Matthew 20
Pwa̤ma̤ta̤phû̌ tokhlǒ dǒ sîpî̌ hǔklakhû̌
1“Ma̤titè̌hî̌dě, mǒkhû̌ shilǎ̤gǎkû mî̌ asô̌sô̌kû̌ hǔkla běcǎ tôpwa̤ dǒ a hǎhtò̌cû̌ wî̤sò dě a cû̌ dakǎ kaǎ hè kòyò dǒ a sîpî̌phǎkhû̌ nuhǒ. 2Hǔkla běcǎ tôpwa̤ kû̌ pwa̤dakǎǎphû̌ tokhlǒnu, a sǎphlǒtô lû̌û kû̌ a gǔ dakǎ lû̌û tôni̤ mî̌ ruyî̌ Denari tôbǎ. 3“Bǎ lṳmṳ̌plè̤̌ lǐ̤sô̌tônarî akhanu, a cû̌ dǒ klǎkû dě a cû̌ kè̌shǐ kòyò ô̌kôtṳ̌dè pwǎ dě ata̤ma̤ ô̌tô̤̌ tokhlǒ ihtǒ ô̌htôô̌lò̤ lô̌khô bǎnu. 4Dě a hî̌ asî kû̌, ‘hè lô̌khô dǒ he sîpî̌phǎkhû̌nu dě he gǔ kè̌ ǐtôǐbǎ tûû̌ sî akhû̌akǎ pě.’ 5Dě asî hè lô̌khô dǒ ahǔklakhû̌ dě hǔkla běcǎ nî̌ a hǎhtò̌cû̌ sô̌ dǒ klǎkû bǎ lṳmṳ̌htǔ shǐginǐ̤narî bǎ akhanu, htodě a hǎhtò̌cû̌ sô̌ bǎ lṳ̌mṳ̌lò̤ sunarî akha dě a cû̌ dakǎ hèsô̌ kòyò dǒ a sîpî̌ hǔklakhû̌ dě a hî̌ kòyò pô̤̌ a hî̌ wǐ hto kòyò nutokhlǒ. 6Dě a hǎhtò̌cû̌ sô̌ dǒ klǎkû bǎ lṳ̌mṳ̌lò̤ yè̤̌narî akha, dě a cû̌ kè̌shǐ pepe kòyò dǒ a ô̌kôtṳ̌dè tônô̤, a ta̤ma̤ ô̌tô̤̌ tokhlǒ ihtǒ ô̌htôô̌lò̤ bǎnu dě a gwè̌ asî kû̌, ‘sî ma̤ta̤ tocǒ tô̤̌ dě sî cû̌ ihtǒô̌ nòdû̌ bò bǒo tônǐ̤mṳ̌hǎ ma̤titè?’ 7“Dě asî hî̌shěshu lû̌û kû̌, ‘pwa̤dakǎ hè dǒ pa ô̌ tôpwǎ̤꤮ tô̤̌.’ “Dě a hî̌ asî kû̌, ‘hèma̤ lô̌khô dǒ he sîpî̌phǎ hǔklakhû̌nu.’ 8“Bǎ lṳmṳ̌lò̤tě̤ akhanu, hǔkla běcǎ hî̌ pwa̤pǒǐkè̌ǐ kò tôpwa̤ kû̌, ‘kaǎ lô̌khô pwa̤ma̤ta̤phû̌ nutokhlǒ dě ǐ asî akhû̌akǎnu. Ǐwǐlǒ a hèlò̤ nô̌kògutṳ̌ nutokhlǒ nî̌, dě a hè wǐlǒ nutokhlǒ dě ǐnô̌ yǎ pě.’ a 9“Pwa̤ma̤ta̤phû̌ dǒ a hè ma̤ta̤ dǒ lṳ̌mṳ̌lò̤ yè̤̌narî akha tokhlǒ hèphǐ wǐ khû̌kǎ dě pwa̤pǒǐkè̌ǐ kò hǔkla tôpwa̤ ǐ asî tôpwa̤ kû̌ ruyî̌ Denari tôbǎ. 10Hǒtaplǎdě shěkhǎ tôkû̌ dǒ a hèdakǎ wǐlǒkhlo kòyò tokhlǒ dě asî gènè̤ kû̌ a gǔ nǐ̤bǎ dû̌khlo ru kû̌ kòyò pě bǎbǎkǎlè asî nǐ̤bǎ ruyî̌ Denari tôpwa̤ tôbǎ sô̌sô̌kû̌ kòyò pwǎ. 11Bǎ asî nǐ̤bǎ khû̌kǎ akha a tûmṳ̂̌ta̤ma̤ hǔkla běcǎ ayô̤. 12Asî hî̌ hǔkla běcǎ kû̌, ‘kòyò hǒtokhlǒ dě a hè ma̤nṳ̌ yî̤pwǎ tôna̤rî gûlǎ̤phû̌ nô̤̌pwǎ dě a gelǎ hǒ bǎbǎkǎlè na ǐ asî khû̌kǎ sô̌sô̌kû̌ papa. Pa dě pa ma̤ shèwè̤ dǒ gǎgû̌khû̌ tônǐ̤mṳ̌hǎ dě na ǐlǒ pa tô̤̌tô̤̌.’ 