Matthew 7

Ta̤hî̌bǎphô̌phô̌ kòyò, ta̤gènè̤sǔ gènè̤phô̌phô̌ kòyò

(Lǔka 6:37-38, 6:41-42)

1“Hî̌bǎphô̌phô̌ kòyò, gènè̤sǔ gènè̤plě tǎ̤ kòyò tǎ̤mǎ̤ nî̌꤮. Cǒmara gǔ ma̤ shěshu gesô̌ sî ta̤alǐ̤ pô̤̌nu pě. 2Ma̤titèhî̌dě Cǒmara gǔ ma̤ geshěshu na pô̤̌ na hî̌bǎphô̌phô̌ kòyò, na gènè̤sǔ gènè̤phô̌phô̌ kò nupě. Na ma̤ kòyò, na hî̌ kòyò pwǐ tènu, Cǒmara gǔ ma̤ getîkhî shěshutè̌ na pwǐ꤮ nupě. ^a

3“Ta̤wè̤̌ amǔaphî ô̌pwǎ dǒ sî pṳ̌wè̤̌ pwa̤yṳ̌ǎta̤phû̌ tôpwa̤ a mǐ̤sǎphlǒkû pwǎ dě sî kè̌shǐ, bǎbǎkǎlè sǒglǒ tôglǒ ô̌ dǒ sî mǐ̤sǎphlǒkû dě, sî kè̌shǐ gû̌ kò tô̤̌ ma̤titè? 4Bǎ sǒglǒ ô̌ dǒ sî mǐ̤sǎphlǒkû akhanu, sî cû̌hî̌tǒ̤ sî pṳ̌wè̤ kû̌, ‘pṳ̌wè̤̌ he tèkhwè̌ htò̌kèmò̌ bǎ na ta̤wè̤̌ amǔaphî ô̌ dǒ na mi̤sǎphlǒkûnu,’ mî̌, a nǐ̤jò ya? 5Pwa̤jî̌cǒjî̌tè̤ anǎ̤ sî phî̌htò̌wǐkè sǒglǒ ô̌ dǒ sî mǐ̤sǎphlǒkû nu, htodě sî kè̌shǐlṳ̌wô̌bǎ pě dě sî tèkhwè̌ htò̌ jò kè bǎnô̌ ta̤wè̤̌ amǔaphî ô̌ dǒ sî pṳ̌wè̤̌ a mǐ̤sǎphlǒkû nupě.

6“Ta̤plò̌shǐnu ǐ tǎ̤ kû̌ shǐ tokhlǒ tǎ̤mǎ̤, wîlò̤ bǎ tǎ̤ lǒ̤pô̤lòsè̌ tokhlǒ dǒ htô̌ tokhlǒ alô̤mô̤̌nu tǎ̤mǎ̤, sî kè̌ wîlò̤ bǎ a numî̌ a gǔ yî̤̌cǒprǒ bòkè pě, htopědě a gǔ ě getîkhî sô̌ sî pě.”

Kwi lô̌khô, kè̌lǎ lô̌khô, tôglô̌ lô̌khô

(Matè̌ 11:9-13)

7“Kwi mò̌ lô̌khô, sî nǐ̤bǎ pě! Kè̌lǎ mò̌ lô̌khô, sî kè̌shǐ pě. Tôglô̌mò̌ lô̌khô takha, Cǒmara gǔ bǔmô bǎ sî pě. 8Ma̤titè̌hî̌dě kòyò lǒ̤꤮ bò dǒ a kwita̤ tokhlǒnu, a nǐ̤bǎ pě, dě kòyò lǒ̤꤮ bò dǒ a kè̌lǎ ta̤ tokhlǒnu, a kè̌shǐ pě, dě kòyò lǒ̤꤮ bò dǒ a tôglô̌ takha tokhlǒnu, Cǒmara bǔmô bǎ lû̌û pě.

