Mat 10 | KxfSCKXF | STEP | Pô̤̌khô a khôphijǎ shǐsò̌ginǐ̤ gǔ wṳ̂̌hǎhtò̌pè̤̌kè khînǎkhîno phû̌mò̤̌ tokhlǒ, htokhôtô̤̌ pô̤̌khô asî gǔ ma̤hǎmǎbǎ bò̌bò ta̤shǐta̤sha pṳ̂̌꤮ tocǒ ayanu, Běcǎ Yeshǔ kaǎ asî dǒ a ô̌ dě a ǐ pè̤̌ asî ta̤siwi̤sòwò̤.

Matthew 10

Pwa̤nophû̌ shǐsò̌ginǐ̤

(Makǔ 3:13-19; Lǔka 6:12-16)

1 Pô̤̌khô a khôphijǎ shǐsò̌ginǐ̤ gǔ wṳ̂̌hǎhtò̌pè̤̌kè khînǎkhîno phû̌mò̤̌ tokhlǒ, htokhôtô̤̌ pô̤̌khô asî gǔ ma̤hǎmǎbǎ bò̌bò ta̤shǐta̤sha pṳ̂̌꤮ tocǒ ayanu, Běcǎ Yeshǔ kaǎ asî dǒ a ô̌ dě a ǐ pè̤̌ asî ta̤siwi̤sòwò̤.

2 Pwa̤nophû̌ shǐsò̌ginǐ̤ ami̤ mî̌ kwè̌ mò̌pè hî̌dě, awǐlǒ tôpwa̤ mî̌ ami̤ kû̌ Khûshǐmû tô̤̌mî̌ kòyò kaǎ lû̌û kû̌ Khûpetarǔ kû̌ apṳ̌ Khûîdru, htodě Phasebedè̌ aphû̌pwa̤khû Khûya̤kû kû̌ apṳ̌ Khûyṳ̂ha, 3 Htodě Khûphǐlǐpǔ kû̌ Khûbatòlòmè̌, Khûtû̌mǎ kû̌ pwa̤kwi ta̤kûta̤mṳ̂̌ Khûmatè̌, htodě PhaAlaphè̌ aphû̌khû Khûya̤kû htodě Khûtadè̌, 4 Htodě Khûshǐmṳ̂, a mî̌ kòyò kaǎ lû̌û kû̌ sèlò̌ ^{▼▼sèlò̌ mî̌ aprṳ̂aphǎ ami̤, dě aprṳ̂aphǎ numî̌ a sǎyṳ ô̌ lô̌khô dǒ Rṳ̂̌me̤ a ta̤pǒalǎ̤ tô̤̌. A sǎyṳ ô̌ tûû̌ kû̌ ashiagǎ.} aplǒacuphû̌ akla tôpwa̤, htodě Khûyǔda Isakarû dǒ a shaǎlò̤kè Běcǎ nutôpwa̤.

Běcǎ Yeshǔ plûcû̌ pwa̤nophû̌ shǐsò̌ginǐ̤

(Makǔ 6:7-13; Lǔka 9:1-6)