13“Bǎbǎkǎlè hǔkla běcǎ hî̌shěshu dǒ a hî̌ pô̤̌o akla tôpwa̤ kû̌, ‘he ǎtṳ̌ dǒ nakhû̌ tocǒ tô̤̌, he ma̤ tô pwǎ, na sǎphlǒtô hto kû̌ he gǔ ǐ na tôni̤ mî̌ ruyî̌ Denari tôbǎ yahî̌? 14Phî̌nṳ̌ na khû̌kǎnu dě gemò̌. He sǎyṳ ǐ kòyò dǒ a hè ma̤nô̌ kò tokhlǒ akhû̌akǎ sô̌sô̌kû̌ he ǐ nanu. 15Heru kû̌ henǎ̤ pwǎ, he sǎyṳ ma̤hî̌tènu a nǐ̤ tô̤̌ ya? He sǎphlǒshû̌ ǐwô̌ǐbǎ ta̤ pô̤̌o dě na sǎkhwè̌ he ya?’ 16“Bǎbǎkǎlè kòyò ô̌ dǒ alô̤mô̤̌lǒ tokhlǒnu, a gǔ ô̌kè dǒ nô̌kòlǒ pě. Dě kòyò ô̌kè dǒ nô̌kòlǒ tokhlǒnu a gǔ ô̌ dǒ alô̤mô̤̌lǒ pě.” ▼▼Kòyò ô̌ dǒ nô̌kò amṳ̂asǎ mî̌ kòyò dǒ kò gènè̤ kû̌ a lṳ̂dû̌lǒ tôpwa̤nu, a gǔ ô̌kè dǒ nô̌kògutṳ̌ pě, kòyò dǒ a ô̌kè dǒ nô̌kòlǒ tokhlǒnu, a gǔ htûhtò̌ dǒ kòyò lṳ̂dû̌lǒ lû̌û pě, Yeshǔ hî̌ bǎ asî pô̤̌nu.
c Běcǎ Yeshǔ hî̌lṳ̌ sô̌ kû̌ a gǔ si pě awe̤akè
(Makǔ 10:32-34; Lǔka 18:31-34)
17Bǎ Běcǎ Yeshǔ htò̌ dǒ Wî̤̌yarǔshôle dě bǎ a cû̌ dǒ klè̌lô̤ akhanu, a kaǎcû̌ plǒ khô̌ akhôphijǎ shǐsò̌ginǐ̤ tûkû dě a hî̌ asî kû̌, 18“Pa htò̌ dǒ Wî̤̌yarǔshôle, dě kòyò gǔ shaǎlò̤kè Kòyòphû̌khû mî̌ henu dǒ pwa̤shû̌gǎ ikǒlǒkòdû̌ tokhlǒ kû̌ pwa̤sû̌ǐ ta̤sû̌ta̤tòwò asara tokhlǒ a cǔdekû pě. Dě asî gǔ sǎphlǒ tô bò lû̌û dǒ a ma̤sikè he pě. 19Asî gǔ ǐlò̤ tutṳ̌ he dǒ Yǔdaphû̌ mè̤̌tô̤̌ tokhlǒ a cǔdekû pě. Dě Yǔdaphû̌ mè̤̌tô̤̌ tokhlǒ gǔ hî̌bǎ takǎ ma̤yǒma̤lè bò he pě. Htodě asî gǔ po̤ he kû̌ sǒpli̤ wî̤ pě dě asî gǔ ma̤sihtò̌ he dǒ nò̌dò̌htǔlô̤ pě. Bǎbǎkǎlè suni̤ tôni̤ pěnu Cǒmara gǔ ma̤htûpwa̤ ihtǒ getîkhî sô̌ he pě.”Mǒ̤tôpwa̤ a ta̤kwisǎyṳ
(Makǔ 10:35-45)
20Htodě Phasebedè̌ aphû̌khû Khûya̤kû kû̌ Khûyṳ̂ha amǒ̤nu a hè wô̤̌wô̤̌ kû̌ a phû̌pwa̤khûnu sò̌ginǐ̤ dǒ Běcǎ Yeshǔ a ô̌. Amǒ̤ hè dô̌gînî̤lò̤ dǒ Běcǎ alô̤mô̤̌ dě a kwisǎyṳ lû̌û kû̌ a gǔ ma̤ bǎ lû̌û ta̤tocǒ. 21Dě Běcǎ hî̌ lû̌û kû̌, “Na sǎyṳ kû̌ he bǎ ma̤jè̌ na mî̌titè?” Dě a hî̌shěshu Běcǎ kû̌, “Htû̌ na htû khwǐ dǒ Cǒmara shilǎ̤gǎkû pěnu dǐ hǎnòò̌ padô̌ hephû̌ hǒo sò̌ginǐ̤ dǒ na cǔtômû tôkhô tôpwa̤, dǒ na cǔcôcî̌ tôkhô tôpwa̤ pě nî̌꤮.” 