Mat 17 | KxfSCKXF | STEP | Lṳmṳ̌ni̤ susô̌ behtò̌hto dě Běcǎ Yeshǔ kaǎnṳ̌ Khûpetarǔ, Khûya̤kû kû̌ apṳ̌ Khûyṳ̂ha dě a cû̌htò̌ dǒ khôlôhtò̌yô̤̌ tômè akhû̌. Dě a sǎyṳ cû̌ô̌ kû̌ asî pwǎ.

Matthew 17

Běcǎ Yeshǔ hî̌bǎ kû̌ Khûmṳ̂shě kû̌ piwi̤pèshè Khûělǐya

(Makǔ 9:2-13; Lǔka 9:28-36)

1 Lṳmṳ̌ni̤ susô̌ behtò̌hto dě Běcǎ Yeshǔ kaǎnṳ̌ Khûpetarǔ, Khûya̤kû kû̌ apṳ̌ Khûyṳ̂ha dě a cû̌htò̌ dǒ khôlôhtò̌yô̤̌ tômè akhû̌. Dě a sǎyṳ cû̌ô̌ kû̌ asî pwǎ. 2 Bǎ asî ô̌ bǎnuakha Běcǎ Yeshǔ anǎ̤glǒ htû̌lè̌tèplè̌ khô̌bò dǒ asî lô̤mô̤̌. Amǐ̤sǎ tôbǎnu a rakha asô̌sô̌kû̌ lṳmṳ̌nu, ajenu a bûsǔlǔ plò̌kishǐ kè. 3 Tashò̌phû̌nô̤̌ akûnu, asî kè̌shǐ Khûmṳ̂shě kû̌ piwi̤pèshè Khûělǐya hèô̌lṳ̌htò̌ dě asî hî̌bǎ lô̌khô kû̌ Běcǎ Yeshǔ.

4 Khûpetarǔ hî̌ Yeshǔ kû̌, “Běcǎ, gûlǎ̤ bǒo tûkû nî̌ awî̤ amô̤wô̌꤮ lîlè. Na kè̌ sǎphlǒô̌ hî̌dě he gǔ ma̤bǎ sî hǐphû̌ sumè. Tômèdě naya, tômèdě Khûmṳ̂shě aya, tômèdě piwi̤pèshè Khûělǐya aya.”

5 Bǎ a hî̌bǎ pepwǎ akhanu, poǒlṳ̌ kakha tôbě lò̤plû̌ bǐkè asî dě alě̤pwe̤htò̌ tômû dǒ poǒlṳ̌ akû kû̌, “Hǒomî̌ hephû̌ dǒ he mô̤ǐ yǎ dě he sǎphlǒô̌ yǎ tôpwa̤, ganǎ̤de lô̌khô ayô̤̌ nî̌꤮.” ^a

6 Bǎ akhôphijǎ ganǎ̤de pô̤̌o akhanu, asî ǐsha jòjî̌꤮ tô̤̌, dě a wî lò̤khǔpo̤ tuklu bò anǎ̤ dǒ hǎkhû̌. 7 Bǎbǎkǎlè, Běcǎ Yeshǔ hè tô̌bǎ asî dě a hî̌ asî kû̌, “Ihtǒ lô̌khô, ǐsha tǎ̤mǎ̤.” 8 Bǎ asî kè̌htò̌ akha, a kè̌shǐ pwǎtǒ̤ Běcǎ Yeshǔ tôpwa̤pwǎ̤꤮ nô̤̌.

9 Bǎ asî ô̌ dǒ khôlôkhû̌ hǎtě̤ akhanu, Běcǎ Yeshǔ mǎnǎ tě̤mè̤̌ asî yô̤̌sǎ kû̌, “Kòyòphû̌khû kè̌ si ihtǒhtûpwa̤ getîkhî dǒ ta̤si nò̌khôtô̤̌nu, cû̌ shôbǐǐlṳ̌ bǎ tǎ̤ kòyò kû̌ sî kè̌shǐ ta̤hǒtokhlǒ awe̤akè tôpwǎ̤꤮ tǎ̤mǎ̤ nî̌꤮.”

