Philippians 2

1Sî ta̤ô̌htûpwa̤ dǒ Khrǐ akû numî̌, a nǐ̤khû̌nǐ̤ǎ sî ya? Ata̤mô̤ numî̌ a ma̤mô̤ sî sǎphlǒ ya? Sî bǒsû̌khǎkhô lô̌khô kû̌ Yôla Plò̌shǐ Běcǎ ya? Khrǐ tôpwa̤ numî̌ a ma̤wô̌ ǐ sî, a sǎyṳgwèbǎǐ ǐ sî ya? 2Htodě, ô̌ lô̌khô kû̌ ta̤gènè̤ tôcǒ꤮ nô̤̌, ta̤mô̤ǐ lû̌û tôcǒ꤮ nô̤̌, sǎphlǒ tômè kû̌ ta̤gènè̤nǎ tôcǒ꤮ nô̤̌ nî̌꤮. Sî kè̌ ma̤pô̤̌ numî̌ sî ma̤lǒma̤be bǎ he ta̤sǎlě̤sǎlò̤ hǒ. 3Bǎ sî ma̤ta̤ akhanu, kè̌dû̌ tûû̌ tǒ̤ sî tôpwa̤ ayanô̤̌ tǎ̤mǎ̤ nî̌, bè̌dû̌bè̌htò̌lǒ tǎ̤ sînǎ̤ tǎ̤mǎ̤, bǎbǎ shò̌lò̤ lô̌khô sî sǎphlǒ dǒ tôpwa̤ kû̌ tôpwa̤ alǎ̤ nî̌꤮, dě gènè̤dû̌ khlo kòyò kû̌ sînǎ̤ tû̌ nî̌꤮. 4Kè̌lǎǐ pwǎ sî ta̤lṳ̂bǎ tokhlǒ ayanu tǎ̤mǎ̤ nî̌꤮, gènè̤ bǎ pû kòyò tôpwa̤ kû̌ tôpwa̤ aya nî̌꤮.

5Sî tô bè̌ sô̌sô̌ lô̌khô sî sǎphlǒ pô̤̌ Khrǐnu.

6Khrǐ ô̌ kû̌ Cǒmara alǎ̤klô sô̌sô̌kû̌ Cǒmara nuhǒ bǎbǎkǎlè a gènè̤ bè̌gunò̤ anǎ̤ kû̌ Cǒmara tô̤̌. 7Mè̤mè̤̌tôkhônu, a wîkè a ta̤pô̤ta̤phǎ kû̌ Cǒmara agûlǎ̤ tokhlǒ, a wîkè ta̤pṳ̂̌tocǒ, dě a hèlò̤ htû anǎ̤ sô̌sô̌kû̌ jû̌ tôpwa̤. Htokhôtô̤̌ a hèlò̤ sûlûanǎ̤ pô̤̌ kòyòhǎkhû̌phû̌ tôpwa̤nu. 8Dě a hè dǔlè̌lṳ̌ anǎ̤ pô̤̌ kòyòhǎkhû̌phû̌ nuhǒ, htodě, a shò̌lò̤ anǎ̤ dǒ kòyò lǎ̤. A ganǎ̤de Cǒmara ayô̤̌, a sikè dě a bè̌kè ta̤ tôcǒ꤮ tô̤̌. Tǒ̤dǒ a tôbǎ si dǒ nò̌dò̌htǔlô̤ dě a jûǎ pwǎ. 9Pô̤̌nudě Cǒmara bè̌dû̌bè̌htû ǐ yǎ dě a bè̌htò̌ lû̌û dǒ agûlǎ̤ htò̌yô̤̌lǒ dě a ǐ lû̌û mi̤ dǒ adû̌lǒkhlo kû̌ kòyòmi̤ pṳ̂̌꤮ tôpwa̤nu. 10– 11Bǎ kòyò kaǎhtò̌ Yeshǔ ami̤ pěnu ta̤bô̌lò̤ lǒ̤bò dǒ a ô̌ dǒ mǒkhû̌ sînu bǎbǎ, dǒ hǎkhû̌ sînu bǎbǎ, dǒ lṳ̌gǎnǎdo sînu bǎbǎ, pô̤̌khô kòyò pṳ̂̌꤮ tôpwa̤ gǔ hè dô̌gînî̤lò̤ bè̌dubè̌nǎ̤bò lô̌khô dǒ Yeshǔ alô̤mô̤̌ pě. Htokhôtô̤̌ pô̤̌khô kòyò pṳ̂̌꤮ tôpwa̤ gǔ olò̤bò lô̌khô kû̌ Yeshǔ Khrǐ mî̌ Běcǎ tôpwa̤ pě htokhôtô̤̌ pô̤̌khô asî ma̤bwǐdû̌ ma̤sîrîhtû lô̌khô pha Cǒmara kû̌ asî ta̤olò̤ pô̤̌nu pě ayanudě, Cǒmara bè̌dû̌bè̌htû tûû̌ Yeshǔ pô̤̌nu hǒ. ^a

