Matthew 28
Běcǎ Yeshǔ ihtǒhtûpwa̤ getîkhî sô̌ dǒ ta̤si
(Makǔ 16:1-8; Lǔka 24:1-12; Yṳ̂ha 20:1-10)
1Bǎ Yǔdaphû̌ a lṳmṳ̌dǔ hto nô̌kòtôwô̤ lṳmṳ̌lî wî̤sò lṳmṳ̌khǐpe akhanu, Magadalǎ dokûphû̌ Mǒ̤ma̤rǐ kû̌ Mǒ̤ma̤rǐ dǒ ashǔshawa̤ hèkè̌ lô̌khô Běcǎ a lṳ̌kû. 2Dě tanahtû̌de shû̌jî̌jî̌, ma̤titè̌hî̌dě Běcǎ a tanaphû̌ tôpwa̤ ô̌ dǒ mǒkhû̌ hèlò̤ htǔlò̤khǔpo̤ tephekè lǒ̤nu tômè dě a hè hǎnòò̌ dǒ lǒ̤ nutômè akhû̌. 3Anǎ̤glǒ dě a rakha sô̌sô̌kû̌ shî̌lî̌bǒnu htodě ajenu a bûsǔlǔ asô̌sô̌kû̌ shicò lò̤nu. 4Pwa̤ô̌pǒ̤ tokhlǒ gònò̤̌gòglè bò lô̌khô asî ǐsha tûlû̌shû̌lě dě asî sô̌sô̌kè kû̌ kòyòsinu. 5Dě mǒkhû̌ tanaphû̌ hî̌ pwa̤mǒ̤ nusò̌ginǐ̤ kû̌, “Ǐsha lô̌khô tǎ̤mǎ̤, ma̤titè̌ hî̌dě he sî̌ganǎ̤ kû̌ sî kè̌shuǐ Yeshǔ dǒ kòyò htǎsihtò̌ yǎ dǒ nò̌dò̌htǔ alô̤ nutôpwa̤ pwǎ. 6Bǎbǎkǎlè a ô̌pe bǒo tô̤̌. Pô̤̌ a hî̌nǎ htohǒnu, a ihtǒhtûpwa̤ getîkhî htohǒ. Hèkè̌mò̌ a lǎ̤môô̌ gûlǎ̤nu. 7He hî̌ sî ge shôbǐǐlṳ̌ bǎ phwèmò̌ akhôphijǎ nutokhlǒ kû̌, ‘a ihtǒhtûpwa̤ getîkhî sô̌ hǒ dě a cû̌ ô̌nǎ wǐ sî dǒ Galilè̤̌gǎ kû hǒ nu, sî gǔ cû̌kè̌shǐ a bǎnu pě,’ khònò̤̌ dě he hî̌lṳ̌ bǎ sî hǒ.” 8Pô̤̌nudě pwa̤mǒ̤ nusò̌ginǐ̤ ô̌ bǎ lṳ̌kûnu dě a tṳplṳ̌tewě̤ hǎhtò̌ge lô̌khô. Asî ǐsha, sǎlě̤sǎlò̤ dě a khlè̌ge shôbǐǐ bǎ lô̌khô akhôphijǎ tokhlǒ. 9Tôplǎnô̤̌ Běcǎ Yeshǔ kè̌shǐ glǎshǔ asî dě a hî̌mô̤hî̌wô̌shǔ asî. Dě asî hèglǎ Běcǎ dě a hè pṳ̂̌mě lû̌û khò̌lôpô̤̌ dě cubucabahtò̌ lû̌û. 10Htodě Běcǎ hî̌ asî kû̌, “Ǐsha tǎ̤ lô̌khô tǎ̤mǎ̤. Geshôbǐǐ bǎ lô̌khô hepṳ̌hewè̤̌ kû̌, cû̌ lô̌khô dǒ Galilè̤̌gǎnu, sî gǔ cû̌kè̌shǐ he bǎnu pě, shôbǐǐbǎ asî pô̤̌nu nî̌꤮.”Pwa̤ô̌pǒ̤ tokhlǒ gehî̌lṳ̌ ta̤we̤ta̤kè kû̌ Běcǎ ô̌ petô̤̌