10 A khôphijǎ tokhlǒ gwè̌ lû̌û kû̌, “Pwa̤sû̌ǐ ta̤sû̌ta̤tòwò asara tokhlǒ hî̌ kû̌ piwi̤pèshè Khûělǐya bǎhè wǐkhlo kû̌ Me̤shǐya dǒ a ma̤hǎplǎge kòyònu tôpwa̤ pě, a cû̌hî̌tǒ̤ pô̤̌nu ma̤titè?” ^b

11 Dě Běcǎ Yeshǔ hî̌shěshu asî kû̌, “Piwi̤pèshè Khûělǐya bǎ hè mè̤̌mî̌ca pě dě a bǎ hè tîwî̌tòwò ma̤wô̌ getîkhî ta̤lǒ̤꤮ bò numî̌ a mè̤̌mî̌ca kǎ. 12 Bǎbǎkǎlè he hî̌ sî, piwi̤pèshè Khûělǐya hè htohǒ bǎbǎkǎlè asî sî̌ganǎ̤ lû̌û tô̤̌ dě kòyò tokhlǒ ma̤ yǎ jû̌꤮ asî sǎphlǒ sǎyṳ ma̤ lû̌û nupwǎ. Ma̤pô̤̌nu, Kòyòphû̌khû khòbǎ ta̤jî̌ta̤jû̌ dǒ asî cǔdekû pě.” ^c 13 Bǎnuakha akhôphijǎ tokhlǒ sî̌ganǎ̤phlôhè kû̌ a hî̌ pwa̤jushi Khûyṳ̂ha awe̤akènu hǒ.

Běcǎ ma̤hǎmǎ phijǎ pwa̤khûphû̌ tôpwa̤ ta̤sha

(Makǔ 9:14-29; Lǔka 9:37-43)

14 Bǎ asî hǎtě̤lò̤ kè̌shǐ kòyò saprṳ̂ dǒ khôlôlǎ̤ akhanu, kòyòpha tôpwa̤ hè dô̌gînî̤lò̤ dǒ alô̤mô̤̌ dě a hî̌ lû̌û kû̌, 15 “Běcǎ, gwèbǎǐ mò̌ he phû̌pwa̤khû, akicî̌ dě a lò̤khǔpo̤ nṳ̌ taga dǒ mî̌kû, tô̤̌mî̌ a lò̤tě̤nṳ̌ taga dǒ shikû. 16 He kaǎ lû̌û dǒ nakhôphijǎ tokhlǒ a ô̌ bǎbǎkǎlè a ma̤hǎmǎjò bǎ he tô̤̌.”

17 Běcǎ Yeshǔ hî̌ asî kû̌, “Kòyò shôdô ta̤yṳ̌ta̤nǎ̤ sî꤮, kû̌ kòyò cû̌sǔklè̌ sî꤮, he bǎ ô̌yî̤ pô̤̌ pe kû̌ sî pwǐtè? He tôbǎ khòsǎdô ô̌yî̤pekû̌ sî pwǐtè?” A hî̌hto pô̤̌nudě a hî̌ kòyòpha nutôpwa̤ kû̌, “Kaǎhè na phû̌khû bǒo.” 18 Běcǎ Yeshǔ sǎhtǎ khînǎ dě khînǎ hǎhtò̌cû̌kè dǒ phijǎphû̌nu tôpwa̤ akû dě ata̤sha hǎmǎkè taplǎnô̤̌.

19 Htodě akhôphijǎ tokhlǒ hèhǔhèsè̌ dǒ a ô̌ dě a hè gwè̌hǔ lû̌û kû̌, “Pa wṳ̂̌hǎhtò̌ bò̌kè khînǎ tô̤̌mî̌ a ma̤titè?”

20 Dě a hî̌shěshu asî kû̌, “Ma̤hî̌tè sî wṳ̂̌htò̌pè̤̌kè kû̌ kò khînǎ tô̤̌ hî̌dě, sî ta̤yṳ̌ta̤nǎ̤ pî̌tî̌ cǎkǎ nǒ̤. He hî̌cǒcǒ sî꤮, sî ta̤yṳ̌ kè̌ ô̌ tî̌꤮ saplǎphlǒ tôphlǒ nô̤̌pwǎ bǎbǎkǎlè sî kè̌ hî̌ khôlô nutômè kû̌, ‘shǒ cû̌ tephekè kû̌ gûlǎ̤ bǒo,’ kèhî̌dě a gǔ sǒcû̌ pwǎ. Sî ta̤yṳ̌ kè̌ ô̌ hî̌nu, ta̤ dǒ sî ma̤jòtô̤̌nu a ô̌ tocǒ tô̤̌. ^d 21 (Bǎbǎkǎlè, sî kè̌ dǔǎshǎ tô̤̌ kwicaba tô̤̌ hî̌nu, khînǎ hǎhtò̌cû̌kè jò tô̤̌.)” ^{▼▼Lî̤ hǒtôplônu a ô̌ nṳ̌ bǎ lî̤ dǒ kòyò wě̤ kû̌ cǔde dǒ awǐlǒ akhanu tôbě akû tô̤̌.}

