Psalms 107

Lî̤htû̌sû̌htò̌ yè̤̌bǎ tôbǎ

(Htû̌sò̌htò̌ 107-150)

Cǒmara tûjû̌pwa̤ ata̤mô̤ dǒ ahǎbòjò tô̤̌

1No hî̌bò kòyò kû̌, Cǒmara tûjû̌pwa̤ wô̌ mî̌ca, hî̌bwǐhî̌sîrîhtò̌ lô̌khô yǎ.

Ata̤mô̤ dǒ ahǎbòjò tô̤̌nu, a ô̌měô̌gle tûjû̌pwa̤. ^a

2Kòyò dǒ Cǒmara tûjû̌pwa̤ ma̤hǎplǎge yǎ nutokhlǒ, kòyò dǒ a rû̌htò̌ge lû̌û dǒ pwa̤sǎkhě asî tokhlǒ cǔdekû nutokhlǒ bǎbǎ, 3Kòyò dǒ a kaǎgeplǒ bò dǒ gǎshǔshawa̤ gǎkhlo dǒ lṳmṳ̌htò̌ tôkhô, lṳmṳ̌nṳ̌ tôkhô, gǎcûmû kû̌ gǎcôcî̌ tôkhô nutokhlǒ bǎbǎ, hî̌bwǐhî̌sîrîhtò̌ lô̌khô lû̌û.

4Kòyò tokhlǒkhlǒ lètewe̤ tônô̤ ashěkhǎ bǎ gǎshashigǎkhû̌.

Asî kè̌shǐ klè̌ lǎ̤cû̌ dǒ asî lǎ̤ô̌ǐ wî̤̌ nutôwî̤̌ tô̤̌.

5Asî sǎǎsǎô mî̌ca shǎǎshǎô, a glè̌si tè̤tè̤̌hǒ.

6Asî ô̌ dǒ ta̤pò̤̌ta̤sha akû dě a kwisǎyṳhtò̌ Cǒmara tûjû̌pwa̤.

A ma̤hǎplǎ asî dǒ ta̤khòjî̌khòjû̌ akû.

7Pô̤̌khô asî glè̌ cû̌tǒ̤ dǒ asî lǎ̤ô̌ǐ wî̤̌ nutôwî̤̌ ayanu, a sûcû̌ asî dǒ klè̌tôklè̌bǎ nutôbô.

8Cǒmara tûjû̌pwa̤ mô̤nṳ̌ kòyò hǎkhû̌phû̌ kû̌ ata̤mô̤ dǒ ahǎbòjò tô̤̌ nudě a ma̤nṳ̌ bǎ kòyò ta̤cô̌klǐcô̌sènu akhû̌akhî, no hî̌bwǐhî̌sîrîhtò̌ mò̌ asî.

9A dǐ ôkǒôbe kòyò dǒ a sǎwǐ̤sǎô shinu.

A dǐ ǎkǒôbe kòyò dǒ a sǎwǐ̤sǎô shǎǎshǎônu.

10Kòyò tokhlǒkhlǒ ô̌ lô̌khô bǎ gûlǎ̤ bǎ akhǐsiwi̤ jî̌jî̌ akû.

Asî lò̤tě̤bò dǒ apô̤kû, kòyò comě asî kû̌ sǒpli̤ tě̤htò̌.

11Asî ma̤takǎshǔ Cǒmaradû̌ hî̌bǎlò̤ ata̤hî̌bǎnu, a jûlě̤phǐyô̤̌ Cǒmara dǒ adû̌ahtûgutṳ̌ nutôpwa̤ ata̤sû̌ǐtòwòǐ tô̤̌ akhû̌akhî, asî khòbǎ lô̌khô pô̤̌nu.

12Pô̤̌khô asî glè̌ yò̤lǎ̤ lô̌khô anǎ̤nu, Cǒmara nophǐnoma̤ asî ta̤ma̤ dǒ ajî̌ajû̌ nu.

Asî kè̌shǐtṳ̌bǎbò kû̌ ta̤pò̤̌ta̤sha dě pwa̤ ma̤jè̌ asî ô̌ tôpwa̤ tô̤̌.

