Mar 7 | KxfSCKXF | STEP | Bǎnu akha pwa̤sû̌ǐ ta̤sû̌ta̤tòwò asara kû̌ Pharishè̌phû̌ dǒ a ô̌ lô̌khô dǒ Wî̤̌yarǔshôle akû hè tokhlǒnu, a hè ô̌plǒô̌cu te̤we̤ bò bǎ Yeshǔ kòshî̌.

Mark 7

Yeshǔ sû̌ǐ kòyò kû̌ ta̤mṳ̂̌plî awe̤akè kû̌ ta̤mṳ̂̌plî tô̤̌ awe̤akè

(Matè̌ 15:1-9)

1 Bǎnu akha pwa̤sû̌ǐ ta̤sû̌ta̤tòwò asara kû̌ Pharishè̌phû̌ dǒ a ô̌ lô̌khô dǒ Wî̤̌yarǔshôle akû hè tokhlǒnu, a hè ô̌plǒô̌cu te̤we̤ bò bǎ Yeshǔ kòshî̌. 2 Asî kè̌shǐ Běcǎ akhôphijǎ tokhlǒ ǎshǎǎ dě a cǔbò gû̌ kòyò acǔde tô̤̌. Amûasǎ mî̌ asî sǎyṳ hî̌ kû̌ pô̤̌ ta̤cubucaba alǎ̤klô ô̌ kû̌ bǎ ǎ shǎǎ khôtô̤̌ akha tôbǎ cǔbò wǐ cǔde bǎbǎkǎlè akhôphijǎ tokhlǒ ma̤gû̌ pô̤̌nu tô̤̌. 3 (Ma̤titèmî̌ Pharishè̌phû̌ tokhlǒ kû̌ lǒ̤꤮ bò Yǔdaphû̌ tokhlǒnu a bǎ cǔbò lô̌khô acǔde dě asî phî̌ǎ nô̌ shǎǎshǎô pwǎ, asî pṳ̂̌měǐ lô̌khô asî phiphu lǎ̤klô tokhlǒ. 4 Asî kè̌ ô̌ dǒ klǎ ge dě a kè̌ shǔbòmò̌ acǔde tô̤̌ hî̌nu, asî ǎô tocǒ꤮ tô̤̌. Htokhôtô̤̌ asî pṳ̂̌měǐ pe lǎ̤klô dǒ ashǔshawa̤ tokhlǒ nî̌ a ô̌ dû̌ pe. Kwè̌꤮ mî̌titè nu dě, asî cǔbò wô̌ shiba tokhlǒ, gopo̤ tokhlǒ, kû̌ batṳ̌balě tilibò sîtokhlǒ).

5 Htodě Pharishè̌phû̌ tokhlǒ kû̌ pwa̤sû̌ǐ ta̤sû̌ta̤tòwò asara tokhlǒ gwè̌ Yeshǔ kû̌, “Nakhôphijǎ tokhlǒ dě a gû̌ma̤ pô̤̌ phiphu lǎ̤klô ta̤sû̌ǐnu tô̤̌ ya? Bǎ asî ǎshǎôshi akhanu, a cǔbò kòyò acǔde tô̤̌ ma̤titè?”

6 Yeshǔ hî̌shěshu asî kû̌, “Piwi̤pèshè Khûyashǎya hî̌nǎ sîwe̤sîkè numî̌ a tôtǐ꤮ hǒ. Sî mî̌ pwa̤ jî̌cǒjî̌tè̤ anǎ̤ tokhlǒ. Piwi̤pèshè Khûyashǎya wě̤ dǒ awǐkha dě a hî̌ kû̌, Cǒmara hî̌ kû̌, ^a

‘kòyò hǒtokhlǒ bè̌dubè̌nǎ̤ lô̌khô he kû̌ akhû̌phě bǎbǎkǎlè asǎphlǒ numî̌ a ô̌tepheyî̤ kû̌ he pwǎ. 7 Asî cabahtò̌ henu yô̤̌mṳ̂yô̤̌sǎ ô̌ tocǒ꤮ tô̤̌. Asî sû̌ǐtòwòǐ pwǎ kòyò kû̌ kòyòhǎkhû̌phû̌ alǎ̤klô tokhlǒ pwǎ bǎbǎkǎlè a hî̌ tûû̌ lô̌khô kû̌ a sû̌ǐtòwòǐ kòyò kû̌ Cǒmara a ta̤mǎlò̤ tokhlǒ.’ ^b

