Matthew 25

Pwa̤mǒ̤ pwa̤sasû̌ kòyò apwa̤shǐ awe̤akè

1“Mǒkhû̌ shilǎ̤gǎkûnu, asô̌sô̌kû̌ pwa̤mǒ̤ pwa̤sasû̌ kòyò apwa̤shǐ phî̌nṳ̌ mî̌tè̌ko dě cû̌ô̌pǒ̤ kè̌shuǐ khômǎ̤ pwa̤khû hè awe̤akènu hǒ. ^a 2Sò̌yè̤̌ dě a sî̌jò̌, sò̌yè̤̌ dě a sî̌jò̌ gû̌ kòyò tô̤̌. 3Pwa̤mǒ̤ dǒ a sî̌jò̌ tô̤̌ sò̌yè̤̌ nî̌, a phî̌hèǐ amî̌tè̌ko bǎbǎkǎlè a phî̌hè nṳ̌lǒ pô̤̌ mî̌tè̌ko shi tô̤̌. 4Bǎbǎkǎlè pwa̤mǒ̤ dǒ a sî̌jò̌ sò̌yè̤̌ nî̌ a phǐhèǐ amî̌tè̌ko dě a phî̌hènṳ̌ pô̤̌ mî̌tè̌ko shi kû̌ pò̤̌ tokhlǒ. 5Khòmò̤̌phû̌khû hètǒ̤ pò̤̌yǎ̤pò̤̌sha akhû̌akhî, asî hǎmôô̌tṳ̌khwe htodě a hǎmôô̌nṳ̌bò lô̌khô.

6“Bǎ lṳmṳ̌klamanu, kòyò kaǎgǔ kû̌, ‘ǒ khòmò̤̌phû̌khû hè hǒ, hǎhtò̌cû̌ kè̌shuǐ mò̌ lô̌khô yǎ.’

7“Dě pwa̤mǒ̤ pwa̤sasû̌ kòyò lǒ̤bò ihtǒ dě tîwî̌tòwò lô̌khô amî̌ pṳ̂̌꤮ tôpwa̤. 8Pwa̤mǒ̤ sî̌jò̌ gû̌ kòyò tô̤̌ tokhlǒ hî̌ pwa̤mǒ̤ sî̌jò̌ tokhlǒ kû̌, ‘ǐpè̤̌ pa sî mî̌ shi, pamî̌ glè̌ pǐ̤hǒ.’

9“Bǎbǎkǎlè asî hî̌shěshu kû̌, ‘tô̤̌, a pô̌wô̌ pe sîya tô̤̌, awô̌lǒ mî̌ sî cû̌pwî̤ khô̌tû̌ sîya dǒ kòyò lǎ̤shaǎ mî̌shi gûlǎ̤nu.’

10“Bǎ asî cû̌ pepwǎ dǒ klè̌lô̤ akhanu, khòmò̤̌phû̌khû hètǒ̤ lǎkè, pwa̤mǒ̤ sî̌jò̌ dǒ a ô̌ tîwî̌tòwò anǎ̤ tokhlǒ hènṳ̌ kû̌ khòmò̤̌phû̌khû dǒ khòmò̤̌ pwè gûlǎ̤ dě kòyò ma̤bǐkè takha.

11“Dǒ nô̌kò dě pwa̤mǒ̤ dǒ a sî̌jò̌ tô̤̌ tokhlǒ getǒ̤ dě a hî̌ lô̌khô kû̌, ‘Běcǎ, Běcǎ, bǔmô mò̌ bǎ pa takha.’ ^b

12“Bǎbǎkǎlè khòmò̤̌phû̌khû hî̌shěshu asî kû̌, he hî̌mî̌ca sî, ‘he sî̌ganǎ̤bǎnô̌ sî tôkhò̌꤮ tô̤̌.’

13“Pô̤̌nudě ô̌sòklò lô̌khô, ma̤titè̌hî̌dě lṳmṳ̌ni̤ lṳmṳ̌sa dǒ Kòyòphû̌khû gǔ hèsô̌ bǎkhò̌tè pěnu sî sî̌yajòtô̤̌.

