Psalms 101
Khwǐdû̌ ata̤olò̤
Khwǐdawi̤ ata̤sǎwǐ htû̌sò̌htò̌
1Ǒ꤮ Cǒmara tûjû̌pwa̤, he glè̌ sǎwǐhtò̌ na ta̤mô̤ dǒ ahǎbòjò tô̤̌ kû̌ na ta̤ma̤tôma̤bǎ. He sǎwǐ htû̌sò̌htò̌ na pě. 2Pô̤̌khô he hǎplǎkè kû̌ ta̤bè̌ ta̤sǔ ayanu, he sè̌rè̌ ǐtûû̌ he ta̤ô̌htûpwa̤. Na hè dǒ he ô̌ htû̌꤮ bǎkhòtè pě? He ô̌htûpwa̤ hǎplǎkè kû̌ ta̤bè̌ ta̤sǔ dǒ he hǐkû. 3Lǎ̤ma̤sǔma̤plě kòyò ayanu, he gènè̤tǒ̤ pe bǎtô̤̌. He sǎkhě kòyò dǒ a cǒ kû̌ ayô̤̌ tô̤̌nu. He sǎphlǒ glè̌ sô̌sô̌kû̌ asînu a ô̌ tôcǒ tô̤̌. 4He glè̌ ô̌tephekè kû̌ kòyò dǒ asǎphlǒkěshô̌. He glè̌ ma̤ sôdô̌ ta̤ kû̌ kòyò sǎphlǒ phû̌mò̤̌shǐhtô tô̤̌. 5He glè̌ ma̤pî̌kè kòyò dǒ a dô̌hǔdô̌sè̌ ahǐphòkòshǐ ayô̤ pě. Kòyò dǒ a bè̌dû̌bè̌pwǎ̤ anǎ̤, a bè̌htò̌yô̤̌ asǎphlǒ tokhlǒnu, he glè̌ khòsǎplǒhtû nô̌ asî tô̤̌. 6He glè̌ kè̌shuǐ kòyò dǒ he yṳ̌ǎnṳ̌ lû̌û dǒ gǎkûnu pě. He no ô̌plǒ asî kû̌ he pě. Kòyò dǒ a ô̌htûpwa̤ hǎplǎkè kû̌ ta̤bè̌ ta̤sǔ tokhlǒnu, he no ma̤ asî kû̌ he ta̤ma̤ pě. 7Kòyò dǒ a hî̌bǎ tôhtôtôlò̤ ayô̤̌ tokhlǒnu, a ô̌nṳ̌ kû̌ he hǐhôkû tô̤̌. Kòyò dǒ a hî̌bǎ lahǎlahò ta̤ tokhlǒnu, a nṳ̌ô̌ jò dǒ he lô̤mô̤̌ tôpwa̤꤮ tô̤̌. 8Pṳ̂̌wô̤wô̤꤮ he ma̤pî̌ kèbò kòyòkhu phû̌mò̤̌ nutokhlǒ dǒ gǎkû nupě. He wṳ̂̌htò̌ kèbò kòyò dǒ a ma̤ ta̤phû̌mò̤̌shǐhtô nutokhlǒ dǒ Cǒmara tûjû̌pwa̤ awî̤̌khlo pě.
Copyright information for
KxfSCKXF