9“Dǒ sîklanu sîphû̌ kè̌ kwiǎ sî mû̌ hî̌dě sî dǐǎ asî kû̌ lǒ̤ numî̌ a ô̌ cǎ tôpwa̤pwa̤ ya? 10Mè̤̌tô̤̌mî̌ sîphû̌ kè̌ kwiǎ sî tò̤̌phû̌ hî̌dě sî dǐǎ asî kû̌ wṳ̂̌ numî̌ a ô̌ cǎ tôpwa̤pwa̤ ya? 11Sî mî̌ kòyò dǒ a phû̌mò̤̌ tokhlǒ pwǎ bǎbǎkǎlè sî sî̌ganǎ̤ dǐǎ sîphû̌sîli̤ tokhlǒ kû̌ ta̤dǒ awô̌ tokhlǒ kè̌hî̌dě, gènè̤kè̌mò̌ lô̌khô sîpha dǒ mǒkhû̌ tôpwa̤nu, a gǔ ǐ mè̤̌mî̌ca ta̤wô̌ tokhlǒ kû̌ kòyò dǒ a kwihtò̌ lû̌û nutokhlǒ pě. 12Ma̤bǎ kòyò sô̌sô̌kû̌ sî sǎyṳ noma̤ kòyò kû̌ sînǎ̤ nu nî̌꤮. Ma̤titè̌hî̌dě lǒ̤꤮ bò Khûmṳ̂shě a ta̤sû̌ta̤tòwò kû̌ piwi̤pèshè tokhlǒ a ta̤mǎlò̤ tokhlǒnu, a sǎyṳ hî̌ yô̤̌mûyô̤̌sǎ numî̌ hǒo hǒ.” ^b

Klè̌ginǐ̤bô

(Lǔka 13:24)

13“Cû̌nṳ̌ lô̌khô dǒ takha î̌nî̌ nutûkû, ma̤titè̌hî̌dě we̤takhalè̤̌ tûkûnu kû̌ klè̌lè̤̌ tôbônu a sûcû̌ kòyò dǒ ta̤si tûjû̌pwa̤ agûlǎ̤ dě kòyò cû̌nṳ̌ dû̌wî̤ yǎ. 14Bǎbǎkǎlè we̤takha î̌nî̌ tûkû kû̌ klè̌ î̌nî̌ tôbônu a sûcû̌ kòyò dǒ ta̤htûpwa̤ tûjû̌pwa̤nu kòyò kè̌shǐ pî̌tî̌ lû̌û.

Sǒsǎ kû̌ amṳ̌bô

(Lǔka 6:43-45)

15“Sè̌rè̌ lô̌khô sînǎ̤ kû̌ pwa̤jî̌lòhô anǎ̤ pô̤̌ piwi̤pèshè nutokhlǒ nî̌꤮. A jî̌hè lòhô anǎ̤ pô̤̌ sû̌phû̌ dǒ a sǎphlǒ sǎdôhôbî̌nu bǎbǎkǎlè asî sǎphlǒkû numî̌ a phû̌mò̤̌ sô̌sô̌kû̌ shǐmi̤nu. 16Dǒ asî ma̤ ta̤phû̌mò̤̌ akhû̌akhî, sî sî̌ganǎ̤ jò kû̌ asî mî̌ pwa̤jî̌ lòhôhè anǎ̤ tokhlǒ pwǎ. Kòyò dǒ a cû̌ kè̌lǎ běǎ sîpî̌sǎ dǒ ta̤shî̌shô̌mṳ̌ lô̤, tô̤̌mî̌ a cû̌kè̌lǎ běǎ dǐshisǎ dǒ ta̤shî̌shô̌mṳ̌ lô̤ numî̌ a ô̌ cǎ ya? 17Pô̤̌nudě, sǒ dǒ awî̤nu, a gǔ sǎhtò̌ dǒ awô̌. Bǎbǎkǎlè sǒmṳ̌ dǒ awô̌tô̤̌nu, a gǔ sǎhtò̌pwǎ sǒsǎ dǒ awî̤tô̤̌ pwǎ. 18Sǒmṳ̌ dǒ awô̌nu, asǎhtò̌ jò sǒsǎ dǒ a phû̌mò̤̌ tô̤̌. Htodě sǒmṳ̌ dǒ a phû̌mò̤̌nu, a sǎhtò̌ jò sǒsǎ dǒ awî̤nu tô̤̌. 19Lǒ̤bò sǒmṳ̌ dǒ a sǎhtò̌ awô̌tô̤̌ tokhlǒnu, kòyò gǔ pè̤̌tṳ̌kè lû̌û pě dě kòyò gǔ wînṳ̌ bòkè yǎ dǒ mî̌kû pě. ^c 20Ma̤pô̤̌nudě sî gǔ sî̌ganǎ̤ jò pwa̤jî̌lòhô anǎ̤ tokhlǒnu kû̌ a sǎhtò̌ phôhtò̌ nutokhlǒ pwǎ.” ^d