11Bǎ pwa̤mǒ̤ nutokhlǒ ge dǒ klè̌lô̤ akhanu, pwa̤ô̌pǒ̤ lṳ̌kû tokhlǒ genṳ̌tǒ̤ bò dǒ wî̤̌kû dě a ma̤kwè̌ hî̌tènu, asî ge shôbǐǐlṳ̌ bǎ kû̌ pwa̤shû̌gǎ ikǒlǒkòdû̌ tokhlǒ. 12Bǎ pwa̤shû̌gǎ ikǒlǒkòdû̌ tokhlǒ kè̌shǐ glǎshǔ kû̌ Yǔdaphû̌ mǒ̤khumǒ̤pwǎ̤ dǒ a ikǒlǒkòdû̌ tokhlǒ akhanu, asî bǎ ma̤ lô̌khô hî̌tè pěnu a tîwî̌tòwò lô̌khô. Htodě asî ǐ kliphû̌ tokhlǒ ru tôprṳ̂tôphǎ dě a hî̌ asî kû̌, 13“Sî tôbǎ hî̌ lô̌khô pô̤̌o, ‘bǎ pa hǎmôô̌ shôpě̤ akhanu, akhôphijǎ tokhlǒ hèphî̌hǔ gekè lû̌û hǒ,’ hî̌ lô̌khô pô̤̌onu nî̌꤮. 14Ta̤we̤ta̤kè hǒo kè̌ lûcû̌tǒ̤ dǒ khwǐ ô̌ pě hî̌dě pô̤̌khô a gǔ ma̤pò̤̌ma̤sha sî tô̤̌nu, pa kè̌ hî̌tû̌ a pě.” 15Pô̤̌nudě kliphû̌ tokhlǒ phî̌ lô̌khô runu dě a hî̌ pô̤̌ asî no lû̌ûnu. Yô̤̌sǎ hǒtômû nî̌ Yǔdaphû̌ tôgǎ hî̌ǐ bòpe tǒ̤lò̤ khònò̤̌.Běcǎ hî̌bǎ kû̌ akhôphijǎ tokhlǒ
(Makǔ 16:14-18; Lǔka 24:36-49; Yṳ̂ha 20:19-23; Pwa̤nophû̌ 1:6-8)
16Hǒtaplǎdě akhôphijǎ shǐtôpwa̤ cû̌ lô̌khô dǒ Galilè̤̌gǎ khôlôkhû̌ pô̤̌ Běcǎ shôbǐǐ nǎkè asînu. a 17Bǎ asî kè̌shǐ a Běcǎ akhanu, asî cabahtò̌ lû̌û bǎbǎkǎlè tokhlǒkhlǒnu asǎphlǒ wò̌wè̌ pe. 18Dě Běcǎ Yeshǔ hè dǒ asî ô̌ dě a hî̌ asî kû̌, “Ta̤siwi̤sòwò̤ dǒ mǒkhû̌ bǎbǎ, dǒ hǎkhû̌nu bǎbǎ, kòyò ǐ bòkè kû̌ he hǒ. 19Ma̤pô̤̌nudě, he hî̌ sî꤮, cû̌ lô̌khô dǒ kòyò tokhlǒ a ô̌ dě cû̌ma̤ htûhtò̌ asî kû̌ he khôphijǎ nî̌꤮. Cû̌ ju bǎ lô̌khô asî shi kû̌ pha ami̤, phû̌khû ami̤ kû̌ Yôla Plò̌shǐ Běcǎ ami̤ nî̌꤮. b 20Htodě sû̌ǐtòwòǐ lô̌khô asî kû̌ a gǔ jûlě̤phî̌yô̤̌ gû̌ma̤ bò pô̤̌ he mǎnǎ sî ayô̤̌ nutokhlǒ nî̌꤮. He gǔ ô̌plǒ kû̌ sî pṳ̂̌꤮ plǎ pě, tǒ̤ dǒ hǎkhû̌ gutṳ̌kè pě bǎbǎ he gǔ ô̌cu kû̌ sî pě.”
Copyright information for
KxfSCKXF