Mar 8 | KxfSCKXF | STEP | Bǎnu akha kòyò saprṳ̂saphǎdû̌ dǒ ashǔshawa̤ tôprṳ̂ hèô̌plǒô̌cu bò lû̌ dě asî lǎ̤ǎlǎ̤ô hǎlǒ̤kè hǒ dě Yeshǔ kaǎ akhôphijǎ tokhlǒ dǒ a ô̌ dě a hî̌ asî kû̌,

Mark 8

Yeshǔ dǐǎdǐô kòyò lǐ̤rǐ

(Matè̌ 15:32-39)

1 Bǎnu akha kòyò saprṳ̂saphǎdû̌ dǒ ashǔshawa̤ tôprṳ̂ hèô̌plǒô̌cu bò lû̌ dě asî lǎ̤ǎlǎ̤ô hǎlǒ̤kè hǒ dě Yeshǔ kaǎ akhôphijǎ tokhlǒ dǒ a ô̌ dě a hî̌ asî kû̌, 2 “He sǎyṳgwèbǎǐ jî̌꤮ kòyò nutokhlǒ, a ô̌ lô̌khô kû̌ he bǒo mî̌ abe suni̤ hǒ. Asî lǎ̤ǎlǎ̤ô ô̌ lô̌khô tocǒ꤮ tô̤̌. 3 He sǎyṳ plûge ti̤wǐ̤kè asî tô̤̌, hî̌pě asî lò̤dô̌lò̤de tò̤̌ lô̌khô dǒ klè̌lô̤ pě, ma̤titè̌hî̌dě kòyò tokhlǒkhlǒ mî̌ a ô̌ lô̌khô dǒ ayî̤ dě ahè.”

4 Dě akhôphijǎ tokhlǒ hî̌shěshu lû̌ kû̌, “Pa tôbǎ dǐǎ asî lǎ̤ǎ mî̌ amè̤̌kǎ꤮, bǎbǎkǎlè dǒ gǎshashigǎ lǒ̤seměkhû̌ pô̤̌onu, pa gǔ cû̌kè̌lǎ dǐǎ jò bǎ asî hî̌tè?”

5 Yeshǔ gwè̌ asî kû̌, “Sî mû̌ ô̌ bephlǒya?”

“A ô̌ susô̌tôphlǒ” asî hî̌shěshu lû̌ pô̤̌nu.

6 Yeshǔ nohǎnòò̌ bò kòyò saprṳ̂saphǎ nutokhlǒ dǒ hǎkhû̌ dě a phî̌htò̌ mû̌nu susô̌tôphlǒ dě a hî̌bwǐhî̌sîrî htû̌sò̌htò̌ Cǒmara, dě a bî̌phò̌ hto mû̌ nutokhlǒdě a ǐ kû̌ akhôphijǎ tokhlǒ dě a nocû̌yṳ̂̌ asî dě akhôphijǎ tokhlǒ cû̌yṳ̂̌lò̤ pè̤̌ kû̌ kòyò saprṳ̂saphǎ tokhlǒ. 7 Asî phî̌hè dô̌gû̌ tò̤̌prǐphû̌ tîkî̌ dě Yeshǔ hî̌bwǐhî̌sîrî htû̌sò̌htò̌ Cǒmara htodě a noyṳ̂̌lò̤ ǎ kû̌ kòyò saprṳ̂saphǎ nutokhlǒ. 8 Asî ǎkǒôbe pô̌ǎpô̌ô bò. Dě a khôphijǎ phî̌cusô̌ mû̌ dǒ a ô̌kèpe tokhlǒnu a bepe kû̌ phû̌běnu susô̌tômè. 9 Kòyò ǎshǎǎ tokhlǒnu aphǔ ô̌ kòyò lǐ̤rǐ. 10 Yeshǔ plûgekè hto kòyò saprṳ̂saphǎ nutokhlǒ dě taplǎnô̤̌ a kû̌ akhôphijǎ tokhlǒ cû̌nṳ̌ dǒ sǒkhlikû dě hǎhtò̌cû̌ dǒ Dalamanṳ̌ta agǎ.

