Matthew 14

Jushi Khûyṳ̂ha si ma̤hî̌tè awe̤akè

(Makǔ 6:14-29; Lǔka 9:7-9)

1Bǎnuakha pwa̤pǒta̤ Herû ganǎ̤de Běcǎ Yeshǔ awe̤akè. 2Dě a hî̌ a pwa̤ma̤ta̤phû̌ tokhlǒ kû̌, “A mî̌ pwa̤jushi Khûyṳ̂ha pwǎ, a ihtǒgesô̌ dǒ ta̤si hǒ, htodě a ma̤jò ta̤cô̌klǐcô̌sè nutokhlǒ hǒ.”

3– 4Khwǐherû cû̌phî̌ sô̌ tûû̌ akhi Mǒ̤heròdǐ. A mî̌ apṳ̌ Khûphǐlǐpǔ ama, pô̤̌nu akhû̌akhî, Khûyṳ̂ha hî̌htohî̌sô̌ lû̌û kû̌, “Na cû̌phî̌ sô̌ nakhi pô̤̌nu mî̌ atô kû̌ ta̤sû̌ta̤tòwò tô̤̌.” ^a A hî̌ lû̌û pô̤̌nudě a no cû̌pṳ̂̌ akliphû̌ tokhlǒ kû̌ Khûyṳ̂ha dě a nodǒlò̤tě̤kè lû̌û dǒ apô̤kû. ^b 5Khwǐherû sǎyṳ ma̤sikè Khûyṳ̂ha bǎbǎkǎlè Yǔdaphû̌ tokhlǒ yṳ̌ǎ kû̌ Khûyṳ̂ha mî̌ piwi̤pèshè tôpwa̤ akhû̌akhî, a ǐsha asî alǎ̤ dě a ma̤si bǔ lû̌û tô̤̌.

6Bǎbǎkǎlè bǎ Khwǐherû ô̌phijǎlò̤ alṳmṳ̌ni̤ hètǒ̤ akhanu, Mǒ̤heròdǐ aphû̌pwa̤mǒ̤ kalǐ dǒ Khwǐherû alô̤mô̤̌ kû̌ shǐpwǎ̤shǐmè̤ tokhlǒ alô̤mô̤̌ dě Khwǐherû sǎphlǒmô̤ jòjî̌ tô̤̌ akhû̌akhî, 7A olò̤ kû̌ a sǎyṳ kwi titètè̌꤮ nu, a gǔ ǐ lû̌û a hî̌ lû̌û pô̤̌nu. 8Dě bǎkwi mî̌titènu amǒ̤ hî̌ bǎ lû̌û dě a cû̌ hî̌ Khwǐherû kû̌, “Pě̤tṳ̌ bǎ he jushi Khûyṳ̂ha agô̌bô dě bè̌nṳ̌ bǎ he a ikǒnu dǒ balětaa dû̌kû dě hèǐ he bǒo,” A hî̌ pô̤̌nu. 9Khwǐnu a sǎphlǒmô̤ tô̤̌ bǎbǎkǎlè a olò̤ hto dǒ ashǐtèmè̤ tokhlǒ alô̤mô̤̌ akhû̌akhî, a no akliphû̌ tokhlǒ kû̌ a gǔ cû̌ma̤pô̤̌ phǐjǎpwa̤mǒ̤ nutôpwa̤ kwi yǎnu. 10Asî cû̌ dǒ kò lǎ̤dǒô̌ kòyò apô̤kû dě a cû̌pě̤tṳ̌ ge Khûyṳ̂ha agô̌bô. 11Asî bè̌nṳ̌ Khûyṳ̂ha a ikǒnu dǒ balětaa akû dě a hèǐ kû̌ phijǎpwa̤mǒ̤ nutôpwa̤ dě phijǎpwa̤mǒ̤ joge dǒ amǒ̤ ô̌. 12Khûyṳ̂ha akhôphijǎ tokhlǒ hèphǐkè a nǎ̤glǒ ô̌kènu dě ge lǔǐkè lû̌û. Htodě asî cû̌ shôbǐǐ Běcǎ Yeshǔ.

