Matthew 26

Asî gènè̤ ma̤si Běcǎ

(Makǔ 14:1-2; Lǔka 22:1-2; Yṳ̂ha 11:45-53)

1Bǎ Běcǎ shôbǐǐlṳ̌ bǎ htobò ta̤tokhlǒ akhanu, a hî̌ akhôphijǎ tokhlǒ kû̌, 2“Sî sî̌ya kû̌, alṳ̂pe ginǐ̤ni̤ mî̌ pwè dǒ kòyò kaǎ kû̌ ta̤cû̌bò̌tûlû̌pwè hètǒ̤hǒ. Kòyò gǔ shaǎlò̤kè Kòyòphû̌khû pě dě kòyò gǔ htǎsihtò̌ kè lû̌û dǒ nò̌dò̌htǔlô̤ pě.” ^a

3Bǎnukhanu, pwa̤shû̌gǎ ikǒlǒkò dû̌ tokhlǒ kû̌ Yǔdaphû̌ ta̤cubucaba ikǒlǒkòdû̌ tokhlǒ ô̌plǒ kè̌shî̌ lû̌û dǒ pwa̤shû̌gǎ ikǒdû̌lǒ Phakayaphǎ ahôkû. 4Asî tîwî̌tòwò nǎ bò kû̌ a gǔ pṳ̂̌ ma̤si hǔkè Yeshǔ. 5Bǎbǎkǎlè asî hî̌ kè̌khî lû̌û kû̌, “Bǎ pa ma̤pwè akhanu pa tô pṳ̂̌ yǎ tô̤̌, hî̌pě kòyò saprṳ̂saphǎ tokhlǒ sǎphlǒdû̌ pě dě a ma̤shû̌shushû̌shǎ bò̌bòhè̌.”

Kòyò lò̌lò̤ shinumû̌ dǒ Yeshǔ a ikǒlô̤ bǎ do Betanǐ dokû

(Makǔ 14:3-9; Yṳ̂ha 12:1-8)

6Bǎ Běcǎ Yeshǔ ô̌ dǒ do Betanǐ, Khûshǐmṳ̂ dǒ ta̤shakrôǎ bǎ yǎ dǒ bělô̤ nutôpwa̤ ahǐkû dě a ǎdî akhanu, 7Pwa̤mǒ̤ tôpwa̤ hè dǒ aô̌ dě a phǐhèǐ pò̤̌ dǒ kòyò ma̤ yǎ kû̌ lǒ̤bû dǒ a ô̌be kû̌ shinumû̌ lě̤dû̌pwî̤htû tôpò̤̌ dě a hè lò̌lò̤ dǒ Běcǎ Yeshǔ a ikǒlô̤. ^b

8Bǎ akhôphijǎ tokhlǒ kè̌shǐ akhanu, a sǎphlǒdû̌ dě a gwè̌ lû̌û kû̌, “Cû̌ ma̤bò tônô̤kè yǎ ma̤titè? 9Kè̌ shaǎ shinumû̌ numî̌ alě̤dû̌pwî̤htû dě nǐ̤bǎ runu ǐ kû̌ kòyò pwa̤hǎwǐ̤shèwè̤phû̌ nukò̌.”

10Běcǎ Yeshǔ sî̌ganǎ̤ akhû̌akhî, a hî̌ asî kû̌, “Sî cû̌ ma̤dǐdò pwa̤mǒ̤ nutôpwa̤ ma̤titè? A ma̤ta̤ numî̌ awô̌ jî̌ dǒ heya hǒ. 11Kòyò hǎwǐ̤shèwè̤phû̌ tokhlǒ ô̌plǒ kû̌ sî pṳ̂̌꤮ taplǎ bǎbǎkǎlè he dě he ô̌ sayè̤ nô̌ kû̌ sî tô̤̌. ^c 12Bǎ a lò̌lò̤ shinumû̌ dǒ he nǎ̤lô̤ akha numî̌, amè̤̌kû̌ a tîwî̌ nǎ hto he dǒ kòyò gǔ lǔlò̤ he dǒ lṳ̌kû pěnu hǒ. 13He hî̌cǒcǒ꤮ sî, htû̌ kòyò cû̌ shôbǐǐlṳ̌ ta̤sǎlě̤we̤kènu dǒ hǎkhû̌ hǒtôbǎ bǎtè tûkû pě bǎbǎ, kòyò gǔ gènè̤htò̌ to̤bǎǐ a pě dě kòyò gǔ dǔlè̌lṳ̌ ta̤ dǒ a ma̤hto ta̤nu pě.”