Pharishè̌phû̌ tokhlǒ kwikè̌kè̌ ta̤cô̌klǐcô̌sè

(Matè̌ 16:1-4)

11 Pharishè̌phû̌ tokhlǒ hè dǒ Yeshǔ a ô̌ dě a hè sahtò̌ htè̌ lû̌û. Yeshǔ numî̌ a ô̌ dǒ Cǒmara a ô̌ hè mè̤̌ya, mè̤̌tô̤̌ya nu, asî hèkwi klǐyatakǎ kè̌kè̌pwǎ lû̌û kû̌ a gǔ dǔlè̌lṳ̌ bǎ asî ta̤cô̌klǐcô̌sè tocǒ. ^a 12 Yeshǔ sǎbò̌htò̌ dě a hî̌ asî kû̌, “Kòyò hǒtôhtu tokhlǒ cû̌kwikè̌kè̌ tǒ̤ he ta̤ma̤ cô̌klǐcô̌sè ma̤titè? He hî̌cǒcǒ sî, he dǔlè̌lṳ̌ bǎ sî ta̤ma̤ cô̌klǐcô̌sè tocǒ꤮ tô̤̌.” ^b 13 A hî̌ dě a hǎhtò̌cû̌ tephekè kû̌ Pharishè̌phû̌ nutokhlǒ, dě a genṳ̌tîkhî dǒ sǒkhlikû dě a hǎhtò̌cû̌kè dǒ shikoǒdû̌ lô̤̌bò̌ tôkhô.

Pharishè̌phû̌ tokhlǒ kû̌ Khwǐherû ata̤bû

(Matè̌ 16:5-12)

14 Yeshǔ akhôphijǎ tokhlǒ shôpe̤ phî̌cû̌nṳ̌ lô̌khô mû̌ dǒ sǒkhlikû nu, asî phî̌cû̌nṳ̌ pwǎ mû̌ tôphlǒphû̌ nô̤̌ pwǎ. 15 Yeshǔ mǎnǎ tě̤tě̤mè̤̌mè̤̌ akhôphijǎ tokhlǒ kû̌, “Sè̌rè̌ lô̌khô sînǎ̤ kû̌ Pharishè̌phû̌ tokhlǒ ata̤bû kû̌ Khwǐherû ata̤bû nu nî̌.” ^c

16 Asî hî̌ tûû̌ kè̌khî lû̌û kû̌, “Běcǎ hî̌ pa pô̤̌numî̌, amè̤̌ dǒ pa mû̌ ô̌ bǎ lû̌û tô̤̌ nuhǒ.”

17 Běcǎ Yeshǔ sî̌ya kû̌ asî hî̌bǎǐ kè̌khî lû̌û kû̌ mû̌ awe̤akè akhû̌akhî, a gwè̌ asî kû̌, “Ma̤titèdě sî cû̌hî̌ tûû̌ kè̌khî lû̌û kû̌ sî mû̌ ô̌tô̤̌ awe̤akè hî̌tè? Mî̌ sî kè̌shǐ sî̌yaphlô khôtô̤̌ ya? Sî cû̌sî̌yaphlô bǎ gû̌ kòyò tô̤̌ hî̌tè? 18 Sî mǐ̤sǎphlǒ ô̌ gû̌ kòyò dě sî kè̌shǐ gû̌ kòyò tô̤̌, sî nò̌kulǎ ô̌ gû̌ kòyò dě sî ganǎ̤de gû̌ kòyò tô̤̌. ^d 19 Bǎ he běphò̌ mû̌ yè̤̌phlǒ dě he dǐǎ kû̌ kòyò yè̤̌rǐ akhanu, sî phî̌geplǒ sô̌ a ô̌kè nutokhlǒdě a ô̌pe bephû̌běya numî̌ sî to̤ǐ petô̤̌ ya?”

Asî hî̌shěshu lû̌û kû̌, “A ô̌kè pe shǐginǐ̤ phû̌bě.

20 “Bǎ he běphò̌ mû̌ susô̌tôphlǒ dě he dǐǎ kû̌ kòyò lǐ̤rǐ akha, sî phî̌ge plǒsô̌ mû̌ dǒ he běphò̌ tokhlǒnu, a ô̌kè pe bephû̌běya?”

asî hî̌shěshu lû̌ kû̌, “A ô̌kè pe susô̌tôphû̌bě.”

21 Dě a hî̌ asî kû̌, “Sî sî̌ya bǎ gû̌ kòyò khôtô̤̌ ya?”

Yeshǔ ma̤hǎmǎbǎ kòyòpha mǐ̤sǎkhǐ tôpwa̤ dǒ Wî̤̌bètôsè̌da

22 Yeshǔ kû̌ akhôphijǎ tokhlǒ cû̌tǒ̤ dǒ Wî̤̌bètôsè̌da dě kòyò tokhlǒ kaǎhèǐ kòyò mǐ̤sǎkhǐ tôpwa̤ dě a hèkwisǎyṳ Yeshǔ kû̌ a gǔ tô̌bǎ mò̌ kòyò hǒtôpwa̤. 23 Yeshǔ pṳ̂̌mě kòyò mǐ̤sǎkhǐ nutôpwa̤ acǔde dě a kaǎ hǎhtò̌ lû̌ dǒ dokhlo dě a htǔplǐ lû̌û mǐ̤sǎphlǒ dě Yeshǔ tè̌wǎ̤ a cǔde ginǐ̤khô kû̌ kòyòpha nutôpwa̤ a mǐ̤sǎ ginǐ̤khô dě a gwè̌ lû̌û kû̌, “Na kè̌shǐ ta̤ tocǒcǒ꤮ ya?”