13Ashuphushèwè̤ mî̌ca asî dě a kwisǎyṳhtò̌ Cǒmara tûjû̌pwa̤.

A ma̤hǎplǎkè asî dǒ ta̤khòjî̌khòjû̌ akû.

14A kaǎ hǎhtò̌ asî dǒ gûlǎ̤ akhǐsiwi̤ jî̌jî̌ nutôkû akû.

A ma̤htò̌tṳ̌kè bǎ bò asî sǒpli̤ tě̤htò̌.

15Cǒmara tûjû̌pwa̤ mô̤nṳ̌ kòyò hǎkhû̌phû̌ kû̌ ata̤mô̤ dǒ ahǎbòjò tô̤̌ nudě a ma̤nṳ̌ bǎ kòyò ta̤cô̌klǐcô̌sènu akhû̌akhî, no hî̌bwǐhî̌sîrîhtò̌ mò̌ asî.

16A ma̤pò̌bò apô̤ takhadû̌ tokhlǒ dǒ kòyò ma̤ lû̌û kû̌ tilibò.

A ma̤lagǎkè bò tě̤htò̌bô dǒ kòyò wṳ̂̌tě̤tṳ̌nu.

17Kòyò ǒò̌phuhtò ikǒpwǐ̤, ma̤tò̤̌ ta̤.

Asî ma̤sǔma̤plě pô̤̌nukhû̌khî, ashǐasha lǒ̤bò.

18Asî ma̤yǒ̤ bò shǎǎshǎô pṳ̂̌tôcǒ.

Asî glè̌si tètè̤̌ bò hǒ.

19Asî ô̌ dǒ ta̤pò̤̌ta̤sha akû dě a kwisǎyṳhtò̌ Cǒmara tûjû̌pwa̤.

A ma̤hǎplǎge asî dǒ ta̤sǎphlǒgû̌gè̌ akû.

20A hî̌lò̤ ayô̤̌ dě a ma̤hǎmǎ bǎ asî ta̤shǐ.

A ma̤hǎplǎ asî dǒ ta̤si akû.

21Cǒmara tûjû̌pwa̤ mô̤nṳ̌ kòyò hǎkhû̌phû̌ kû̌ ata̤mô̤ dǒ ahǎbòjò tô̤̌ nudě a ma̤nṳ̌ bǎ kòyò ta̤cô̌klǐcô̌sènu akhû̌akhî, no hî̌bwǐhî̌sîrîhtò̌ mò̌ asî.

22No lṳtòhtò̌ asî ta̤hî̌bwǐsîrî ata̤lṳta̤tònu.

No sǎlě̤sǎlò̤ sǎwǐ hî̌lṳ̌ asî kû̌ ta̤ dǒ a ma̤hto bǎ asînu.

23Kòyò tokhlǒkhlǒ cû̌ge kû̌ sǒkhlidû̌ dǒ shidû̌te̤we̤kû, asî ma̤kuma̤khǎ ta̤ bǎnu.

24Asî kè̌shǐ Cǒmara tûjû̌pwa̤ ata̤phǐta̤ma̤.

Asî kè̌shǐ ata̤ma̤ cô̌klǐcô̌sè dǒ shidû̌shite̤we̤ yô̤̌ akû.

25A hî̌lò̤pwǎ ayô̤̌ dě gili̤sǎ plǎwi̤, shi pěpǒdû̌ hè.

26Asî sǒkhlidû̌ lě̤lṳ lûhtò̌ dǒ gili̤sǎkla, lûlò̤ dǒ shipěpǒ plǎ akû.

Asî ǐsha gònò̤̌gòglè lǒ̤bò.

27Asî cû̌ lûhtôlûlò̤ sô̌sô̌kû̌ pwa̤ômṳshi.

Asî lǎ̤klô sî̌ya khlòjò sǒkhlidû̌ awe̤akènu, a tṳ̌dèbò pwǎ.

28Asî ô̌ dǒ ta̤pò̤̌ta̤sha akû dě a kwisǎyṳhtò̌ Cǒmara tûjû̌pwa̤.

A ma̤hǎplǎkè asî dǒ ta̤jî̌ta̤jû̌ akû.