Běcǎ Yeshǔ dǐǎ kòyò yè̤̌rî̌ a shǎǎ

(Makǔ 6:30-44; Lǔka 9:10-17; Yṳ̂ha 6:1-14)

13Bǎ Běcǎ Yeshǔ ganǎ̤de kû̌ kòyò ma̤si kèhto Khûyṳ̂ha akhanu, a kû̌ akhôphijǎ tokhlǒ cû̌nṳ̌ dò̌ sǒkhli dě hǎhtò̌cû̌kè lô̌khô tû̌ dǒ gûlǎ̤ sǔtukǔ dǒ kòyò ô̌ tôpwǎ̤꤮ tô̤̌ tûkû. Dě bǎ kòyò saprṳ̂ ganǎ̤de akhanu, a ô̌ lô̌khô bǎ wî̤̌kû nutokhlǒ dě a hǎhtò̌ cû̌ lô̌khô kû̌ khò̌lôpô̤̌ dǒ khôkhû̌ tôkhô. 14Bǎ Běcǎ Yeshǔ ô̌ dǒ sǒkhlikû hǎhtò̌ akhanu, a kè̌shǐ kòyò saprṳ̂dû̌ cû̌ ô̌pǒ̤ nǎ wǐ bòkè dǒ lômô̤̌. Bǎ a kè̌shǐ asî akha a sǎyṳgwèbǎǐ asî dě a ma̤hǎmǎbǎ bò kòyòsha dǒ asîkla nutokhlǒ.

15Bǎ lṳmṳ̌hǎ lṳmṳ̌ glè̌ lò̤tě̤phǔhǒ akhanu, akhôphijǎ tokhlǒ hè dǒ lû̌ô̌ dě a hèhî̌ lû̌û kû̌, “Gûlǎ̤ bǒo tûkû mî̌ do ô̌phǔ tôdǒ꤮ tô̤̌, kǎtô̤̌ lṳmṳ̌khǐ pô̤lô̤̌ akhû̌akhî, pô̤̌khô asî gǔ cû̌pwî̤ ǎ tûû̌ lô̌khô a lǎ̤ǎlǎ̤ô dophû̌shô̌phû̌ nutokhlǒ akû dě nogemò̌ kòyò nutokhlǒ.”

16Běcǎ Yeshǔ hî̌shěshu asî kû̌, “Lǎ̤lû noge asî tô̤̌. Kè̌ dǐǎdǐô mò̌ asî tocǒcǒnu.”

17Dě asî hî̌shěshu lû̌û kû̌, “Pata ô̌ pwǎtǒ̤ mû̌ yè̤̌phlǒ kû̌ tò̤̌phû̌ ginǐ̤bǎ nô̤̌pwǎ.”

18Dě a hî̌ asî kû̌, “Phî̌hè dǒ he ô̌ bǒo.” 19Dě a nohǎnòò̌lò̤ bò kòyò nutokhlǒ dǒ mi̤khû̌. A phî̌ mû̌ yè̤̌phlǒ kû̌ tò̤̌phû̌ ginǐ̤bǎ dě a kè̌htò̌ dǒ mǒlǎ̤ dě a hî̌bwǐhî̌sîrîhtò̌ Cǒmara htodě a běphwǐ mû̌. Htodě a ǐlò̤ dǒ akhôphijǎ tokhlǒ a ô̌. Dě akhôphijǎ tokhlǒ yṳ̂̌lò̤ tutṳ̌ dǒ kòyò saprṳ̂ tokhlǒ a ô̌. 20Asî ǎ pô̌ǎpô̌ô ǎkǒôbe bò pṳ̂̌꤮ tôpwa̤. A khôphijǎ tokhlǒ phî̌plǒ gesô̌ a kashǎ ô̌kè tokhlǒnu a ô̌be pe kû̌ phû̌běnu shǐginǐ̤phû̌bě. 21Dô̌ còcè̌pwǎ pwa̤khûdû̌ dǒ a ǎ shǎ tokhlǒnu a phǔ ô̌tònò̤̌ yè̤̌rî̌. Pwa̤mǒ̤ kû̌ phijǎphû̌ tokhlǒnu dô̌bǎpa lû̌û tô̤̌.