8 Sî dò̌tephe khô̌kè Cǒmara a ta̤mǎlò̤ tokhlǒ dě sî pṳ̂̌mě ǐtûû̌ lô̌khô kòyòhǎkhû̌phû̌ a lǎ̤bû̌lǎ̤klô tokhlǒ.”

9 Htodě a hî̌ asî kû̌, “Pô̤̌khô sî gǔ pṳ̂̌mě ǐtûû̌ sî lǎ̤klô ta̤sû̌ta̤tòwò tokhlǒ ayanudě, Cǒmara ta̤mǎlò̤ tokhlǒnu, sî lîmò htè̌shěshu jò mî̌ca. 10 Khûmṳ̂shě hî̌ kû̌, ‘bè̌dubè̌nǎ̤ namǒ̤napha nî̌꤮,’ ^c dě ‘kòyò dǒ a ǐsho amǒ̤apha tôpwa̤pwa̤nu bǎ ma̤sikè yǎ꤮.’ ^d 11 Bǎbǎkǎlè sî nohî̌ kòyòmǒ̤pha kû̌, ‘Ǒ mǒ̤, ǒ pha, ruhta dǒ he bǎ kè̌ǐ ma̤jè̌ kû̌ sînu a ô̌ kǎ, bǎbǎkǎlè he gǔ bè̌ǐ yǎ kû̌ Cǒmara ta̤ma̤lṳ,’ ^{▼▼(Kòba mî̌ ahè dǒ Hebrǔ yô̤̌ dě amûasǎ mî̌ ta̤ma̤lṳhtò̌ kû̌ Cǒmara).} Sî nohî̌ kòyò kû̌ amǒ̤apha pô̤̌nu, 12 Htodě sî noma̤jè̌ kè̌pǒ̤ǐ pe asî kû̌ amǒ̤apha tô̤̌. 13 Pô̤̌nu akhû̌akhî sî ma̤pî̌kèbò Cǒmara alě̤ayô̤̌ hî̌nǎ nutokhlǒ hǒ, ma̤titè̌hî̌dě sî pṳ̂̌měǐ sî lǎ̤klô dě sî ǐlò̤ tṳtṳ̌ kòyò. Sî ma̤sô̌sô̌ pô̤̌o dǒ ashǔshawa̤ tokhlǒnu a ô̌ dû̌pe.”

(Matè̌ 15:10-20)

14 Dě Běcǎ Yeshǔ kaǎ hèphǔ kòyò saprṳ̂saphǎ dǒ akòshî̌ dě a hî̌ asî kû̌, “Pṳ̂̌tôpwa̤ ganǎ̤de lô̌khô he hî̌ sînu dě jî̌pwǐ̤ kè̌lǎ sî̌ya tě̤tě̤mè̤̌mè̤̌ lô̌khô. 15 Ta̤ dǒ a ô̌ dǒ akhlo dě a hènṳ̌ dǒ kòyò tôpwa̤pwa̤ akû tokhlǒ nî̌ a ma̤ phû̌mò̤̌ jò lû̌û tô̤̌, bǎbǎkǎlè ta̤ dǒ a ô̌ dǒ kòyò sǎphlǒkû dě a hǎhtò̌ tokhlǒ numî̌ a ma̤ phû̌mò̤̌ lû̌ pwǎ.” 16 (“Lǒ̤꤮ bò sî hǒtokhlǒ, sî kè̌ sǎyṳ sî̌ya dě, sî ganǎ̤de lô̌khô pû.”) ^{▼▼kòyò wě̤ lî̤ta̤bě dǒ awǐkha tokhlǒkhlǒnu a wě̤nṳ̌bǎ lî̤phlǒ hǒonu tô̤̌.}

17 Yeshǔ hǎhtò̌cû̌ tephekè dǒ kòyò saprṳ̂saphǎkla dě bǎ a cû̌nṳ̌ dǒ hǐdǒkû akhanu, akhôphijǎ tokhlǒ gwè̌ lû̌ yô̤̌sǎkhěkhô̌ amûasǎ tokhlǒ. 18 Dě a hî̌ bǎ asî kû̌, “Sî sî̌ya gû̌ kòyò tô̤̌ ya? Sî tôbǎ sî̌ya kû̌, shǎǎ titètè̌꤮ bǎbǎ, a ô̌ dǒ akhlo dě a hènṳ̌ dǒ kòyòkû tokhlǒ numî̌, a ma̤ phû̌mò̤̌ jò tô̤̌. 19 Ma̤titèhî̌dě shǎǎ hǒonu, a nṳ̌ dǒ sǎphlǒkû mè̤̌tô̤̌, a nṳ̌ dǒ phutôgô̌kû dě a bǎ cû̌ sûhtò̌kè lû̌û dǒ dokhlo pwǎ.” (A hî̌ pô̤̌hî̌numî̌, a sǎyṳ hî̌ kû̌, shǎǎ titètè̌꤮ bǎbǎ, ǎ mî̌ a nǐ̤ bòpwǎ.)

