Psa 112 | KxfSCKXF | STEP | Htû̌sò̌htò̌ Cǒmara tûjû̌pwa̤. Kòyò dǒ a ǐsha bè̌dubè̌nǎ̤ Cǒmara tûjû̌pwa̤ dě a sǎphlǒô̌ jûlě̤phǐ ta̤mǎlò̤nu a nǐ̤bǎ ta̤ǐshowî̤.

Psalms 112

1 Htû̌sò̌htò̌ Cǒmara tûjû̌pwa̤.

Kòyò dǒ a ǐsha bè̌dubè̌nǎ̤ Cǒmara tûjû̌pwa̤ dě a sǎphlǒô̌ jûlě̤phǐ ta̤mǎlò̤nu a nǐ̤bǎ ta̤ǐshowî̤.

2 Bǎ hǎkhû̌nu, aphû̌ali̤ bwǐdû̌sîrîhtû pě.

Kòyòcǒkòyòtè̤ akhlialè nǐ̤bǎ ta̤ǐshowî̤ pě.

3 Ta̤lě̤dû̌pwî̤htû, ta̤dû̌yò̤̌htò̌sa sîtokhlǒ ô̌ dǒ ahǐdǒkû.

Ata̤cǒta̤tè̤ ô̌měô̌gle tûjû̌pwa̤ pě.

4 Asî ma̤bwǐma̤sîsî kòyò, gwèbǎǐ kòyò, acǒatè̤ akhû̌akhî, asô̌sô̌kû̌ ta̤lî tômè dǒ a lîkakhalṳ̌ bǎ kòyò sǎphlǒwô̌.

5 Kòyò dǒ a sǎleǐ ata tô̤̌, a dǐlô̤̌dǐbǒpè̤̌ kòyò, a kè̌lǎcǒtè̤ ruhtanu, a ǎbǎôbǎ pě.

6 Kòyò sǎphlǒwô̌nu, a lò̤jû̌ tôkhò̌ tô̤̌.

Kòyò shôpe̤jò lû̌û tôkhò̌ tô̤̌tô̤̌.

7 A ganǎ̤de ta̤we̤ta̤kè dǒ awô̌tô̤̌ tokhlǒ bǎbǎ a ǐsha tô̤̌.

A yṳ̌ǎ kè̌shuǐ Cǒmara tûjû̌pwa̤ akhû̌akhî, a sǎphlǒshû̌ sǎphlǒsho mî̌ca.

8 A sǎphlǒshû̌ sǎphlǒsho mî̌ca dě a ǐsha tôcǒtô̤̌.

Dǒ anô̌kò gutṳ̌ pě dě, a kè̌shǐ Cǒmara ma̤pî̌kè a pwa̤sǎkhě nutokhlǒ pě.

9 Pwa̤cǒpwa̤tè̤ tôpwa̤ sǎphlǒshû̌ ma̤jè̌ kòyò hǎwě̤shèwè̤.

Ata̤cǒta̤tè̤ nî̌ a ô̌měô̌gle tûjû̌pwa̤.

A nǐ̤bǎ ta̤bwǐdû̌sîrîhtû, kòyò bè̌dubè̌nǎ̤ a pě. ^a

10 Kòyòkhu phû̌mò̤̌ kè̌shǐ ata̤ma̤ dě a sǎphlǒ gû̌gè̌ mî̌ca pě.

Asî sǎphlǒdû̌ gwěbò khû̌khi dě a hǎmǎkèbò pě.

Ata̤sǎyṳ tokhlǒnu, a nǐ̤bǎ pe tôcǒ tô̤̌.