Khûphǐlǐmṳ̂ mî̌ khrǐphû̌ dě ami̤ lṳ̌shilṳ̌gǎ tôpwa̤. Kǎtô̤̌ a mî̌ Kòlòtè̌ ta̤dòkû tôpwa̤. A mî̌ a htû Khûò̌nesimǔ ajû̌ Běcǎ tôpwa̤. Khûò̌nesimǔ khlè̌ hǎhtò̌cû̌ tephekè kû̌ a Běcǎ Khûphǐlǐmṳ̂ dě a cû̌ kè̌shǐ lò̤shǔ kû̌ Khûpò̌lǔ dě kòyò dǒlò̤tě̤ lû̌û dǒ apô̤kû nutôpwa̤. Dě Khûpò̌lǔ akhû̌akhî, dě Khûò̌nesimǔ htûhtò̌kè khrǐphû̌. Khûpò̌lǔ wě̤ Phǐlǐmṳ̂lî̤ nutôbǎ mî̌ a wě̤ kwigwèbǎǐ cû̌ Khûphǐlǐmṳ̂ kû̌ a glè̌ kla tîkhî sô̌ kû̌ ajû̌ Khûò̌nesimǔ dě Khûpò̌lǔ sû tîkhî sô̌ dǒ aô̌ nutôpwa̤. Dě a wě̤ kwigwèbǎǐ lû̌û kû̌ a gǔ kaǎmô̤shǔǐwô̌ pô̤̌ jû̌ dě a plûkè lû̌û ta̤sǔ tôpwa̤ nu mè̤tô̤̌, a gǔ kaǎmô̤shuǐwô̌ lû̌û pô̤̌ pṳ̌wè̤̌ khrǐphû̌ tôpwa̤nu.

Ta̤hî̌bǎ tôtô̤̌ kû̌ tôtô̤̌

Ta̤hî̌bǎ wǐ 1:1-3

Htû̌sò̌ǐ Phǐlǐmṳ̂ 1:4-7

Kwigwèbǎǐ bǎ Khûò̌nesimǔ nutôpwa̤ aya 1:8-22

Ta̤hî̌bǎ gutṳ̌kò 1:23-25

Philemon

1– 2He mî̌ Khûpò̌lǔ. He kû̌ Khûtîmôte mî̌ dǒ Khrǐ akhû̌akhî, pa pṳ̌wè̤̌ lû̌û wě̤cû̌bǎ Khûphǐlǐmṳ̂ lî̤hǒtôbǎ. Dǒ he ma̤ bǎ Yeshǔ Khrǐ ata̤ma̤ akhû̌akhî, kòyò dǒtě̤ he dǒ apô̤kû.

Pa wě̤cû̌bǎ lî̤nu dǒ pa khô Khûphǐlǐmṳ̂ dǒ a ma̤ ta̤ kû̌ pa hǒtôpwa̤ a ô̌, kû̌ pa pṳ̌wè̤̌ Khrǐphû̌ pwa̤mǒ̤ Mǒ̤aphǐ, kû̌ pa pṳ̌wè̤̌ Khrǐphû̌ Khûakǐpǔ dǒ asô̌sô̌kû̌ kliphû̌ tôpwa̤ nutokhlǒ a ô̌, kû̌ ta̤dòkûphû̌ ô̌ dǒ Khûphǐlǐmṳ̂ ahǐkû nutokhlǒ a ô̌. ^a

3Papha Cǒmara kû̌ Běcǎ Yeshǔ Khrǐ ǐlò̤ pû sî ta̤bwǐta̤sîrî kû̌ ta̤gûjû̌kabǎ nî̌꤮.

Khûphǐlǐmṳ̂ ata̤mô̤ kû̌ a ta̤yṳ̌ta̤nǎ̤

4Khûphǐlǐmṳ̂꤮, bǎ he kwicaba akhanu, he gènè̤htò̌nṳ̌ na pṳ̂̌꤮ tôplǎ dě he hî̌bwǐhî̌sîrî he Cǒmara. 5Ma̤titèhî̌dě, he ganǎ̤de kû̌ na yṳ̌ǎ mè̤̌mî̌ca Běcǎ Yeshǔ htodě na mô̤ǐ bò kòyò yṳ̌ǎ mè̤̌mî̌ca Cǒmara nutokhlǒ akhû̌akhî, he hî̌bwǐhî̌sîrî he Cǒmara. 6Pô̤̌khô na ta̤bǒsû̌khǎkhô kû̌ ta̤dòkûphû̌ dǒ ashǔshawa̤ tokhlǒ gǔ ma̤jè̌ tutṳ̌ na dǒ na gǔ sî̌ganǎ̤ lǒbebò ta̤wô̌ pṳ̂̌꤮ tôcǒ dǒ pa nǐ̤bǎ dǒ Khrǐ akû tokhlǒ ayanu, he kwicaba bǎ dǒ naya. ▼

