Psalms 106

Cǒmara wô̌ dǒ a kòyò tokhlǒ aya

1Htû̌sò̌htò̌ Cǒmara tûjû̌pwa̤.

Cǒmara tûjû̌pwa̤ wô̌ jî̌le, hî̌bwǐhî̌sîrîhtò̌ lû̌û.

Ata̤mô̤ dǒ ahǎbòjò tô̤̌nu, a ô̌měô̌gle tûjû̌pwa̤. ^a

2Mò̌pè tôpwa̤ cû̌shèbǐǐlṳ̌ bòpe jò bò Cǒmara tûjû̌pwa̤ ma̤htohǒ ta̤cô̌klǐcô̌sè dǒ adû̌ayô̤̌ nutokhlǒ ya?

Mò̌pè tôpwa̤ htû̌sò̌htò̌ lǒbe jò lû̌û ya?

3Cǒmara ǐshowî̤ kòyò dǒ a ma̤tô̤ma̤bǎ ta̤ nutokhlǒ kû̌ kòyò dǒ pṳ̂̌plǎplǎ a ma̤cǒma̤tě̤ ta̤ nutokhlǒ.

4Ǒ Cǒmara tûjû̌pwa̤, bǎ na kè̌dû̌ ma̤mô̤ma̤wô̌ nakòyò tokhlǒ akhanu, sî̌yahtò̌tǒ̤ he.

Bǎ na ma̤hǎplǎkè asî akhanu, ma̤jè̌ gû̌ he.

5Na kòyò dǒ na rû̌htò̌ hǒtokhlǒ ata̤ǎbǎôbǎnu, no kè̌shǐ pû he.

Nakhlilè ata̤sǎlě̤sǎlò̤nu, no sǎlě̤sǎlò̤ padô̌ he bǎnu.

No htû̌sò̌htò̌ padô̌ he kû̌ na kòyò tokhlǒ.

6Pô̤̌ paphipaphu tokhlǒ ma̤sǔnu, pa ma̤sǔma̤plě lǒ̤bò.

Pa ma̤sǔ lǒ̤bò hǒ, pa ma̤bò ta̤phû̌mò̤̌shǐhtô hǒ.

7Bǎ paphipaphu tokhlǒ ô̌ pe dǒ Ijǐgǎkû akhanu, asî bè̌sû̌bè̌sǎ padô̌ na ma̤hto ta̤ma̤cô̌klî̌cô̌sè tokhlǒ tôcǒ tô̤̌.

Asî shôpe̤shônǎ bò ta̤ dǒ na ma̤ bǎ asî kû̌ na ta̤mô̤ adû̌ayô̤̌ dǒ ahǎbòjò tô̤̌nu.

Asî ma̤tûkhû̌takǎ na dǒ shidû̌shite̤we̤ kòshî̌, amè̤̌kû̌ shidû̌shitewe̤ lî̤htu. ^b

8Bǎbǎkǎlè pô̤̌khô na gǔ dǔlṳ̌ǐ na ta̤sîrîpô̤phǎ shû̌sho dǒ lǎ̤bè̌dubè̌nǎ̤ǐ nami̤wî̤mi̤wô̌ ayanu, na ma̤hǎplǎge asî.

9Na hî̌lò̤ nayô̤̌ kû̌ shidû̌shitewe̤ lî̤ dě a sǔtèkhwè̌ bòkè.

Na sûcû̌ phlǔ bò̌kè Isôrělaphû̌ sîtokhlǒ kû̌ shidû̌shite̤we̤ sô̌sô̌kû̌ asî cû̌tûlû̌bò̌kè gǎshashigǎnu. ^c

10Na ma̤hǎplǎge asî dǒ pwa̤sǎkhě asî acǔdekû.

Na ma̤hǎplǎge asî khuwè̤ tokhlǒ acǔdekû.

11Shi plǒbǐ sikèbò pwa̤sǎkhě asînu.

A ô̌htûpwa̤ pe tôpwa̤ tô̤̌.

12Htodě asî yṳ̌ǎnṳ̌ na ta̤olò̤.

A sǎwǐ htû̌sò̌htò̌ǐ na. ^d

13Bǎbǎkǎlè tashò̌phû̌ akû nô̤̌, asî shôpe̤ phwèkèbò ta̤ dǒ na ma̤hto nutokhlǒ.

A ô̌yṳ̂̌bò̌ pe na ta̤yṳ̂̌klè̌nèklò tô̤̌.

14Bǎ asî ô̌ dǒ gǎshashigǎkhû̌ akhanu, asî kwiǎ shǎǎshǎô dǒ a nǎsǔǐ dě sǎǎsǎô nutokhlǒ.

Asî ma̤kè̌kè̌ Cǒmara bǎnu. ^e

15Pô̤̌nudě pô̤̌ asî kwihtò̌nu, na ǐlò̤ bǎ asî.

Bǎbǎkǎlè na nohtûhtò̌ ta̤shasiwě̤ dǒ asîkla.