Khûyǔda sǎphlǒtô dǒ a gǔ shaǎkè Běcǎ

(Makǔ 14:10-11; Lǔka 22:3-6)

14Dǒ Běcǎ Yeshǔ akhôphijǎ shǐsò̌ginǐ̤ akla ami̤ kû̌ Khûyǔda Isakariyû tôpwa̤nu, a cû̌ dǒ pwa̤shû̌gǎ ikǒlǒkò dû̌ tokhlǒ a ô̌. 15Dě a cû̌ gwè̌ asî kû̌, “He kè̌ ǐlò̤kè Yeshǔ dǒ sî cǔdekû hî̌dě sî ǐ he pwǐtè?” Dě asî ǐ lû̌û ruyî̌ sakhò̌. ^d 16Sahtò̌ bǎnu dě Khûyǔda kè̌côǐ shěkhǎwô̌ dǒ a gǔ tôtǐ bǎkhò̌tè dě a gǔ shaǎlò̤kè Yeshǔnu.

Ta̤cû̌bò̌tûlû̌pwè ta̤shǎǎplò̌shǐ lṳmṳ̌hǎ

(Makǔ 14:12-21; Lǔka 22:7-13; Yṳ̂ha 13:21-30)

17Bǎ pwè ǎ mû̌ shôdô ta̤bû awǐlǒ tôni̤nu, akhôphijǎ tokhlǒ hè dǒ Yeshǔ a ô̌ dě a hègwè̌ lû̌û kû̌, “Ta̤cû̌bò̌tûlû̌pwè ta̤shǎǎplò̌shǐ lṳmṳ̌hǎ nunî̌, na sǎyṳ notîwî̌tòwò tô pa bǎtè tûkûya?”

18Dě a hî̌shěshu asî kû̌, “Cû̌nṳ̌ dǒ wî̤̌kû nudě cû̌ dǒ pwa̤khû nutôpwa̤ a ô̌nu dě cû̌ hî̌ lû̌û kû̌, ‘sara hî̌ kû̌, shěkhǎ phǔ dǒ heya hǒ, dě he bǎǎbǎô ta̤cû̌bò̌tûlû̌pwè ta̤shǎǎplò̌shǐ lṳmṳ̌hǎ shǎǎnu kû̌ he khôphijǎ dǒ nahǐkû’ hî̌ a pô̤̌nu nî̌꤮.” 19Dě a khôphijǎ tokhlǒ ma̤pô̤̌ a hî̌ asînu dě asî cû̌ tîwî̌tòwònǎ lô̌khô ta̤cû̌bò̌tûlû̌pwè ta̤shǎǎplò̌shǐ lṳmṳ̌hǎta̤ǎ aya bǎnu.

20Bǎ lṳmṳ̌khǐpô̤lô̤̌ akhanu, Běcǎ kû̌ akhôphijǎ shǐsò̌ginǐ̤ hǎnòò̌ te̤we̤ wô̤̌wô̤̌ lû̌û dǒ lǎ̤ǎdîwǎ̤ akòshî̌. 21Dě bǎ asî ǎdî akhanu, a hî̌ asî kû̌, “He hî̌cǒcǒ꤮ sî, dǒ sîklanu, kòyò dǒ a gǔ shaǎlò̤kè he pěnu a ô̌ tôpwa̤.”

