Psalms 105
Cǒmaradû̌ ma̤hǎplǎ a kòyò tokhlǒ
1Hî̌bwǐhî̌sîrî Cǒmara tûjû̌pwa̤, kwicabahtò̌ kû̌ ami̤. Dǐ sî̌ganǎ̤ padô̌ khlilèphû̌ tokhlǒ kû̌ a ma̤ hto ta̤ hǒnu. 2Sǎwǐhtò̌mò̌ yǎ, sǎwǐ htû̌sò̌htò̌mò̌ yǎ. Shôbǐǐlṳ̌ bǎbòmò̌ kòyò kû̌ lǒ̤bò a ma̤ ta̤cô̌klǐcô̌sènu. 3Htû̌sò̌htò̌ mò̌ ami̤plò̌shǐ. No sǎlě̤sǎlò̤ mò̌ kòyò dǒ a kè̌lǎ Cǒmara tûjû̌pwa̤nu. 4Kè̌lǎ mò̌ Cǒmara tûjû̌pwa̤, kwihtò̌ mò̌ ata̤khû̌ta̤ǎ. Pṳ̂̌plǎplǎ hèphǔ dǒ alô̤mô̤̌. 5Gènè̤̌htò̌bǎ ta̤cô̌klǐcô̌sè, ta̤ ǒò̌ kiti̤kaa, ta̤cî̌htò̌tôcî̌htò̌bǎ dǒ a ma̤htonu. 6Sî mî̌ Cǒmaradû̌ apwa̤ma̤ta̤phû̌ amè̤̌kû̌ PhaAbraha aphû̌ali̤ hǒ. Sî mî̌ Phayakò akhlialè dǒ Cǒmara rû̌htò̌ tokhlǒ hǒhǒ. 7A mî̌ Cǒmara tûjû̌pwa̤, amè̤̌ pa Cǒmaradû̌ hǒ. A cî̌htò̌cǒ cî̌htò̌tô bò hǎkhû̌běkhû̌. 8A gènè̤nṳ̌ ata̤olò̤ pṳ̂̌tôplǎ. Ayô̤̌ dǒ a olò̤ hto tokhlǒnu, kòyò tôhtu hto tôhtu, htu dǒ arî̌kû a shôpe̤ pè̤̌ tô̤̌. 9A cǒ kû̌ ayô̤̌ dǒ a olò̤ hto kû̌ PhaAbraha, a wṳ̂̌dòlò̤ hto kû̌ Pha Isè̌nu. a 10A bè̌měbè̌gle ta̤sû̌ta̤tòwò kû̌ Phayakò. A olò̤ měgle ayô̤̌ kû̌ PhaIsôrěla tûjû̌pwa̤. b 11A hî̌ kû̌, “He ǐ na Khanagǎ pô̤̌ na û̌cata̤bǐ.” 12Bǎ a hî̌ ayô̤̌ pô̤̌o akhanu, asî ô̌tîkî̌phû̌ nô̤̌ pe pwǎ. Asî htû shǐpwǎ̤shǐmè̤ dǒ Khana̤gǎkû pî̌tî̌phû̌nô̤̌ pwǎ. 13Asî cû̌ tôgǎ hto tôgǎ, tôkû hto tôkû. 14A no ma̤jî̌ma̤jû̌ asî kû̌ kòyò tôpwa̤ tô̤̌. Dǒ asî ayanu, a dǐsè̌rè̌ǐ khwǐ tokhlǒ dǒ a glè̌ tugutakaǐ asî. c 15A hî̌ kû̌, “Ma̤bǎma̤sha tǎ̤ kòyò dǒ he rû̌htò̌ a nutokhlǒ mǎ̤. “Ma̤shama̤htò tǎ̤ hepiwi̤pèsè nutokhlǒ mǎ̤.” 