He sî̌ganǎ̤ bǎnô̌ sî tôkhò̌꤮ tô̤̌

(Lǔka 13:26-27)

21“Lǒ̤꤮ bò kòyò dǒ a kaǎ he kû̌, ‘Běcǎ꤮ Becǎ’ nu, a nṳ̌ bò̌ nô̌ dǒ mǒkhû̌ shilǎ̤gǎkû pṳ̂̌tôpwa̤ tô̤̌. A nṳ̌nǐ̤ pwǎtǒ̤ kòyò dǒ a ma̤tôma̤bǎ hepha asǎphlǒ dǒ mǒkhû̌ nutôpwa̤ tokhlǒ nô̤̌pwǎ. 22Htû̌ ta̤cî̌htò̌ alṳmṳ̌ni̤ pě tôni̤nu, kòyò gǔ hè hî̌lṳ̌htò̌ dû̌wî̤bǎ lô̌khô pě dě a gǔ hî̌ lô̌khô kû̌, ‘Běcǎ꤮ Běcǎ pa shôbǐǐlṳ̌ bǎ kòyò pô̤̌ Yôla Plò̌shǐ Běcǎ shôbǐǐ bǎ panu kû̌ nami̤, htodě pa wṳ̂̌hǎhtò̌kè khînǎkhîno tokhlǒ kû̌ nami̤, htodě pa dǔlè̌lṳ̌ ta̤cô̌klǐcô̌sè tokhlǒ kû̌ nami̤nu a ô̌dû̌wî̤, mè̤̌tô̤̌ya.’ 23Bǎnu akhapě he gǔ hî̌lîshěshu asî kû̌, ‘he sî̌ganǎ̤bǎnô̌ sî tôkhò̌꤮ tô̤̌. Kòyò dǒ a ma̤ ta̤phû̌mò̤̌shǐhtô sî꤮ hǎhtò̌cû̌ tephe yî̤kè kû̌ he.’” ^e

Pwa̤ ma̤htò̌hǐ sò̌ginǐ̤

(Lǔka 6:47-49)

24“Pô̤̌nudě kòyò tôpwa̤pwa̤ dǒ a ganǎ̤de helě̤heyô̤̌ dě a ganǎ̤de gû̌ma̤ pô̤̌ he hî̌ numî̌, a sô̌sô̌kû̌ kòyò sî̌jò̌ tôpwa̤ bô̌htò̌ ahǐ dǒ lǒ̤khû̌ nuhǒ. 25Gǎjudû̌hè shidû̌htò̌, gili̤sǎ dû̌ hèbǎ hǐnu bǎbǎkǎlè a lòkhǔpo̤tô̤̌, ma̤titè̌hî̌dě kòyò ma̤htò̌ a dǒ lǒ̤khû̌. 26Bǎbǎkǎlè kòyò tôpwa̤pwa̤ dǒ a ganǎ̤de helě̤heyô̤̌ dě a kè̌ ganǎ̤de gû̌ma̤ pô̤̌ he hî̌nu tô̤̌ numî̌, asô̌sô̌kû̌ kòyò gènè̤phlôphǎ gû̌ kòyò tô̤̌ tôpwa̤ bô̌htò̌ ahǐ dǒ hǎsè̌khû̌ nuhǒ. 27Gǎjudû̌hè shidû̌htò̌, gili̤sǎ plǎ̤ hèbǎ hǐ hǒonu dě a lò̤tě̤pro̤ bòmǔtegle pwǎ.”

Yeshǔ ta̤pô̤ta̤pwǎ̤

28Bǎ Běcǎ Yeshǔ hî̌hto ta̤nu tokhlǒ akhanu, kòyò saprṳ̂ dǒ a ganǎ̤de lû̌û ta̤sû̌ǐtòwòǐ tokhlǒnu, a ǒò̌ kiti̤kaa lǒ̤bò. ^f 29Ma̤titè̌hî̌dě, a sû̌ǐtòwò sô̌sô̌kû̌ pwa̤sû̌ǐ ta̤sû̌ta̤tòwò asara nutokhlǒ sû̌ǐ nutô̤̌. A sû̌ǐ asô̌sô̌kû̌ kòyò dǒ a ô̌ kû̌ a siwi̤sòwò̤ sû̌ǐnu.