5 Bǎ Běcǎ Yeshǔ nocû̌ a khôphijǎ shǐsò̌ginǐ̤ akhanu, a mǎcû̌nṳ̌ asî ayô̤̌ kû̌, “Cû̌ tǎ̤ dǒ Yǔdaphû̌ mè̤̌tô̤̌ tokhlǒ aklanu tǎ̤mǎ̤ nî̌, htodě cû̌nṳ̌ tǎ̤ dǒ Shamarǐphû̌ adoashô̌kûnu tǎ̤mǎ̤mǎ̤ nî̌꤮. 6 Cû̌ pwǎ dǒ pa kòyò khlilèphû̌ Isôrělaphû̌ akla dǒ asô̌sô̌kû̌ sû̌phû̌ hǎmǎ nutokhlǒ a ô̌ nupwǎ nî̌꤮. 7 Bǎ sî cû̌ akha, shôbǐǐlṳ̌ bǎ kòyò kû̌, ‘mǒkhû̌ ashiagǎ phǔhtò̌phǔlò̤hǒ,’ pô̤̌nu nî̌꤮. 8 Ma̤hǎmǎ kòyò dǒ ashǐasha tokhlǒ, ma̤htûpwa̤ getîkhî kòyò dǒ a si tokhlǒ, ma̤hǎmǎge kòyò ta̤shakrôǎ dǒ bělô̤ tokhlǒ, wṳ̂̌hǎhtò̌kè lô̌khô khînǎkhîno, sî nǐ̤bǎ kwe ta̤lǒ̤꤮ bò nutokhlǒ akhû̌akhî, kwi tǎ̤ kòyò akhû̌akǎ tǎ̤mǎ̤ nî̌, ma̤kwe bǎpwǎ kòyò nî̌꤮. 9 Htabǎbǎ, rubǎbǎ, tilitè̌kò̌ bǎbǎ shû̌nṳ̌cû̌ tǎ̤ lô̌khô dǒ sî rukhûkhi kû tǎ̤mǎ̤ nî̌꤮. 10 Khûkhi bǎbǎ, phî̌cû̌lǒ phî̌cû̌khlo tǎ̤ lô̌khô tǎ̤mǎ̤ nî̌, je bǎbǎ, khò̌phě bǎbǎ, tô̤̌mî̌ nò̌htô̌ bǎbǎ phî̌cû̌nṳ̌ lô̌khô tǎ̤mǎ̤ nî̌꤮. Ma̤titèhî̌dě kòyò dǒ a ma̤ ta̤ma̤ tokhlǒnu a tô nǐ̤bǎ ta̤ dǒ a lǎ̤lṳ̂ tokhlǒ. ^b

11 “Bǎ sî cû̌nṳ̌ dǒ do tôdo akûnu, kè̌lǎ kòyò dǒ sî lǎ̤nǎla̤ǐ yǎ tôpwa̤pwa̤ dě cû̌ô̌ kû̌ dǒ ahǐnu. Dě ô̌gutṳ̌ kû̌ a bǎnu tǒ̤dǒ sî hǎhtò̌gepě tôplǎnu nî̌꤮. 12 Bǎ sî cû̌nṳ̌ dǒ hǐnu tômèkû akhanu, kwi Cǒmara dǒ a gǔ ǐshowî̤ hǐnu tômè nî̌꤮. 13 Hǐnu tômè kè̌ a tô nǐ̤bǎ ta̤ǐshowî̤ kè̌hî̌dě dǐô̌kè sî sǎphlǒ gûjû̌kabǎ a ta̤ǐshowî̤ dǒ asî hǐkûnu. Kè̌ asî kaǎmô̤shěshuwô̌ sî tô̤̌ kè̌hî̌dě phî̌tîkhîsô̌ sî ta̤pè̤̌ta̤dû nî̌꤮. 14 Kòyò tôpwa̤pwa̤ kè̌ kaǎshěshu sî tô̤̌, a kè̌ ganǎ̤de sîyô̤̌ tô̤̌ kè̌hî̌dě, bǎ sî hǎhtò̌cû̌kè kû̌ hǐ nutômè akha, kè̌mè̤̌tô̤̌dě do nutôdo akhanu, tuphlǔlò̤tě̤kè hǎkumṳ̌ dǒ sî khǎlǎlô̤ nutokhlǒ. ^{▼▼tuphlǔlò̤tě̤kè hǎkumṳ̌ yô̤̌mûyô̤̌sǎ mî̌, Cǒmara gǔ cî̌htò̌ asî pě nuhǒ.} ^d 15 He hî̌cǒcǒ sî, htû̌ Cǒmara cî̌htò̌ kòyòhǎkhû̌phû̌ pě akhanu, a gǔ cî̌htò̌ jî̌khlo kòyò nutôdo kû̌ Wî̤̌sadûphû̌ kû̌ Wî̤̌gamû̌ra phû̌ ^{▼▼dǒ awǐkha bǎ PhaAbraha ô̌htûpwa̤ pe dǒ hǎkhû̌ akha, kòyò ô̌ dǒ wî̤̌nu ginǐ̤wî̤̌ akû tokhlǒnu, a ma̤jî̌ ta̤phû̌mò̤̌shǐhtô akhû̌akhî, Cǒmara ma̤pî̌kè bò wî̤̌nu ginǐ̤wî̤̌.} Dǒ Cǒmara cî̌htò̌ asî dǒ꤮ awǐkha nutokhlǒ pě. ^f

