Psalms 109
Kwihtò̌ ta̤ma̤jè̌ dǒ Cǒmara tûjû̌pwa̤ a ô̌
Khwǐdawi̤ ata̤sǎwǐ htû̌sò̌htò̌. Ta̤sǎwǐ numî̌ pwa̤sǎwǐ ta̤tokhlǒ aikǒlǒkò dǒ ta̤lṳhtò̌hôkû nutôpwa̤ aya.
1Ǒ Cǒmaradû̌, he htû̌sò̌htò̌ ǐtû̌ na. Jî̌koo tǎ̤mǎ̤ nî̌. 2Kòyòphû̌mò̤̌, kòyòcôklè lòhôǎ kòyò tokhlǒnu, a hî̌ takǎ bò he. Asî dô̌ lòhǎlòhò bò heyô̤. 3Asî ô̌te̤we̤, hî̌bǎ sǎkhěkhû̌khwè bò he. He ma̤sǔma̤plě asî tôcǒ tô̤̌ bǎbǎkǎlè asî hèshě bò he. 4He mô̤ǐ asî bǎbǎkǎlè asî bè̌ta̤sǔ pe lô̌khô he. He caba gutṳ̌ bǎpe dǒ asîya pwǎ. 5He ma̤wô̌pwǎ asî bǎbǎkǎlè asî ma̤phǔmò̤̌ còcè̌ he. a He mô̤ǐ asî bǎbǎkǎlè asî sǎkhěkhû̌khwè lô̌khô he. 6Rû̌htò̌ kòyòphû̌mò̤̌ tôpwa̤ dě no shěshǔma̤khǔkè kû̌ lû̌nu. No ihtǒô̌ pwa̤gèwè̤̌ lû̌û ta̤sǔ dǒ lû̌kòshǐ tôpwa̤nu. 7Bǎ kòyò ma̤kè̌kè̌ lû̌û akhanu, kòyò gǔ dò̌ lû̌ ta̤sǔ pě nî̌. Ata̤kwicabanu, no htûhtò̌ kè lû̌û pô̤̌ ta̤sǔ nunî̌. 8A lṳmṳ̌ni̤ lṳmṳ̌sa gǔ phǔkè tûû̌ pe nî̌. Kòyò gǔ nomǎ̤ agûlǎ̤ tôpwa̤pwa̤ pě nî̌. b 9A phû̌ tokhlǒ gǔ shôdôphǎkè tûû̌ pě nî̌. Ama gǔ ô̌khwè̌kè tû̌pě nî̌. 10Aphû̌ tokhlǒ gǔ htûkè bò pwa̤kwiǎta̤ pě nî̌꤮. Asî ô̌ dǒ ahǐphòyò̤̌kû dě bǎ hǎhtò̌cû̌ kè̌lǎtû̌ alǎ̤ǎlǎ̤ô pě nî̌꤮. 11Kòyò dǒ ashû̌běcǎ ô̌ kòyò nutokhlǒ gǔ phî̌ge bò lû̌tě̤ta̤ pě nî̌꤮. Shilǎ̤gǎkhlophû̌ tokhlǒ gǔ phǐsugwǐkè bò lû̌tě̤ta̤ dǒ a ǎwè̤ ǐtû̌ nutokhlǒ pě nî̌. 12No ô̌ tǎ̤ kòyò dǒ a ma̤mô̤ma̤wô̌ lû̌û tôpwa̤ tǎ̤mǎ̤. No ô̌ tǎ̤ kòyò dǒ a gwèbǎǐ lû̌phû̌ dǒ a shôdôpha nutokhlǒ tôpwa̤ tǎ̤mǎ̤mǎ̤. 13Akhlialè tokhlǒ gǔ tṳ̌kè tû̌ pě nî̌. Kòyò dǒ nô̌kò tôhtu pe tokhlǒ gǔ shôpe̤ bòkètû̌ lû̌mi̤ pě nî̌. 14Cǒmara tûjû̌pwa̤ gǔ tǒ̤mǎǐ tûû̌ aphiaphu sîtokhlǒ ata̤sǔta̤phû̌mò̤̌ nî̌꤮. Plûkè bǎ tǎ̤ amǒ̤ ta̤sǔ nutǎ̤mǎ̤ nî̌꤮. 15– 16A ma̤mô̤ma̤wô̌ kû̌ kòyò tô̤̌, a ma̤jî̌ma̤jû̌, ma̤sima̤mǎ̤ kòyò dǒ kòyò pè̤̌ǎpè̤̌ô lû̌û, kòyò dǒ a shôdô pwa̤ma̤jè̌ kû̌ kòyòsǎphlǒpî̌ nutokhlǒ akhû̌akhî, Cǒmara tûjû̌pwa̤ gǔ tô̤̌mǎǐ tû̌ asî ta̤ma̤sǔnu pṳ̂̌ tôplǎ nî̌. Bǎ hǎkhû̌nu no gènè̤htò̌tǒ̤ pe tǎ̤ kòyò kû̌ ami̤nu tǎ̤mǎ̤. 