22Hǒtaplǎdě asî sǎphlǒ mô̤pe tîkî̌꤮ tô̤̌, dě a gwè̌ lô̌khô Běcǎ tôpwa̤ hto tôpwa̤ kû̌, “Běcǎ, na hî̌nu tôpwa̤mî̌ he mè̤̌tô̤̌ yahî̌?”

23Běcǎ hî̌shěshu asî kû̌, “Kòyò dǒ a bǒnṳ̌ǎ kû̌ he dǒ balěkû nutôpwa̤ mî̌ amè̤̌ pwa̤ dǒ a gǔ shaǎlò̤kè he pě nutôpwa̤ hǒ. ^e 24Pô̤̌ lî̤plò̌shǐkû hî̌nǎ kû̌ Kòyòphû̌khû mî̌ he a bǎ si pě bǎbǎkǎlè kòyò dǒ a gǔ shaǎlò̤kè Kòyòphû̌khû nutôpwa̤ nî̌, Cǒmara gǔ cî̌htò̌ yǎ pě. A kè̌ ô̌phijǎlò̤ tô̤̌ numî̌ awô̌khlo pe dǒ aya.”

25Hǒtaplǎdě Khûyǔda dǒ a gǔ shaǎlò̤kè lû̌û hǒtôpwa̤ gwè̌ lû̌û kû̌, “Sara, na hî̌nu tôpwa̤mî̌ he mè̤̌tô̤̌, yahî̌?” Běcǎ hî̌shěshu lû̌û kû̌, “tô̤̌, na mè̤̌hǒ.”

(Makǔ 14:22-26; Lǔka 22:14-23; Kôritu awǐlǒ tôbǎ 11:23-25)

26Bǎ asî ǎshǎ akhanu, Běcǎ Yeshǔ phî̌ mû̌ dě a hî̌bwǐhî̌sîrî Cǒmara, htodě a bephwǐǎ dě a ǐlò̤ dǒ akhôphijǎ tokhlǒ a cǔdekû, dě a hî̌ asî kû̌, “Phî̌ǎmò̌ lô̌khô, hǒomî̌ he nǎ̤glǒ hǒ.”

27Htodě a phî̌htò̌ sîpî̌shiba dě a hî̌bwǐhî̌sîrî dě a ǐlò̤ tutṳ̌ dǒ akhôphijǎ tokhlǒ a ô̌ dě a hî̌ asî kû̌, “Ômò̌ lô̌khô hǒo. 28Shishǐbè mî̌ ta̤wṳ̂̌dò asa dǒ amè̤̌ hesǐ dǒ a gǔ sǐlò̤ dě a gǔ plûkè kòyò saprṳ̂ ata̤sǔ pě. ^f 29He shôbǐǐ bǎ sî, sahtò̌ khònò̤̌ tǒ̤hè he ô bǎ pe sîpî̌shinu tô̤̌. He gǔ geô wô̤̌wô̤̌ sô̌ sîpî̌shi asa dǒ hepha ashiagǎkû pě.”

30Htodě asî sǎwǐ htû̌sò̌htò̌ Cǒmara alî̤ sǎwǐ tôtô̤̌ dě a hǎhtò̌cû̌kè dǒ Òlǐba khôlôkhû̌.

Běcǎ Yeshǔ hî̌nǎ anǎ̤ kû̌ Khûpetarǔ gǔ htè̌bǐ lû̌û pě

(Makǔ 14:27-31; Lǔka 22:31-34; Yṳ̂ha 13:36-38)

31Htodě Běcǎ Yeshǔ hî̌ asî kû̌, “Lî̤plò̌shǐkû hî̌ kû̌,

‘He gǔ po̤ pwa̤kè̌sû̌phû̌ pě, dě sû̌phû̌sî tokhlǒ gǔ khlè̌cû̌peshe bò pě.’

