Mat 8 | KxfSCKXF | STEP | Bǎ a ô̌ dǒ khôlôkhû̌ dě a hǎtě̤lò̤ akhanu, kòyò tokhlǒ gû̌prṳ̂gû̌phǎ bò dû̌wî̤ kû̌ lû̌û kò.

Matthew 8

Yeshǔ ma̤hǎmǎ kòyò ta̤shakrôǎ dǒ bělô̤ tôpwa̤,

(Makǔ 1:40-45; Lǔka 5:12-16)

1 Bǎ a ô̌ dǒ khôlôkhû̌ dě a hǎtě̤lò̤ akhanu, kòyò tokhlǒ gû̌prṳ̂gû̌phǎ bò dû̌wî̤ kû̌ lû̌û kò. 2 Kòyò ta̤shakrôǎ dǒ bělô̤ tôpwa̤ hè dô̌gînî̤lò̤ dǒ alô̤mô̤̌ dě a hî̌ lû̌û kû̌, “Běcǎ, na kè̌ sǎphlǒô̌ ma̤hǎmǎbǎ ^{▼▼lî̤plò̌shǐ hî̌ kû̌ ma̤hǎmǎ mî̌ ma̤mṳ̂̌plî. Yô̤̌sǎyô̤̌mû mî̌ kòyò dǒ a ta̤sha ô̌ pô̤̌nu tokhlǒnu, kòyò bǎ nocû̌ ô̌tephe yǎ. Bǎ asî ta̤sha mṳ̂̌plî (hǎmǎ) kèhto akhanu, a cû̌cukhacu kû̌ kòyò mî̌ anǐ̤ hǒ, a cubucabahtò̌ Cǒmara mî̌ anǐ̤ hǒ.} he ta̤sha numî̌ na ma̤bǎjò pwǎ.”

3 Běcǎ Yeshǔ ayṳ̂̌hè acǔde dě a tô̌bǎhto lû̌û dě a hî̌ lû̌û kû̌, “He sǎphlǒô̌ pwǎ,” A hî̌ htodě “Ta̤sha hǎmǎkèmò̌,” A hî̌ pô̤̌ pô̤̌nu, dě taplǎnô̤̌ ta̤sha hǎmǎkè. 4 Dě Běcǎ Yeshǔ hî̌ lû̌û kû̌, “Shôbǐǐlṳ̌ bǎ tǎ̤ kòyò tôpwǎ̤ tǎ̤mǎ̤ nî̌꤮, bǎbǎkǎlè cû̌ dǔlè̌lṳ̌ nanǎ̤nu dǒ pwa̤shû̌gǎ nutôpwa̤ a ô̌nu nî̌꤮. Htodě pô̤̌khô a gǔ htûhtò̌ ta̤khòlṳ̌ dǒ kòyò pṳ̂̌꤮ tôpwa̤ a lô̤mô̤̌ kû̌ na ta̤sha hǎmǎhǒ dě a ma̤mṳ̂̌plî ayanu, lṳhtò̌pû ta̤lṳta̤tòhtò̌ pô̤̌ Khûmṳ̂shě ta̤mǎlò̤ ô̌nu nî̌꤮.” ^b

Běcǎ Yeshǔ ma̤hǎmǎ Rṳ̂̌me̤ a kli ikǒdû̌ pwa̤ma̤ta̤phû̌ tôpwa̤ ta̤sha

(Lǔka 7:1,10; Yṳ̂ha 4:43,54)

5 Bǎ Běcǎ Yeshǔ hènṳ̌ dǒ Wî̤̌kaperanò̤ akû akhanu, Rṳ̂̌me̤ kli tôya̤ ikǒdû̌ tôpwa̤ hèkwi lû̌û ta̤ma̤jè̌. 6 Dě a hî̌ lû̌û kû̌, “Běcǎ he pwa̤ma̤ta̤phû̌ tôpwa̤ asha sitôkô̌ke dě a hǎmôô̌ pwǎ dǒ lǎ̤dakhû̌ pô̤̌nu. Ajî̌jû̌ jî̌ lû̌û hǒ.”