17A sǎyṳ ǐsho còcè̌ kòyò akhû̌akhî, no lò̤bǎ gesô̌tû̌ lû̌ kû̌ ta̤ǐsho nî̌. A sǎyṳ ǐshowî̤ kû̌ kòyò tôkhò̌ tô̤̌ akhû̌akhî, no nǐ̤bǎ tǎ̤ a ta̤hôwe̤hôwô̌ tîkî̌ tǎ̤mǎ̤. 18No bôte̤we̤bǐ a kû̌ ta̤ǐsho pô̤̌ a sô̌ jenu. No lò̤jûnṳ̌tû̌ ta̤ǐsho sô̌sô̌kû̌ je cô̌nu acô̌nṳ̌kè dǒ aběyî̌kûnu. No lò̤nṳ̌tû̌ ta̤ǐsho sô̌sô̌kû̌ htǒshi lò̤nṳ̌ dǒ khwǐgîkûnu. 19Ta̤ǐshonu ô̌te̤we̤bǐ bò lû̌û pô̤̌ a sô̌te̤we̤ bǐbò je nu. Ta̤ǐshonu te̤we̤bǐ bò lû̌ pô̤̌ kòyò è̌te̤we̤bǐ sǎto̤ pṳ̂̌ni̤ni̤nu. 20Cǒmara tûjû̌pwa̤ gǔ ma̤ geshî̌shǔ gesô̌tû̌ kòyò dǒ a bè̌ta̤sǔ he, a hî̌ phû̌mò̤̌shî̌htô he nunî̌. 21Ǒ Cǒmara tûjû̌pwa̤, he Běcǎdû̌, dǒ lǎ̤bè̌dubè̌nǎ̤ǐ nami̤wî̤mi̤wô̌ nuaya, ma̤jè̌ mò̌ he. Nata̤mô̤ dǒ ahǎbòjò tô̤̌nu awô̌꤮ jî̌le akhû̌akhî, ma̤hǎplǎkèmò̌ he. 22Kòyò pè̤̌ǎpè̤̌ô he, he shôdô pwa̤ma̤jè̌. Asha꤮ jî̌le hesǎphlǒ. 23He glè̌ hǎmǎ phwèkè asô̌sô̌kû̌ heyô̤ǔ lǎ̤hǎmǎkè bǎ lṳmṳ̌lò̤tě̤ akha. He sô̌sô̌kû̌ dèpǒ̤ dǒ gili̤sǎ sǎcû̌hǎmǎkè lû̌û nu. 24He dǔǎ shǎ akhû̌akhî, he khò̌delǎ̤ jǎbò hǒ. A ô̌kè pwǎ tǒ̤꤮ hekhwǐ kû̌ hebě pwǎ. 25Pwa̤sǎkhě he tokhlǒ kè̌shǐ he bǎtè tôkû bǎbǎ, a pî̤jî̌ǐsho bò he. A nǒlò̤ lô̌khô a ikǒ dě a sǎyî̤̌ bò he. c 26Ǒ Cǒmara tûjû̌pwa̤, he Cǒmaradû̌, ma̤jè̌mò̌ he. Nata̤mô̤ nî̌ ahǎbòjò tô̤̌ akhû̌akhî, ma̤hǎplǎ he. 27Ǒ Cǒmara tûjû̌pwa̤, no sî̌ganǎ̤ tě̤tě̤mè̤̌mè̤̌ asî kû̌ na ma̤ ta̤ lǒ̤bò, na ma̤htûhtò̌bò kû̌ nanǎ̤. 28Asî dě a ǐsho he, na dě na ǐshowî̤ he. Bǎ asî hèshě he akhanu, no lò̤jû̌kè bò asî, bǎbǎkǎlè no sǎlě̤sǎlò̤ pû na pwa̤ma̤ta̤phû̌ amè̤̌kû̌ he nî̌. 29Pwa̤sǎkhě he tokhlǒ shòwò̤̌ mǐ̤sǎphû̌mò̤̌ bò nî̌. No kûsô̌htò̌bò asî ta̤shòwò̤̌ pô̤̌ kòyò kûsô̌htò̌bǐ anǎ̤ kû̌ jehǐyò̤̌nu. 30He hî̌bwǐsîrî mè̤̌caca Cǒmara tûjû̌pwa̤. He htû̌sò̌htò̌ a dǒ kòyòsaprṳ̂ akla. 31Cǒmara tûjû̌pwa̤ tugutakaǐ tě̤tṳshǔ, ma̤hǎplǎge kòyò dǒ a shôdô pwa̤ma̤jè̌ dě kòyò cî̌htò̌si yǎnu.
Copyright information for
KxfSCKXF