Běcǎ Yeshǔ cû̌ dǒ shikhû̌

(Makǔ 6:45-52; Yṳ̂ha 6:15-21)

22Asî htǔplǒ htohto kû̌ Yeshǔ no cû̌nṳ̌ dò̌ bò akhôphijǎ tokhlǒ sǒkhli dě a nohǎhtò̌cû̌ wǐkè asî dǒ shikoǒ lô̤̌bò̌. Dě bǎ akhôphijǎ htò̌dò̌ sǒkhli akhanu, a dě a plûgekè bò kòyò saprṳ̂ nutokhlǒ. 23A plûgehto kòyò saprṳ̂ dě, a cû̌htò̌ kwicaba tûû̌ dǒ khôlôkhû̌ tôpwa̤ nô̤̌pwǎ. Bǎ lṳmṳ̌khǐpô̤lô̤̌ akhanu, a ô̌ tûû̌ bǎnu tôpwa̤nô̤̌. 24Bǎbǎkǎlè bǎ sǒkhli nutôbǎ hǎhtò̌cû̌ yî̤kè dǒ shikoǒdû̌kû akhanu, gili̤sǎdû̌ hèshěbǎ asî dě shipěpǒ hè pǒbǎ bò asî sǒkhli.

25Bǎ shîû̌ lṳmṳ̌ glè̌ lîbû akhanu, Běcǎ Yeshǔ cû̌ dǒ shikhû̌ dě a hè tô bǎ asî ô̌. 26Bǎ akhôphijǎ tokhlǒ kè̌shǐ a cû̌ dǒ shikhû̌ akhanu, asî ǐsha gònò̤̌gòglè dě a kaǎgǔ lô̌khô kû̌, “Ǒ꤮ kòyò yômǔyôla.”

27Bǎbǎkǎlè tôplǎnô̤̌, Běcǎ Yeshǔ hî̌ asî kû̌, “Bè̌khubè̌he lô̌khô sî sǎphlǒ. Ǐsha lô̌khô tǎ̤mǎ̤, hǒo mî̌ he pwǎ.”

28Dě Khûpetarǔ hî̌ kû̌, “Běcǎ, kè̌ na mè̤̌mî̌ca hî̌dě hî̌mò̌ he dǒ he gǔ hè dǒ shikhû̌ bǎ na ô̌.”

29Dě a hî̌ lû̌û kû̌, “Hèmò̌.”

Dě Khûpetarǔ hǎtě̤ dǒ sǒkhlikû dě a cû̌ dǒ Yeshǔ a ô̌ dǒ shikhû̌. 30Bǎbǎkǎlè bǎ a kè̌shǐ gili̤sǎ shipěpǒ akhanu, a ǐsha dě a lò̤cǔkè, dě a kaǎgǔ kû̌, “Běcǎ, ma̤jè̌ mò̌ he.”

31Běcǎ Yeshǔ yṳ̂̌hè acǔde tôplǎnô̤̌ dě a cî̌htò̌ lû̌û dě a hî̌ lû̌û kû̌, “Na ta̤yṳ̌ pî̌tî̌ shû̌lě, na sǎphlǒ wò̌wè̌ ma̤titè?”

32Bǎ asî htò̌nṳ̌ dǒ sǒkhlikû akhanu, gili̤sǎ ô̌kǔ hèkè. 33Bǎnuakha kòyò ô̌ dǒ sǒkhlikû nutokhlǒ cabahtò̌ Běcǎ Yeshǔ dě a hî̌ kû̌, “Na mî̌ Cǒmara aphû̌khû tôpwa̤ mè̤̌mî̌ca hǒ.”

Běcǎ ma̤hǎmǎ ta̤shǐta̤sha dǒ Genashèrè̤̌gǎ

(Makǔ 6:53-56)

34Asî cû̌bò̌ hto shikoǒdû̌ nudě a cû̌tǒ̤ lô̌khô dǒ Genashèrè̤̌gǎ. 35Dophû̌shô̌phû̌ bǎnu tokhlǒ to̤ǐ Yeshǔ dě asî cû̌ pwe̤ǐbǎ bò kòyò dǒ a ô̌ lô̌khô dǒ gǎkû bǎnu tokhlǒ dě kòyò kaǎ hèbò kòyòshǐ kòyòsha tokhlǒ dǒ Yeshǔ ô̌. 36Asî kwisǎyṳ Běcǎ kû̌ notô̌bǎ pwǎ na jejûgòpwè̤nu kû̌ pwa̤shǐ pwa̤sha tokhlǒnu tîkî̌phû̌ nô̤̌pwǎ. Dě kòyò dǒ a tô̌bǎ lû̌ jejûgòpwè̤ tokhlǒnu, a ta̤shǐta̤sha hǎmǎ bòkè.