7 Běcǎ Yeshǔ hî̌shěshu lû̌û kû̌, “He cû̌ ma̤hǎmǎ tûû̌ pě.”

8 Klitôya̤ a ikǒdû̌ nutôpwa̤ hî̌shěshu kû̌, “Běcǎ, na hènṳ̌pwǎ dǒ hehǐkû pwǎnu he gwǎ kû̌ na tô̤̌. Hî̌lò̤pwǎ nayô̤̌ tômûpwǎ numî̌ he pwa̤ma̤ta̤phû̌ ô̌mô̤gesô̌ tûû̌ hǒ. 9 Ma̤titè̌hî̌dě he hî̌ pô̤̌o numî̌ he nǎ̤běcǎ nî̌ he bǎ ganǎ̤de kòyò dǒ adû̌khlo kû̌ he tokhlǒ ayô̤̌. Pô̤̌nudě kliphû̌ dǒ a ô̌ dǒ helǎ̤ tokhlǒnu a bǎ ganǎ̤de heyô̤̌ pô̤̌nu. Kè̌ he hî̌ kliphû̌ tôpwa̤pwa̤ kû̌, ‘cû̌mò̌,’ numî̌ a bǎcû̌ pwǎ, kè̌ he hî̌ dǒ ashǔshawa̤ kû̌, ‘hèmò̌,’ numî̌ a bǎ hè pwǎ. Htokhôtô̤̌ he kè̌ hî̌ hejû̌ kû̌, ‘ma̤mò̌,’ numî̌ a bǎ ma̤ pwǎ.”

10 Bǎ Běcǎ Yeshǔ ganǎ̤de ta̤hî̌bǎnu akha, a ǒò̌ kiti̤kaa jî̌ dě a hî̌ kòyò dǒ a gû̌ lû̌kò tokhlǒ kû̌, “He hî̌cǒcǒ sî, ta̤yṳ̌ta̤nǎ̤ shopô̤̌nu dǒ Isôrělaphû̌ aklanu he kè̌shǐnô̌ khôtô̤̌. 11 He hî̌ sî, kòyò ô̌ dǒ lṳmṳ̌htò̌ tôkhô lṳmṳ̌nṳ̌ tôkhô tokhlǒ gǔ hè dû̌ pě. Asî gǔ hè hǎnòò̌ ǎplǒ kû̌ paphu Abraha, PhuIsè̌, Phuya̤kò dǒ mǒkhû̌ a shilǎ̤gǎkû pě. ^c 12 Yǔdaphû̌ tokhlǒnu, a tô htû Cǒmara a kòyò dǒ Cǒmara shilǎ̤gǎkûnu bǎbǎkǎlè Cǒmara gǔ wînṳ̌kè asî dǒ ta̤khǐsiwi̤ agûlǎ̤ pě. Ta̤lǎ̤ bǎ asî gǔ cû̌ ô̌ tôkû pěnu, asî gǔ cû̌ hǎsihǎô̌ dě asî gǔ ěsekwe bò akhû̌khi pě.” ^d

13 Htodě a hî̌ kli ikǒdû̌ kû̌, “Gemò̌, a gǔ htûhtò̌ pô̤̌ na yṳ̌nu pě.” Dě pwa̤ma̤ta̤phû̌ nutôpwa̤ ô̌mô̤ge tôtǐ bǎ Běcǎ hî̌ lû̌û ashěkhǎnu.

Běcǎ Yeshǔ ma̤hǎmǎ dû̌wî̤ bǎ kòyò ta̤sha

(Makǔ 1:29-34; Lǔka 4:38-41)

14 Bǎ Běcǎ Yeshǔ cû̌nṳ̌ dǒ Khûpetarǔ ahǐkû akhanu, a kè̌shǐ kû̌ Khûpetarǔ a mipwǎ̤pwa̤mǒ̤ shǐshanǎ̤gû̌ dě hǎmôô̌ pwǎ dǒ lǎ̤mi̤kû pwǎ. 15 A pṳ̂̌mě lû̌û cǔde dě a ta̤sha hǎmǎkè. Htodě a ihtǒ ma̤ǎma̤ô bǎ Yeshǔ.