▼Lî̤ tômènu, pa kè̌ dô̌ kû̌, “He kwicaba dǒ na gǔ shôbǐǐlṳ̌ bǎ kòyò kû̌ na ta̤yṳ̌ta̤nǎ̤,” pô̤̌numî̌ anǐ̤ pwǎ. Mè̤̌tô̤̌mî̌ pa kè̌ dô̌ kû̌, “He kwicaba dǒ pa ta̤bǒsû̌khǎkhô kû̌ na pô̤̌ ta̤dòkûphû̌ tôpwa̤nu,” pô̤̌numî̌ a anǐ̤nǐ̤.

7Sû̌khô mô̤, na ta̤mô̤nu, a ma̤ sǎlě̤sǎlò̤ mî̌ca he dě a ǐ shû̌htò̌ mî̌ca hekhû̌heǎ. Dǒ mî̌titè akhû̌akhî hî̌dě, na ma̤mô̤ hto lǒ̤꤮ bò kòyò yṳ̌ǎ Cǒmara nutokhlǒ asǎphlǒ hǒ.

Ta̤kwisǎyṳ dǒ Khûò̌nesimǔ aya

8Dǒ ta̤nu akhû̌akhî, he sǎyṳ kwi na ta̤ma̤jè̌ tôcǒ. Khrǐ ǐ he ta̤shû̌ta̤sho dǒ he gǔ bǎ hî̌bǎhtò̌ khuhe heyô̤̌ kû̌ he bǎ noma̤ na ta̤ dǒ awô̌ pô̤̌ na tô ma̤nu bǎbǎkǎlè, 9Pa mô̤ǐ gesô̌ lû̌û tôpwa̤ kû̌ tôpwa̤ akhû̌akhî, he kwisǎyṳpwǎ na pwǎ. Khònò̤̌dě he amè̤̌kû̌ Khûpò̌lǔnu, he mǒ̤pwǎ̤hǒ, htokhôtô̤̌ dǒ Yeshǔ Khrǐ akhû̌akhîdě, kòyò dǒlò̤tě̤bǎ he dǒ apô̤kû dě he kwisǎyṳ na pwǎ. 10He kwisǎyṳ na dǒ Khûò̌nesamǔ agûlǎ̤ pwǎ. A mî̌ a sô̌sô̌kû̌ he phû̌pwa̤khû tôpwa̤. Bǎ he lò̤tě̤ dǒ apô̤kû akha, a htûhtò̌kè hephû̌pwa̤khû dǒ Khrǐ akû tôpwa̤hǒ. ^c 11Dǒ awǐkha numî̌ a htûbwǐhtûsîrî dǒ naya tô̤̌ bǎbǎkǎlè khònò̤̌ a gǔ htûbwǐhtûsîrî dǒ naya kû̌ heya hǒ.

12A mî̌ kòyò tôpwa̤ dǒ he mô̤ǐ mî̌ca yǎ dě he sûge tîkhîsô̌ a dǒ naô̌. 13Dǒ ta̤sǎlě̤we̤kè akhû̌akhîdě, kòyò dǒô̌pe he dǒ apô̤kû akhanu, pô̤̌khô a gǔ ma̤jè̌ he dǒ na gûlǎ̤ ayanudě, he sǎyṳ kaǎ ô̌ pe a dǒ he kòshî̌. 14Bǎbǎkǎlè na sî̌ganǎ̤ awe̤kè tô̤̌, htodě na olò̤ he tôcǒ꤮ tô̤̌ akhû̌akhî, he sǎyṳ ma̤khôtô̤̌. He sǎyṳ noshû̌ nô̌ na tô̤̌tô̤̌. Jû̌ tûû̌ na sǎphlǒ sǎyṳ ma̤jè̌ he pwǎ. 15Mè̤̌tô̤̌mî̌ ta̤we̤ta̤kè dǒ a hǎhtò̌cû̌ tephekè kû̌ na tòshò̌phû̌ numî̌ pô̤̌khô na gǔ ma̤nṳ̌ getîkhî sô̌ a tûjû̌pwa̤ aya nupwǎ kǎlè. 16Dě na nǐ̤bǎ getîkhî sô̌ Khûò̌nesimǔ numî̌ a mè̤̌pe pô̤̌ jû̌ tôpwa̤ tô̤̌, awô̌ khlo kû̌ jû̌, a htû pṳ̌wè̤̌ pô̤̌ dǒ Khrǐ akû tôpwa̤ nuhǒ. A mî̌ asô̌sô̌kû̌ pṳ̌wè̤̌ dǒ he mô̤ǐ lû̌û bǎbǎkǎlè na gǔ mô̤ǐ khlo lû̌û kû̌ he pě, ma̤titèhî̌dě na nǐ̤bǎ getîkhî sô̌ a pô̤̌ jû̌ tôpwa̤ kû̌ pṳ̌wè̤̌ dǒ Běcǎ akû ginǐ̤cǒ bòhǒ.