20 Htodě a hî̌ kû̌, “Ta̤ dǒ a ô̌ bǎ kòyò sǎphlǒkû dě a hǎhtò̌ tokhlǒ numî̌ a ma̤ phû̌mò̤̌ jò lû̌û pwǎ. 21 Ta̤ dǒ a ô̌ dǒ kòyò sǎphlǒkû hǎhtò̌ tokhlǒ numî̌ amè̤̌kû̌ ta̤gènè̤ phû̌mò̤̌shî̌htô sî, cû̌sǔnṳ̌plěnṳ̌ pwa̤mǒ̤pwa̤khû ô̌pili̤, ǎhǔǎhî̌, ma̤si kòyò, cû̌sǔnṳ̌plěnṳ̌ kòyòphû̌kòyòma, 22 Ta̤sǎyṳsǎbǎ tûlû̌ ta̤, ta̤sǎkhěkhû̌khwè kòyò, tili̤tôlô̌ kòyò, ma̤ putupatǎ pǔlǔpǐlî anǎ̤, sǎkhwè̌nǐ̤kòyòta̤, pîjî̌shǐcô̌ kòyò, ta̤bè̌dû̌bè̌pwǎ̤nǎ̤, ta̤gènè̤ shapwǎ̤ tô̤̌dě ma̤ phô̌phô̌. 23 Lǒ̤꤮ bò ta̤ dǒ awô̌tô̤̌ tokhlǒnu a ô̌ dǒ kòyò sǎphlǒkû hǎhtò̌ dě a ma̤ phû̌mò̤̌ kòyò pwǎ.”

Yǔdaphû̌ mè̤̌tô̤̌ tôpwa̤ yṳ̌ǎ kû̌ Yeshǔ gǔ ma̤jè̌ yǎ

(Matè̌ 15:21-28)

24 Yeshǔ hǎhtò̌cû̌kè kû̌ gûlǎ̤ bǎnutûkû dě a hǎhtò̌cû̌tǒ̤ dǒ gûlǎ̤ tôkû dǒ aphǔ kû̌ Wî̤̌tǔrǔ kû̌ Wî̤̌shǐdṳ̂. Htodě a cû̌nṳ̌ dǒ hǐtômè akû dě a sǎyṳ dǔsî̌ya anǎ̤ kû̌ kòyò saprṳ̂saphǎ nutokhlǒ tô̤̌ bǎbǎkǎlè a ô̌û̌ bǐjò tô̤̌. 25 Pwa̤mǒ̤ tôpwa̤ ganǎ̤de Yeshǔ awe̤akè kû̌ taplǎnô̤̌ a hè dô̌gînî̤û̌lò̤ caba dǒ Yeshǔ khò̌lôpô̤̌kòshî̌. Dě pwa̤mǒ̤ tôpwa̤ nî̌ a phû̌pwa̤mǒ̤ pî̌tî̌phû̌ ô̌ tôpwa̤ dě khînǎkhîno ma̤bǎ yǎ. 26 Pwa̤mǒ̤ hǒtôpwa̤ mî̌ Yǔdaphû̌ mè̤̌tô̤̌, a ô̌ dǒ Shurǐ gǎmǒ̤ alǎ̤, Bûnǐke gǎkû, dě a ô̌ kû̌ a phû̌pwa̤mǒ̤ tôpwa̤. Dě a hè kwisǎyṳ gutṳ̌glǎ Yeshǔ kû̌ a gǔ wṳ̂̌hǎhtò̌kè bǎ khînǎkhîno dǒ a phû̌pwa̤mǒ̤ nu akû.

27 Htodě Yeshǔ hî̌ a kû̌, “Phû̌ tokhlǒnu a tôbǎ ǎkǒôbe wǐ, pa phî̌kè phû̌ tokhlǒ ashǎǎ dě dǐǎ kû̌ shǐ tokhlǒ numî̌ a gwǎtô̤̌.” (Yeshǔ hî̌ kû̌ phijǎphû̌ nu amûasǎ mî̌ Yǔdaphû̌ dě shǐ a hî̌ numî̌ Yǔdaphû̌ mè̤̌tô̤̌ tokhlǒ).

