Psalms 10

Ta̤kwicaba dǒ lǎ̤ma̤pè̤̌kè pwa̤ma̤jěma̤jû̌ kòyò aya

1Ǒ Cǒmara tûjû̌pwa̤, na cû̌ô̌ tepheyî̤kè ma̤titè?

Bǎ pa bǎpò̤̌bǎshajî̌ akhanu, na cû̌ ô̌û̌ nanǎ̤ ma̤titè?

2Kòyòjî̌jû̌ phî̌htò̌yô̤̌ anǎ̤sî nî̌ apè̤̌ǎpè̤̌ô pwa̤shèphû̌shèwè̤phû̌.

No pṳ̂̌bǎ sô̌tû̌ asî ta̤dò dǒ a glè̌dò kòyò nu.

3Asî hî̌bǎ htò̌mǒhtò̌phô lô̌khô dǒ a sǎyṳ ma̤ phû̌mò̌ kòyò ashǔshawa̤.

Kòyò dǒ ǎkǒôbe tûû̌ aya tokhlǒnu a ǐshoǐbě dě awîkè Cǒmara tûjû̌pwa̤.

4Dǒ asî bè̌dû̌bè̌htò̌lǒ lô̌khô anǎ̤ akhû̌akhî, asî kè̌lǎǐ pe Cǒmaradû̌ tô̤̌.

Asî gènè̤htò̌nṳ̌ pe Cǒmaradû̌ tôcǒ tô̤̌.

5Asî sǎyṳ titètè̌nu a nǐ̤bǎ pṳ̂̌tôplǎ.

Asî gènè̤htò̌bò̌ Cǒmaradû̌ ata̤cî̌htò̌ aklè̌aklò tô̤̌.

A hî̌tûkhû̌takǎ bò pwa̤sǎkhě asî nutokhlǒ.

6“Pa lǎ̤lò̤jû̌ nî̌ a ô̌ nô̌ tôkhò̌ tô̤̌.

“Pṳ̂̌plǎplǎ pa sǎlě̤ pě. Ta̤jî̌ta̤jû̌ nî̌ a hèbǎ jò pe pa tôkhò̌ tô̤̌,” a gènè̤ ǐ lô̌khô anǎ̤ pô̤̌nu.

7Asî ta̤hî̌bǎhî̌shu alǒbebò kû̌ ta̤ǐshoǐbě, ta̤lòhô, ta̤hî̌tôkhôsò̌ ǐsha kòyò. ^a

Akhû̌phě lǒbebò kû̌ ta̤hî̌bǎ sǎphlǒdû̌, hî̌bǎ phû̌mò̌shî̌htô kòyò. ^b

8Asî cû̌ ô̌yṳ̂̌phǔ dǒ dohtu, ô̌pǒ̤ ma̤si kòyò dǒ ata̤sǔ ô̌tô̤̌nu.

Pṳ̂̌plǎplǎ asî kè̌lǎ ma̤si kòyò dǒ a shôdô pwa̤ma̤jè̌.

9Asî cû̌ô̌ kè̌jôû̌ lô̌khô dǒ jôjǔkû sô̌sô̌kû̌ khî ô̌pǒ̤ ta̤mi̤ nu.

A ô̌pǒ̤ bôshǔ kòyò dǒ a shôdô pwa̤ma̤jè̌nu aklè̌.

A pṳ̂̌nǐ̤ kòyò dǒ a shôdô pwa̤ma̤jè̌nu kû̌ ata̤dò, a cî̌cûgrû̌ cû̌ tepheyî̤kè asî. ^c

10Asî ma̤jî̌ma̤jû̌ ma̤numa̤cěkè kòyò dǒ hǎkhû̌.

Kòyò shôdô pwa̤ma̤jè̌ nutokhlǒ lò̤tě̤nṳ̌kè dǒ kòyò cǔshokhò̌sho acǔdekû.

11Kòyòphǔmò̤̌ nutokhlǒ a gènè̤ǐ lô̌khô anǎ̤ kû̌, “Cǒmara shôpenǎkè pa hǒ.

“A kè̌khô̌kè dě a kè̌shǐ pe pa tô̤̌.”

12Ǒ Cǒmara tûjû̌pwa̤, ihtǒmò̌, plèmò̌ kòyòphû̌mò̤̌ nutokhlǒ. ^d

Shôpe̤nǎkè tǎ̤ kòyò dǒ a khòjî̌khòjû̌nu tǎ̤mǎ̤.

13Kòyòphû̌mò̤̌ cû̌hî̌bǎ takǎ na gètè̤̌ numî̌ ma̤titè?

“Cǒmara plè nô̌ pa tôkhò̌ tô̤̌,” a cû̌hî̌tǒ̤ pô̤̌nu ma̤titè?

14Na kè̌shǐ sî̌ganǎ̤ tě̤tě̤mè̤̌mè̤̌ htobò ta̤pò̤̌ta̤sha, ta̤khò̌jî̌jû̌.

Na gènè̤ tě̤tě̤mè̤̌mè̤̌ ô̌tîwî̌tòwò dǒ na gǔ ma̤jè̌ kòyò.

Pwa̤bǎpò̤̌bǎsha ǐlò̤ anǎ̤ dǒ na cudekû.

Na mî̌ pwa̤tugǔtakaǐ phû̌ dǒ a shôdô mǒ̤phanu.

15Delò̤gǎkè bòmò̌ kòjî̌kòjû̌, kòyòkhu phû̌mò̤̌ acǔgô̌.

Cǐhtò̌ bòmò̌ ta̤sǔta̤plě dǒ asî ma̤ nutokhlǒ tǒ̤htû̌ asî ma̤ bò̌ pe tôcǒ tô̤̌ nu.

16Cǒmara tûjû̌pwa̤ mî̌ khwǐ dǒ a pǒ ta̤ tûjû̌pwa̤ talakhǎ.

A gǔ wṳ̂̌hǎhtò̌bò shigǎphû̌ tokhlǒ dǒ ashigǎkû. ^e

17Ǒ Cǒmara tûjû̌pwa̤ na sî̌yahto kòyò dǒ a khòbǎ ta̤pò̤̌ta̤sha nutokhlǒ ata̤sǎyṳsǎbǎ hǒ.

Na ǐkhû̌ǐǎ dǐshû̌dǐsho asî sǎphlǒ, na ganǎ̤de asî ta̤kwisǎyṳ hǒ.

18Pô̤̌khô hǎkhû̌phû̌ dǒ a sijò nutokhlǒ gǔ ma̤ gònò̤̌gòglè ǐsha phû̌ dǒ shôdô mǒ̤pha kû̌ pwa̤ dǒ kòyò pè̤̌ǎpè̤̌ô lû̌û tô̤̌ ayanu, na takabǐ tûû̌ pû asî. ^f