16 Bǎ lṳmṳ̌hǎlò̤ akhanu, kòyò hèsû dû̌wî̤ kòyò dǒ khînǎkhîno dò̌ yǎ nutokhlǒ dǒ Yeshǔ a ô̌. A hî̌bǎhtò̌ pwǎ ayô̤̌ tômû pwǎ dě khînǎkhîno hǎhtò̌cû̌kè lǒ̤bò. Htodě a ma̤hǎmǎ bǎ lǒ̤bò kòshǐkòsha nutokhlǒ. 17 Ta̤ hǒtokhlǒnu a ma̤lǒhtò̌behtò̌ piwi̤pèshè Khûyashǎya a ta̤hî̌nǎ kû̌,

“A phî̌cû̌kè pa ta̤shǐta̤sha tokhlǒ.” ^e

Kòyò dǒ a gû̌ Běcǎ Yeshǔ akò tokhlǒ akhû̌akǎ

(Lǔka 9:57-62)

18 Bǎ Běcǎ Yeshǔ kè̌shǐ kû̌ kòyò saprṳ̂ hè ô̌te̤we̤ bò yǎ akhanu, a hî̌bǎhtò̌ ayô̤̌ dǒ akhôphijǎ tokhlǒ a ô̌ kû̌ pa cû̌ dǒ shikoǒdû̌ abò̌khô tǎ꤮, a hî̌ pô̤̌nu. 19 Bǎnuakha, pwa̤sû̌ǐ ta̤sû̌ta̤tòwò asara tôpwa̤ hè dǒ lû̌û ô̌ dě a hî̌ lû̌û kû̌, “Sara, na cû̌ bǎtè꤮ tôkû bǎbǎ, he gǔ cû̌kû̌ na.”

20 Běcǎ Yeshǔ hî̌ lû̌û kû̌, “Htwǐmi̤ tokhlǒ ô̌ kû̌ akû, htû̌patǐsî ô̌ kû̌ api̤, bǎbǎkǎlè Kòyòphû̌khû nî̌ bǎ a ikǒ lǎ̤bè̌lò̤ pwǎnu a ô̌tô̤̌.”

21 A khôphijǎ dǒ ashǔshawa̤ hî̌ lû̌û kû̌, “Běcǎ, ǐ mò̌ he ta̤shěkhǎ dǒ he gǔ ge lǔǐwǐ mò̌ hepha nî̌꤮.”

22 Bǎbǎkǎlè Běcǎ Yeshǔ hî̌shěshu lû̌û kû̌, “Gû̌kû̌ hekò khònò̤̌, kòyò dǒ a ganǎ̤de Cǒmara ayô̤̌ tô̤̌ tokhlǒ numî̌ asô̌sô̌kû̌ kòyòsi nuhǒ. Nolǔ tûû̌ kòyòsinu kû̌ asînu.”

A noô̌kǔ gili̤sǎ

(Makǔ 4:35-41; Lǔka 8:22-25)

23 Bǎnuakha Běcǎ Yeshǔ nṳ̌ dǒ sǒkhlikû dě akhôphijǎ tokhlǒ gû̌nṳ̌ kû̌ lû̌û dě asî hǎhtò̌cû̌kè. 24 Bǎ asî cû̌tǒ̤ dǒ shi klǎmakû akhanu, gili̤sǎ hè sumṳ̌htò̌. Shipěpǒ dû̌ dě a pěpǒnṳ̌ bò dǒ sǒkhlikû. Bǎnuakha Běcǎ Yeshǔ hǎmôô̌ shôpě̤. 25 Dě akhôphijǎ tokhlǒ cû̌ htû̌wṳ̂̌ ihtǒ lû̌û dě a hî̌ lû̌û kû̌, “Běcǎ, ma̤jè̌mò̌ pa, pa glè̌ lò̤cǔ si bòkèhǒ.”