Ta̤ma̤jî̌ma̤jû̌ dǒ a gǔ hèbǎ pwa̤nophû̌ tokhlǒ

(Makǔ 13:9-13; Lǔka 21:12-17)

16 “He nocû̌ sî sô̌sô̌kû̌ he plûcû̌ sû̌phû̌ dǒ shǐmi̤ aklanu. Ma̤pô̤̌nudě lîmò lô̌khô pô̤̌ wṳ̂̌ tokhlǒnu, dě sǎphlǒ mṳ̂̌plî lô̌khô pô̤̌ htû̌lǐ̤nu nî̌꤮. ^g 17 Ô̌sèrè̌ lô̌khô sînǎ̤, ma̤titè̌hî̌dě kòyò gǔ pṳ̂̌ sûcû̌ sî dǒ ta̤cabahǐ ikǒdû̌ tokhlǒ lǎ̤hî̌bǎplǒ kè̌shǐ shěshu lû̌û ahǐkû pě dě a gǔplègǔpo̤ sî dǒ ta̤cabahǐ tokhlǒ akû pě. ^h 18 Dǒ hekhû̌khî dě kòyò gǔ cî̌cûgrû̌htû̌taa hè sî dǒ pwa̤pǒta̤ dǒ a htû ikǒdû̌ tokhlǒ kû̌ khwǐ tokhlǒ a ô̌ pě. Sî gǔ shôbǐǐlṳ̌ asî kû̌ hewe̤hekè pě. Sî khòlṳ̌ bǎ sîsǎphlǒ kû̌ asî nutokhlǒ kû̌ Yǔdaphû̌ mè̤̌tô̤̌ tokhlǒ pě. 19 Bǎbǎkǎlè bǎ asî pṳ̂̌ sî akhanu, bǎgû̌bǎgè̌ nǎ tǎ̤ kû̌ sî hî̌bǎ mî̌titè pě tô̤̌mî̌ sî hî̌bǎ hî̌tènu tǎ̤mǎ̤. Shěkhǎ hètǒ̤ pěnu, Cǒmara ǐ sî yô̤̌sǎ dǒ sî tô hî̌bǎ nutokhlǒ pě. 20 Yô̤̌sǎ nutokhlǒ mî̌ sî ta̤hî̌bǎ tûû̌ mè̤̌tô̤̌, a mî̌ papha Cǒmara a Yôla Plò̌shǐ hî̌bǎ sî dǒ sî bǎ hî̌ pwǎ.

21 “Bǎnuakha pěnu, pṳ̌ glè̌ noma̤si tûû̌ awè̤̌ kû̌ kòyò pě, dě wè̤̌ noma̤si tûû̌ apṳ̌ kû̌ kòyò pě, pha noma̤si tûû̌ aphû̌ kû̌ kòyò pě, phû̌ tokhlǒ shěgeshěshu tûû̌ amǒ̤apha tokhlǒ pě, dě a noma̤si kòyò kû̌ amǒ̤apha pě. ⁱ 22 Dǒ hekhû̌khî dě, kòyò pṳ̂̌꤮ tôpwa̤ sǎkhě bò sî pě. ^j Bǎbǎkǎlè kòyò dǒ a ihtǒ tònò ô̌měô̌gle dǒ a ta̤yṳ̌ta̤nǎ̤ akû tǒ̤dǒ agutṳ̌ tokhlǒnu Cǒmara ma̤hǎplǎge asî pě.” ^k 23 Kòyò kè̌ ma̤jî̌ma̤jû̌ sî bǒo tûkû kè̌hî̌dě khlè̌cû̌ tutṳ̌ dǒ ashǔshawa̤ tûkûnu. He hî̌cǒcǒ sî, bǎ sî cû̌ pṳ̂̌bò Isôrělaphû̌ awî̤̌ nutokhlǒ khôtô̤̌nu, kòyòphû̌khû hèlǎ pě. ^l