Ma̤titèhî̌dě khò̌tôsa pěnu, ta̤ gǔ htûhtò̌ kû̌ he pô̤̌o pě akhû̌akhî, sî gǔ hǎhtò̌khlè̌ cû̌khô̌bòkè helǎ̤ pě,” A hî̌ pô̤̌nu. ^g

32“Bǎbǎkǎlè htû̌ he si ihtǒhtûpwa̤sô̌ htopěnu, he gǔ cû̌ ô̌nǎwǐ sî dǒ Galilè̤̌gǎ kûnu pě.” ^h

33Khûpetarǔ hî̌shěshu kû̌, “Kòyò gǔ sǎphlǒpî̌kè bò na gûlǎ̤ bǎbǎ, he glè̌ sǎphlǒpî̌kè nô̌ na tîkî̌꤮ tô̤̌.”

34Bǎbǎkǎlè Běcǎ Yeshǔ hî̌shěshu lû̌û kû̌, “He hî̌cǒcǒ na, khò̌tôsa bǎ shîpha û̌ htò̌ khôtô̤̌ pě nu, he sî̌ganǎ̤bǎnô̌ tô̤̌, na gǔ htè̌bǐ he suplǎ pě.”

35Bǎbǎkǎlè Khûpetarǔ hî̌shěshu kû̌, “He tôbǎ si kû̌ na bǎbǎ, he sî̌ganǎ̤bǎnô̌ a tô̤̌nu he hî̌ nô̌ tîkî̌꤮ tô̤̌.” Dě akhôphijǎ dǒ ashǔshawa̤ tokhlǒ gû̌hî̌ kû̌ bò pô̤̌nu.

Běcǎ Yeshǔ cû̌ kwicaba dǒ Ketashema̤na̤ agûlǎ̤ tûkû

(Makǔ 14:32-42; Lǔka 22:39-46)

36Htodě Běcǎ Yeshǔ kû̌ akhôphijǎ tokhlǒ cû̌ dǒ gûlǎ̤ tûkû dǒ kòyò kaǎ kû̌ Ketashema̤na̤ dě a hî̌ asî kû̌, “Bǎ he cû̌ caba dǒ nutûkû akhapěnu, hǎnòò̌kè kû̌lǎ lô̌khô bǒo nî̌꤮.” 37A kaǎcû̌ǐ Khûpetarǔ kû̌ Phasebedè̌ aphû̌pwa̤khû sò̌ginǐ̤ dě a sǎplǎ̤ hè dě a sǎphlǒgû̌ sǎphlǒgè̌ hè. 38Htodě a hî̌ asî kû̌, “He sǎplǎ̤ sikèhǒ, a sô̌sô̌cǎkû̌ he glè̌ si tè̤tè̤̌nu hǒ. Ô̌kè lô̌khô bǒo dě ô̌sòklò lô̌khô nî̌꤮.”

39A cû̌ pô̤̌ dǒ alô̤mô̤̌ tîkî̌phû̌ dě a hǎmôô̌ tuglǔ dǒ hǎkhû̌ dě a kwicaba dě a hî̌ kû̌, “Ǒ pha na kè̌ phî̌ tephekè bǎ he ta̤jî̌ta̤jû̌ ashishǐbè hǒtôbǎ nî̌ kè̌ anǐ̤ hî̌dě phî̌tephekè bǎ he, bǎbǎkǎlè he sǎyṳ ma̤ jû̌꤮ tûû̌ he sǎphlǒ tô̤̌. Jû̌꤮ tûû̌ pwǎ na sǎphlǒ nî̌꤮.”

