Matthew 3
Jushi Khûyṳ̂ha a ta̤shôbǐǐlṳ̌htò̌
(Makǔ 1:1-8; Lǔka 3:1-18; Yṳ̂ha 1:19-28)
1Něyî̤layî̤ hè akhanu, kòyò ô̌ tôpwa̤, a cû̌lè shôbǐǐlṳ̌ ta̤ dǒ Yǔdagǎ gǎshashigǎ lǒ̤seměkhû̌, dě kòyò kaǎ lû̌û kû̌ pwa̤jushi Khûyṳ̂ha. 2Dě a hî̌ kû̌, “Yò̤lǎ̤plǎdî̌ lô̌khô sîsǎphlǒ, ma̤titè̌hî̌dě mǒkhû̌ ashiagǎ phǔhtò̌hǒ.” a 3A mî̌ kòyò dǒ piwi̤pèshè Khûyashǎya hî̌nǎ nutôpwa̤ awe̤akè kû̌, “Kòyò tôpwa̤ yî̤̌kǒhtò̌ dǒ gǎshashigǎ lǒ̤seměkhû̌ dě a hî̌ kû̌, ‘tîwî̌tòwò nǎ lô̌khô klè̌ dǒ Běcǎ aya. Ma̤cǒma̤nò̤ lô̌khô Běcǎ lǎ̤hèklè̌ aya tôbô nî̌꤮.’” b 4Khûyṳ̂ha kûsô̌htò̌nṳ̌ jejû dǒ kòyò bǒ kû̌ tîsî̌budû̌ ashû̌, dě a è̌mě sèwò̤̌ sǎto̤phě. Dě a ǎpwǎ dèpǒ̤ kû̌ wè̌khû̌shi. c 5Kòyò ô̌ bǎ Wî̤̌yarǔshôle akû kû̌ Yǔda gǎ kû̌ lǒ̤꤮ bò kòyò dǒ a ô̌ te̤we̤bò dû̌wî̤ Jòda shilô̤̌mǒ̤ nutokhlǒ hè lô̌khô dǒ Khûyṳ̂ha a ô̌. 6Asî hè olò̤wǎ̤lò̤ lô̌khô ata̤sǔ tokhlǒ dě Khûyṳ̂ha ju bǎ asî shi dǒ Jòda shilô̤̌mǒ̤kû. 7Bǎbǎkǎlè bǎ Khûyṳ̂ha kè̌shǐ Pharishè̌phû̌ kû̌ Sadukè̌phû̌ tokhlǒ hèprṳ̂ hèphǎ dǒ a gǔ hèju anǎ̤ kû̌ shi akhanu, a hî̌ asî kû̌, “Wṳ̂̌sasî꤮! mò̌pè tôpwa̤ dǐsè̌rè̌ sî kû̌ sî gǔ hǎplǎbò̌ kû̌ Cǒmara a ta̤cî̌htò̌ dǒ a hèlò̤pě nuya? d 8Sî kè̌ yò̤lǎ̤plǎdî̌ mè̤̌mî̌ca sî nǎ̤ kè̌hî̌dě dǔlè̌lṳ̌ lô̌khô sî ta̤ô̌htûpwa̤ tokhlǒ kû̌ sî ta̤bè̌ sî sǎphlǒsǔshi sîtokhlǒ. 9Hî̌htôhî̌lò̤ tǎ̤ sînǎ̤ kû̌, ‘Pa mî̌ PhaAbraha akhlialè’ nutǎ̤mǎ̤. He hî̌ sî, Cǒmara ma̤htûhtò̌ jò lǒ̤ tokhlǒ kû̌ PhaAbraha aphû̌ mî̌ a ma̤jò pwǎ. e 10Kû tôbǎ ô̌ dǒ sǒ kòshî̌ dě kòyò gǔ gû̌gǎ lò̤khǔpo̤ sǒmṳ̌ tokhlǒ pě, dě kòyò gǔ cô̌tṳ̌yǎ tǒ̤dǒ akhò̌wǐ̤ pě. Sǒmṳ̌ tômṳ̌mṳ̌ dǒ asǎaphô wî̤ǎ tô̤̌nu, kòyò gû̌gǎ lò̤khǔpo̤ a pě dě kòyò wînṳ̌kè a dǒ mî̌kû pě. f 11“Dǒ sî yò̤lǎ̤plǎdî̌ sîsǎphlǒ akhû̌akhî, he ju sî kû̌ shi. Bǎbǎkǎlè kòyò dǒ a ta̤pô̤ta̤phǎ shû̌sho khlo kû̌ he tôpwa̤nu a hè pě. A ju sî kû̌ Yôla Plò̌shǐ Běcǎ kû̌ mî̌ pě. He jocû̌ bǎ pwǎ a khò̌phě pwǎnu, he gwǎkû̌ a tô̤̌. 12A pṳ̂̌mě dògo dǒ a cǔdekû, dě a tîwî̌tòwò nǎhto dǒ a khǎbò bǔshò̌ pě. A khǎbò hto pě dě a gǎplǒ bǔshò̌ dǒ phòkû pě. Dě bǔsû̌ tokhlǒnu a shû̌ukè kû̌ mî̌ dǒ a pǐ̤jò tôkhò̌꤮ tô̤̌ nutôphǎ akû pě.”Yeshǔ ju anǎ̤ kû̌ shi
(Makǔ 1:9-11; Lǔka 3:21-22)
13Htodě pô̤̌khô Yeshǔ ju anǎ̤ kû̌ shi dǒ Khûyṳ̂ha a cǔdekû ayanu, a ô̌ dǒ Galilè̤̌gǎ dě a hè dǒ Jòda shilô̤̌mǒ̤ a ô̌. 14Bǎbǎkǎlè Khûyṳ̂ha sǎyṳ ju bǎ lû̌û tô̤̌. Dě a hî̌ lû̌û kû̌, “He tô ju tèpè̤̌꤮ henǎ̤ dǒ na ô̌ hò̌꤮ dě na cû̌hè ju nanǎ̤ dǒ heô̌ hî̌tè?” 15Yeshǔ hî̌shěshu lû̌û kû̌, “Khònò̤̌ dě tûlû̌ ju bǎ mò̌ he, ma̤titè̌hî̌dě pa tôbǎ ma̤lǒbe lǒ̤꤮ bò Cǒmara a ta̤sǎyṳ noma̤ pa nutokhlǒ,” A hî̌ dě Khûyṳ̂ha sǎphlǒô̌ ju bǎ lû̌û. 16Bǎ Yeshǔ juhto anǎ̤ kû̌ shi dě a ihtǒ dǒ shikla kû̌ Cǒmara bǔmô mǒkhû̌ takha. Dě a kè̌shǐ Cǒmara a Yôla Plò̌shǐ hèlò̤ ô̌ dǒ alô̤ sô̌sô̌kû̌ htû̌lǐ̤nu. 17Htodě alě̤pwe̤htò̌ dǒ mǒkhû̌ tômû dě a hî̌ kû̌, “Hǒtôpwa̤ mî̌ hephû̌pwa̤khû dǒ he mô̤ǐyǎ dě a ma̤mô̤ he sǎphlǒ tôpwa̤.” g
Copyright information for
KxfSCKXF