Philippians 1

1Pa mî̌ Khûpò̌lǔ kû̌ Khûtîmôte. Pa mî̌ Yeshǔ Khrǐ ajû̌ tokhlǒ. Pa wě̤cû̌ bǎ lî̤ hǒtôbǎ kû̌ Cǒmara a kòyò dǒ a htûhtò̌ kû̌ Yeshǔ Khrǐ tôcǒ꤮ nô̤̌ dě a ô̌ lô̌khô dǒ Wî̤̌phǐlǐpǐ akû nutokhlǒ a ô̌. Pa wě̤cû̌ padô̌ ta̤dòkû ikǒlǒkòdû̌ tokhlǒ kû̌ pwa̤ma̤jè̌ ta̤dòkû saprṳ̂phû̌ tokhlǒ. ^a 2Papha Cǒmara kû̌ Běcǎ Yeshǔ Khrǐ ǐpû sî ta̤bwǐta̤sîrî kû̌ ta̤gûjû̌kabǎ nî̌꤮.

Khûpò̌lǔ kwicaba bǎ phǐlǐpǐphû̌ dǒ a yṳ̌ǎ Khrǐ tokhlǒ aya

3He gènè̤htò̌nṳ̌ bǎ sô̌ sî bǎkhò̌tè꤮ bǎbǎnu, he hî̌bwǐhî̌sîrî he Cǒmara. 4He kwicaba bǎ sîya bǎkhò̌tè꤮ bǎbǎnu, he sǎlě̤sǎlò̤ pṳ̂̌꤮ taplǎ. 5Ma̤titèhî̌dě, he ma̤ ta̤sǎlě̤we̤kènu, sî gû̌ma̤ kû̌ he dǒ asakhû̌lû̌kha tǒ̤dǒ khònò̤̌ hǒ. 6Cǒmara dǒ a sahtò̌ htû̌lè̌ tèplè̌ wô̌ge hto sî sǎphlǒ tôpwa̤nu, he yṳ̌ǎ tě̤tě̤mè̤̌mè̤̌ kû̌ a ma̤wô̌ hènè tǒ̤dǒ Yeshǔkhrǐ alṳmṳ̌ni̤ hètǒ̤ nupě tôplǎ pě.

7He mô̤ǐ jî̌ sî akhû̌akhî, he gènè̤ sîwe̤sîkè pô̤̌o numî̌ atô pwǎ. Bǎ he ô̌pe dǒ apô̤kû akhanu bǎbǎ, bǎ he tô hî̌bǎ taka tě̤tṳ he ta̤sǎlě̤we̤kè dě he tô hî̌bǎ glemě ǐ he ta̤sǎlě̤we̤kè akhanu bǎbǎ, Cǒmara ma̤wô̌ bǎ pa dě a ǐlò̤ khô̌ pa ta̤ma̤ dǒ pa ma̤wô̤̌wô̤̌ lû̌û ta̤ kû̌ Cǒmara abwǐsîrî dě cû̌ shôbǐǐlṳ̌ bǎ kòyò kû̌ ta̤sǎlě̤we̤kènu. 8He nǎsǔ kè̌shǐ mî̌ca sî dě he mô̤ǐ sî pṳ̂̌ tôpwa̤ kû̌ ta̤mô̤ dǒ Yeshǔkhrǐ ǐ he numî̌ Cǒmara sî̌ganǎ̤ pwǎ.

9Pô̤̌khô sî ta̤mô̤ǐ kè̌khî lû̌û tôpwa̤ kû̌ tôpwa̤nu, sǔ sǔ a gǔ shû̌htò̌, htokhôtô̤̌ pô̤̌khô sî gǔ sî̌ganǎ̤hè sǔ sǔ adû̌htò̌ pô̤̌ lô̌khô htokhôtô̤̌ pô̤̌khô sî gǔ sî̌ganǎ̤ bè̌khô̌bè̌yò lô̌khô ta̤ dǒ asǔ kû̌ atô tokhlǒ ayanudě, he kwicaba bǎ sîya pwǎ. 10Pô̤̌khô sî gǔ sî̌yaphlô tě̤tě̤mè̤̌mè̤̌ wô̌ ta̤ dǒ awô̌lǒnu dě sî sǎphlǒ mṳ̂̌plîpě, htokhôtô̤̌ tǒ̤dǒ Khrǐ hè sô̌ alṳmṳ̌ni̤ pě tôni̤nu, kòyò gǔ bè̌jò pe ta̤sǔ dǒ sîlô̤ tô̤̌nu, he kwicaba bǎ sîya. 11Htokhôtô̤̌ he kwicaba bǎ sîya kû̌, dǒ Yeshǔkhrǐ a ta̤pô̤ta̤phǎ khû̌khîdě, sî gǔ sǎhtò̌ tutṳ̌ lô̌khô ta̤tě̤ta̤mè̤̌ asǎ tokhlǒ. Ma̤titèhî̌dě bǎ kòyò kè̌shǐ sî sǎhtò̌ ta̤tě̤ta̤mè̤̌ asǎ nutokhlǒ akhanu, kòyò bè̌dubè̌nǎ̤ Cǒmara, dě kòyò gǔ htû̌sò̌htò̌ǐ yǎ pě.