40Htodě a getîkhî sô̌ dǒ a khôphijǎ tokhlǒ a ô̌ dě a ge kè̌shǐ asî hǎmôô̌ shôpě̤ lǒ̤bò, dě a gwè̌ Khûpetarǔ kû̌, “Sî ô̌sòklò yî̤ kû̌ he bǎ tônarîpwǎ dě sî sòklò khòbò̌tô̤̌ ya? 41Pô̤̌khô sî gǔ cû̌nṳ̌ gû̌ tǎ̤ dǒ ta̤tili̤tôlô̌ akû tǎ̤mǎ̤nu, sòklò dě kwicaba lô̌khô nî̌꤮. Sî sǎphlǒshû̌sho mî̌ca ta̤ dǒ atô bǎbǎkǎlè sî nǎ̤glǒnu a khû̌shiǎjǎ jî̌lî.”

42A cû̌ sô̌ ginǐ̤plǎtôplǎ dě a kwicaba kû̌, “Ǒ he pha꤮, he bǎ ô mî̌ca ta̤jî̌ta̤jû̌ ashishǐbè, kè̌ phî̌tephekè anǐ̤ tô̤̌ hî̌dě, jû̌꤮ tûû̌ pwǎ na sǎphlǒ nî̌꤮.”

43Bǎ a ge kè̌ tîkhî sô̌ akhôphijǎ tokhlǒnu, a gekè̌shî̌ kû̌ asî sǎhǎmôô̌ shôpe̤ bò. Asî hǎmôô̌ jî̌ tûlû̌shû̌lě dě a kè̌htò̌bò̌ pe tô̤̌. 44Dě a hǎhtò̌cû̌ kwicaba sô̌ suplǎtaplǎ dě a hî̌sô̌sô̌ pô̤̌ a hî̌ wǐ nupwǎ.

45Htodě a getîkhî dǒ akhôphijǎ tokhlǒ a ô̌ dě a hî̌ asî kû̌, “Sî hǎmôô̌ sadape lô̌khô ya, sî ô̌kǔ sadadape lô̌khô hî̌tè? Ganǎ̤de kè̌mò̌ lô̌khô, shěkhǎ dǒ kòyò gǔ shaǎlò̤kè kòyòphû̌khûnu dǒ pwa̤ma̤sǔphû̌ tokhlǒ a cǔdekûnu, a hètǒ̤hǒ. 46Ihtǒmò̌ lô̌khô, dě pa bǎ cû̌, pwa̤ shaǎlò̤kè he nutôpwa̤ hètǒ̤hǒ.”

Khûyǔda kaǎhèǐ kòyò tokhlǒ dě a hèpṳ̂̌ Běcǎ Yeshǔ

(Makǔ 14:43-50; Lǔka 22:47-53; Yṳ̂ha 18:3-12)

47Bǎ Běcǎ Yeshǔ hî̌bǎ pepwǎ akhanu, Khûyǔda dǒ a ô̌plǒ kû̌ a khôphijǎ shǐsò̌ginǐ̤ akla tôpwa̤ nî̌ a hètǒ̤ bǎnu. Dě kòyò gû̌hè lû̌û tôprṳ̂tôphǎ dě a phǐhèǐ lô̌khô nò̌plè, nò̌po̤ kû̌ nò̌she tokhlǒ. Kòyò hǒtokhlǒ numî̌ amè̤̌pwǎ pwa̤shû̌gǎ ikǒlǒkòdû̌ tokhlǒ kû̌ kòyò khlilèphû̌ a ikǒlǒkòdû̌ tokhlǒ plûhè asî nutokhlǒ pwǎ. 48Pwa̤shaǎlò̤kè Běcǎ nutôpwa̤ nî̌ a dǐsî̌ya nǎ wǐ hto asî kû̌, “Kòyò dǒ he gômô̤ a tôpwa̤ numî̌ Yeshǔ dǒ pa sǎyṳpṳ̂̌ a nutôpwa̤ hǒ dě hèpṳ̂̌ lô̌khô yǎ nî̌,” A hî̌nǎ asî pô̤̌nu. 49Sělě a hè tôtǐ dǒ Běcǎ Yeshǔ a ô̌ dě a hè hî̌ lû̌û kû̌, “Sara, na ô̌shû̌ô̌mô̤ ya?” Htodě a gômô̤ lû̌û.