16Bǎ asî ô̌ pe dǒ gǎshashigǎkhû̌ akhanu, a sǎkhwè̌ Phamṳ̂shě kû̌ Cǒmara tûjû̌pwa̤ apwa̤lṳ̌htò̌ ikǒdû̌ aplò̌shǐ, Pha Arṳ̂ nusò̌ginǐ̤. ^f

17Ma̤pô̤̌nu akhû̌akhî, hǎkhû̌ è̌phò̌ dě a pî̌genṳ̌kè Khûdatana dě apî̌genṳ̌ pô̤̌ Khûabǐramǎ kû̌ asû̌akhô sî.

18Cǒmara plûlò̤ mî̌ dǒ asî aprṳ̂aphǎ alô̤ dě a usi kèbò kòyòkhu phû̌mò̤̌ nutokhlǒ.

19Asî bô̌ lô̌khô pṳ̂̌phaphû̌ yô̤ tôyô̤ bǎ hò̌rǎ khôlô kòshî̌.

A cubǔcabǎhtò̌ nǐ̤ lô̌khô ta̤yǎ̤yô̤yǎ̤gî̌. ^g

20Asî htû̌lè̌kè Cǒmara dǒ asiwi̤dû̌sòwò̤htû nutôpwa̤ kû̌ pṳ̂̌phaphû̌ dǒ a ǎ pwǎ mi̤ nutôdo ayǎ̤yô̤yǎ̤gî̌.

21Asî shôpe̤shônǎkè Cǒmaradû̌ dǒ a ma̤hǎplǎkè hto asînu, a ma̤ bǎ hto asî ta̤sǔkhǔsǔsò̌ adû̌ayô̤̌ dǒ Ijǐgǎkû nutôpwa̤.

22A ma̤ cô̌klǐcô̌sè bǎ Hamǎ khlilèphû̌ ô̌ gǎkû.

Kǎtô̤̌ a ma̤nṳ̌ ta̤cô̌klǐ kiti̤kaa bǎ shidû̌shitewe̤ lî̤htu nutôpwa̤nu, asî shôpe̤shônǎkè.

23Pô̤̌nukhû̌khî, Cǒmaradû̌ sǎphlǒdû̌ asî, a glè̌ ma̤sikèbò asî.

Bǎbǎkǎlè pô̤̌khô Cǒmara gǔ sǎphlǒjǎlò̤ tîkhî sô̌nu, a glè̌ ma̤sikè asî tô̤̌ ayanu, Phamṳ̂shě dǒ Cǒmaradû̌ rû̌htò̌ yǎ nutôpwa̤, a kwisǎyṳhtò̌ Cǒmara dǒ asîgûlǎ̤.

24Asî yṳ̌ǎnṳ̌ Cǒmaradû̌ ata̤olò̤ nutô̤̌ akhû̌akhî, a gènè̤ pî̌tî̌ gǎmô̤gǎwô̌ nutôgǎ. ^h

25Asî ô̌ lô̌khô dǒ ahǐphû̌kû dě a tûmṳ̂̌ta̤ma̤.

A ganǎ̤de Cǒmara tûjû̌pwa̤ ayô̤̌ tô̤̌.

26Ma̤pô̤̌nudě Cǒmara wṳ̂̌dòlò̤ ayô̤̌ kû̌ asî dǒ a glè̌ ma̤sibò asî bǎ gǎshashigǎkhû̌nu.

27A nosikè asî khlilè tokhlǒ bǎ khlilèphû̌ shǔshawa̤ akla.

A no pushǔpeshî cû̌bò asî dǒ gǎshǔshawa̤ gǎkhlo. ⁱ

28Asî cabahtò̌ lô̌khô khlilèphû̌ ashǔshawa̤ a Cǒmara dǒ kòyò kaǎ kû̌ balǎ bǎ Peûrǎ khôlôkhǐ nutôkû.

A ǎ lô̌khô ta̤yî̌ dǒ amè̤̌ kòyò ma̤si lṳhtò̌ ta̤phû̌ta̤wè̤ kû̌ Cǒmara dǒ a si nutokhlǒ ayî̌. ^j

29Dǒ asî ma̤ ta̤phû̌mò̤̌shǐhtô akhû̌akhî, a ma̤ sǎphlǒdû̌ Cǒmara tûjû̌pwa̤.

Pô̤̌nudě ta̤shasiwě̤ ô̌htò̌ dǒ asîkla.

30Bǎbǎkǎlè Khûphǐna̤ ma̤sikè pwa̤ma̤sǔta̤ nutokhlǒ dě Cǒmara no ô̌kǔkè nô̌ ta̤shasiwě̤.

31Ma̤pô̤̌nudě kòyò gènè̤htò̌bǎsô̌ lû̌û pô̤̌ kòyòcǒkòyòtè̤ tôpwa̤ tôhtu hto tôhtu, tûjû̌pwa̤ talakhǎ.

32Asî ma̤ sǎphlǒdû̌ bò Cǒmara tûjû̌pwa̤ bǎ Merǐbǎ shipǒ̤htò̌nu.

