Phili 3 | KxfSCKXF | STEP | He pṳ̌wè̤̌ sî, dǒnô̌kòlǒnu, he sǎyṳ hî̌ sî kû̌, dǒ sî htûhtò̌ ta̤tôcǒ꤮ nô̤̌ kû̌ Běcǎ Khrǐnu, sǎlě̤sǎlò̤ lô̌khô nî̌꤮. He wě̤cû̌ bǎ sô̌ sî lî̤ dǒ asô̌sô̌kû̌ awǐkha tokhlǒnu pwǎ bǎbǎkǎlè a dǐkhû̌dǐdò nô̌ he tôcǒ꤮ tô̤̌. He wě̤ tokhlǒ numî̌ pô̤̌khô a takabǐ sîyapwǎ.

Philippians 3

Ta̤cǒta̤tè̤ mè̤̌mî̌ca

1 He pṳ̌wè̤̌ sî, dǒnô̌kòlǒnu, he sǎyṳ hî̌ sî kû̌, dǒ sî htûhtò̌ ta̤tôcǒ꤮ nô̤̌ kû̌ Běcǎ Khrǐnu, sǎlě̤sǎlò̤ lô̌khô nî̌꤮. He wě̤cû̌ bǎ sô̌ sî lî̤ dǒ asô̌sô̌kû̌ awǐkha tokhlǒnu pwǎ bǎbǎkǎlè a dǐkhû̌dǐdò nô̌ he tôcǒ꤮ tô̤̌. He wě̤ tokhlǒ numî̌ pô̤̌khô a takabǐ sîyapwǎ.

2 Sè̌rè̌ lô̌khô sînǎ̤ kû̌ kòyò ma̤ ta̤phû̌mò̤̌shǐhtô dǒ asô̌sô̌kû̌ shǐ nutokhlǒ nî̌꤮. Kòyò nutokhlǒ mî̌ sî bǎ dǔtṳ̌aphě a noshû̌bò kòyò pô̤̌nu. 3 Pa mî̌ Cǒmara a kòyò mè̤̌mî̌ca tokhlǒ hǒ, asî nutokhlǒ mî̌ a mè̤̌mî̌ca mè̤̌tô̤̌, ma̤titèhî̌dě dǒ Cǒmara a Yôla Plò̌shǐ akhû̌akhî, pa cubucabahtò̌ hǒ Cǒmara dě pa hî̌bǎhtû̌sò̌ǐ ta̤dǒ Yeshǔ Khrǐ ma̤ bǎ hto pa tokhlǒ nuhǒ. Pô̤̌khô pa nǐ̤bǎ ta̤ma̤hǎplǎge ayanu, pa tô nǎla̤ǐ ta̤dǒ pa ma̤ a nutokhlǒ tô̤̌. 4 Pô̤̌ kòyò yṳ̌ǎ ǐtû̌ lô̌khô kòyònǎ̤nu, he lǎ̤yṳ̌ǎlò̤ tû̌ henǎ̤ a ô̌ kǎkǎ.

Kòyò tokhlǒkhlǒ kè̌ gènè̤kè̌ kû̌ ta̤we̤ta̤kè dǒ a yṳ̌ǎlò̤ ǐtûû̌ anǎ̤nu a ô̌ tokhlǒ a kè̌ gènè̤ pô̤̌nuhî̌dě, ta̤we̤ta̤kè dǒ he lǎ̤yṳ̌ǎ heyanu a ô̌ dû̌wî̤khlo pe kǎlè. 5 Bǎ he ô̌phijǎlò̤ behtò̌ hǒ ni̤lǐ̤sô̌ akhanu, kòyò dǔtṳ̌ bǎ hephě. He htû Isôrělaphû̌ dǒ he ô̌phijǎlò̤ akhanu pe. ^a Hekhlihelè gelò̤ dǒ Khûbîyame̤ tômṳ̌tôcǒ, he mî̌ Hebrǔphû̌ mè̤̌mî̌ca tôpwa̤. He mî̌ Pharishè̌phû̌ dǒ a ganǎ̤de gû̌ma̤ Yǔdaphû̌ a ta̤sû̌ta̤tòwò tôpwa̤. ^b 6 Ma̤titèhî̌dě he sǎphlǒshû̌ bè̌dû̌bè̌htû mî̌ca Cǒmara ata̤ma̤ akhû̌akhî, he ma̤jî̌ma̤jû̌ kòyò dǒ a yṳ̌ǎ Khrǐ tokhlǒ. Kè̌ hî̌kûmṳ̂̌mò̌ kû̌ jûlě̤phî̌yô̤̌ ta̤sû̌ta̤tòwò a ta̤mǎlò̤nu tokhlǒ htodě htûhtò̌ bò̌pwǎ kòyòcǒkòyòtè̤ pwǎ kè̌hî̌dě, he htû hto kòyò tôpwa̤ dǒ kòyò kè̌lǎ bè̌ he ta̤sǔnu, a ô̌ tôpwǎ̤꤮ tô̤̌. ^c

