Matthew 22

Ta̤dô̌nè khěkhô̌ ta̤khòmò̤̌khômô̤

(Lǔka 14:15-24)

1Běcǎ Yeshǔ hî̌ǐ khô̌ bǎ sô̌ asî dě a hî̌ kû̌, 2“Mǒkhû̌ a shilǎ̤gǎkû numî̌ asô̌sô̌kû̌ khwǐ tôpwa̤ dǒ a tîwî̌tòwò nǎ bǎ a phû̌pwa̤khû pwè khòmò̤̌ dǒ a gǔ dǐǎdǐô kòyò ayanu tôpwa̤hǒ. 3A nocû̌ kaǎhè ajû̌ nutokhlǒ kû̌mî̌ kòyò dǒ a mǎhèǎô lû̌û tokhlǒnu bǎbǎkǎlè asî hî̌shěshu lô̌khô kû̌, ‘tô̤̌, pa gû̌ hè kû̌ na tô̤̌.’

4“Htodě a nocû̌ kaǎhè pô̤̌ ajû̌ dǒ ashǔshawa̤ tokhlǒ kû̌mî̌ kòyò dǒ amǎhèǎô lû̌û nutokhlǒ dě a hî̌cû̌ lû̌û kû̌, ‘shôbǐǐ bǎ kòyò dǒ he mǎhèǎô lû̌û nutokhlǒ kû̌, he tîwî̌tòwò htobò lṳmṳ̌hǎ ayahǒ. He ma̤siǎ pṳ̂̌phadû̌ kû̌ pṳ̂̌phû̌ bû̌sikǐtû̌ tokhlǒ ayî̌hǒ. Hèǎhèô lô̌khô pwè khòmò̤̌ a ta̤ǎta̤ô numî̌ anǐ̤ hǒ, cû̌hî̌ lô̌khô asî pô̤̌nu nî̌꤮’ a hî̌cû̌ a jû̌ tokhlǒ pô̤̌nu.

5“Bǎbǎkǎlè kòyò dǒ khwǐ mǎhè lû̌û tokhlǒnu a bè̌dubè̌nǎ̤ tocǒ꤮ tô̤̌. A hǎhtò̌cû̌ khô̌kè bò. Tôpwa̤ dě a hè dǒ hǔklakhû̌, tôpwa̤ dě a cû̌ ma̤gǔma̤khè̌ǎ. 6A ô̌kè tokhlǒ dě a pṳ̂̌ ma̤jî̌ma̤jû̌ khwǐ a jû̌ tokhlǒ, htodě a ma̤sikè ajû̌ nutokhlǒ. 7Hǒtôplǎdě khwǐ sǎphlǒdû̌ dě a nocû̌ akliphû̌ tokhlǒ dě asî cû̌ma̤sikè bò kòyò dǒ a ma̤si lû̌û jû̌ nutokhlǒ dě shû̌ǔkè bò asî wî̤̌.

8“Dě a hî̌ jû̌ tokhlǒ kû̌, ‘kòyò tîwî̌tòwò nǎbò pwè khòmò̤̌ a ta̤ǎta̤ô bǎbǎkǎlè kòyò dǒ he mǎhè lû̌û tokhlǒ numî̌ kòyò tokhlǒ dǒ he tô mǎhè tô̤̌. 9Cû̌mò̌ lô̌khô dǒ klè̌tǎ̤nu dě kè̌shǐ mò̌pèpè̌ bǎbǎ kaǎhè asî dǒ pakû bǒo nî̌꤮.’ 10Pô̤̌nudě ajû̌ tokhlǒ hǎhtò̌cû̌ dǒ klè̌dû̌ tokhlǒ akû dě a cû̌kaǎge plǒbò kòyò dǒ a kè̌shǐ nutokhlǒ. Ajî̌ bǎbǎ, awô̌ bǎbǎ, a hî̌ bǎ tô̤̌, a kaǎge bò dě dǒ pwè khòmò̤̌ ahǐkûnu nî̌ shǐpwǎ̤shǐmè̤ betǐpǐkè.

