Psa 108 | KxfSCKXF | STEP | Khwǐdawi̤ ata̤sǎwǐ htû̌sò̌htò̌ Ǒ Cǒmaradû̌, he yṳ̌ǎnṳ̌ tǒ̤ na pwǎ. He sǎwǐ htû̌sò̌htò̌nǐ̤ na kû̌ hesǎphlǒ tômèbò pě.

Psalms 108

1 Ǒ Cǒmaradû̌, he yṳ̌ǎnṳ̌ tǒ̤ na pwǎ.

He sǎwǐ htû̌sò̌htò̌nǐ̤ na kû̌ hesǎphlǒ tômèbò pě.

2 Ǒ tǐ kû̌ tǐte̤kwe, shî̌nǎ mò̌.

Ǒ lṳmṳ̌lî, bûhè mò̌.

3 Ǒ Cǒmara tûjû̌pwa̤, he gǔ hî̌bwǐhî̌sîrî na dǒ khlilèphû̌ tokhlǒ akla.

He gǔ sǎwǐhtûsò̌htò̌ na dǒ khlilèphû̌shǔshawa̤ tokhlǒ akla.

4 Nata̤mô̤ dǒ ahǎbòjò tô̤̌nu adû̌ sô̌sô̌ kû̌ mǒkhû̌.

Nata̤cǒ kû̌ nayô̤̌nu a htò̌yô̤̌ tǒ̤ dǒ mǒlǎ̤.

5 Ǒ Cǒmaradû̌, nasîrîdû̌sîrîhtû gǔ lîkakhalṳ̌ tû̌ dǒ mǒkhû̌ htò̌yô̤̌lǒ akhû̌ nunî̌.

Nata̤sîrîpô̤phǎ gǔ bebòtû̌ bǎ hǎkhû̌ nunî̌. ^a

6 Kòyò dǒ na mô̤ǐ nutokhlǒ gǔ hǎplǎ ayanu, ma̤hǎplǎgenǐ̤ pa kû̌ nacǔde dǒ ata̤sîrîpô̤phǎshû̌sho.

Ganǎ̤depû pa ta̤kwicaba.

7 Cǒmaradû̌ ô̌ dǒ agûlǎ̤plò̌shǐ, a hî̌bǎlò̤ kû̌, “He gǔ kaǎgǔ sǎlě̤sǎlò̤ bèpè̤̌kè wî̤̌ Shake.

“He gǔ bèpè̤̌ bǎpô̤̌ wî̤̌ Sǔkû̌ gǎlǒ̤to̤kû.

8 “Kǐlè̌gǎ mî̌ heta. Manǎshegǎ mî̌ hetata.

“Ebarěgǎ mî̌ hekhû̌glû̌tě̤htò̌.

“Yǔdagǎ mî̌ henò̌htô̌ dǒ a dǔlṳ̌ hesîrîshû̌sho.

9 “Mò̤bǎgǎ mî̌ helǎ̤shǔbò shibǎtaadû̌ kûyô̤̌.

“He no htû Edûgǎ kû̌ hepwa̤ma̤ta̤phû̌.

“He ma̤pè̤̌ hǒ Phǐlǐsatǐgǎ akhû̌akhî, he gǔ yî̤̌kǒhtò̌ ta̤ma̤pè̤̌,” Cǒmara hî̌ pô̤̌nu.

10 Mò̌pè gǔ cû̌sû he dǒ wî̤̌dû̌wî̤̌htû akû?

Mò̌pè gǔ cû̌sû he dǒ Edûgǎkû?

11 Ǒ Cǒmaradû̌, na wîkè bòkè pa ya?

Ǒ Cǒmaradû̌, na htò̌shětǒ̤ pe ta̤ kû̌ pwa̤kliphû̌ tokhlǒ tô̤̌tô̤̌?

12 Kòyòhǎkhû̌phû̌ ata̤ma̤jè̌nu a bwǐsîrî ô̌ nô̌ tôcǒ tô̤̌,

Shějè̌ padô̌ pwa̤sǎkhě pa nutokhlǒ tǎ.

13 Dǒ Cǒmaradû̌ ô̌ kû̌ dǒ patôkhô akhû̌akhî, pa gǔ ma̤pè̤̌ ta̤.

A gma̤pè̤̌ bòkè pwa̤sǎkhě pa tokhlǒ pě.