24 “Khôphijǎ nî̌ asî̌ajò̌ khlo kû̌ asara tôkhò̌꤮ tô̤̌. ^m Jû̌ tôpwa̤nu, adû̌khlo kû̌ aběcǎ tôkhò̌꤮ tô̤̌. ⁿ 25 Khôphijǎ tôpwa̤ kè̌ jò̌ pô̤̌ asaranu, dě jû̌ tôpwa̤ kè̌ jò̌ pô̤̌ aběcǎnu mî̌ pô̌hǒ. He htû hǐ ikǒ tôpwa̤ dě asî kè̌ kaǎ he kû̌ khînǎkhîno a ikǒlǒkòdû̌ dǒ ami̤ kû̌ Belǎsebulǎ kè̌hî̌dě sî dǒ a htû pwǎ hǐphû̌phòphû̌ tokhlǒnu a kaǎjî̌kaǎjû̌ khlo sîmi̤ pě. ^o

Yṳ̌ǎ lô̌khô Cǒmara nî̌꤮, ǐsha tǎ̤ lô̌khô kòyòhǎkhû̌phû̌ alǎ̤ tǎ̤mǎ̤ nî̌꤮.

(Lǔka 12:2-7)

26 “Ma̤pô̤̌nudě ǐsha tǎ̤ asîlǎ̤ tǎ̤mǎ̤. Ta̤dǒû̌dǒbǐ lǒ̤꤮ bò tokhlǒnu, Cǒmara bǔmôhtò̌ lṳ̌bò a pě. Dě lǒ̤꤮ bò ta̤ma̤hǔma̤sè̌ tokhlǒnu, Cǒmara ma̤htò̌lṳ̌bò a pě. ^p 27 Yô̤̌sǎ dǒ he hî̌ bǎ sî dǒ akhǐsiwikû tokhlǒnu, cû̌hî̌bǎ lô̌khô dǒ alîklanu nî̌꤮. Yô̤̌sǎ dǒ sî ganǎ̤dehǔ ganǎ̤desè̌ tokhlǒnu, htò̌ kaǎgǔ lô̌khô dǒ hǐgutadǎkhû̌ nî̌꤮. 28 Kòyò dǒ a ma̤si jò sî nǎ̤glǒ bǎbǎkǎlè a ma̤si jò sî yôla tô̤̌ tokhlǒnu, ǐsha tǎ̤ alǎ̤ tǎ̤mǎ̤. Ǐsha lô̌khô Cǒmara dǒ a ma̤si jò sî nǎ̤glǒ kû̌ sî yôla ginǐ̤cǒbònu dǒ larakû nutôpwa̤ nî̌꤮. 29 Htû̌pwǎ̤phû̌ ginǐ̤bǎnu kòyò shaǎ pwǎ lû̌û kû̌ ruyî̌ tômṳ̌ pwǎ, yahě? Bǎbǎkǎlè pha Cǒmara kè̌ nolò̤tě̤ si asî tô̤̌ hî̌nu, a lò̤tě̤si nô̌ dǒ hǎkhû̌ tôbǎtô̤̌. 30 Lǒ̤꤮ bò sî khǔlṳ dǒ sî ikǒlô̤ nutokhlǒ Cǒmara dô̌bǎ nǎ hto lǒ̤bò hǒ. 31 Pô̤̌nudě ǐsha tǎ̤mǎ̤! Sî lě̤dû̌pwî̤htû khlo kû̌ htû̌pwǎ̤phû̌nu tôprṳ̂tôphǎ.

Ta̤kaǎmô̤ shěshu Khrǐ kû̌ ta̤htè̌ shěshu Khrǐ

(Lǔka 12:8-9)

32 “Mò̌pèpè̌꤮ bǎbǎ a kè̌ olò̤ kû̌ a yṳ̌ǎ he dǒ kòyò saprû a lô̤mô̤̌ hî̌nu, he olò̤ a pô̤̌nu dǒ Cǒmara a mǒkhû̌ tanaphû̌ tokhlǒ a lô̤mô̤̌ pě. 33 Bǎbǎkǎlè mò̌pèpè̌ bǎbǎ a kè̌ sumṳ̌ ^{▼▼tokhlǒkhlǒ nu a hî̌ kû̌ htè̌shěshu} he kû̌ a yṳ̌ǎ he tô̤̌ dǒ kòyò saprṳ̂ a lô̤mô̤̌ pě tôpwa̤pwa̤ hî̌nu, dǒ mǒkhû̌ hepha a lô̤mô̤̌ pěnu, a mî̌ he kòyò mè̤̌tô̤̌ he hî̌tè̌ pô̤̌nu pě. ^r