11“Bǎbǎkǎlè bǎ khwǐ hènṳ̌kè̌ shǐpwǎ̤shǐmè̤ akhanu, a kè̌shǐ shǐpwǎ̤shǐmè̤ dǒ a kûsô̌ gû̌ kòyò khòmò̤̌ a jejû tô̤̌ ô̌ tôpwa̤. 12A gwè̌ lû̌û kû̌, ‘khòmò̤̌, na kûsô̌ gû̌ kòyò pwè khòmò̤̌ jejû tô̤̌ dě na cû̌ hènṳ̌ jò gû̌ kò hî̌tè?’ Bǎbǎkǎlè a hî̌shěshu lû̌û tômṳ̂̌꤮ tô̤̌.

13“Hǒtaplǎdě khwǐ hî̌ pwa̤ma̤ta̤phû̌ tokhlǒ kû̌, ‘comě acǔkhò̌lô̤pô̤̌nu dě tě̤hǎhtò̌kè a dǒ akhǐklanu. Gûlǎ̤ bǎnu tûkûmî̌ ta̤hǎyî̤̌te̤tě̤ agûlǎ̤ kû̌ ta̤ ě cegwě khû̌khi agûlǎ̤.’ ^a

14“Ma̤titèhî̌dě Cǒmara mǎhè dû̌wî̤ kòyò bǎbǎkǎlè a rû̌htò̌ kòyò tîkî̌phû̌ nô̤̌pwǎ.”

Yǔdaphû̌ tokhlǒmî̌ a tôǐ Khwǐkèsha ta̤kûta̤mṳ̂̌ ya?

(Makǔ 12:13-17; Lǔka 20:20-26)

15Htodě pô̤̌khô Pharishè̌phû̌ tokhlǒ gǔ pṳ̂̌nǐ̤ Běcǎ Yeshǔ hî̌bǎsǔ yô̤̌sǎ tokhlǒ ayanudě, a hǎhtò̌cû̌ ô̌plǒ hî̌bǎcu ǐ lû̌û. 16Asî nocû̌ a khôphijǎ tokhlǒ kû̌ Khwǐherû aplǒacuphû̌ tokhlǒ dǒ Běcǎ a ô̌ dě asî cû̌hî̌ Běcǎ kû̌, “Saradû̌, pa sî̌ganǎ̤ kû̌ na mî̌ kòyòcǒ tôpwa̤. Na sû̌ǐ kòyò pô̤̌ Cǒmara sǎyṳ nohtûpwa̤ kòyò nutokhlǒ. Na kè̌ sû̌ǐtòwòǐ kòyò numî̌ na sû̌ǐ bǎpwǎ kòyò ta̤tě̤ta̤mè̤̌ pwǎ. Kòyòhǎkhû̌phû̌ tokhlǒ gènè̤ na hî̌tè bǎbǎ, na ǐsha kòyò tocǒ꤮ tô̤̌. Na kè̌dû̌ kè̌pî̌tî̌ kòyò tô̤̌tô̤̌. 17Pô̤̌nudě na hî̌ kè̌kè̌mò̌ bǎ pa hǒtocǒ, mî̌ na gènè̤ hî̌tè? Mî̌ pa tôǐ Rṳ̂̌me̤ akhwǐdû̌ Kèsha ta̤kûta̤mṳ̂̌ ya? Mî̌ pa tôǐ tô̤̌ ya?”

18Bǎbǎkǎlè Běcǎ Yeshǔ sî̌yanǎ hto dǒ asî glè̌ pṳ̂̌ lû̌û ta̤hî̌bǎ dě a hî̌shěshu asî kû̌, “Kòyò jî̌cǒjî̌tè̤ anǎ̤ sî, ma̤titèdě sî nè̤̌hè gwè̌ yô̤̌sǎ pô̤̌o ma̤titè? 19Dǐlè̌lṳ̌ kè̌mò̌ he ruyî̌ dǒ sî ǐ kû̌ ta̤kûta̤mṳ̂̌nu,” Dě asî hèǐ lû̌û ruyî̌ Denari tôbǎ. 20Dě a gwè̌ asî kû̌, “Hǒomî̌ mò̌pè ikǒ yô̤ ya? A wě̤ kû̌ mò̌pè ami̤ya?”

21Dě asî hî̌shěshu kû̌, “Khwǐ a ikǒyô̤ kû̌ khwǐ ami̤.”

Htodě Běcǎ hî̌shěshu asî kû̌, “Khwǐdû̌ Kè̌sha ata kè̌hî̌dě ǐ kû̌ khwǐdû̌nu, Cǒmara ata kè̌hî̌dě ǐ kû̌ Cǒmaranu.”