16Cǒmara tûjû̌pwa̤ no ô̌htûhtò̌ gǎwǐ̤gǎkodû̌ dǒ Khana̤gǎkû. A ma̤pî̌ma̤kè kèbò sǒsǎwû̌phô bǔmṳ̌ sîtokhlǒ. d 17A sûcû̌wǐ bǎ kòyò tôpwa̤ dǒ asî alô̤mô̤̌. Kòyò shaǎcû̌kè Khûyûtǎ dǒ Ijǐgǎ pô̤̌ jû̌ tôpwa̤. e 18Kòyò comě htòbò akhò̌lôpô̤̌ kû̌ sǒpli̤ tě̤htò̌. Kòyò tûplû̌nṳ̌ tě̤htò̌pli̤ dǒ agô̌bôlô̤. f 19Cǒmara tûjû̌pwa̤ hî̌nǎ ayô̤̌ tokhlǒ lǒhtò̌behtò̌ khôtô̤̌nu, a ma̤kè̌kè̌ pe Khûyûtǎ ata̤bè̌ sǎphlǒ. 20Ijî̌gǎkhwǐ plûhǎhtò̌ kè Khûyûtǎ. Pwa̤pǒǐ kòyò tokhlǒ nutôpwa̤ plûhǎhtò̌ kè lû̌û. g 21Khwǐ no htû lû̌û kû̌ pwa̤pǒǐ ahôhta. A no pǒǐ lû̌û kû̌ khwǐ atě̤ta̤ lǒ̤bò. h 22Khûyûtǎ nè̌klè̌nè̌klò bò̌ khwǐ apwa̤ma̤ta̤phû̌ tokhlǒ pô̤̌ ata̤sǎyṳ ô̌nu. A sû̌ǐtòwòǐlò̤ pwa̤htû ikǒlǒkò̌dû̌ dǒ a dǐsî̌yajè̌ khwǐ nutôpwa̤ tokhlǒnu. 23Htodě PhaIsôrěla hètǒ̤ bǎ Ijǐgǎ. i A hè htû gû̌mṳ̂̌ shǐtèmè̤ bǎ Hama khlilèphû̌ ô̌ ǐ gǎkû. j 24Cǒmara tûjû̌pwa̤ no phû̌ô̌wô̤̌ li̤ô̌plṳ̂ a kòyò. A no cǔshokhò̌sho khlo asî kû̌ pwa̤sǎkhě asînu. k 25A no htû̌lè̌tèplè̌ khô̌kè Ijǐ khlilèphû̌ asǎphlǒ. A no sǎkhěkkhû̌khwè Ijǐ khlilèphû̌ tokhlǒ kû̌ Cǒmara apwa̤ma̤ta̤phû̌ tokhlǒ. 26A sûhè apwa̤ma̤ta̤phû̌ KhûMûshě kû̌ Pha Arṳ̂ dǒ a rû̌htò̌ nusò̌ginǐ̤. l 27KhûMûshě kû̌ Pha Arṳ̂ dǐlṳ̌ bǎ Cǒmara ata̤ma̤ǒò̌ sû̌khǔsû̌sò̌ dǒ Ijî̌khlilèphû̌ akla. A dǔlṳ̌ pô̤̌ ta̤ma̤cô̌klî̌cô̌sè dǒ Hama khlilèphû̌ agǎkû. 28Cǒmara no khǐlò̤bò tôgǎ lǎ̤bò. Bǎbǎkǎlè Ijî̌ khlilèphû̌ ma̤takǎshǔ ayô̤̌ dǒ a hî̌bǎhtò̌ nutô̤̌. m 29Cǒmara no htûhtò̌kèbò asî shilô̤̌mǒ̤dû̌ kû̌ sǐ, dě tò̤̌phû̌ sikè lǒ̤bò. n 30Dî̌phû̌ tokhlǒ ô̌be tîpî̌ lǒ̤bò dǒ asîgǎkû pṳ̂̌ tôkû. o A cû̌tǒ̤ ô̌tǒ̤ bò dǒ khwǐcaphǎ hôhtakû. 