Yô̤̌sǎkhěkhô̌ jû̌ sò̌su awe̤akè

(Lǔka 19:11-27)

14“Mǒkhû̌ shilǎ̤gǎkû nu a sô̌sô̌ pô̤̌ kû̌ kòyò tôpwa̤ dǒ a glè̌ hǎhtò̌cû̌ klè̌ dě kaǎplǒ a jû̌ tokhlǒ, dě a ǐ kè a ta̤dû̌yò̤̌htò̌sa tokhlǒ dǒ ajû̌ tokhlǒ a cǔdekû. ^c 15Tôpwa̤ dě a ǐ kè lû̌û hta ahtǒ yè̤̌jwè̌ ▼

▼tôjwè̌ mî̌ agònò̤̌ kû̌ kòyò wè̤ta̤ akhû̌akhǎ shǐyè̤̌nělǒ

, tôpwa̤pô̤̌ dě tôkô̌, dǒ ashǔshawa̤ tôpwa̤ tè̌ dě tôjwè̌, pô̤̌ asî ô̌ kû̌ a ta̤sî̌ta̤jò̌nu a ǐpè̤̌ asî htodě a hǎhtò̌cû̌kè klè̌. 16Kòyò dǒ a nǐ̤bǎ hta yè̤̌jwè̌ tôpwa̤nu, a nǐ̤bǎ hto kû̌ a hǎhtò̌cû̌ ma̤gǔ dě a cû̌ ma̤hǎhtò̌ dû̌wî̤pô̤̌ yè̤̌jwè̌. 17Pô̤̌nudě a nǐ̤bǎ hta tôkô̌ tôpwa̤ nî̌, a cû̌ ma̤kuhtò̌ dû̌khlo pô̤̌ ginǐ̤jwè̌. 18Bǎbǎkǎlè dǒ a nǐ̤bǎ hta tôjwè̌ tôpwa̤ nî̌, a hǎhtò̌cû̌ dě a cû̌ pho hǎkû tûkû dě a cû̌ plǒ hô̌bǐkè aběcǎ hta dǒ hǎlǎ̤.

19“Lṳmṳ̌ni̤ lṳmṳ̌sa yî̤hǒdě asî Běcǎ getǒ̤ dě a gegwè̌ sô̌ hta dǒ a ǐ kè asî nutokhlǒ. 20Kòyò dǒ a nǐ̤bǎ hta yè̤̌jwè̌ tôpwa̤nu, a phî̌hè dû̌wî̤pô̤̌ yè̤̌jwè̌ dě a hî̌ aběcǎ kû̌, ‘Běcǎ, na ǐ kè he hta amǒ̤ yè̤̌jwè̌. Dě hǒo mî̌, he ma̤phû̌htò̌ dû̌ pô̤̌ yè̤̌jwè̌ nuhǒ.’

21“Aběcǎ hî̌shěshu lû̌û kû̌, ‘o, awô̌ jî̌lî. Na mî̌ jû̌ dǒ awô̌ dě acǒ kû̌ he, na cǒ kû̌ he ǐ na ta̤pî̌tî̌phû̌ tokhlǒ akhû̌akhî, he gǔ ǐ dû̌htò̌ khlopô̤̌ na ta̤ma̤ dǒ na gǔ pǒǐ dû̌wî̤khlo pô̤̌ kû̌ hǒnu pě. Hè sǎlě̤sǎlò̤ wô̤̌wô̤̌ mò̌ pû kû̌ he.’

22“Kòyò dǒ a nǐ̤bǎ hta tôkô̌ tôpwa̤nu, a phî̌hè dû̌wî̤pô̤̌ tôkô̌ dě a hî̌ aběcǎ kû̌, ‘Běcǎ, na ǐ he hta amǒ̤ tôkô̌, dě hǒo mî̌, he ma̤phû̌htò̌ dû̌wî̤pô̤̌ tôkô̌ nuhǒ.’

23“Dě aběcǎ hî̌shěshu lû̌û kû̌, ‘o, awô̌ jî̌lî. Na mî̌ jû̌ dǒ awô̌ dě acǒ kû̌ he, na cǒ kû̌ ta̤ dǒ he ǐ na ta̤pî̌tî̌phû̌ tokhlǒ akhû̌akhî, he gǔ ǐ dû̌htò̌ khlopô̤̌ na ta̤ma̤ dǒ na gǔ pǒǐ dû̌ khlopô̤̌ kû̌ hǒonu pě. Hè sǎlě̤sǎlò̤ wô̤̌wô̤̌ mò̌ pû kû̌ he!’

24“Hǒtaplǎdě kòyò dǒ a nǐ̤bǎ hta tôjwè̌ tôpwa̤ nî̌ a hèhî̌ aběcǎ kû̌, ‘Běcǎ, he sî̌ganǎ̤ kû̌ na mî̌ kòyò dǒ apò̤̌yǎ̤ mè̤̌mè̤̌ tôpwa̤. Bǔshò̌ dǒ na shǒǐ gû̌ kòyò tô̤̌ tokhlǒnu na cû̌ kǎge tûû̌ naya, bǔshò̌ dǒ na shǒǐ gû̌ kòyò tô̤̌ tokhlǒnu na cû̌pô̤̌geplǒ tûû̌ yǎ. 25Pô̤̌nu akhû̌akhî, he ǐsha dě he cû̌ plǒ û̌kè nahta nutôjwè̌ dǒ hǎlǎ̤, kè̌mò̌, hǒo mî̌ hta dǒ na ǐ kè he nuhǒ.’