22Bǎ asî ganǎ̤de Yeshǔ hî̌ pô̤̌o akhanu, a ǒò̌ kiti̤kaa kèbò asî dě asî hǎhtò̌cû̌ tephekè lǒ̤bò lû̌lǎ̤.

Ta̤gwè̌ dǒ ta̤ô̌htûpwa̤ htû̌꤮ sihto pě awe̤akè

(Makǔ 12:18-27; Lǔka 20:27-40)

23Bǎnu tôni̤dě, Sadukè̌phû̌ dǒ a yṳ̌ǎ tûû̌ aya kû̌ htû̌꤮ sihtopěnu ta̤htûpwa̤ge tîkhî ô̌ pe tô̤̌ tômṳ̌nu a hè dǒ Běcǎ a ô̌ dě a hè gwè̌ lû̌û ayô̤̌ tômû. ^b 24Dě asî gwè̌ Běcǎ Yeshǔ kû̌, “Saradû̌꤮, Khûmṳ̂shě hî̌ bǎ pa kû̌ pwa̤khû tôpwa̤pwa̤ kè̌ si dě aphû̌ kè̌ ô̌kè tôpwǎ̤꤮ tô̤̌ hî̌nu, pô̤̌khô akhlialè gǔ ô̌kè kû̌ kò nudě, a pṳ̌pwa̤khû bǎ phî̌wô̌ akhi ô̌kènu, a hî̌ pô̤̌nu. ^c 25Khònò̤̌dě dǒ paklanu pṳ̌wè̤̌ pwa̤khû ô̌ susô̌tôpwa̤. A wè̤̌pwǎ̤lǒ tôpwa̤ phî̌ ama dě dǒnô̌kònu a sikè amalǎ̤, dě aphû̌ ô̌kè tôpwǎ̤꤮ tô̤̌ akhû̌akhî, apṳ̌ dǒ hǒlǎ̤ tôpwa̤ bǎphî̌ akhi ô̌kè nutôpwa̤. 26Apṳ̌ sò̌ginǐ̤ tôpwa̤ htodě supwa̤ tôpwa̤ tǒ̤dǒ pwa̤ susô̌tôpwa̤nu a htûhtò̌ sô̌sô̌ bò pô̤̌ awè̤̌pwǎ̤ htûhtò̌nu. 27Dǒnô̌kò gutṳ̌ dě pwa̤mǒ̤ nutôpwa̤ gû̌ si pwǎ. 28Pô̤̌nudě htû̌ si ihtǒhtûpwa̤sô̌ alṳmṳ̌ni̤ pě tôni̤nu, hǒo susô̌tôpwa̤ aklanu, bǎtè tôpwa̤ gǔ htû awṳ̂ ya? Ma̤titèhî̌dě asî htûbǎbò awṳ̂ no̤꤮,” A gwè̌ Yeshǔ pô̤̌nu.

29Dě Běcǎ Yeshǔ hî̌shěshu getîkhî asî kû̌, “Sî sǔ bòkèhǒ, ma̤titè̌hî̌dě sî sî̌ganǎ̤ tě̤tě̤mè̤̌mè̤̌ gû̌ kòyò lî̤plò̌shǐ kû̌ Cǒmara a ta̤pô̤ta̤phǎ ma̤jò ta̤ tokhlǒ tô̤̌. 30Ma̤titèhî̌dě htû̌ kòyò si ihtǒhtûpwa̤sô̌ pěnu kòyò phî̌phû̌phî̌ma, kòyò phî̌phû̌phî̌wṳ̂ ô̌ petô̤̌, asî gǔ sô̌sô̌bò pô̤̌ mǒkhû̌ tanaphû̌ nutokhlǒ pě. 31– 32Ta̤si ihtǒhtûpwa̤sô̌ awe̤akènu, Cǒmara hî̌nǎ kû̌, ‘he mî̌ PhaAbraha a Cǒmara, PhaIsè̌ a Cǒmara, kû̌ Phaya̤kò a Cǒmara,’ a hî̌ pô̤̌o numî̌ sî dô̌nô̌ gû̌ kòyò tô̤̌ ya? Cǒmara mî̌ kòyòsi tokhlǒ a Cǒmara mè̤̌tô̤̌, kòyò htûpwa̤ tokhlǒ a Cǒmara.” ^d

33Bǎ kòyò saprṳ̂ ganǎ̤de a ta̤sû̌ǐhǒo akhanu, a ǒò̌ kiti̤kaa lǒ̤bò.

