ bǎ kòyò nutokhlǒ awe̤akè. 31 Pwa̤ hè dǒ a ô̌ tokhlǒkhlǒ dě ahè, pwa̤gekè tokhlǒkhlǒ dě age ô̌wô̤̌ô̌dû̌ tûlû̌shû̌lě akhû̌khî, Yeshǔ kû̌ akhôphijǎ tokhlǒ lǎ̤ô̌kǔ ǎ ô ashěkhǎnu a ô̌ jòpe tô̤̌, dě Yeshǔ hî̌ akhôphijǎ tokhlǒ kû̌, “Pa cû̌ wô̤̌wô̤̌ lû̌û dǒ gûlǎ̤sǔtukǔ tûkû dǒ kòyò ô̌ tôpwǎ̤꤮ tô̤̌ nu dě pa gǔ ô̌kǔ pô̤̌ kûmṳ̂̌ tòshò̌phû̌ tǎ꤮.”

32 Dě Yeshǔ kû̌ akhôphijǎ tokhlǒ cû̌nṳ̌dò̌ sǒkhli dě hǎhtò̌cû̌kè lô̌khô tûû̌ dǒ gûlǎ̤sǔtukǔ tûkû. 33 Bǎbǎkǎlè kòyò saprṳ̂saphǎ dǒ a kè̌shǐ asî cû̌ tokhlǒnu, a sî̌ya mè̤mè̤̌ lô̌khô kû̌ Yeshǔ kû̌ akhôphijǎ tokhlǒ akhû̌akhî, Wî̤̌phû̌ pṳ̂̌tîwî̤̌ khlè̌cû̌ kû̌ khò̌lôpô̤̌ dǒ khôsûkhû̌ dě khlè̌cû̌ te̤we̤tǒ̤ wǐ dǒ Yeshǔ kû̌ akhôphijǎ tokhlǒ alô̤mô̤̌. 34 Bǎ Běcǎ Yeshǔ ô̌ dǒ sǒkhlikû hǎhtò̌ akhanu, a kè̌shǐ kòyò saprṳ̂dû̌ cû̌ ô̌pǒ̤ nǎ wǐ bòkè dǒ lô̤mô̤̌ dě a gwèbǎǐ jî̌ asî, ma̤titè̌hî̌dě kòyò hǒtokhlǒ nî̌ asô̌sô̌kû̌ sû̌phû̌ tokhlǒ dǒ pwa̤kè̌pǒ̤ǐ ô̌ tô̤̌ nu akhû̌akhî a sahtò̌ sû̌ǐ dû̌wî̤ bǎ asî. ^g

35 Bǎnu akha lṳmṳ̌hǎ hǒ dě Yeshǔ akhôphijǎ tokhlǒ hè dǒ lû̌ô̌ dě a hèhî̌ lû̌ kû̌, “Gûlǎ̤ bǒo tûkû mî̌ do ô̌phǔ tôdo꤮ tô̤̌, htodě lṳmṳ̌hǎ hǒ. 36 Pô̤̌khô asî gǔ cû̌ pwî̤ǎpwî̤ô tûû̌ lô̌khô ashǎǎshǎô ayanudě, nocû̌kè mò̌ asî dǒ dokûshô̌kû dǒ a ô̌ te̤we̤bò bǒo tûkûnu.”

37 Bǎbǎkǎlè Yeshǔ hî̌shěshu asî kû̌, “Kè̌ dǐǎdǐô mò̌ asî tôcǒcǒ nu.”

Dě asî gwè̌ lû̌ kû̌, “Pa kè̌ cû̌pwî̤ǎ mò̌ bǎ asî mû̌ dě ahǎlǒ̤ gunò̤ kû̌ pwa̤ma̤ta̤phû̌ tôpwa̤ alakǎ lalǐ̤sô̌ ^{▼▼ruyî̌ Denari tôbǎ mî̌ a gònò̤ kû̌ tôni̤ ata̤ma̤ khû̌kǎ.} ruyî̌ Denari ô̌ pwǎ tôkô̌ kô̌꤮ nô̤̌ pwǎ dě a glè̌ cû̌ pṳ̂̌ǎpṳ̂̌ô asî hî̌tè?”

38 Yeshǔ gwè̌ akhôphijǎ tokhlǒ kû̌, “Dǒ sîklanu mû̌ ô̌ bephlǒya? Cû̌kè̌kè̌,” a hî̌ asî pô̤̌nu akha, asî cû̌kè̌ dě asî kè̌shǐ pwǎ, “Mû̌ yè̤̌phlǒ kû̌ tò̤̌phû̌ ginǐ̤bǎ nô̤̌pwǎ,” asî hî̌ lû̌ pô̤̌nu.

39 Htodě Yeshǔ nohǎnòò̌ ô̌plǒ asî tôprṳ̂ kû̌ tôprṳ̂ dǒ mi̤khû̌. 40 Dě asî hǎnòò̌plǒ lû̌ tôprṳ̂ kû̌ apwa̤ yè̤̌shi tokhlǒ apwa̤ tôya̤ tokhlǒ. 41 Yeshǔ phî̌ mû̌ yè̤̌phlǒ kû̌ tò̤̌phû̌ ginǐ̤bǎ dě a kè̌htò̌ dǒ mǒlǎ̤ dě a hî̌bwǐhî̌sîrî htû̌sò̌htò̌ Cǒmara dě běphò̌kè mû̌. Htodě a ǐlò̤ dǒ akhôphijǎ tokhlǒ a ô̌. Dě akhôphijǎ tokhlǒ yṳ̂̌ǎlò̤ tutṳ̌ kû̌ kòyò nutokhlǒ. Htodě a gǎtṳ̌ pô̤̌ tò̤̌phû̌ ginǐ̤bǎ pô̤̌nu. 42 Asî pô̌ǎpô̌ô ǎkǒôbe bò pṳ̂̌꤮ tôpwa̤ hǒ. 43 A khôphijǎ tokhlǒ phî̌plǒ gesô̌ mû̌ kû̌ tò̤̌phû̌ dǒ a běphò̌nu dě a ô̌kèkashǎ tokhlǒnu a ô̌be pe kû̌ phû̌běnu shǐginǐ̤phû̌bě. 44 Pwa̤khûwè̤̌pwǎ̤ dǒ a ǎ mû̌ lǒ̤꤮ bò numî̌ a ô̌ kòyò yè̤̌rǐ.