26“Dě aběcǎ hî̌shěshǔ lû̌û kû̌, ‘jû̌khujû̌jî̌, jû̌cè̌klèlôbô̌, na sî̌ganǎ̤ kû̌ bǔ dǒ he shǒǐ yǎtô̤̌ tokhlǒnu, he cû̌ kǎge, bǔ dǒ he shǒǐ tô̤̌ tokhlǒnu he cû̌ pô̤̌geplǒ tû̌û yǎ mè̤̌bǎtô̤̌ya? 27Na kè̌ sî̌ganǎ̤ pô̤̌nudě na dǐbǒkè he htahǒo dǒ pwa̤ phǐbǒphǐlô̤̌ htatokhlǒ a cǔdekû tô̤̌ ma̤titè? Na kè̌ ma̤pô̤̌nu hî̌dě htû̌ he getîkhî pěnu he gǔ nǐ̤bǎ getîkhî aphû̌phû̌ amǒ̤mǒ̤ pě hò̌.

28“‘Phî̌ getîkhîwô̌ gesô̌ htanu tôjwè̌ dě ǐ kû̌ kòyò dǒ a nǐ̤bǎ ajwè̌shǐ nutôpwa̤. 29Ma̤titèhî̌dě kòyò lǒ̤bò dǒ kòyò yṳ̌ǎnṳ̌ lû̌û dě kòyò bè̌ô̌ tě̤ta̤ dǒ a ô̌ tokhlǒnu, kòyò gǔ ǐdû̌htò̌ pô̤̌ a pě. Dě ata̤ gǔ ô̌ htò̌be pô̤̌ pě. Bǎbǎkǎlè kòyò dǒ kòyò dǐô̌ tě̤ta̤ pî̌tî̌phû̌pwǎ dǒ alô̤ dě kòyò yṳ̌ǎnṳ̌ lû̌û tô̤̌ tokhlǒnu, kòyò gǔ phî̌getîkhî sô̌ bòbǎ asî pě. ^e 30Tě̤nṳ̌ jû̌ ô̌lǒô̌khlo nutôpwa̤ dǒ ta̤khǐsiwi̤ akla nu. Bǎnutûkû nî̌ kòyò gǔ cû̌hǎcû̌wô, kòyò gǔ ě jegwě akhû̌khi pě.’ ^f

Ta̤cî̌htò̌ dǒ nô̌kò gutṳ̌

31“Htû̌꤮ Kòyòphû̌khû gǔ hè kû̌ a ta̤bwǐdû̌sîrîhtû pě dě amǒkhû̌ tanaphû̌ tokhlǒ gǔ hè kû̌ lû̌û akhapěnu a gǔ hǎnòò̌ dǒ a khwǐ tòcò kakha akhû̌ pě. ^g 32Kòyò khlilè lǒ̤꤮ bònu a gǔ hè ô̌plǒ dǒ alô̤mô̤̌ pě dě pô̤̌ pwa̤kè̌sû̌phû̌ bè̌yò asû̌phû̌ tokhlǒ kû̌ pè̤̌ tokhlǒnu, a gǔ bè̌yò̤ khô̌bò kòyò tokhlǒ pě. 33A gǔ bè̌yò sû̌phû̌ tokhlǒ dǒ a cǔtômû tôkhô pě dě pè̤̌ tokhlǒnu a gǔ bè̌yò dǒ a cǔcôcî̌ tôkhô pě.

34“Bǎnuakha pěnu, khwǐ nutôpwa̤ gǔ hî̌ kòyò dǒ a cǔtômû tokhlǒ pě kû̌, ‘hèmò̌ lô̌khô, sî mî̌ kòyò dǒ a nǐ̤bǎ hepha a ta̤ǐshowî̤ tokhlǒ, hènṳ̌ phî̌wô̌ lô̌khô mǒkhû̌ shilǎ̤gǎkû dǒ amè̤̌kû̌ na û̌tě̤û̌ca dǒ kòyò tîwî̌tòwò nǎ bǎ sî dǒ mǒhtûlû̌ hǎhtûsa pě akhanu. 35Ma̤titèhî̌dě bǎ he hǎwǐ̤sǎǎ akha sî dǐǎdǐô he, bǎ he hǎwǐ̤sǎô akha sî dǐô he, bǎ he cû̌htû shǐtèmè̤ akha sî kaǎ mô̤ he. 36Bǎ he ô̌koyo lǎ̤kûlǎ̤sô̌ akha, sî dǐkûdǐsô̌ he, bǎ heshǐhesha akha, sîkè̌ ǐ he. Bǎ kòyò dǒtě̤ he dǒ apô̤kû akhanu, sî hè ô̌lè he.’