29A no ô̌kǔkèbò gili̤sǎdû̌ dě shipěpǒ ô̌kǔkèbò

30Shipěpǒdû̌ ô̌kǔ kèbò akhû̌akhî, asî sǎlě̤sǎlò̤.

Cǒmara sûcû̌tǒ̤ asî dǒ asî lǎ̤cû̌bè̌ô̌kǔ sǒkhlidû̌ gûlǎ̤ nutôkû.

31Cǒmara tûjû̌pwa̤ mô̤ǐ kòyòhǎkhû̌phû̌ kû̌ ata̤mô̤ dǒ ahǎbòjò tô̤̌ nudě a ma̤ bǎ kòyò ta̤cô̌klǐcô̌sè akhû̌akhî, no hî̌bwǐhî̌sîrîhtò̌ mò̌ asî.

32No bè̌dubè̌nǎ̤mò̌ asî kû̌ Cǒmara tûjû̌pwa̤ dǒ kòyòsaprû akla.

No htû̌sò̌htò̌ mò̌ asî kû̌ Cǒmara dǒ khlilèphû̌ aikǒlǒkò tokhlǒ ta̤ô̌htuhî̌bǎplǒ akû.

33Cǒmara no htûhtò̌ shilô̤̌mǒ̤ tokhlǒ kû̌ gǎshashigǎ.

A no htûhtò̌ shipo̤hǎhtò̌ gûlǎ̤ tokhlǒ kû̌ hǎkhû̌khwedǎtrè̌.

34Kòyò dǒ a ô̌ bǎnutokhlǒ ma̤ ta̤phû̌mò̤̌shǐhtô akhû̌akhî, a no htûhtò̌ kèbò hǎkhû̌wî̤hǎkhû̌wô̌khû̌ nukû̌ hǎkhû̌cakwǎ.

35A no htûhtò̌ gǎshashigǎ kû̌ shikoǒ.

A no htûhtò̌ hǎkhû̌khwedǎtrè̌ kû̌ shipǒ̤hǎhtò̌.

36A no ô̌ kòyòô̌tiwǐ̤ bǎ gûlǎ̤ nutôkû.

Asî ma̤htò̌ ǐtûû̌ lô̌khô awî̤̌phû̌.

37Asî ma̤ǎ lô̌khô hǔklalǎ̤, a shǒǐ ǐtû̌ lô̌khô sîpî̌mṳ̌.

Asî nǐ̤bǎge dû̌wî̤ mî̌ca sîpî̌sǎ.

38Cǒmara ǐshowî̤ asî akhû̌akhî, asî hǐphû̌phòphû̌ ô̌wô̤̌ô̌dû̌htò̌.

A no tûyû̌ kalò̤lò̤ nǒ asîta̤phû̌ta̤li̤ tô̤̌.

39Asî kòyò ô̌pî̌tî̌ yû̌ kalò̤ akhanu kòyò pè̤̌ǎpè̤̌ô asî ma̤jî̌ma̤jû̌ asî dě sǎpla̤nǎ̤bǎbò.

40Cǒmara ma̤sòwò̤kè lǒ̤bò pwa̤pǒta̤ nutokhlǒ.

A no lètewe̤ bòshěkhǎ tṳ̌dèkè asî bǎ gǎshashigǎkhû̌nu.

41Bǎbǎkǎlè a bè̌htò̌yô̤̌ kòyò shôdô pwa̤ma̤jè̌ dǒ ta̤ma̤jî̌ma̤jû̌ akû.

A no ô̌wô̤̌ô̌plû htò̌ asîhǐphû̌phòphû̌ asô̌sô̌cǎkû̌ sû̌phû̌sî.

42Kòyòcǒkòyòtè̤ kè̌shǐ dě a sǎlě̤sǎlò̤

Lǒ̤bò kòyòphû̌mò̤̌ nudě a ô̌ sǔtukǔ꤮ kèbò.

43No gènè̤tě̤mè̤̌bò ta̤ nutokhlǒ kû̌ kòyò dǒ ata̤sî̌ta̤jò̌ ô̌nu.

No sî̌ganǎ̤ tě̤tôbò asî kû̌ Cǒmara tûjû̌pwa̤ ata̤mô̤ dǒ ahǎbòjò tô̤̌ nunî̌.