7 Tôplǎnu, ta̤ dǒ he bè̌ yǎ kû̌ alě̤dû̌pwî̤htû dǒ heya tokhlǒnu, khònò̤̌dě dǒ he yṳ̌ǎ Khrǐ akhû̌akhî, lǒ̤bò ta̤ hǒtokhlǒnu he bè̌kè a pô̤̌ ta̤ô̌lǒô̌khlo dǒ heya nupwǎ. 8 Tǒ̤hǒo kǎtô̤̌, khònò̤̌ sǔ sǔ he sî̌yahèhto he Běcǎ Yeshǔkhrǐnu a lě̤dû̌pwî̤htû khlope kû̌ ta̤lǒ̤ bò akhû̌akhî, lǒ̤bò ta̤ tokhlǒnu, he bè̌kè a pô̤̌ ta̤ô̌lǒô̌khlo tokhlǒnu pwǎ. Dǒ Khrǐ aya akhû̌akhî, he wîkè bòkè pṳ̂̌꤮ tôcǒ hǒ. Pô̤̌khô he gǔ nǐ̤bǎ Khrǐ dě he gǔ htûhtò̌ ta̤ tôcǒ꤮ nô̤̌ kû̌ Khrǐ ayanu, lǒ̤bò ta̤ tokhlǒnu, he gènè̤kè a pô̤̌ ta̤wè̤̌ta̤sô̌ tokhlǒnu pwǎ. 9 He ta̤tě̤ta̤mè̤̌nu, he nǎla̤ǐ pe dǒ he ganǎ̤de gû̌ma̤kû̌ ta̤sû̌ta̤tòwò akhû̌nu mè̤̌petô̤̌. Mè̤mè̤̌tôkhônu, he yṳ̌ǎ Khrǐ hǒ akhû̌akhîdě, he nǐ̤bǎ ta̤tě̤ta̤mè̤̌ hǒ. Ta̤cǒta̤tè̤ dǒ Cǒmara ǐ numî̌ a nǎla̤ǐ dǒ ta̤yṳ̌ta̤nǎ̤ alô̤ pwǎ. 10 Lǒ̤bò ta̤ dǒ he sǎyṳ sî̌ganǎ̤ tokhlǒ numî̌ pwǎtǒ̤ Khrǐ kû̌ ata̤si ihtǒhtûpwa̤ getîkhî a ta̤pô̤ta̤phǎ hǒnu pwǎ. Dě he sǎyṳ khòjî̌khòjû̌ kû̌ a, dě he sǎyṳ htûhtò̌ sô̌sô̌kû̌ a tṳ̌sikhòsi anǎ̤ nupwǎ. 11 He sǎyṳ htûhtò̌ sô̌sô̌kû̌ pô̤̌nu, ma̤titèhî̌dě pô̤̌khô Cǒmara gǔ ma̤htûpwa̤ getîkhî he dǒ ta̤si sô̌sô̌kû̌nu pe pwǎ.

12 Ta̤hǒ tokhlǒnu he nǐ̤bǎ htohǒ he hî̌nǒ kû̌ pô̤̌nutô̤̌, htodě he ta̤ô̌htûpwa̤nu, a lǒbe bòkè he hî̌nǒ kû̌ pô̤̌nu tô̤̌tô̤̌. Bǎbǎkǎlè pô̤̌khô he gǔ sî̌ganǎ̤ Khrǐ dě he gǔ htûhtò̌ hènè sô̌sô̌kû̌ a ayanu, he jî̌pwǐjî̌le mî̌ca. Khrǐ rû̌htò̌ he kû̌ ta̤we̤ta̤kè hǒtokhlǒ akhû̌akhî pwǎ. 13 Pṳ̌wè̤̌ sî꤮, hǒtokhlǒ numî̌, he nǐ̤bǎ htohǒ he gènè̤ bǎnǒ kû̌ pô̤̌nu khôtô̤̌. Bǎbǎkǎlè he ma̤pwǎ tôcǒpwǎ. He ma̤ hǒtôcǒ numî̌ he shope̤kè ta̤ dǒ a hto nutokhlǒ, dě htû̌ he hètǒ̤ dǒ kòyò bè̌ô̌ ta̤ma̤pè̤̌ahtǔ nutôcǒ a ô̌ ayanu, he jî̌pwǐ̤jî̌le mî̌ca. 14 Dǒ Yeshǔ Khrǐ ma̤ bǎ hto dǒ heya akhû̌akhî, Cǒmara kaǎnṳ̌ he dǒ mǒkhû̌ dě he jî̌pwǐjî̌le hènô tǒ̤dǒ he gǔ nǐ̤bǎ ta̤ma̤nǐ̤khû̌kǎ dǒ mǒkhû̌nu pě. He lò̤kû̌ kòyò bèkhlè̌ tôpwa̤ dǒ a gǔ nǐ̤bǎ kû̌ kòyò ta̤ma̤nǐ̤khû̌kǎ dě a khlè̌ sělě tǒ̤dǒ agutṳ̌ nutôpwa̤ hǒ.