Ta̤mǎlò̤ dǒ a lṳ̂dû̌lǒ

(Makǔ 12:28-34; Lǔka 10:25-28)

34Pharishè̌phû̌ tokhlǒ ganǎ̤de kû̌ Sadukè̌phû̌ tokhlǒ hî̌tîkhî shěshubò̌ Běcǎ Yeshǔ tômṳ̂̌꤮ tô̤̌, dě Pharishè̌phû̌ tokhlǒ kaǎô̌plǒ hî̌bǎcu ǐtûû̌ kè̌khî lû̌û. 35Dǒ asî aklanu, a sî̌ganǎ̤ lǒlǒbebebò Yǔdaphû̌ a ta̤mǎlò̤nu a ô̌tôpwa̤ dě a hè gwè̌khô̌ kè̌kè̌ Běcǎ Yeshǔ kû̌, 36“Sara, ta̤mǎlò̤ a ta̤sû̌ta̤tòwò akla tokhlǒ numî̌ bǎtè tômû dě a lṳ̂dû̌lǒ ya?”

37Běcǎ hî̌shěshu getîkhî kû̌, “‘Mô̤ lǒ̤sû̌lǒ̤sò̌ sî Cǒmara kû̌ sî sǎphlǒ lǒ̤꤮ bò, mô̤ lǒ̤sû̌lǒ̤sò̌ a kû̌ sî ta̤ô̌htûpwa̤ lǒ̤꤮ bò, mô̤ lǒ̤sû̌lǒ̤sò̌ a kû̌ sî ta̤gènè̤ lǒ̤꤮ bò.’ ^e 38Hǒomî̌ ta̤mǎlò̤ dǒ a lṳ̂dû̌lǒ tômû hǒ. 39Ginǐ̤mûtômû mî̌, a sô̌sô̌ kû̌ awǐ nu tômû hǒ, ‘mô̤ǐ kòyò dǒ a ô̌phǔ kû̌ sî nutokhlǒ pô̤̌ sî mô̤ǐlò̤ tûû̌ sînǎ̤nu.’ ^f 40Lǒ̤bò Khûmṳ̂shě kû̌ piwi̤pèshè sîtokhlǒ a ta̤sû̌ta̤tòwò a kòshî̌ tokhlǒnu agètè̤ bò dǒ ta̤mǎlò̤ hǒoginǐ̤mû alô̤ pwǎ.” ^g

Me̤shǐya mî̌ mò̌pè akhlialè ya?

(Makǔ 12:35-37; Lǔka 20:41-44)

41Bǎ Pharishè̌phû̌ cû̌ ô̌plǒô̌cu bò lû̌û akhanu, Běcǎ Yeshǔ gwè̌ asî kû̌, 42“Khrǐ dǒ a ma̤hǎplǎge kòyò tôpwa̤nu awe̤akè, sî gènè̤ lû̌û hî̌tè? Akhlialè lò̤ dǒ mò̌pè ô̌?”

Dě asî hî̌shěshu kû̌, “Khwǐdawi̤ akhlialè.”

43Dě a hî̌ asî kû̌, “Kè̌ ma̤pô̤̌nudě ma̤titèdě Yôla Plò̌shǐ Běcǎ htû̌sò̌bǎ Khûdawi̤ dě a cû̌no kaǎtǒ̤ Khrǐnu kû̌, ‘Běcǎ’ ma̤titè? Ma̤titèhî̌dě a cû̌hî̌ tǒ̤ kû̌,

44‘Běcǎ Cǒmara hî̌ he Běcǎ kû̌, “Bǎ he ma̤pè̤̌ bòmǔtegle nò̌khôtô̤̌ pwa̤sǎkhě ▼

▼khuwè̤

na nutokhlǒ dě he bè̌bò asî dǒ na khǎlǎlǎ̤ khôtô̤̌nu, hǎnòò̌ô̌ dǒ he cǔtômû nutôkhô.”’ ⁱ

45Dě Khwǐdawi̤ kè̌ kaǎ lû̌û kû̌, ‘Běcǎ’ kè̌hî̌dě a cû̌ htû jò Khwǐdawi̤ aphû̌khû hî̌tè?” 46Kòyò hî̌shěshu tîkhî jò pe yǎ tôpwa̤꤮ tô̤̌. Sahtò̌ bǎnu tôni̤ hènènu kòyò gwè̌bǔ pe yǎ tôpwǎ̤꤮ tô̤̌.