Psalms 115

Cǒmara kû̌ ta̤yô̤ tokhlǒ awe̤akè

1Ǒ Cǒmara tûjû̌pwa̤, dǒ na cǒ kû̌ yô̤̌, na mô̤nǐ̤ pa kû̌ ta̤mô̤ dǒ ahǎbòjò tô̤̌ akhû̌akhî, pa bè̌dubè̌nǎ̤ na, pa bè̌dubè̌nǎ̤ pwǎ na tôpwa̤ nô̤̌.

Pa bǎ bè̌dubè̌nǎ̤ ǐtûû̌ panǎ̤ tô̤̌.

2Ma̤titè hî̌dě khlilèphû̌ tokhlǒ cû̌hî̌ kû̌, “Asî Cǒmaradû̌ ô̌ bǎtè?”

3Pa Cǒmaradû̌ mî̌ a ô̌ dǒ mǒkhû̌.

A sǎyṳma̤ hî̌tètè̌ mî̌ a ma̤.

4Bǎbǎkǎlè asî Cǒmara yô̤ tokhlǒnu, kòyò hǎkhû̌phû̌ bô̌ yǎ.

Dě kòyò ma̤pwǎ lû̌û kû̌ ruhta. ^a

5Ta̤yô̤ tokhlǒnu, akhû̌phě ô̌ bǎbǎkǎlè a hî̌bǎ jò tô̤̌.

Amǐ̤sǎphlǒ ô̌ bǎbǎkǎlè a kè̌shǐjò tô̤̌tô̤̌.

6Anò̌ku ô̌ bǎbǎkǎlè a ganǎ̤de jò tô̤̌.

Anò̌khî ô̌ bǎbǎkǎlè a nusa jò tô̤̌tô̤̌.

7Acǔde ô̌ bǎbǎkǎlè apṳ̂̌mě jò tô̤̌.

Akhò̌lôpô̤̌ ô̌ bǎbǎkǎlè a cû̌jò tô̤̌.

Kǎtô̤̌, alě̤ pwe̤htò̌jò dǒ agô̌lô̤ tô̤̌tô̤̌.

8Lǒ̤bò kòyò dǒ a bô̌ ta̤yô̤ nutokhlǒ bǎbǎ, a nǎla̤yṳ̌ǎǐ ta̤yô̤ nutokhlǒ bǎbǎ, a sô̌sô̌ kû̌ ta̤yô̤ pwǎ.

9Ǒ Isôrělakhlilè sî, nǎla̤yṳ̌ǎǐ Cǒmara tûjû̌pwa̤.

A mî̌ pwa̤ma̤jè̌ sî, pwa̤tukutakaǐ sî.

10Ǒ PhaArû akhlialè sî, nǎlǎ̤yṳ̌ǎǐ Cǒmara tûjû̌pwa̤.

A mî̌ pwa̤ma̤jè̌ sî, pwa̤tukutakaǐ sî.

11Ǒ kòyò dǒ a ǐsha bè̌dubè̌nǎ̤ Cǒmara tûjû̌pwa̤ sî, nǎlǎ̤yṳ̌ǎǐ Cǒmara tûjû̌pwa̤.

A mî̌ pwa̤ma̤jè̌ sî, pwa̤tukutakaǐ sî.

12Cǒmara tûjû̌pwa̤ gènè̤htò̌ǐ pa, a glè̌ ǐshowî̤ pa.

A glè̌ ǐshowî̤ Isôrě̤la khlilèphû̌.

A glè̌ ǐshowî̤ PhaArû akhlialè.

13Kòyò dǒ a ǐsha bè̌dubè̌nǎ̤ Cǒmara tûjû̌pwa̤ tokhlǒnu, atò̤atô̤̌ phǔlò̤ bǎbǎ, atò̤atô̤̌ htò̌yô̤̌ bǎbǎ, a ǐshowî̤bò asî. ^b

14Cǒmara tûjû̌pwa̤ no ô̌wô̤̌ô̌plṳ̂ pû sî kû̌ sîphû̌sîli̤ nî̌.

15Cǒmara tûjû̌pwa̤ dǒ a bô̌lò̤ mǒkhû̌ kû̌ hǎkhû̌ tôpwa̤nu ǐshôwî̤ pû sî nî̌.

16Mǒkhû̌ mî̌ Cǒmara tûjû̌pwa̤ ata pwǎ.

Hǎkhû̌ dě a ǐ kû̌ kòyò hǎkhû̌phû̌.

17Kòyò dǒ a si hto tokhlǒ bǎbǎ, a cû̌tǒ̤kè dǒ lṳ̌gǎnǎdo tokhlǒ bǎbǎ, a htû̌sò̌htò̌jò Cǒmara tûjû̌pwa̤ tô̤̌.

18Pa dǒ ahtûpwa̤ tokhlǒ dě pa htû̌sò̌htò̌ Cǒmara tûjû̌pwa̤ pě.

Pa htû̌sò̌htò̌ khònò̤̌ hènè tûjû̌pwa̤ talakhǎ.

Htû̌sò̌htò̌ Cǒmara tûjû̌pwa̤.