Yeshǔ cû̌ dǒ shikhû̌

(Matè̌ 14:22-33; Yṳ̂ha 6:15-21)

45 Asî htǔplǒ htohto kû̌ Yeshǔ no cû̌nṳ̌ dò̌ bò akhôphijǎ tokhlǒ dǒ sǒkhlikû dě a nohǎhtò̌cû̌ wǐkè asî dǒ Wî̤̌bètôsè̌da dǒ a ô̌ dǒ shikoǒdû̌ lô̤̌bò̌ nutîwî̤̌. Dě bǎ akhôphijǎ htò̌dò̌ sǒkhli akhanu, a dě a plûgekè bò kòyò saprṳ̂saphǎnu. 46 Htodě Yeshǔ hǎhtò̌cû̌kè dě a cû̌htò̌ kwicaba dǒ khôlôkhû̌.

47 Bǎ lṳmṳ̌khǐpô̤lô̤̌ akhanu, akhôphijǎ sǒkhli cû̌tǒ̤ dǒ shiklǎma hǒ bǎbǎkǎlè Yeshǔ ô̌kè tûû̌ pwǎ dǒ shihtu tôpwǎ̤ nô̤̌. 48 Yeshǔ kè̌shǐ kû̌ gili̤sǎ htò̌hèshǔ akhôphijǎ tokhlǒ akhû̌akhî, asî khlò̌shěshu gili̤sǎ dě a sǎplǎ̤lò̤dekè lǒ̤bò. Bǎ shîphaû̌sayè lṳmṳ̌ glè̌ lîbû akhanu, Běcǎ Yeshǔ cû̌ dǒ shikhû̌ dě hètǒ̤ dǒ akhôphijǎ tokhlǒ a ô̌. A glè̌ cû̌tûlû̌ kû̌ akhôphijǎ tokhlǒ. 49 Bǎbǎkǎlè bǎ akhôphijǎ tokhlǒ kè̌shǐ a cû̌ dǒ shikhû̌ akhanu, asî shò̌tò̤̌ lû̌û kû̌ kòyò yôla tôpwa̤ dě a yî̤̌kǒyî̤̌sa lǒ̤bò. 50 Ma̤titèhî̌dě asî pṳ̂̌꤮ tôpwa̤ kè̌shǐ bò lû̌ dě ǐsha lǒ̤bò.

Tôplǎnô̤̌ Yeshǔ hî̌ asî kû̌, “Bè̌khubè̌he lô̌khô sî sǎphlǒ. Ǐsha lô̌khô tǎ̤mǎ̤, hǒo mî̌ he pwǎ.” 51 Htodě a htò̌nṳ̌ dǒ akhôphijǎ tokhlǒ a sǒkhlikû dě gili̤sǎ ô̌kǔ hèkè dě akhôphijǎ tokhlǒ ǒò̌ kiti̤kaa bòkè. 52 Ma̤titèhî̌dě asî nò̌kudu akhû̌akhî, Yeshǔ dǔlè̌lṳ̌ bǎ asî kû̌ dǐǎ kòyò mû̌ ata̤ma̤ cô̌klǐcô̌sè nu bǎbǎkǎlè asî sî̌yaphlô lô̌khô tô̤̌.

Yeshǔ ma̤hǎmǎbǎ kòyòshǐkòyòsha dǒ Genashèrè̤̌gǎ.

(Matè̌ 14:34-36)

53 Asî cû̌bò̌ hto shikoǒdû̌ nudě a cû̌tǒ̤ lô̌khô dǒ Genashèrè̤̌gǎ dě a cû̌ bè̌ô̌kǔ lô̌khô asǒkhli bǎnu. 54 Asî hǎhtò̌ hto dǒ sǒkhlikû kû̌ kòyò tokhlǒ sî̌ya mè̤mè̤̌ lô̌khô kû̌ Yeshǔ pwǎ. 55 Asî khlè̌htôkhlè̌lò̤ bò lô̌khô pṳ̂̌tûkû dě a sahtò̌ ò̌hè lô̌khô kòyòshǐkòyòsha tokhlǒ kû̌ hujǒ dě a ò̌hètô lô̌khô bǎ asî ganǎ̤de kû̌ Yeshǔ ô̌ tûû̌ bǎ agûlǎ̤ nutûkû. 56 Běcǎ Yeshǔ cû̌tǒ̤ bǎtè tûkû bǎbǎ, a cû̌ dǒ dokû bǎbǎ, a cû̌ dǒ Wî̤̌kû bǎbǎ, a cû̌ dǒ Wî̤̌khlo bǎbǎ, asî dò̌lò̤ lô̌khô kòyòshǐkòyòsha tokhlǒ dǒ klǎkû dě asî kwisǎyṳ Běcǎ kû̌ notô̌bǎ pwǎ na jejûgòpwè̤nu kû̌ pwa̤shǐ pwa̤sha tokhlǒnu tîkî̌phû̌ nô̤̌pwǎ. Dě kòyò dǒ a tô̌bǎ lû̌ jejûgòpwè̤ tokhlǒnu, a ta̤shǐta̤sha hǎmǎ bòkè.