Běcǎ shôbǐǐlṳ̌ sô̌ kû̌ a gǔ si pě awe̤akè

(Makǔ 9:30-32; Lǔka 9:43-45)

22 Bǎ a khôphijǎ tokhlǒ cû̌ kè̌shǐ shěshu plǒbò lû̌û dǒ Galilè̤̌gǎ akhanu, Běcǎ Yeshǔ shôbǐǐlṳ̌ bǎ asî kû̌, “Kòyòphû̌khû mî̌ he, kòyò shaǎ lò̤kè a dǒ kòyòhǎkhû̌phû̌ a cǔdekû pě. 23 Asî ma̤si lû̌û pě dě suni̤ behtò̌ tôni̤ pě dě a htûpwa̤ getîkhîsô̌ pě.” Dě akhôphijǎ tokhlǒ sǎplǎ̤ bò.

Běcǎ Yeshǔ sû̌ǐ bǎ kòyò kû̌ ta̤lṳhtò̌hô ta̤kûta̤mṳ̂̌ awe̤akè

24 Bǎ Běcǎ Yeshǔ kû̌ akhôphijǎ tokhlǒ cû̌tǒ̤ dǒ Wî̤̌kaperanò̤ akhanu, pwa̤htǔplǒ ta̤lṳhtò̌hô akûamṳ̂̌ tokhlǒ hè dǒ Khûpetarǔ a ô̌ dě a gwè̌ lû̌û kû̌, “Sî sara ǐ kû̌ kò ta̤lṳhtò̌hô ta̤kûta̤mṳ̂̌ tô̤̌ ya?” ^f

25 Khûpetarǔ hî̌shěshu asî kû̌, “Tô̤̌, a ǐ kǎ.”

Bǎ Khûpetarǔ nṳ̌ dǒ hǐdǒkû akha, Běcǎ Yeshǔ hî̌ wǐ lû̌û kû̌, “Khûshǐmû, na gènè̤ hî̌tè? Hǎkhû̌ akhwǐ tokhlǒ a hèkwi ta̤kûta̤mṳ̂̌ dǒ mò̌pè ô̌ pě? A kwi tûû̌ dǒ a shiphû̌gǎphû̌ tokhlǒ a ô̌ ya? Mè̤̌tô̤̌dě a kwi lô̌khô dǒ gǎshǔshawǎ̤phû̌ tokhlǒ a ô̌ ya?”

26 Khûpetarǔ hî̌shěshu lû̌û kû̌, “A kwi dǒ gǎshǔshawǎ̤phû̌ tokhlǒ a ô̌ pwǎ.”

Dě Běcǎ Yeshǔ hî̌shěshu lû̌û kû̌, “Kè̌ ma̤pô̤̌nudě a shiphû̌gǎphû̌ tûû̌ tokhlǒnu, a gǔ nǐ̤ ta̤pi̤li̤ hǒ. 27 Bǎbǎkǎlè pô̤̌khô asî gǔ sǎphlǒsha pa tô̤̌nu, cû̌sèmè̤̌ǎmò̌ tò̤̌phû̌ dǒ Galilè̤̌ a shikoǒkûnu. Tò̤̌phû̌ dǒ a nǐ̤ wǐ tôbǎnu bǔmô kè̌kè̌ wǐ agô̌kûnu. Na gǔ kè̌shǐ ruyî̌ tôbǎ pě. Ruyî̌ hǒtôbǎnu apô̌nṳ̌ kû̌ ta̤lṳhtò̌hô akûamṳ̂̌ hǒ. Phî̌ runu dě cû̌ǐ naya kû̌ heyanu.”