Psalms 103

Cǒmaradû̌ ata̤mô̤

Khwǐdawi̤ ata̤sǎwǐ htû̌sò̌htò̌.

1He htû̌sò̌htò̌ Cǒmara tûjû̌pwa̤.

He htû̌sò̌htò̌ ami̤ aplò̌shǐnu kû̌ hesǎphlǒtômèbò.

2He htû̌sò̌htò̌ Cǒmara tûjû̌pwa̤ kû̌ hesǎphlǒtômèbò.

Lǒ̤꤮ bò ta̤wô̌ dǒ a ma̤ htobǎ he tokhlǒnu, he shôpe̤ pè̤̌ tô̤̌.

3A plûkèbò heta̤sǔta̤phû̌mò̤̌ lǒ̤꤮ bò.

A ma̤hǎmǎ kèbò heta̤shǐsha pṳ̂̌꤮ tôcǒ.

4A ma̤hǎplǎge he dǒ ta̤si akû.

A ta̤mô̤ dǒ ahǎbòjò tô̤̌ kû̌ ata̤gwèbǎǐ glû̌bǐ hǒ heikǒ sô̌sô̌kû̌ khû̌glǒ nuhǒ.

5A bè̌mô̤ hesǎphlǒ kû̌ ta̤twèta̤wô̌.

He phû̌sǎ shû̌shokhò̌sho sô̌ge kû̌ lě̤bǎdû̌.

6Cǒmara tûjû̌pwa̤ cî̌htò̌cǒ cî̌htò̌tè̤, cî̌htò̌tô cî̌htò̌bǎ nǐ̤ lǒ̤꤮ bò kòyò dǒ kòyò ma̤jî̌ma̤jû̌ lû̌ nutokhlǒ.

7A ta̤yè̤ô̌nǎ sî tokhlǒ, a dǔlṳ̌ sî̌ganǎ̤ kû̌ KhûMûshě.

Ata̤phǐta̤ma̤ sîtokhlǒ, a dǔlṳ̌ sî̌ganǎ̤ kû̌ Isarela khlilèphû̌.

8Cǒmara tûjû̌pwa̤ mî̌ a gwèbǎǐ kòyò, a ma̤bwǐma̤sîrî kòyò.

A sǎphlǒhtû, a lǒbe kû̌ ta̤mô̤ dǒ ahǎbòjò tô̤̌. ^a

9A bè̌ tû̌ kòyò ta̤sǔ tô̤̌, a sǎphlǒdû̌ tû̌ nǒ kòyò tô̤̌.

10Pô̤̌ ta̤sǔta̤plě ô̌ dě pa tô khòbǎ ǐbò̌nu, a no khòbǎ pa tô̤̌.

Pô̤̌ pa ma̤sǔ ta̤nu, pa tô khòbǎ bǎbǎkǎlè a ma̤ geshî̌shǔ pa tô̤̌.

11Pô̤̌ mǒkhû̌ ô̌htò̌yî̤khlo kû̌ hǎkhû̌nu, Cǒmara ata̤mô̤ dǒ ahǎbòjò tô̤̌nu, adû̌ahtûlǒ mî̌ca dǒ kòyò ǐsha bè̌dubè̌nǎ̤ lû̌ nutokhlǒ aya.

12Cǒmara wî tepheyî̤kè bòkè pata̤sǔ tokhlǒ asô̌sô̌kû̌ lṳmṳ̌htò̌ kû̌ lṳmṳ̌lò̤ ô̌tepheyî kè̌khî lû̌ûnu.

13Pô̤̌ pha gwèbǎǐ aphû̌ tokhlǒnu, Cǒmara tûjû̌pwa̤ gwèbǎǐ pwa̤ dǒ a ǐsha dě bè̌dubè̌nǎ̤ lû̌ nutokhlǒ.

14Panǎ̤glǒnu kòyò bô̌ lû̌û hî̌tènu, a sî̌ganǎ̤ lǒ̤bò.

Pa mî̌ hǎkumṳ̌ pwǎnu a shôpe̤ tô̤̌.

15Kòyòhǎkhû̌phû̌ alṳmṳ̌ni̤ lṳmṳ̌sanu, a phǔ sô̌sô̌pwǎkû̌ mi̤mṳ̌.

Pa sô̌sô̌pwǎkû̌ ta̤phô dǒ a phôhtò̌ dǒ ya̤dakhû̌ nutokhlǒ pwǎ.

16Bǎ gili̤sǎ hèhtû̌bǎ asî akhanu, aphô tokhlǒ lûhǎmǎ kèbò, a gûlǎ̤ ô̌kè pe tô̤̌.

17Pwa̤ dǒ a ǐsha dě bè̌dubè̌nǎ̤ Cǒmara tûjû̌pwa̤ tokhlǒ aya dě, ata̤mô̤ dǒ ahǎbòjò tô̤̌nu a ô̌měô̌gle tûjû̌pwa̤ talakhǎ.

Ata̤cǒta̤tè̤ tokhlǒnu a ô̌měô̌gle sělětû̌ tǒ̤ dǒ aphû̌ali̤ alûala̤ sîtokhlǒ tôhtu hto tôhtu.

18Htokhôtô̤̌ a ô̌měô̌gle bǎpô̤̌ pwa̤ dǒ acǒ kû̌ Cǒmara ata̤olò̤ nutokhlǒ kû̌ pwa̤ dǒ a ganǎ̤de jûǎ lû̌ ta̤sû̌ta̤tòwò nutokhlǒ aya.

19Cǒmara tûjû̌pwa̤ bè̌ô̌nǎ agògǒhtò̌yô̤̌lǒ dǒ mǒkhû̌.

A htû khwǐ bǎnu dě a pǒǐ lǒ̤bò ta̤ pṳ̂̌꤮ tôcǒ.

20Ǒ꤮ mǒkhû̌tanaphû̌ dǒ akhû̌aǎ shû̌sho, a ganǎ̤de lû̌ ta̤sû̌ta̤tòwò, a jûǎ lû̌yô̤̌ sî, htû̌sò̌htò̌mò̌ lô̌khô Cǒmara tûjû̌pwa̤.

21Lǒ̤꤮ bò mǒkhû̌tanaphû̌ akli saprûdû̌ dǒ a ma̤ tô Cǒmara asǎphlǒ lǒ̤bò sî꤮, htû̌sò̌htò̌ lô̌khômò̌ Cǒmara tûjû̌pwa̤.

22Lǒ̤꤮ bò a bô̌lò̤ǐ tokhlǒ kû̌ bò a pǒǐ gûlǎ̤ pṳ̂̌꤮ tôkû sî꤮, htû̌sò̌htò̌ lô̌khômò̌ Cǒmara tûjû̌pwa̤.

He htû̌sò̌htò̌ Cǒmara tûjû̌pwa̤ kû̌ hesǎphlǒtômèbò.