22Běcǎ hî̌shěshu asî kû̌, “Sî hèkwi ta̤hǒonu sî sî̌ganǎ̤ ǐtûû̌ awe̤akè tô̤̌. Ta̤jî̌ta̤jû̌ dǒ he glè̌ khòbǎ pěnumî̌ sî gǔ khòbò̌ pě ya?” Dě asî hî̌shěshu kû̌, “Pa khòbò̌ pwǎ.” 23Běcǎ hî̌shěshu asî kû̌, “Sî gǔ khòbò̌ mî̌ca tûû̌ pô̤̌ he khòbǎnu pě. Bǎbǎkǎlè na tô hǎnòò̌ dǒ he cǔde cǔcôcî̌ tôkhô ya, cǔtômû tôkhônu a ô̌ dǒ he cǔdekû mè̤̌tô̤̌. Hepha dǒ mǒkhû̌ tôpwa̤ tîwî̌tòwò bǎ gûlǎ̤hǒo kû̌ jû̌꤮ a sǎyṳ ǐ kò nutokhlǒ aya hǒ.” 24Bǎ akhôphijǎ dǒ a ô̌kè pwa̤shǐ tokhlǒ ganǎ̤de a gwè̌ pô̤̌o akhanu, asî sǎphlǒdû̌ bò pṳ̌wè̤̌nu sò̌ginǐ̤. 25Běcǎ Yeshǔ kaǎplǒbò asî dě a hî̌ asî kû̌, “Sî sî̌ganǎ̤ tûû̌ kû̌ khwǐdû̌ côphǎdû̌ tokhlǒ numî̌ a noǎ ǐtûû̌ lô̌khô a ta̤siwi̤sòwò̤ dǒ shiphû̌gǎphû̌ tokhlǒ akhû̌. Shiphû̌gǎphû̌ a ikǒlǒkòdû̌ sî tokhlǒdě a noǎ pwǎ a ta̤siwi̤sòwò̤nu dǒ shiphû̌gǎphû̌ tokhlǒ akhû̌khû̌. d 26Sî dě sî tô ma̤pô̤̌nu tô̤̌. Dǒ sîklanu, kòyò tôpwa̤pwa̤ kè̌ sǎyṳ htûdû̌htûpwǎ̤ hî̌dě a tôbǎ htû sî pwa̤ma̤ta̤phû̌. e 27Htodě dǒ sîklanu, kòyò tôpwa̤pwa̤ kè̌ sǎyṳ htû sîběcǎ hî̌dě a tôbǎ htû sîjû̌. 28Kè̌lû̌mò̌mṳ he amè̤̌kû̌ Kòyòphû̌khû nu, he hè dǒ kòyò gǔ ma̤ bǎ heyanu mè̤̌tô̤̌. He hè dǒ he bǎ ma̤ kòyòya pwǎ. Dě pô̤̌khô he gǔ phî̌htò̌ge asî ayanudě, he tṳ̌sikhòsi he ta̤htûpwa̤ dǒ kòyò saprṳ̂ aya.”Běcǎ Yeshǔ ma̤hǎmǎbǎ kòyò mǐ̤sǎkhǐ sò̌ginǐ̤
(Makǔ 10:46-52; Lǔka 18:35-43)
29Bǎ Běcǎ Yeshǔ kû̌ akhôphijǎ tokhlǒ hǎhtò̌cû̌kè bǎ Wî̤̌yarikhò̌ akhanu, kòyò saprṳ̂dû̌ gû̌kû̌ bò akò tûprṳ̂taphǎ. 30Kòyò mǐ̤sǎkhǐ sò̌ginǐ̤ hǎnòò̌ dǒ klè̌htu dě bǎ a ganǎ̤de kòyò hî̌ kû̌ Běcǎ Yeshǔ hè dǒ asî kòshî̌ akhanu, a kaǎgǔ dě a hî̌ kû̌, “Ǒ꤮ Phadawi̤ aphû̌khû, Běcǎ꤮ gwèbǎǐ mò̌ pa nî̌꤮.” 31“Sǔtukǔ ô̌mò̌,” Kòyò saprṳ̂ tokhlǒ hî̌ asî shû̌shû̌, a lî̤̌ yî̤̌kǒhtò̌ shû̌shû̌ pô̤̌ kû̌, “Ǒ꤮ Phadawi̤ aphû̌khû, Běcǎ꤮ gwèbǎǐ mò̌ pa nî̌꤮,” Pô̤̌nu. 32Běcǎ Yeshǔ ô̌kǔ kaǎ asî dě gwè̌ asî kû̌, “Sî sǎyṳ noma̤ he mî̌titè?” 33Dě asî hî̌ lû̌û kû̌, “Běcǎ, pa sǎyṳ mǐ̤sǎlî gû̌ kòyò.” 34Běcǎ Yeshǔ gwèbǎǐ asî dě a tè̌bǎ asî mǐ̤sǎphlǒ dě asî mǐ̤sǎ lîhtò̌ sô̌ dě asî sahtò̌ gû̌kû̌ bò akò.
Copyright information for
KxfSCKXF