Psalms 104

Htû̌sò̌htò̌ǐ Cǒmara pwa̤bô̌lò̤ta̤

1He htû̌sò̌htò̌ Cǒmara tûjû̌pwa̤ kû̌ he sǎphlǒ tômèbò.

Ǒ Cǒmara tûjû̌pwa̤, he Cǒmaradû̌, na mî̌ adû̌ahtû.

Na kûsô̌htò̌ǐ ta̤bwǐdû̌sîrîhtû, ta̤lîta̤kakha.

2Na kûsô̌htò̌ǐhǒ ta̤lî pô̤̌ kòyò kûsô̌htò̌ jejû.

Na hǔbǐhtò̌ mǒlǎ̤ pô̤̌ kòyò hǔbǐ hugò̌.

3Na ma̤htò̌ǐ nahǐ dǒ poǒlṳ̌khû̌.

Na noǐ poǒlṳ̌ pô̤̌ na tîsî̌lô̤.

Na dò̌cû̌ǐ gili̤sǎ adî̌gî.

4Na no htûhtò̌ gili̤sǎ pô̤̌ na tanaphû̌nu.

Na no htûhtò̌ mî̌gè̌plô̤̌ pô̤̌ na pwa̤ma̤ta̤phû̌nu. ^a

5Na ma̤htò̌ hǎkhû̌ akòshî̌kòtṳ̌ dě a kuyṳ̌jò pè̤̌jò tô̤̌.

6Na hǔbǐ hǎkhû̌ kû̌ shidû̌shite̤we̤ pô̤̌ kòyò hǔbǐ kû̌ jejû.

Shi tokhlǒ dû̌htò̌ jò dǒ khôlô tokhlǒ akhi.

7Na sǎhtǎdû̌da dě shi dû̌cû̌ tephekèbò hǒ.

A ganǎ̤de na shî̌lî̌ dě a tṳplṳ̌tewě̤ hǎhtò̌cû̌ phwèkèbò hǒ.

8Na no htûhtò̌dû̌htò̌ bòkè khôlô, na no lò̤yô̤̌kè lô̤̌.

A htûhtò̌ bòkè pô̤̌ na sǎyṳ no htûhtò̌ asî dǒ agûlǎ̤ kû̌ agûlǎ̤nu.

9Pô̤̌khô shi glè̌ dû̌bǐjò hǎkhû̌ tô̤̌nu, na ma̤mǎnǎ tě̤tṳ̌kè hto asîgǎhtu.

10Na no lô̤̌cû̌bò shilô̤̌phû̌ dǒ lô̤̌te̤yô̤̌ akû.

Shi lô̤̌cû̌ lô̌khô dǒ khôlôplǎ.

11Shilô̤̌ nutokhlǒ ǐ lǒ̤bò ta̤phû̌ta̤li̤ shilǎ̤ô.

Mî̌ò̌lǎmi̤ sîtokhlǒ ôkǒôbe bò shi.

12Htû̌patǐ wi̤ dǒ mǒlǎ̤ ma̤ǐ api̤ bǎ shilô̤̌htu.

A pwe̤htò̌ dǒ sǒdû̌khi.

13Na ô̌ dǒ na hǐ mǒkhû̌, na no julò̤ gǎ dǒ khôlô sîtokhlǒ akhû̌.

Hǎkhû̌nu a lǒbebò kû̌ na ta̤hôwe̤hôwô̌.

14Na no dô̌htò̌ mi̤mṳ̌ dǒ ta̤phû̌ta̤wè̤ aya.

Na no phǎhtò̌ sǒdogotǒ̤ dǒ kòyò hǎkhû̌phû̌ lǎ̤ǎ aya.

Asî shǒǐ sǎhtò̌phôhtò̌ ǐjòpô̤̌ sǒsusǒsǎ bǎ hǎkhû̌.

15Asî nǐ̤bǎ sîpî̌shisǐyô̤̌ dǒ a ma̤mô̤ kòyò hǎkhû̌phû̌ sǎphlǒ, htǒshi dǒ a ma̤ sǎyǎ̤ asî, kû̌ shǎǎshǎô dǒ a ǐ asî ta̤khû̌ta̤ǎ.

16Cǒmara tûjû̌pwa̤ bô̌htò̌ sǒmṳ̌dû̌tònò dǒ Lebanû khôlôkhû̌, a nǐ̤bǎ lǒlǒbebe gǎjushi.

17Htû̌patǐ tokhlǒ ma̤ǐ api̤ dǒ sǒmṳ̌ nutokhlǒ alô̤.

Htû̌shiphalo̤dû̌ tokhlǒ ma̤ǐ alǎ̤ô̌ gûlǎ̤ dǒ sǒmṳ̌dû̌tònò akla.

18Khôlôdû̌khôlôhtû mî̌ pè̤̌mi̤ lǎ̤ô̌tûdû.

Lǒ̤dû̌lǒ̤htû mî̌ yṳ̌dodû̌ lǎ̤ô̌û̌.