Dǒ asî ma̤ pô̤̌nukhû̌khî, KhûMûshě kè̌shǐtṳ̌bǎ kû̌ ta̤pò̤̌ta̤sha. ^k

33Asî ma̤sǎphlǒdû̌ lô̌khô Phamṳ̂shě akhû̌akhî, Phamṳ̂shě hî̌bǎbǐ hî̌bǎô̌ bòkè.

34Pô̤̌ Cǒmara tûjû̌pwa̤ no ma̤si asî kû̌ khlilèphû̌ ashǔshawa̤ tokhlǒnu, asî ma̤ pô̤̌ a noma̤ asî nutô̤̌. ^l

35Bǎbǎkǎlè asî ô̌sakla bò lô̌khô kû̌ kòyò khlilèphû̌ nutokhlǒ.

Asî sû̌ǐ gû̌ma̤ bò pô̤̌ kòyò khlilèphû̌ nutokhlǒ alǎ̤klôma̤nu.

36Asî cubucabahtò̌ bò kòyò khlilèphû̌ nutokhlǒ ayǎ̤yô̤yǎ̤gî̌ akhû̌akhî, asî tǒ̤bò dǒ ta̤pî̌ta̤lṳ̂̌.

37Asî lṳhtò̌tòhtò̌bò aphû̌pwa̤mǒ̤, aphû̌pwa̤khû tokhlǒ kû̌ khînǎkhîno. ^m

38Asî ma̤sibò kòyò dǒ ata̤sǔ ô̌tô̤̌ tokhlǒ dǒ amè̤̌ asî aphû̌pwa̤mǒ̤ kû̌ phû̌pwa̤khû sanǎ̤nu.

A lṳhtò̌tòhtò̌kè kû̌ Khanagǎ ayǎ̤yô̤yǎ̤gî̌.

Hǎkhû̌ hǒonu a phû̌mò̤̌shî̌htô bò kû̌ asî ma̤si sǐlò̤ kòyò hǒo. ⁿ

39Dǒ asî ma̤ phû̌mò̤̌shî̌htô ma̤yǒ̤ bò anǎ̤ pô̤̌nu akhû̌khî, asî ma̤ lô̌khô anǎ̤ asô̌sô̌kû̌ pwa̤mǒ̤tili̤.

40Ma̤pô̤̌nudě Cǒmara tûjû̌pwa̤ sǎphlǒdû̌ a kòyò, a ma̤yǒ̤ a kòyò. ^o

41A ǐlò̤ asî dǒ khlilèphû̌ shǔshawa̤ tokhlǒ acǔdekû.

Kòyò dǒ a sǎphlǒdû̌ asî nutokhlǒ pǒǐbò asî.

42Pwa̤sǎkhě asî tokhlǒ ma̤jî̌ma̤jû̌bò asî.

A pǒǐ asî dě asî bè̌ lô̌khô dǒ asî khuwè̤ tokhlǒ asiwi̤sòwò̤ alǎ̤.

43Cǒmara tûjû̌pwa̤ ma̤hǎplǎ taga akòyò tokhlǒ.

Bǎbǎkǎlè asî gènè̤ còcè̌ lǎ̤ma̤tukutakǎshǔ ta̤.

Dǒ asî ta̤sǔta̤plě ô̌ akhû̌akhî, a tǒ̤bò dǒ ta̤pî̌ta̤lṳ̂̌.

44Bǎ Cǒmara tûjû̌pwa̤ ganǎ̤de asî kwihtò̌ ta̤ma̤jè̌ akhanu, a kè̌shǐ sî̌ya asî ata̤khòbǎ ta̤jî̌ta̤jû̌.

45A gènè̤̌htò̌bǎ ata̤olò̤ dǒ a olò̤ hto kû̌ asînu.

Dǒ a mô̤nṳ̌ asî kû̌ ta̤mô̤ dǒ ahǎbòjò tô̤̌nu akhû̌akhî, asǎphlǒjǎlò̤ sô̌.

46A no sǎyṳgwèbǎ asî kû̌ lǒ̤bò kòyò dǒ a pṳ̂̌cû̌ asî nutokhlǒ.

47Ǒ Cǒmara tûjû̌pwa̤ amè̤̌kû̌ pa Cǒmaradû̌, ma̤hǎplǎ pa.

Kaǎhtò̌mò̌ pa dǒ kòyò khlilèphû̌ nutokhlǒ akla, no geô̌plǒ sô̌mò̌ pa.

Htodě pa hî̌bwǐsîrî nami̤ aplò̌shǐ, pa sǎlě̤sǎlò̤ htû̌sò̌ǐ na ma̤ta̤ tokhlǒ pě. ^p

48Htû̌sò̌htò̌ Cǒmara tûjû̌pwa̤, amè̤̌kû̌ Isôrě̤lakhlilè a Cǒmaradû̌nu.

Htû̌sò̌htò̌ yǎ tûjû̌pwa̤ talakhǎ.

No hî̌bò kòyò pṳ̂̌ tôpwa̤ kû̌, “Ame̤.”

Htû̌sò̌htò̌ Cǒmara tûjû̌pwa̤.