Matthew 4

Hǎkhû̌tana tili̤tôlô̌ Běcǎ Yeshǔ

(Makǔ 1:12-13; Lǔka 4:1-13)

1Pô̤̌khô hǎkhû̌tana gǔ tili̤tôlô̌ Yeshǔ aya dě Yôla Plò̌shǐ Běcǎ sûcû̌ lû̌û dǒ lǒ̤mî̌shô̌kla. ^a 2Yeshǔ dǔǎshǎ ani̤lǐ̤shi asalǐ̤shi htodě a sǎwǐ̤ sǎǎsǎô. 3Bǎnuakha hǎkhû̌tana hè dǒ a ô̌ dě a hî̌ lû̌û kû̌, “Kè̌ na mî̌ Cǒmara aphû̌khû tôpwa̤ hî̌dě, hî̌lò̤ lǒ̤ nutokhlǒ dě nohtûhtò̌ a kû̌ mû̌nu.”

4Bǎbǎkǎlè Yeshǔ hî̌ lû̌û kû̌, “Lî̤plò̌shǐ hî̌pô̤̌o, ‘kòyòhǎkhû̌phû̌ htûpwa̤ kû̌ shǎǎshǎônu mè̤̌tô̤̌. Pô̤̌khô kòyòhǎkhû̌phû̌ gǔ htûpwa̤ ayanu, Cǒmara a ta̤hî̌bǎ lǒ̤꤮ bònu tokhlǒ mî̌ alṳ̂dû̌lǒ pwǎ.’” ^b

5Htodě hǎkhû̌tana kaǎcû̌ Yeshǔ dǒ Wî̤̌yarǔshôle wî̤̌plò̌shǐ dě a no ihtǒô̌ lû̌û dǒ ta̤lṳhtò̌hô a hǐgukhû̌ a htò̌yô̤̌lǒ tôtô̤̌. 6Dě a hî̌ lû̌û kû̌, “Kè̌ na mî̌ Cǒmara aphû̌khû tôpwa̤ kè̌hî̌dě, pě̤lò̤tě̤ mò̌! Ma̤titèhî̌dě, lî̤plò̌shǐkû hî̌ kû̌,

‘Cǒmara no kè̌pǒ̤ǐ tègè̌tôgôǐ na kû̌ a mǒkhû̌ tanaphû̌ tokhlǒ pě. Dě pô̤̌khô na khò̌lôpô̤̌ gǔ bǎsha kû̌ lǒ̤ tô̤̌nu, asî phô̌htò̌shěshu na pě.’” ^c

7Yeshǔ hî̌shěshu lû̌û kû̌, “Lî̤plò̌shǐkû hî̌pô̤̌ kû̌, ‘na bǎ tili̤tôlô̌ na Běcǎ Cǒmara tô̤̌.’” ^d

8Hǎkhû̌tana kaǎcû̌ sô̌ yǎ dǒ khôlôhtò̌yô̤̌lǒ tômè alô̤ dě a dǔlè̌lṳ̌bò lû̌û kû̌ shigǎ pṳ̂̌tôgǎ dǒ hǎkhû̌nu kû̌ a ta̤bwǐdû̌sîrîhtû, a wî̤tè̤̌sî̌ kû̌ ta̤dû̌yò̤̌htò̌sa tokhlǒ. 9Hǎkhû̌tana hî̌ Yeshǔ kû̌, “Kè̌ na dô̌gînî̤ cabahtò̌ he kè̌hî̌dě, lǒ̤꤮ bò hǒtokhlǒ nî̌ he ǐbò kû̌ na pě.”

10Htodě Yeshǔ hî̌ lû̌û kû̌, “Hǎkhû̌tana! Cû̌ tephe yî̤kè. Lî̤plò̌shǐkû hî̌ kû̌, ‘cabahtò̌ pwǎtǒ̤ na Běcǎ Cǒmara dě ma̤pwǎtǒ̤ ata̤ma̤ pwǎ nî̌,’” ^e A hî̌ pô̤̌nu.

11Hǎkhû̌tana hǎhtò̌cû̌kè hto lû̌lǎ̤ dě, mǒkhû̌ tanaphû̌ tokhlǒ hè kè̌ǐ ma̤ǐ yǎ.

Yeshǔ sahtò̌ ma̤ a ta̤ma̤ dǒ Galilè̤̌gǎ

(Makǔ 1:14-15; Lǔka 4:14-15)

12Bǎ Yeshǔ ganǎ̤de kû̌ kòyò pṳ̂̌ dǒlò̤tě̤ Khûyṳ̂ha dǒ apô̤kû ▼

▼apô̤ mî̌ tokhlǒkhlǒ dě a hî̌ kû̌ hto.

akhanu, a getîkhîsô̌ dǒ Galilè̤̌gǎ. ^g 13A hǎhtò̌cû̌kè kû̌ Wî̤̌na̤sôrè̤̌ dě dǒnô̌kònu a cû̌ ô̌dǒ Wî̤̌kaperanò̤ dǒ a ô̌phǔ kû̌ Galilè̤̌ shikoǒdû̌ akòshî̌nu tîwî̤̌. Gûlǎ̤ bǎnu tûkû mî̌ a ô̌phǔ kû̌ Sabǔlûgǎ kû̌ Nataligǎ. ^h 14Hǒomî̌ a ma̤lǒbekè piwi̤pèshè Khûyashǎya a ta̤hî̌nǎ kû̌,