31Bǎ Cǒmara hî̌bǎlò̤ ayô̤̌ akhanu, phǔsî̌phû̌ kû̌ kadǎ tokhlǒ a wî̤cû̌ ô̌bebò asîgǎ tôgǎ. p 32Gǎ tô ju dǒ asîgǎ tôgǎbò bǎbǎkǎlè Cǒmara no julò̤ siwǐ̤jî̌, anolò̤ shî̌lî̌ dǒ asî gǎkû. 33A ma̤pî̌ kèbò Ijî̌phû̌ sîpî̌mṳ̌ kû̌ dǔshimṳ̌. A ma̤lòkhǔpo̤ ma̤lagǎ kèbò sǒmṳ̌ dǒ asîgǎkû. 34A hî̌lò̤ ayô̤̌ dě dèpǒ̤ tokhlǒ hèlò̤ lǒ̤bò. Dèpǒ̤ tokhlǒ mî̌ dô̌bòpè̤̌ pe tô̤̌. q 35Asî lò̤ǎ bò sǒdosǒlǎ sulè̌sula ô̌ dǒ gǎkû. A lò̤ǎbò ta̤sǎta̤phô dǒ asî lǔǐǎǐ dǒ awe̤kûnu. 36Htodě Cǒmara ma̤sikèbò Ijǐ khlilèphû̌ aphû̌wè̤̌pwǎ̤. Phû̌wè̤̌pwǎ̤ mî̌ asî ta̤khû̌ta̤ǎ dǒ awǐlǒ tôcǒ. r 37A kaǎhtò̌gekè Isôrělaphû̌ tokhlǒ, asî tô̤̌geǐ lô̌khô ruhta. s Dǒ asî khlilè aklanu, ata̤khû̌shiǎjǎ ô̌ tôpwa̤ tô̤̌. 38Ijǐ khlilèphû̌ sîtokhlǒ ǐsha jî̌jû̌ Isôrělaphû̌ tokhlǒ alǎ̤ akhû̌akhî, bǎ asî hǎhtò̌ge akhanu, Ijǐ khlilèphû̌ tokhlǒ sǎlě̤sǎlò̤ lǒ̤bò. 39Cǒmara hǔbǐ tugǔtakabǐ asî kû̌ poǒlṳ̌. Lṳmṳ̌khǐ dě a shělîlò̤ bǎ asî kû̌ mî̌. t 40Asî kwihtò̌ ta̤yî̌ dě a ǐlò̤ bǎ asî htû̌pwǐ. A ǐlò̤ bǎ asî kû̌ khòmû ô̌ dǒ mǒkhû̌ hèlò̤, asî ǎkǒôbe lǒ̤bò. u 41Cǒmara ma̤phò̌ bǎ asî lǒ̤ dě shi shěhtò̌. A lô̤̌꤮ cû̌ dǒ gǎshashigǎkhû̌ asô̌sô̌kû̌ shilô̤̌. 42Pô̤̌nudě Cǒmara sî̌yatǒ̤ ata̤olò̤ dǒ aplò̌ashǐ dǒ a olò̤ hto kû̌ apwa̤ma̤ta̤phû̌ PhaAbrahanu dě a ma̤ bǎ asî pô̤̌nu. 43Pô̤̌nudě a kaǎge a kòyò dǒ Ijǐgǎkû kû̌ ta̤sǎlě̤sǎlò̤. A kaǎge a kòyò dǒ arû̌htò̌ǐ kû̌ ta̤sǎwǐ sǎlě̤sǎlò̤. 44Kòyò khlilèphû̌ shǔshawa̤ hǎkhû̌ hǔkla tokhlǒnu, a ǐbò kû̌ asî. Kòyò hǔkla dǒ kòyò jî̌pwǐ̤ma̤ǐ tokhlǒnu, a htûkè asî ta. v 45Pô̤̌khô asî gǔ ganǎ̤de Cǒmara ata̤hî̌lò̤ yô̤̌sǎ dě asî jûǎbò ata̤sû̌ta̤tòwò ayanu, a ma̤ ta̤ nutokhlǒ pwǎ. Htû̌sò̌htò̌ Cǒmara tûjû̌pwa̤.
Copyright information for
KxfSCKXF