19Na bô̌lò̤nṳ̌bǎ la dǒ lǎ̤ma̤mǎnǎǐ gǎgû̌gǎju ashěakhǎ.

Lṳmṳ̌nu a tôbǎ lò̤tě̤ bǎkhò̌tènu, a sî̌ganǎ̤ ǐtûû̌.

20Na bô̌lò̤ ta̤khǐ, a htûhtò̌ lṳmṳ̌khǐ.

Lǒ̤bò ta̤phû̌ta̤wè̤̌ dǒ mi̤kla hǎhtò̌cû̌gǎ bǎnukha.

21Khî tôlô cû̌lèpṳ̂̌ǎ ashǎ, agǒgaya̤ lô̌khô.

A kè̌lǎ ashǎ lǎ̤ǎ dǒ Cǒmaradû̌ ǐ asînu.

22Bǎ lṳ̌mṳ̌lîbû hè akhanu, asî getîkhî, a gehǎmôô̌ sô̌ dǒ akû.

23Kòyò hǎkhû̌phû̌ hǎhtò̌cû̌ ǎwè̤, a ǎwè̤ tǒ̤dǒ lṳmṳ̌lò̤tě̤.

24Ǒ Cǒmara tûjû̌pwa̤, na ma̤ ta̤ tokhlǒnu a ô̌wô̤̌ le.

Na bô̌lò̤ ta̤ nutokhlǒ kû̌ ta̤sî̌ta̤jò̌ lǒ̤bò.

Hǎkhû̌nu a ô̌ be bò kû̌ na ta̤bô̌ta̤tè.

25Shidû̌te̤we̤ numî̌ adû̌alè̤̌.

Ta̤bô̌ adû̌dû̌ apî̌tî̌tî̌ dǒ a gòyò̤̌cû̌ dǒ shikû tokhlǒnu dô̌bòpè̤̌ pejò tô̤̌, a ô̌bò lô̌khô bǎnu.

26Sǒkhlidû̌ tokhlǒ cû̌le̤cû̌ge bǎnu.

Tò̤̌phû̌ pǎdû̌ lawi̤ta dǒ na bô̌lò̤ lû̌ûnu a lǎ̤pě̤ lò̤wě̤lò̤sô mô̤ bǎnu. ^b

27Pô̤̌khô na gǔ ǐ bò ta̤phû̌ta̤wè̤ nutokhlǒ ashǎǎshǎô ashěakhǎ kû̌ ashěakhǎ ayanudě, asî kè̌shuǐhtò̌ dǒ naô̌.

28Bǎ na ǐlò̤ asî shǎǎshǎô akhanu, asî nǐ̤bǎbò.

Bǎ na yṳ̂̌lò̤ asî shǎǎshǎô akhanu, asî sǎphlǒmô̤bò.

29Bǎ na kè̌khô̌kè akhanu, asî ǐsha gònò̤̌gòglè lǒ̤bò.

Bǎ na phî̌hǎhtò̌kè asî ta̤htûpwa̤ akhanu, asî sikè, a htûhtò̌bò sô̌ hǎkumṳ̌.

30Bǎ na sûhè bǎ asî na ta̤htûpwa̤ akhanu, na bô̌sa tèplè̌khô̌ asî.

Na ma̤sawô̌ tîkhîsô̌ hǎkhû̌.

31Cǒmara tûjû̌pwa̤ asîrîdû̌sîrîhtû ô̌ hènè pû tûjû̌pwa̤ talakhǎ nî̌.

Cǒmara tûjû̌pwa̤ sǎlě̤sǎlò̤ pû kû̌ ata̤phǐta̤ma̤ nunî̌.

32Na kè̌lò̤ hǎkhû̌ dě a guyṳ̌.

Na tô̌bǎ pwǎ khôlô dě mî̌khǔ khǔhtò̌.

33He gǔ sǎwǐhtò̌ Cǒmara tûjû̌pwa̤ tǒ̤dǒ he si.

Bǎ he ô̌htûpwa̤ pe akhanu, he gǔ sǎwǐ htû̌sò̌htò̌ǐ he Cǒmaradû̌.

34Pwa̤ dǒ a ma̤mô̤ he sǎphlǒ mî̌ a ô̌ tǒ̤pwǎ na nô̤̌pwǎ.

He ta̤hî̌bǎ tokhlǒ glè̌ tôbǎ pû Cǒmara tûjû̌pwa̤ asǎphlǒ nî̌.

35Ta̤sǔta̤plěphû̌ glè̌ pî̌kè bò dǒ hǎkhû̌ nunî̌.

Kòyòphû̌mò̤̌ glè̌ hǎmǎkè bò pû tûjû̌pwa̤ nî̌.

He htû̌sò̌htò̌ Cǒmara tûjû̌pwa̤ kû̌ he sǎphlǒ tômèbò.

Htû̌sò̌htò̌ Cǒmara tûjû̌pwa̤.