24 A kè̌htôkè̌lò̤ dě a hî̌ kû̌, “He kè̌shǐ kòyò tokhlǒ bǎbǎkǎlè asô̌sô̌kû̌ sǒmṳ̌ dě a cû̌le̤cû̌ge pô̤̌nu pwǎ.”

25 Yeshǔ tè̌wǎ̤ sô̌ kòyòpha mǐ̤sǎkhǐ nutôpwa̤ a mǐ̤sǎphlǒ dě kòyò nutôpwa̤ jî̌pwǐ̤ kè̌htò̌ mè̤mè̤̌ sô̌ dě a mǐ̤sǎphlǒ lîhtò̌ dě a kè̌shǐ wô̌bǎbò ta̤pṳ̂̌꤮ tocǒ. 26 Dě Yeshǔ hî̌ lû̌ kû̌, ge sělě dǒ hǐ nî̌꤮, genṳ̌ tǎ̤ dǒ dokû tǎ̤mǎ̤ nî̌꤮.

Khûpetarǔ hî̌lṳ̌htò̌ kû̌ Yeshǔ mî̌ pwa̤ma̤hǎplǎge dǒ Cǒmara rû̌htò̌ a tôpwa̤

(Matè̌ 16:13-20; Lǔka 9:18-21)

27 Yeshǔ kû̌ akhôphijǎ tokhlǒ cû̌ lô̌khô dǒ do ô̌ dǒ Wî̤̌kèsharǐ Phî̌lǐpǐ awò̤shî̌ tokhlǒ dě bǎ a cû̌ dǒ klè̌lô̤ akhanu, Yeshǔ gwè̌ asî kû̌, “Kòyò tokhlǒ hî̌kwè̌꤮ he kû̌ he mî̌ kòyò hî̌tè tôpwa̤ ya?”

28 Asî hî̌shěshu lû̌û kû̌, “Tokhlǒkhlǒdě a hî̌ kû̌ pwa̤jushi Khûyṳ̂ha, tokhlǒkhlǒ nudě a hî̌ kû̌ piwi̤pèshè Khûělǐya, tokhlǒkhlǒdě a hî̌ kû̌ piwi̤pèshè tô̤̌mî̌ piwi̤pèshè khô̌ dǒ ashǔshawa̤ tokhlǒ akla tôpwa̤pwa̤ pwǎ,” a hî̌ lô̌khô pô̤̌nu. ^e

29 Dě a gwè̌ asî kû̌, “Sî klalè, sî gǔ hî̌ he kû̌ mò̌pè?” A hî̌ dě Khûpetarǔ hî̌shěshu a kû̌, “Na mî̌ pwa̤ma̤hǎplǎge kòyò ^{▼▼ma̤hǎplǎge mî̌ pwa̤yṳ̌ǎ Khrǐphû̌ aprṳ̂ dǒ ashǔshawa̤ tokhlǒkhlǒnu a hî̌ kû̌, “Ta̤ma̤lû̌htò̌ge” mè̤̌tô̤̌dě “Ta̤ma̤hǎplǎge, ta̤phǔgekhò̌ge”} dǒ Cǒmara rû̌htò̌ a nutôpwa̤ pwǎ.”

30 Pô̤̌nudě Yeshǔ mǎnǎ asî kû̌, “He mî̌ pwa̤ma̤hǎplǎge kòyò ^{▼▼ma̤hǎplǎge -ta̤ma̤lû̌htò̌ge-phǔgekhò̌ge} dǒ Cǒmara rû̌htò̌ a nutôpwa̤ hǒ, sî bǎ cû̌ shôbǐǐlṳ̌ǐ kòyò pô̤̌nu tô꤮ pwǎ̤ tǎ̤mǎ̤ nî̌꤮.”