Dǒ hǎkhû̌nu sî lîhtò̌ pô̤̌ ta̤lî tokhlǒnu pě

12Pô̤̌nudě, sû̌khô sî bǎ he ô̌plǒ kû̌ sî akhanu, sî ganǎ̤de he yô̤̌, khònò̤̌ he ô̌yî̤ kû̌ sî akhû̌akhî, sî tôbǎ ganǎ̤de khlo pe heyô̤̌. Pô̤̌khô sî ma̤lǒhtò̌behtò̌ ta̤ma̤hǎplǎge sî ayanu, jî̌pwǐ̤ ma̤ lô̌khô ta̤ dǒ ta̤bè̌dubè̌nǎ̤ Cǒmara akû, dě ma̤ kû̌ ǐsha gònò̤̌gòglè anu nî̌꤮. 13Ma̤titèhî̌dě, pô̤̌khô sî sǎphlǒshû̌ sǎyṳ ganǎ̤de gû̌ma̤ pô̤̌ Cǒmara a ta̤sǎyṳ dǒ awô̌ tokhlǒ ayanu, a ma̤ hto ta̤ dǒ sîkû pṳ̂̌꤮ taplǎ hǒ.

14– 15Pô̤̌khô sî htûhtò̌ kòyò mṳ̂̌plî dě kòyò lǎ̤bè̌ ta̤sǔ dǒ sîlô̤ gǔ ô̌ pe tô̤̌nu, htokhôtô̤̌ pô̤̌khô sî htû Cǒmara a phû̌mǒ̤phû̌khû dǒ ata̤sǔ ô̌ tô̤̌ tokhlǒ, dě bǎ sî ô̌htûpwa̤ dǒ kòyò phû̌mò̤̌ cǒtè̤tô̤̌ nutokhlǒ akla, pô̤̌khô sî lîkakhahtò̌ bǎ kòyò pô̤̌ shǎ dǒ hǎkhû̌běkhû̌ nudě, sî ma̤ta̤ titètè̌꤮ bǎbǎ, tûmṳ̂̌ta̤ma̤ htè̌ tǎ̤ lô̌khô tǎ̤mǎ̤ nî̌꤮. ^b 16Shôbǐǐlṳ̌ padô̌ lô̌khô kòyò ta̤htûpwa̤ awe̤akènu nî̌꤮. Sî kè̌ ma̤pô̤̌nu hî̌dě bǎ Khrǐ hèlò̤ sô̌ alṳmṳ̌ni̤ pě tôni̤nu, lǒ̤bò he jî̌pwǐ̤ tokhlǒ kû̌ he ta̤phǐta̤ma̤ nutokhlǒ a htûhtò̌ nòdû̌pe tô̤̌ akhû̌akhî, dǒ sîkhû̌sîkhî dě he gǔ phî̌htò̌lǒǐ henǎ̤ pě. 17Dǒ he shôbǐǐ ta̤sǎlě̤we̤kè akhû̌akhî, he si pě yǎ sî̌. Bǎ sî yṳ̌ǎ ta̤sǎlě̤we̤kè akhanu, sî ǐlò̤ sî ta̤htûpwa̤ dǒ Cǒmara a ô̌ sô̌sô̌kû̌ pwa̤shû̌gǎ lṳhtò̌ ta̤phû̌ta̤wè̤ dǒ Cǒmara a ô̌ nuhǒ. Kòyò kè̌ ma̤si he hî̌dě, hesǐ gǔ sǐlò̤ asô̌sô̌kû̌ pwa̤shû̌gǎ tôpwa̤ yṳ̂̌lò̤ shisî̌yô̤̌ dǒ hǎkhû̌ dǒ asô̌sô̌kû̌ kòyò lṳhtò̌ ta̤lṳta̤tòhtò̌ nuhǒ. A kè̌ htûhtò̌ pô̤̌nu hî̌dě he sǎlě̤sǎlò̤, sǎlě̤bò kû̌ sî pṳ̂̌ tôpwa̤ pwǎ. 18Sî bǎbǎ, sî tô sǎlě̤sǎlò̤, sǎlě̤ lô̌khô kû̌ hehe.