He ô̌htûpwa̤nu he nǎla̤ǐ pwǎ Khrǐ pwǎ

12He pṳ̌wè̤̌ sî, lǒ̤bò ta̤ma̤htûhtò̌ anǎ̤ kû̌ he tokhlǒ numî̌ amè̤̌pwǎ a ma̤jè̌ bǎ ta̤sǎlě̤we̤kè gǔ dû̌htò̌ htûhtò̌ ayapwǎ numî̌ he sǎyṳ nosî̌ganǎ̤ sî. 13Dǒ he yṳ̌ǎ Khrǐ akhû̌akhî, dě kòyò dǒô̌ he dǒ apô̤kû pwǎ numî̌ lǒ̤bò kliphû̌ ô̌pǒ̤ khwǐhôhta nutokhlǒ bǎbǎ, lǒ̤bò kòyò dǒ ashǔshawa̤ nutokhlǒ bǎbǎ, a sî̌ganǎ̤ lǒ̤bò pwǎ. ^b 14Dǒ kòyò dǒtě̤ he dǒ apô̤kû akhû̌akhîdě, pṳ̌wè̤̌ Khrǐphû̌ saprṳ̂ a ta̤yṳ̌ǎǐ Běcǎnu a shû̌htò̌shohtò̌ pô̤̌ lô̌khô dě a shôbǐǐlṳ̌ khu hè bǎ kòyò kû̌ Cǒmara alě̤ayô̤̌, dě asî ǐsha pe lô̌khô tôcǒ tô̤̌.

15Kòyò tokhlǒkhlǒnu a sǎkhwè̌ lô̌khô he, a sǎyṳ tǎ̤ lô̌khô he dě a shôbǐǐlṳ̌ bǎ kòyò kû̌ Khrǐ a ta̤sǎlě̤we̤kè pwǎ. Bǎbǎkǎlè tokhlǒkhlǒ mî̌ a jî̌cǒjî̌tè̤ lô̌khô pwǎ asǎphlǒ dě a shôbǐǐlṳ̌ bǎ kòyò pwǎ. 16Asî mô̤ǐ he dě a ma̤ lô̌khô pwǎ, ma̤titèhî̌dě tôbǎ hî̌bǎ takabǐ tě̤tṳ ta̤sǎlě̤we̤kè ata̤ma̤ numî̌ Cǒmara ǐ he pwǎnu, asî sî̌ganǎ̤ lô̌khô pwǎ. 17Kòyò sǎkhwè̌ he nutokhlǒ mî̌ a shôbǐǐlṳ̌ lô̌khô Khrǐ awe̤akè kû̌ sǎphlǒcǒ sǎphlǒtè̤ tô̤̌. Asî nutokhlǒ mî̌ a sǎyṳ tǎ̤ lô̌khô he pwǎ. He ô̌ dǒ apô̤kû akhû̌akhî, asî ma̤ pô̤̌numî̌ a sǎyṳ nokhòbǎ jî̌khlo pô̤̌ he ta̤pò̤̌ta̤sha pwǎ. 18Kòyò tokhlǒkhlǒnu, a gǔ shôbǐǐlṳ̌ bǎ kòyò kû̌ a ta̤bè̌sû̌bè̌sǎ dǒ asǔ bǎbǎ, tokhlǒkhlǒdě a gǔ shôbǐǐlṳ̌ bǎ kòyò kû̌ a ta̤bè̌sû̌bè̌sǎ dǒ a tô bǎbǎ, a ma̤ lô̌khô bǎtè tôcǒ bǎbǎ, a lǎ̤hî̌ nô̌ tôcǒ꤮ tô̤̌. Ta̤ dǒ a lṳ̂dû̌shî̌ tôcǒ mî̌ asî shôbǐǐlṳ̌ bǎ kòyò kû̌ Khrǐ awe̤akè nuhǒ. Kòyò ginǐ̤mṳ̌bò a shôbǐǐlṳ̌ lô̌khô Khrǐ awe̤akè akhû̌akhî, he sǎlě̤sǎlò̤ pwǎ.