37“Dě kòyòcǒkòyòtè̤ tokhlǒ gǔ hî̌shěshu a kû̌, ‘Běcǎ, pa cû̌kè̌shǐ nô̌ na hǎwǐ̤sǎǎ dě pa cû̌ dǐǎnô̌ na bǎkhò̌tè? Na hǎwǐ̤sǎô dě pa cû̌ dǐônô̌ na bǎkhò̌tè? 38Na htû shǐtèmè̤ dě pa cû̌ kaǎshǔ na, mè̤̌tô̤̌mî̌ na ô̌koyo lǎ̤kûlǎ̤sô̌ dě pa cû̌ dǐkûdǐsô̌nô̌ na bò̌khò̌tè? 39Bǎ na shǐsha akhanu bǎbǎ, bǎ kòyò dǒtě̤ na dǒ apô̤kû akhanu bǎbǎ pa cû̌ hè ô̌lè na bǎkhò̌tè?’

40“Khwǐ nutôpwa̤ gǔ hî̌shěshu asî kû̌, ‘he hî̌mî̌ca sî, dǒ he pṳ̌wè̤̌ tokhlǒ akla, sî ma̤jè̌ kòyò dǒ kò gènè̤ pî̌tî̌ yǎ tôpwa̤ numî̌ amè̤̌kû̌ sî ma̤jè̌ he hǒ.’

41“Htodě a gǔ hî̌ kòyò ô̌ dǒ a cǔcôcî̌ tokhlǒ kû̌, ‘hǎhtò̌cû̌ tephekè kû̌ he, sî mî̌ kòyò dǒ a nǐ̤bǎ ta̤ǐsho tokhlǒ, cû̌nṳ̌ lô̌khô dǒ kòyò tîwî̌tòwò nǎ bǎ hǎkhû̌tana nutôdo kû̌ a khînǎkhîno nutokhlǒ aya dǒ asî gǔ cû̌ô̌ bǎ mî̌ dǒ a pǐ̤jò tôkhò̌꤮ tô̤̌ nutôphǎ akûnu. 42Ma̤titèhî̌dě bǎ he sǎǎsǎô akha, sî dǐǎdǐô he tô̤̌. 43Bǎ he htû shǐtèmè̤ akha, sî kaǎshǔ he tô̤̌. Bǎ he ô̌koyo lǎ̤kûlǎ̤sô̌ akha, sî dǐkûdǐsô̌ he tô̤̌. Bǎ heshǐhesha akha, htokhôtô̤̌ bǎ kòyò dǒô̌ he dǒ apô̤kû akha, sî hèkè̌ǐpǒ̤ǐ he tô̤̌.’

44“Dě asî gǔ hî̌shěshu lû̌û kû̌, ‘Běcǎ, na hǎwǐ̤sǎǎ bǎbǎ, na hǎwǐ̤sǎô akha bǎbǎ, na cû̌ htû shǐtèmè̤ akha bǎbǎ, na lǎ̤kûlǎ̤sô̌ ô̌koyo akha bǎbǎ, nashǐnasha akha bǎbǎ, kòyò dǒtě̤ na dǒ apô̤kû akha bǎbǎ, pa cû̌kè̌shǐ na dě pa ma̤jè̌ na tô̤̌ bǎkhò̌tè?’

45“Dě a gǔ hî̌shěshu asî kû̌, ‘he hî̌mî̌ca sî, dǒ he pṳ̌wè̤̌ tokhlǒ akla, sî kè̌ ma̤jè̌nô̌ kòyò dǒ kòyò gènè̤ pî̌tî̌ gutṳ̌ yǎ nutôpwa̤ tô̤̌ numî̌ amè̤̌kû̌ sî ma̤jè̌ he tô̤̌ hǒ.’

46“Pô̤̌nudě asî gǔ khòbǎ ta̤cî̌htò̌ tûjû̌pwa̤ talakhǎ pě, bǎbǎkǎlè kòyò cǒ tokhlǒnu a gǔ cû̌ nṳ̌nǐ̤ dǒ mǒkhû̌ dě a gǔ nǐ̤bǎ yôla htûpwa̤ tûjû̌pwa̤ pě.” ^h