26 Dě Běcǎ Yeshǔ hî̌ asî kû̌, “Kòyò ta̤yṳ̌pî̌tî̌ sî, sî cû̌ ǐsha kètè̤̌ numî̌ ama̤titè?” A hî̌hto dě a ihtǒ sǎhtǎ gili̤sǎnu kû̌ shipěpǒ nutokhlǒ . Dě gili̤sǎ ô̌kǔ sumṳ̌htò̌ hènèkè.

27 A khôphijǎ tokhlǒ ǒò̌ kiti̤kaa lǒ̤bò dě a hî̌ lô̌khô lû̌û kû̌, “A mî̌ kòyò hî̌tè tôpwa̤ ya? A siwi̤sòwòdû̌ pwǐnu. Gili̤sǎ kû̌ shipěpǒ ganǎ̤dejò̌ lû̌û yô̤̌yô̤̌.”

Běcǎ wṳ̂̌hǎhtò̌kè khînǎkhîno dǒ kòyòpha sò̌ginǐ̤ akû

(Makǔ 5:1-20; Lǔka 8:26-39)

28 Bǎ Yeshǔ cû̌tǒ̤ dǒ shikoǒdû̌ lô̤̌bò̌, Garasagǎ akhanu, kòyòpha dǒ khînǎkhîno ma̤bǎ lû̌û sò̌gini̤ a ô̌ dǒ lṳ̌kû hǎhtò̌ dě a hǎhtò̌cû̌ kè̌shǐ shěshu kû̌ lû̌û. Kòyòpha hǒo sò̌ginǐ̤nu, khînǎ ma̤bǎ lû̌û akhû̌akhî, ashû̌asho, a ma̤ǐsha jî̌jî̌ dě klè̌ bǎ lṳ̌htu nutôbônu kòyò cû̌phǔbǔ tôpwǎ̤꤮ tô̤̌. 29 Asî kaǎgǔ kû̌, “Cǒmara aphû̌khû, na sǎyṳ ma̤ pa hî̌tè? Cǒmara cî̌htò̌ kòyò alṳmṳ̌ni̤ shěkhǎ tǒ̤khôtô̤̌ akhanu, na glè̌ hèma̤ kwè̌꤮ pa mî̌titè?”

30 Bǎ ayî̤ kû̌ asî tô̤̌nu, htô̌ saprṳ̂dû̌ ô̌ tôprṳ̂ dě a ǎ lô̌khô ashǎ bǎnu. 31 Khînǎ ma̤bǎ kòyòpha sò̌ginǐ̤nu, a kwisǎyṳ Běcǎ Yeshǔ kû̌, “Kè̌ na wṳ̂̌hǎhtò̌cû̌kè pa hî̌dě, nocû̌nṳ̌ô̌ pa dǒ htô̌ nutokhlǒ akûnu nî̌꤮.”

32 Běcǎ hî̌shěshu asî kû̌, “Cû̌nṳ̌ô̌mò̌ lô̌khô!” Dě asî hǎhtò̌cû̌ nṳ̌bò lô̌khô dǒ htô̌ nutôprṳ̂ akû, dě htô̌ tokhlǒ atukhlè̌ saprṳ̂bò dǒ kòpò̤̌lô̤ dě lò̤cǔ si nṳ̌bòkè dǒ shikoodû̌kû. 33 Pwa̤kè̌pǒ̤ htô̌ nutokhlǒ khlè̌ge dǒ wî̤̌kû dě a khlè̌ge shôbǐǐlṳ̌ bǎ kòyò kû̌ lǒ̤꤮ bò ta̤htûhtò̌ anǎ̤ tokhlǒ kû̌ ta̤ma̤anǎ̤ kû̌ kòyòpha sò̌ginǐ̤ bò̌꤮ bò. 34 Kòyò tôwî̤̌lǎ̤ hèhǎhtò̌kè̌ bò Yeshǔ. Htodě bǎ asî kè̌shǐ Běcǎ Yeshǔ akha, a kwisǎyṳ lû̌û kû̌ a gǔ hǎhtò̌cû̌ tephekè kû̌ asî gǎkû bǎnu.