28 Bǎbǎkǎlè a hî̌shěshu Yeshǔ kû̌, “Amè̤̌kǎ Běcǎ, shǐ dǒ a ô̌ dǒ dîjowǎ̤ alǎ̤ tokhlǒnu a ǎnô̌ pwǎ phû̌ tokhlǒ ashǎǎ lò̤gǔlò̤wṳ̂̌ nutokhlǒ pwǎ.”

29 Yeshǔ hî̌ lû̌ kû̌, “Na hî̌shěshu getîkhî ta̤hǒo awô̌ jî̌꤮ lî akhû̌akhî, na ge dǒ hǐ mî̌ anǐ̤ hǒ. Khînǎkhîno ô̌ dǒ na phû̌pwa̤mǒ̤ akû nutôdo hǎhtò̌cû̌kè hǒ.”

30 A ge dǒ ahǐ dě a kè̌shǐ bǎ a phû̌pwa̤mǒ̤ hǎmôô̌ lò̤ dǒ lǎ̤dakhû̌ dě a sî̌ya kû̌ khînǎkhîno hǎhtò̌kè dǒ lû̌kû hǒ.

Yeshǔ ma̤hǎmǎbǎ kòyò nò̌kukoo dě a pè̌ tôpwa̤

31 Htodě Yeshǔ ô̌phǔte̤we̤ bǎ Wî̤̌tǔrǔ nu dě a nṳ̌ cû̌tûlû̌ Wî̤̌shǐdṳ̂, htodě a gesô̌ dǒ Galilè̤̌ shidû̌shite̤we̤. Shidû̌shite̤we̤ nu a ô̌phǔ kû̌ Wî̤̌kòshî̌ dǒ kòyò kaǎ kû̌ Dekapòlǐ ^{▼▼Dekapòlǐ mî̌ Wî̤̌shǐ (10) ô̌cuô̌plǒ.} nu tôgǎ akû. 32 Kòyò tokhlǒ kaǎhènǐ̤ kòyòpha nò̌kukoo dě apè̌asho hî̌bǎ hǎhtò̌ pò̤̌yǎ̤ tôpwa̤ dǒ Yeshǔ a ô̌ dě asî kwisǎyṳ gutṳ̌glǎ Yeshǔ dǒ a gǔ dò̌htò̌ acǔde dǒ lû̌lô̤.

33 Dě Yeshǔ kaǎhtò̌ tephecû̌khô̌kè tûû̌ kòyòpha nutôpwa̤ dǒ kòyò saprṳ̂saphǎkla dě a shû̌nṳ̌ acǔmṳ̌ dǒ kòyòpha nutôpwa̤ a nò̌kukû dě a htǔplî̌cô̌ aplî̌shi kû̌ acǔmṳ̌ tômè dě a tô̌ba kû̌ kòyòpha nutôpwa̤ aplî̤. 34 Htodě a kè̌htò̌ dǒ mǒkhû̌ dě a sǎbò̌htò̌, dě a hî̌ lû̌ kû̌, “Ěphǎsǎ!” amûasǎ mî̌ “Lîhtò̌mò̌!” nupwǎ. 35 Dě kòyòpha nutôpwa̤ nò̌ku phlôtîkhîsô̌ dě aplî̤jǎ gesô̌ dě a hî̌bǎjò wô̌꤮ gesô̌.

36 Yeshǔ hî̌ asî kû̌ shôbǐǐ bǎ tǎ̤ kòyò tôpwǎ̤ tǎ̤mǎ̤ nî̌꤮, a hî̌ asî pô̤̌nu bǎbǎkǎlè Yeshǔ nohî̌lṳ̌ tô̤̌ shû̌shû̌, asî lî̤̌꤮ hî̌lṳ̌ shû̌shû̌. 37 Dě lǒ̤꤮ bò kòyò dǒ a ganǎ̤de tokhlǒnu, a ǒò̌ kiti̤kaa lô̌khô jî̌꤮ lî. Dě asî hî̌ lô̌khô kû̌, “Lǒ̤꤮ bò a ma̤ta̤ tokhlǒ numî̌ awô̌ gutṳ̌! kòyò nò̌kukoo mî̌ a ma̤phlôtîkhî, kòyò pè̌ mî̌ a ma̤hî̌bǎ jòwô̌ gesô̌ bǎ kòyò,” a hî̌ lô̌khô pô̤̌nu.