50Dě Běcǎ hî̌shěshǔ lû̌û kû̌, “Khômò̤̌, na hè bǒo dě na lǎ̤hè ma̤titènu tûlû̌ ma̤mò̌.”

Htodě kòyò tokhlǒ hèpṳ̂̌kè Yeshǔ. 51Kòyò dǒ a gû̌ hègû̌ kû̌ Běcǎ Yeshǔ akla tôpwa̤nu a běhtò̌ anò̌she dě a pè̤̌tṳ̌kè pwa̤shû̌gǎ ikǒdû̌lǒ ajû̌ tôpwa̤ anò̌ku tôkhô.

52Běcǎ hî̌ lû̌û kû̌, “Wô̤̌nṳ̌wô̌ kè nanò̌shenu. Ma̤titèhî̌dě kòyò dǒ a pṳ̂̌ nò̌shenu a gǔ si kû̌ nò̌she pě. 53Pô̤̌khô mǒkhû̌ tanaphû̌ tokhlǒ gǔ hèlò̤ takabǐǐ he ayanu, he kè̌ kwi hepha dǒ a gǔ nohî̌lò̤ asî kliphû̌mṳ̌dû̌ ▼

▼tômṳ̌ mî̌ a ô̌ rî̌susô̌

shǐginǐ̤mṳ̌ hî̌dě tôplǎnô̤̌ hepha ǐlò̤ he mî̌ anǐ̤ numî̌ sî sî̌ganǎ̤tô̤̌ ya? 54Kè̌ he ma̤pô̤̌nu hî̌dě lî̤plò̌shǐ a ta̤wě̤nǎ dǒ a bǎ htûhtò̌ pô̤̌onu a cû̌lǒhtò̌behtò̌ jò hî̌tè?”

55Htodě Běcǎ Yeshǔ hî̌ kòyò saprṳ̂ kû̌, “He mî̌ kòyò dǒ a ma̤sǔ ta̤mǎlò̤ tôpwa̤nu ya? Sî hèpṳ̂̌ he dě sî hè kû̌ nò̌she kû̌ nò̌po̤ hî̌tè? He hǎnòò̌ sû̌ǐtòwòǐ kòyò dǒ ta̤lṳhtò̌ hôkû pṳ̂̌ni̤pṳ̂̌sa dě sî pṳ̂̌ he tô̤̌tô̤̌. ^j 56Bǎbǎkǎlè ta̤htûhtò̌ anǎ̤ pô̤̌ numî̌ pô̤̌khô piwi̤pèshè wě̤nǎ tokhlǒ gǔlǒhtò̌behtò̌ aya pwǎ.” Htodě akhôphijǎ lǒ̤bò tokhlǒ hǎhtò̌khlè̌ pheshekè bò alǎ̤.

Yǔdaphû̌ ikǒlǒkòdû̌ tokhlǒ cî̌htò̌ Yeshǔ

(Makǔ 14:53-65; Lǔka 22:54-55, 22:63-71; Yṳ̂ha 18:13-14, 18:19-24)

57Kòyò dǒ a hèpṳ̂̌ Yeshǔ tokhlǒ nî̌, a pṳ̂̌gekè lû̌û dǒ pwa̤shû̌gǎ ikǒdû̌lǒ pha Kayaphǎ nutôpwa̤ ahǐ. Bǎnu mî̌ pwa̤sû̌ǐ ta̤sû̌ta̤tòwò asara tokhlǒ kû̌ ta̤cubucaba ikǒlǒkòdû̌ tokhlǒ ô̌plǒ bò lû̌û bǎnu. 58Khûpetarǔ gû̌cû̌ tûcû kû̌ Běcǎ Yeshǔ. A cû̌ nṳ̌tǒ̤ dǒ pwa̤shû̌gǎ a ikǒ dû̌lǒ tôpwa̤ ahô we̤ kû dě a nṳ̌ hǎnòò̌ kû̌ kliphû̌ dǒ a ô̌pǒ̤ tagaǐ nutokhlǒ. Dě Khûpetarǔ ô̌pǒ̤kè̌ kû̌ kòyò glè̌ cî̌htò̌ kwè̌ Běcǎ hî̌tè pě, pô̤̌nu.