15 Lǒ̤꤮ bò pa dǒ a dû̌htò̌dû̌to̤yobǎ lô̌khô dǒsû̌dǒsò̌ tôkhô tokhlǒnu, pa tô bè̌ sô̌sô̌ lû̌ pa sǎphlǒ pô̤̌ he hǎbǎ sînu. Bǎbǎkǎlè dǒ sîkla tokhlǒkhlǒnu, a kè̌ bè̌ khô̌ a sǎphlǒsǔshi kè̌hî̌dě, Cǒmara gǔ ǐ sî̌yaphlôwô̌ tû̌ sî ta̤gènè̤ dǒ atô nutokhlǒ pě. 16 Pwî̌tètè̌ bǎbǎ, pa gǔ cû̌ wô̤̌wô̤̌ lû̌ dǒ alô̤mô̤̌ pô̤̌ pa sî̌ganǎ̤ hto nutokhlǒ tǎ.

17 He pṳ̌wè̤̌ sî, kè̌lû̌mò̌mṳ lô̌khô he, gû̌ kè̌lû̌mò̌bu kòyò dǒ a gû̌ ô̌htûpwa̤ pô̤̌ pa ô̌htûpwa̤ lṳ̌bǎ sînu tokhlǒnu. ^d 18 Dǒ awǐkhanu mî̌, he pwe̤ǐ sayèyè̤̌ bǎ sî hǒ. Khònò̤̌ he hî̌ bǎ pô̤̌ sô̌ sî kû̌ mǐ̤sǎshi. Kòyò dǒ a bè̌ lô̌khô a sǎphlǒsǔshi kû̌ a sǎkhě Khrǐ ata̤si yô̤̌mûyô̤̌sǎ dǒ nò̌dò̌htǔlô̤ tokhlǒnu a ô̌ dû̌wî̤. 19 Asî aklè̌ nunî̌ a gǔ gutṳ̌ bǎ ta̤pî̌ta̤lṳ̂̌ larakû nupě. Asî Běcǎ mî̌ anǎ̤glǒ a ta̤sǎyṳsǎbǎ nutokhlǒ hǒ. Ta̤dǒ asî tô sòwò̤̌ nutokhlǒ dě a phî̌htò̌lǒ lô̌khô pe anǎ̤. Htokhôtô̤̌ asî gènè̤ còcè̌ pwǎ ta̤ dǒ Kòyòhǎkhû̌phû̌ gènè̤dû̌nǎ̤ nutokhlǒ pwǎ. 20 Bǎbǎkǎlè pa tokhlǒ numî̌ mǒkhû̌ a shiphû̌gǎphû̌ dě pa sǎphlǒshû̌ ô̌pǒ̤kè̌shuǐ pa Běcǎ Yeshǔ Khrǐ dǒ a ma̤hǎplǎge panu ô̌ dǒ mǒkhû̌ hèlò̤ pěnu tôpwa̤ hǒ. 21 Yeshǔkhrǐ gǔ htû̌lè̌tèplè̌ panǎ̤glǒ dǒ a khû̌shiǎjǎ dě a sijònu kû̌ a ta̤pô̤ta̤phǎ pě, dě a ma̤htûhtò̌sô̌ panǎ̤glǒnu pô̤̌ anǎ̤glǒ dǒ a ô̌ kû̌ a ta̤bwǐdû̌sîrîhtû nupě. A pô̤phǎshû̌sho dǒ a ma̤jè̌ lû̌û dǒ a gǔ pǒbò̌bò ta̤lǒ̤bònu, a htû̌lè̌ tèplè̌kèbò panǎ̤glǒ nutokhlǒ pě.