15“Ǒ Galilè̤̌ gǎmǒ̤ dǒ Yǔdaphû̌ mè̤̌tô̤̌ tokhlǒ ô̌ ǐ yǎ, Sabǔlûgǎ kû̌ Nataligǎ, dǒ a ô̌ dǒ shikoǒdû̌htu tokhlǒ, kû̌ Jòda shilô̤̌mǒ̤ lô̤̌bò̌ tokhlǒ, lǒ̤꤮ bò sî, ⁱ 16Kòyò dǒ a ô̌ dǒ ta̤sǔ a ta̤khǐsiwi̤ alǎ̤ sî, sî kè̌shǐ ta̤lîta̤kakha dû̌ hǒ. Kòyò ô̌ dǒ ta̤sita̤hǎmǎ̤ alǎ̤ sî, ta̤lî shělò̤kakha lò̤bǎ sî hǒ.” ^j

17Hènè bǎnudě Yeshǔ sahtò̌ shôbǐǐlṳ̌ bǎ kòyò kû̌, “Yò̤lǎ̤plǎdî̌ lô̌khô sîsǎphlǒ, ma̤titè̌hî̌dě mǒkhû̌ ashiagǎ phǔhtò̌hǒ.” ^k

Yeshǔ rû̌htò̌wǐ akhôphijǎ dǒ pwa̤ma̤ǎ tò̤̌phû̌ sò̌lǐ̤

(Makǔ 1:16-20; Lǔka 5:1-11)

18Bǎ Yeshǔ cû̌ dǒ Galilè̤̌ shikoǒhtu akhanu, a kè̌shǐ pṳ̌wè̤̌ sò̌ginǐ̤. Tôpwa̤ dě ami̤ kû̌ Khûshǐmû kû̌mî̌ kòyò kaǎ lû̌û kû̌ Khûpetarǔ, kû̌ apṳ̌ Khûîdru. Bǎnuakha asî shěǎtò̤̌phû̌ kû̌ tǐ̤ ▼

▼kòyò tokhlǒkhlǒ a sî̌ganǎ̤ pwǎ “ji”

dǒ shikoǒdû̌kû, ma̤titè̌hî̌dě a pṳ̂̌ǎpwǎ lô̌khô ahǔphushǎ kû̌ tò̤̌phû̌ pwǎ. 19Dě Běcǎ hî̌ asî kû̌, “Cû̌ gû̌ kû̌ hekò. He gǔ sû̌ǐtòwòǐ sî pô̤̌khô sî kaǎnṳ̌ kòyò pô̤̌ sî pṳ̂̌ǎnṳ̌ tò̤̌phû̌nu.” 20Tôplǎnô̤̌ asî bè̌kè a tǐ̤ ▼

▼gǎtôhtô kaǎ kû̌ ji

dě a gû̌ cû̌kû̌ lû̌kò.

21Běcǎ cû̌sělě pô̤̌ dǒ alô̤mô̤̌ tîkî̌phû̌ dě a kè̌shǐ Phasebedè̌ aphû̌khû Khûya̤kû kû̌ apṳ̌ Khûyṳ̂ha. Asî hǎnòò̌ kû̌ apha dǒ sǒkhlikû dě shò̌bǐ ma̤wô̌ ǐ tûû̌ a tǐ̤ tokhlǒ. Dě Běcǎ kaǎcû̌ asî. 22Tôplǎnô̤̌ asî bè̌kè asǒkhli kû̌ apha dě a gû̌cû̌ kû̌ Yeshǔ kò.

Yeshǔ ma̤hǎmǎ ta̤shǐta̤sha

(Lǔka 6:17-19)

23Yeshǔ cû̌lè te̤we̤bò Galilè̤̌gǎ tôgǎlǎ̤ dě a cû̌ sû̌ǐtòwòǐ kòyò dǒ ta̤cabahǐkû pṳ̂̌꤮ tûkû. A shôbǐǐlṳ̌ bǎ kòyò kû̌ Cǒmara ashiagǎ ta̤sǎlě̤we̤kè. Dě a ma̤hǎmǎ bǎbò kòyò ta̤shǐta̤sha pṳ̂̌꤮ mishicǒ. ⁿ 24Běcǎ ami̤lṳ̌hǔsǎ cû̌bò Shurǐgǎ tôgǎ꤮ lǎ̤ akhû̌akhî, kòyò kaǎ hè kò dǒ a bǎ ta̤shǐta̤sha pṳ̂̌꤮ tocǒ dǒ aô̌. Dě kòyò kaǎ hè kò dǒ a shajî̌shajû̌ lû̌nǎ̤ sî, khînǎkhîno ma̤bǎ lû̌û sî, a kîjî̌htò̌cî̌ sî tokhlǒ, kû̌ a sitôkhô sî dǒ a ô̌ dě a ma̤hǎmǎ bòbǎ kòyò ta̤sha pṳ̂̌꤮ tôpwa̤. 25Kòyò ô̌dǒ Galilè̤̌gǎ, kû̌ wî̤̌ awî̤̌ shǐ ô̌plǒ cu lû̌û dǒ kòyò kaǎ kû̌ Dekapòlǐ, kû̌ Wî̤̌yarǔshôle, kû̌ Yǔdagǎ, kû̌ kòyò ô̌dǒ Jòda shilô̤̌mǒ̤ lô̤̌bò̌ tokhlǒ gû̌prṳ̂ gû̌phǎ kû̌ bò akò.