17Pô̤̌nu akhû̌akhî, na kè̌ bè̌ he pô̤̌ pwa̤ma̤wô̤̌wô̤̌ta̤ tôpwa̤ kè̌hî̌dě, kaǎmô̤shǔ sô̌ a pô̤̌ na kaǎmô̤shǔ he pě nunî̌꤮. 18Hî̌kûmṳ̂̌mò̌, a kè̌ ma̤sǔ hto na kè̌ tokhlǒ, mè̤̌tô̤̌mî̌ ashû̌ kè̌ô̌ na tokhlǒ kè̌hî̌dě, bè̌ a pô̤̌ henǐ̤heshû̌nu nî̌꤮. 19Khònò̤̌dě he mî̌ Khûpò̌lǔ sahtò̌ wě̤nṳ̌ lî̤nu kû̌ he cǔde tûû̌. Kè̌ a ma̤sǔ hto na kè̌ô̌ tokhlǒ, kè̌mè̤̌tô̤̌dě a lǎ̤lṳ̂plě na kè̌ô̌ tokhlǒ hî̌dě bè̌ a pô̤̌nu, dě he gǔ plělî tîkhî sô̌ na pě. Bǎbǎkǎlè dǒ hekhû̌khî dě, na nǐ̤bǎ ta̤htûpwa̤ asa dǒ Khrǐ akû akhû̌akhî, na nǎ̤běcǎ tûû̌ na lǎ̤lṳ̂ǐ henu, he lṳ̂bǎǐ gènè̤htò̌bǎpe na tô̤̌hǒ. 20Pô̤̌nudě, he pṳ̌wè̤̌ Khûphǐlǐmṳ̂ pa yṳ̌ǎnṳ̌ Běcǎ Yeshǔ akhû̌akhî, khòsǎdô ma̤bwǐma̤sîrî bǎwǐ he hǒtôcǒ nî̌꤮. Khòsǎdô ma̤mô̤htò̌ kû̌lǎ he sǎphlǒ dǒ Khrǐ akû nî̌꤮. 21He wě̤ lî̤ dǒ naô̌nu, he yṳ̌ǎ dǒ na gǔ jûlě̤phî̌ heyô̤̌ dě he sî̌ganǎ̤ dǒ na gǔ ma̤dû̌khlo kû̌ he kwi nanu pě.

22Dě a ô̌pe tôcǒ: khòsǎdô tîwî̌tòwò nǎ heya hǐdǒkû tôtô̤̌ nî̌꤮, ma̤titèhî̌dě he kè̌shuǐ dǒ Cǒmara gǔ ganǎ̤de sî ta̤kwicaba dě a gǔ sû̌ge he dǒ sî ô̌ pě.

Ta̤hî̌mô̤hî̌wô̌ dǒ gutṳ̌kò

23Dǒ Yeshǔ Khrǐ akhû̌akhîdě, Khûepapra lò̤tě̤ kû̌ apô̤kû kû̌ he, dě a sûhè ta̤hî̌mô̤hî̌wô̌ dǒ sîô̌. ^d 24Pô̤̌nudě pwa̤ma̤ta̤ kû̌ he Khûmakǔ, ^e Khûarǐshataku, ^f Khûdemǎ kû̌ Khûlǔka sîtokhlǒ sûhè tǒ̤padô̌ a ta̤hî̌mô̤hî̌wô̌ tokhlǒ dǒ sîô̌. ^g

25Běcǎ Yeshǔ Khrǐ abwǐsîrî ô̌cu pû kû̌ sî lǒ̤bò nî̌꤮.