Ta̤pè̤̌ta̤dû mè̤̌tô̤̌ ta̤shěta̤pě̤ pwǎ

(Lǔka 12:51-53, 14:26-27)

34 “Gènè̤ tǎ̤ lô̌khô kû̌ he phî̌hè ta̤pè̤̌ta̤dû dǒ hǎkhû̌nu tǎ̤mǎ̤. He phî̌hè ta̤pè̤̌ta̤dû mè̤̌tô̤̌. He phî̌hè nò̌she tôbǎ. 35 Ma̤titèhî̌dě, he hè dǐô̌htûhtò̌

‘phû̌pwa̤khû kû̌ pha, phû̌pwa̤mǒ̤ kû̌ mǒ̤, dè̌ kû̌ mipwǎ̤pwa̤mǒ̤ gǔtǒ̤klî̌ lû̌û pě pwǎ. 36 Kòyò tôpwa̤pwa̤ dǒ kòyò gǔ sǎyṳ dǔdǎ lû̌û pě numî̌ a mè̤̌tû̌pwǎ a hǐphû̌phòphû̌ tûû̌ pě pwǎ.’ ^s

37 “Kòyò tôpwa̤pwa̤ dǒ a mô̤ǐ khlo amǒ̤apha kû̌ he hî̌nu, a gwǎ kû̌ he tô̤̌. Kòyò tôpwa̤pwa̤ dǒ a mô̤ǐ khlo a phû̌mǒ̤phû̌khû kû̌ he hî̌nu, a gwǎ kû̌ he tô̤̌. 38 Kòyò tôpwa̤pwa̤ dǒ a yò̌ tûû̌ a nò̌dò̌htǔ tô̤̌tô̤̌, a gû̌ kû̌ hekò tô̤̌tô̤̌ tokhlǒnu, a gwǎ kû̌ he tô̤̌. ^t 39 Kòyò tôpwa̤pwa̤ dǒ a sǎleǐ tûû̌ a ta̤htûpwa̤nu, a yôla gǔ lò̤jû̌kè pě. Kòyò dǒ a tṳ̌sikhòsi ata̤htûpwa̤ dǒ he yanu, a kè̌shǐ yôla htûpwa̤ tûjû̌pwa̤ pě. ^u

Mò̌pèpè̌꤮ bǎbǎ dǒ a kaǎshǔ Běcǎ Yeshǔ akhôphijǎnu, a kaǎshǔ Yeshǔ hǒ.

(Makǔ 9:41)

40 “Kòyò dǒ a kaǎshǔ sî numî̌ a kaǎ shěshu he hǒ. ^v Dě kòyò dǒ a kaǎ shěshǔ he numî̌, a kaǎ shěshu pha Cǒmara dǒ a nohè he nutôpwa̤ hǒ. ^w 41 Kòyò tôpwa̤pwa̤ htû Cǒmara apô̤phǎ dě kòyò tôpwa̤pwa̤ gǔ kaǎmô̤ shěshǔ piwi̤pèshè tôpwa̤nu, Cǒmara gǔ ǐ a ta̤ma̤nǐ̤khû̌kǎ pô̤̌ a ǐ piwi̤pèshè tokhlǒnu pě. Kòyò tôpwa̤pwa̤ htû kòyòcǒkòyòtè̤ dě kòyò tôpwa̤pwa̤ kaǎmô̤shǔ kòyòcǒkòyòtè̤ tôpwa̤nu, Cǒmara ǐ a ta̤ma̤nǐ̤khû̌kǎ pô̤̌ a ǐ kòyòcǒkòyòtè̤ tokhlǒnu pě. 42 He hî̌cǒcǒ sî, kòyò tôpwa̤pwa̤ htû he khôphijǎ dǒ a pî̌tî̌lǒ tôpwa̤ akhû̌akhî, mò̌pèpè̌ bǎbǎ dǒ a dǐô kòyò nutôpwa̤ kû̌ shigûjû̌ tôbè pwǎnu, Cǒmara ǐ mè̤̌mî̌ca lû̌û ta̤ma̤nǐ̤khû̌kǎ pě.”