59Pô̤̌khô asî gǔ cî̌htò̌ ma̤sikè Yeshǔ ayanudě, pwa̤shû̌gǎ ikǒlǒkòdû̌ tokhlǒ kû̌ Yǔdaphû̌ dǒ a ô̌ kû̌ a ta̤siwi̤sòwò̤ htò̌yô̤̌ khlo kòyò tokhlǒ kè̌lǎ lô̌khô lǎ̤khòlṳ̌lòhô lǎ̤nè̌lô̌khô Yeshǔ ata̤sǔ tokhlǒ. 60Kòyò hèphǔkhò̌ lòhǎlòhô jûgrû ata̤sǔ pô̤̌nu bǎbǎkǎlè a htû ikǒdû̌ kôshû̌htû tokhlǒ kè̌shǐ kû̌ a nè̌ lû̌û ta̤sǔ tokhlǒnu a tě̤mè̤̌ tô̤̌.

Dǒ nô̌kòdě kòyò sò̌ginǐ̤ hǎhtò̌ dě a hî̌ kû̌, 61“Kòyò tôpwa̤ nî̌ a hî̌ kû̌, ‘he ma̤lò̤tě̤pro̤kè Cǒmara a ta̤lṳhtò̌hô nudě suni̤ akû he ma̤htò̌bò̌ sô̌ pwǎ’ a hî̌ pô̤̌nu.” ^k

62Htodě pwa̤shû̌gǎ ikǒdû̌lǒ tôpwa̤ ihtǒ dě agwè̌ Yeshǔ kû̌, “Na hî̌ geshěshu kòyò hèbè̌ na ta̤sǔ tokhlǒ tômṳ̂̌ tô̤̌ ma̤titè? Kòyò hè hî̌le̤hî̌ge na ta̤sǔ numî̌ na ganǎ̤de tô̤̌ ya?” 63Bǎbǎkǎlè a dò̌tûklû̌ pwǎ.

Pwa̤shû̌gǎ ikǒdû̌lǒ nutôpwa̤ hî̌ kû̌, “He wṳ̂̌dò heyô̤̌ kû̌ Cǒmara dǒ a htûpwa̤ nutôpwa̤ dě he gǔ gwè̌ na, na mî̌ Me̤shǐya dǒ Cǒmara aphû̌khû nutôpwa̤ mè̤̌mî̌canu shôbǐǐ mò̌ pa.”

64Dě Běcǎ Yeshǔ hî̌shěshu lû̌û kû̌, “O, na hî̌numî̌ amè̤̌ bǎbǎkǎlè he gǔ shôbǐǐbǎ bò sî pṳ̂̌꤮ tôpwa̤ kû̌ nô̌kòpěnu sî gǔ kè̌shǐ kòyòphû̌khû gǔ hǎnòò̌ bǎ pwa̤ dǒ a ta̤pô̤ta̤phǎ dû̌lǒ nutôpwa̤ acǔtômû nutôkhô pě. Htodě he dò̌hè poǒlṳ̌ pě nu sî gǔ kè̌shǐ pě.” ^l

65Hǒtaplǎdě pwa̤shû̌gǎ ikǒdû̌lǒ nutôpwa̤ cî̌hǎyè̌ aje dě a hî̌ kû̌, “A hî̌bǎsǔ Cǒmara hǒ. Pa cû̌lṳ̂pe pwa̤khòlṳ̌ anǎ̤ tokhlǒ hî̌tè? Kè̌mò̌ lô̌khô, sî ganǎ̤de lô̌khô a hî̌bǎsǔ Cǒmara kû̌ sî sanǎ̤ hǒ. ^m 66Sî gènè̤ hî̌tè?”