He sǎlě̤sǎlò̤ hènè pô̤̌ pě pwǎ, 19Ma̤titèhî̌dě, dǒ sî kwicaba akhû̌khî, kû̌ Yeshǔ Khrǐ a Yôla Plò̌shǐ gǔ ma̤jè̌ bǎ he pe khû̌khîdě, he gǔ hǎplǎge dǒ apô̤kû pěnu he sî̌ganǎ̤ pwǎ. 20He ta̤sǎyṳ kû̌ he ta̤kè̌shuǐ mî̌titè hî̌dě, dǒ Khrǐ a lô̤mô̤̌ pěnu, he sòwò̤̌ pe nô̌ tîkî̌ tô̤̌. He htûpwa̤ bǎbǎ, he si bǎbǎ, pô̤̌khô kòyò glè̌ htû̌sò̌htò̌ǐ Khrǐ ayanudě, he sǎyṳ ô̌htûpwa̤ lǒbe kû̌ ta̤sǎphlǒkhuhe pô̤̌ he khuheǐ pṳ̂̌ taplǎ nupwǎ. 21Ta̤ô̌htûpwa̤ dǒ heya mî̌titè hî̌dě, he sǎyṳ ô̌htûpwa̤ bǎ pwǎ dǒ Khrǐ aya pwǎ, dě he kè̌ si numî̌ abwǐasîrî ô̌dû̌wî̤ khlo dǒ heya. 22He kè̌ ô̌htûpwa̤ hènè hî̌dě, he ma̤ ta̤ dǒ abwǐsîrî ô̌ nutokhlǒ pě. Bǎbǎkǎlè he gǔ rû̌htò̌ bǎtè tôcǒyanu he sî̌ganǎ̤ tě̤tě̤mè̤̌mè̤̌ khôtô̤̌. 23He tô rû̌htò̌ bǎtè tôcǒ ayanu he sî̌ganǎ̤ tô̤̌, apò̤̌ jî̌ dǒ heya. He sǎyṳ bè̌kè he ta̤htûpwa̤ nutôhtu dě he sǎyṳ geô̌ kû̌ Khrǐ hǒ, pô̤̌numî̌ ta̤dǒ awô̌gutṳ̌ dǒ heya hǒ. 24Bǎbǎkǎlè, ta̤ dǒ a lṳ̂dû̌lǒ tôcǒmî̌ he tôbǎ ô̌htûpwa̤ bǎ pû dǒ sîya nuhǒ. 25He sî̌ganǎ̤ tě̤tě̤mè̤̌mè̤̌ kû̌ he tôbǎ ô̌htûpwa̤ bǎ pû sîya dě he ô̌plǒ kû̌ sî pě. Pô̤̌khô sî ta̤yṳ̌ta̤nǎ̤ gǔshû̌gǔsho hèpô̤̌, htokhôtô̤̌ dǒ sî yṳ̌ǎ Khrǐ akhû̌akhî, dě sî sǎlě̤sǎlò̤ hèshû̌ pô̤̌ pě nudě he ma̤jè̌ sî pě. 26Pô̤̌khô sî gǔ htû̌sò̌htò̌ǐ Yeshǔ Khrǐ ma̤ bǎ ta̤dǒ heya tokhlǒnudě, he ge ô̌plǒ sô̌ kû̌ sî pě.

27– 28A htûhtò̌ hî̌tè bǎbǎ, sî tô ô̌htûpwa̤ lô̌khô pô̤̌ Khrǐ a ta̤sǎlě̤we̤kè shôbǐǐ bǎ sînu nî̌꤮. Sî kè̌ ma̤pô̤̌nu hî̌dě he hèkè̌shǐ sî bǎbǎ, he ô̌tepheyî̤ kû̌ sî dě he ganǎ̤de pwǎ sîwe̤sîkè bǎbǎ, he sî̌ganǎ̤ kû̌ sî sǎphlǒ icu lû̌û dě sî ihtǒ tònò shěshu lû̌û dǒ ta̤sǎlě̤we̤kè a ta̤yṳ̌ta̤nǎ̤ ayahǒ. Htokhôtô̤̌ sî ǐsha pe kòyò dǒ a sǎkhěkhû̌khwè sî nutokhlǒ alǎ̤ tô̤̌. Sî kè̌ ma̤pô̤̌nu hî̌dě sî khòlṳ̌ hto asî kû̌ Cǒmara ma̤pî̌kè asî pě, dě Cǒmara gǔ ma̤hǎplǎge sî kû̌ anǎ̤ pě. 29Ma̤titèhî̌dě, Cǒmara ǐ pwǎtǒ̤ sî ta̤ǐshowî̤ dǒ sî yṳ̌ǎ Khrǐnu mè̤̌tô̤̌, a sǎphlǒô̌ kû̌ sî khòlṳ̌ ta̤ma̤jî̌ma̤jû̌ dǒ Khrǐ ayaya. 30Ta̤shě dǒ sî shěpě̤ numî̌ asô̌sô̌kû̌ he shěpě̤ hto nutokhlǒ pwǎ. He khòbǎ ta̤ dǒ awǐanô̌ nutokhlǒmî̌ sî kè̌shǐ hto tûû̌ hǒ. Htodě pô̤̌ sî ganǎ̤de hto, he shěpě̤ pe tǒ̤lò̤ khònò̤̌. ^c