Khûtîmôte kû̌ Khûěpaprǔdǐtǔ

19Pô̤̌khô he gǔ sî̌ganǎ̤ sîwe̤sîkè dě a ǐkhû̌ǐǎ ma̤mô̤htò̌ pô̤̌ he sǎphlǒ pě ayanu, a kè̌ tô Běcǎ Yeshǔ asǎphlǒ hî̌dě he nohè phwè bǎ sî Khûtîmôte dǒ sî ô̌ pě dě a ge shôbǐǐlṳ̌ bǎ he pě. 20Asǎphlǒ ô̌ mè̤̌mî̌ca sî. Lǒ̤bò kòyò dǒ a ô̌ kû̌ he bǒo tokhlǒ dǒ asô̌sô̌kû̌ lû̌ûnu he kè̌shǐnǒ tôpwǎ̤꤮ tô̤̌. 21Kòyò ashǔshawa̤ lǒ̤bò tokhlǒ numî̌ a kè̌lǎ ma̤ lô̌khô pwǎtǒ̤ ta̤ dǒ a htûbwǐhtûsîrî dǒ asî aya nutokhlǒ pwǎ. A kè̌lǎ ma̤ bǎ lô̌khô Yeshǔ Khrǐ aya tô̤̌. 22Sî sî̌ya tûû̌, Khûtîmôte mî̌ kòyò lě̤dû̌pwî̤htû tôpwa̤. A ma̤hto ta̤ kû̌ he dǒ ta̤sǎlě̤we̤kè dû̌htò̌htûhtò̌ aya numî̌ a sô̌sô̌kû̌ phû̌ kû̌ pha nuhǒ. 23Pô̤̌nudě dǒ he sî̌yahto kû̌ ta̤ htûhtò̌ anǎ̤ kû̌ he bǒo hî̌tè pě akhanu, he kè̌shuǐ dǒ he nohèlò̤ phwè Khûtîmôte dǒ sî ô̌ pě. 24Yî̤khôtô̤̌ pěnu, he yṳ̌ǎ kû̌ Běcǎ ma̤jè̌ he pě dě he nǎ̤běcǎ sanǎ̤ dě he hèbò̌ dǒ sî ô̌ pě.

25He tô no ge tîkhî bǎ sî Khûěpaprǔdǐtǔ dǒ sî ô̌ he gènè̤ pô̤̌nu. A mî̌ he pṳ̌wè̤̌ tôpwa̤, a mî̌ kòyò dǒ a ma̤cu ta̤ kû̌ he dě a shěpě̤ wô̤̌wô̤̌ ta̤ kû̌ he hǒ. A mî̌ kòyò dǒ a sû bǎ sî lî̤ nutôpwa̤ hǒ dě pô̤̌khô a ma̤jè̌ bǎ he ta̤lṳ̂bǎ tokhlǒnu dě sî nohè lû̌û dǒ he ô̌ nutôpwa̤ hǒ. 26Ma̤titèdě sî ganǎ̤de kû̌ Khûěpaprǔdǐtǔ ô̌shû̌ô̌mô̤ tô̤̌ akhû̌akhî, a nǎsǔ kè̌shǐ mî̌ca sî pṳ̂̌꤮ tôpwa̤. Dě a gènè̤ gû̌gè̌ bǎ mî̌ca dǒ sîya, pô̤̌nudě he no getîkhî sô̌ a dǒ sî ô̌. 27Ashǐasha mè̤̌mî̌ca nî̌꤮, a glè̌ si tètè̤̌ hǒ. Bǎbǎkǎlè Cǒmara gwèbǎǐ pe yǎ, dě a gwèbǎǐ tǒ̤ a mè̤̌tô̤̌, a gwèbǎǐ padô̌ pe he. Ma̤titèhî̌dě a kè̌ simò̌ numî̌, he sǎplǎ̤ khlo pô̤̌nu hǒ. 28Pô̤̌nudě, htǔ sî kè̌shǐ a pě dě, pô̤̌khô sî sǎlě̤sǎlò̤ sô̌ pě, htokhôtô̤̌ pô̤̌khô he sǎphlǒgû̌gè̌ yǎkhè̌ hèpô̤̌ ayanudě, he sǎphlǒ shû̌khlo pô̤̌ kû̌ he noge tîkhî a dǒ sî ô̌ pě. 29Pô̤̌nu akhû̌akhî, kaǎmô̤ shěshuwô̌ lô̌khô a pô̤̌ pṳ̌wè̤̌ dǒ a yṳ̌ǎ Běcǎ tôpwa̤nu nî̌꤮. Kaǎmô̤shǔ a kû̌ ta̤sǎlě̤sǎlò̤ dě bè̌dubè̌nǎ̤ kòyò dǒ asô̌sô̌kû̌ anu tokhlǒ nî̌꤮. 30Ma̤titèhî̌dě, sî ma̤jè̌bò̌ he tô̤̌ akhû̌akhî, pô̤̌khô a ma̤jè̌ he ayanu, dǒ Khrǐ a ta̤phǐta̤ma̤ aya dě, a ô̌phǔ kû̌ ta̤si hǒ.