Yeshǔ shôbǐǐlṳ̌ nǎ wǐ a bǎ khòjî̌khòjû̌ ta̤ kû̌ a bǎ si pě awe̤akè

(Matè̌ 16:21-28; Lǔka 9:22-27)

31 Dě Yeshǔ sahtò̌ sû̌ǐ akhôphijǎ tokhlǒ kû̌, “He mî̌ Kòyòphû̌khû dě he tôbǎ khòbǎ dû̌wî̤ ta̤jî̌ta̤jû̌ pě, dě Yǔdaphû̌ ikǒlǒkòdû̌ tokhlǒ, pwa̤shû̌gǎ ikǒlǒkòdû̌ tokhlǒ kû̌ pwa̤sû̌ǐ ta̤sû̌ta̤tòwò asara tokhlǒ gǔ bè̌tephekè he pě dě asî gǔ ma̤sikè he pě. Dě he sihtopě dě suni̤ pěnu, he htûpwa̤ getîkhî sô̌ dǒ ta̤si pě.” 32 A hî̌lṳ̌htò̌ lîtîklî̌ bǎbò asî kû̌ lǒ̤꤮ bò ta̤nutokhlǒ akhû̌akhî Khûpetarǔ kaǎcû̌ tephekè Běcǎ tîkî̌phû̌ dě a sǎhtǎ lû̌û.

33 Bǎbǎkǎlè Yeshǔ htû̌tiwǐ dě a kè̌cû̌ hto akhôphijǎ tokhlǒ dě a sǎhtǎ geshěshu Khûpetarǔ kû̌, “Ǒ꤮ hǎkhû̌tana, hǎhtò̌cû̌ tephekè kû̌ he, ma̤titè̌hî̌dě na ta̤gènè̤ tokhlǒnu asô̌sô̌kû̌ kòyòhǎkhû̌phû̌ a ta̤gènè̤nu pwǎ, a sô̌sô̌kû̌ Cǒmara a ta̤gènè̤ tokhlǒnu mè̤̌tô̤̌.”

34 Htodě Yeshǔ kaǎ hèplǒbò kòyò saprṳ̂saphǎ tokhlǒ kû̌ akhôphijǎ tokhlǒ dǒ a ô̌ dě a hî̌ asî kû̌, “Kòyò tôpwa̤pwa̤ kè̌ sǎyṳ gû̌ hekò hî̌nu, a tôbǎ ma̤ pô̤̌ he sǎyṳnoma̤ lû̌û nutokhlǒ, kè̌ a ma̤ jû̌ tûû̌ asǎphlǒ mî̌ anǐ̤ tô̤̌. A bǎ ò̌htò̌ tûû̌ a nò̌dò̌htǔ dě a bǎ gû̌ hekò. ^h 35 Ma̤titèhî̌dě kòyò dǒ a sǎyṳ ma̤hǎplǎge tûû̌ a ta̤htûpwa̤ tôpwa̤pwa̤ nu, a yôla htûpwa̤ hǎmǎkè pě. Bǎbǎkǎlè dǒ hekhû̌hekhî dě kòyò tôpwa̤pwa̤ kè̌ ǐlò̤kè a ta̤htûpwa̤ kû̌ ta̤sǎlě̤we̤kènu dǒ heya hî̌nu, a gǔ nǐ̤bǎ yôla htûpwa̤ tûjû̌pwa̤ pě. ⁱ 36 Kòyò tokhlǒ gǔ nǐ̤bǎ bò hǎkhû̌běkhû̌ a ta̤dû̌yò̤̌htò̌sa tokhlǒ dě a kè̌ lò̤jû̌kè a yôla htûpwa̤ tûjû̌pwa̤ nu anǐ̤bwǐsîrî dǒ aya mî̌titè? 37 Kòyò dǒ a sǎyṳ nǐ̤bǎ getîkhî sô̌ a ta̤htûpwa̤ tûjû̌pwa̤ tôpwa̤pwa̤nu, ta̤dû̌yò̤̌htò̌sa ô̌ pwǐtè bǎbǎ dǒ a gǔ pwî̤bò̌ kû̌ a ta̤htûpwa̤ nu a ô̌ tocǒ꤮ tô̤̌. 38 Htukha dǒ a ma̤shû̌pwǎtǒ̤ ta̤sǔta̤plě khònò̤̌htukhanu, kòyò dǒ a gû̌ma̤ tô Cǒmara asǎphlǒ ô̌pe tô̤̌ hǒtôhtu akûnu, kòyò tôpwa̤pwa̤ dǒ a sòwò̤̌ he htokhôtô̤̌ a sòwò̤̌ he kû̌ helě̤heyô̤̌ tokhlǒ tôpwa̤pwa̤ nu, htû̌ Kòyòphû̌khû mî̌ he hè kû̌ hepha a ta̤bwǐdû̌sîrîhtû pě, dě he hè kû̌ mǒkhû̌ tanaphû̌ plò̌shǐ tokhlǒ pěhǒ akhanu, he gǔ sòwò̤̌ a pě.”