Dě asî hî̌shěshu lô̌khô kû̌, “A tô si hǒ,” Pô̤̌nu.

67Htodě asî htǔplî̌ lû̌ mi̤sǎ, po̤ lû̌û, hto lû̌û, tokhlǒkhlǒ dě a plǎ̤ lû̌û. ⁿ 68Dě asî hî̌ lû̌û kû̌, “Ǒ꤮ Khrǐ, tayakè̌ bǎ pa, mò̌pè po̤ naya?”

Khûpetarǔ htè̌bǐ Yeshǔ

(Makǔ 14:66-72; Lǔka 22:56-62; Yṳ̂ha 18:15-18, 18:25-27)

69Bǎnuakha Khûpetarǔ hǎnòò̌ dǒ we̤ kû dě pwa̤ma̤ta̤ pwa̤mǒ̤phû̌ tôpwa̤ hètǒ̤ dǒ a ô̌ dě a hî̌ lû̌û kû̌, “Na kû̌ Galilè̤̌phû̌ Yeshǔ numî̌ tôprṳ̂kû pwǎ.”

70Bǎbǎkǎlè Khûpetarǔ htè̌shěshu bò asî bǎnu tokhlǒ dě a hî̌ kû̌, “He ô̌plǒ bǒo tô̤̌. Pwa̤mǒ̤ nutôpwa̤ hî̌ numî̌ he sî̌ganǎ̤bǎnô̌ tô̤̌.”

71Htodě a hǎhtò̌cû̌ dǒ takhakòshî̌ dě pwa̤ma̤ta̤phû̌ pwa̤mǒ̤ dǒ ashǔshawa̤ kè̌shǐ lû̌û dě a hî̌ bǎ kòyò bǎnu tokhlǒ kû̌, “Hǒtôpwa̤ mî̌ a gû̌ kû̌ Wî̤̌na̤sôrè̤̌phû̌ Yeshǔ Khrǐ nutôpwa̤ pwǎ.”

72A htè̌shěshu sô̌ dě a wṳ̂̌dò anǎ̤ kû̌, “He sî̌ganǎ̤bǎnô̌ tô̤̌.”

73Ô̌ gesô̌ dǒ nô̌kò tashò̌phû̌nô̤̌ dě kòyò ihtǒ te̤we̤ phǔ bò bǎnu tokhlǒ hètǒ̤ Khûpetarǔ dě a hî̌ lû̌û kû̌, “Na mî̌ akhôphijǎ tôpwa̤ mè̤̌mî̌ca hǒ, na hî̌bǎ alě̤nu a lò̤kû̌ Galilè̤̌ alě̤pwǎ.”

74Hǒtaplǎdě Khûpetarǔ sahtò̌ wṳ̂̌dò anǎ̤ dǒ Cǒmara lô̤mô̤̌ dě a hî̌ kû̌, “Kòyò hǒtôpwa̤ mî̌ he sî̌ganǎ̤bǎnô̌ lû̌û tôkhò̌ tô̤̌.”

A hî̌htohto kû̌ shîpha û̌ htò̌. 75Hǒtaplǎdě Khûpetarǔ gènè̤htò̌ to̤ǐbǎ Běcǎ Yeshǔ hî̌nǎ lû̌û ata̤hî̌bǎ kû̌, “Bǎ shîpha û̌ htò̌ nò̌khôtô̤̌ akha, na gǔ htè̌bǐ kòyò kû̌ he sî̌ganǎ̤bǎnô̌ a tô̤̌ suplǎ pě,” Akhû̌akhî a hǎhtò̌cû̌ dǒ akhlo dě a cû̌ hǎsihǎô̌ kè.