Psalms 116
Ta̤sî̌ya bwǐsîrî ata̤kwicabahtò̌
1Cǒmara tûjû̌pwa̤ ganǎ̤de he ta̤kwicaba kû̌ he ta̤kwisǎyṳhtò̌ akhû̌akhî, he mô̤nṳ̌ yǎ. 2A dò̌wô̌ anò̌ku dǒ he ô̌ akhû̌akhî, he kè̌ ô̌htûpwa̤ pe mî̌, he glè̌ kwicabahtò̌ nò yǎ. 3Ta̤si ô̌te̤we̤ he asô̌sô̌kû̌ kòyò dò sumṳnu. He ô̌phǔti̤nǐ̤ kû̌ lṳ̌gǎnǎdo nuhǒ. He kè̌shǐtṳ̌bǎ kû̌ ta̤pò̤̌ta̤shadû̌, ta̤sǎplǎ̤sǎyṳ. 4Bǎnukha, he kwisǎyṳhtò̌ Cǒmara tûjû̌pwa̤ kû̌, “Ǒ Cǒmara tûjû̌pwa̤, khòsǎdô ma̤hǎplǎ he.” 5Cǒmara tûjû̌pwa̤ mî̌ a ma̤bwǐma̤sîrî kòyò, a ma̤tôma̤bǎ. Pa Cǒmaradû̌ mî̌ a gwèbǎǐ mî̌ca kòyò. 6Cǒmara tûjû̌pwa̤ tugutakaǐ kòyò dǒ a shôdô ta̤ma̤jè̌ nutokhlǒ. Bǎ he kè̌shǐtṳ̌bǎ kû̌ ta̤pò̤̌ta̤sha adû̌môti̤ akhanu, a ma̤hǎplǎbǎ he. 7Cǒmara tûjû̌pwa̤ ma̤wô̌mî̌ca dǒ heya akhû̌akhî, “Ô̌kǔ mò̌,” he hî̌ǐ tûû̌ henǎ̤ pô̤̌nu. 8Na ma̤hǎplǎge he dǒ ta̤sita̤hǎmǎ akû. He mǐ̤sǎshi lò̤tě̤ nò pe tô̤̌, he htò̌tukhu nô̌ pe tô̤̌. 9He glè̌ ô̌htûpwa̤ dǒ Cǒmara tûjû̌pwa̤ ata̤kè̌pǒ̤ǐ alǎ̤, bǎ kòyò hǎkhû̌phû̌ ô̌ ǐ hǎkhû̌ nupě. 10“Ǒ Cǒmara tûjû̌pwa̤, he kè̌shǐtṳ̌bǎ mî̌ca kû̌ ta̤jî̌ta̤jû̌ hǒ,” he hî̌ pô̤̌nu bǎbǎ, he yṳ̌ǎ pe pwǎ na. a 11He sǎgònò̤̌ dě he hî̌ kû̌, “Kòyò lǒ̤bò mî̌ kòyò lòhǎlòhô pwǎ.” 12Lǒ̤bò ta̤ dǒ Cǒmara tûjû̌pwa̤ ma̤bwǐma̤sîsî he tokhlǒnu, he cû̌ plěge jòsô̌ lû̌û hětè? 13He hèlṳtòhtò̌ sîpî̌shisǐyô̤̌nu kû̌ Cǒmara tûjû̌pwa̤ pě. A ma̤hǎplǎge he akhû̌akhî, he htû̌sò̌htò̌ Cǒmara tûjû̌pwa̤ ami̤. 14He ma̤lǒma̤be ǐtûû̌ he ta̤olò̤ heyô̤̌ kû̌ Cǒmara tûjû̌pwa̤ nutokhlǒ dǒ akòyò lǒ̤bò alô̤mô̤̌ pě. 15Bǎ Cǒmara tûjû̌pwa̤ a kòyò dǒ acǒ kû̌ ayô̤̌ tokhlǒ si akhanu, a lě̤dû̌pwî̤dû̌ jî̌jî̌ aya. 16Ǒ Cǒmara tûjû̌pwa̤, he mî̌ na pwa̤ma̤ta̤phû̌ tôpwa̤. He mî̌ na pwa̤ma̤ta̤phû̌ sô̌sô̌ hemǒ̤nu. Na ma̤hǎplǎge he dǒ ta̤sita̤hǎmǎ akû. 17He glè̌ ma̤si lṳtòhtò̌ ta̤phû̌ta̤wè̤ kû̌ ta̤hî̌bwǐsîrî ata̤lṳta̤tò kû̌ na pě. He glè̌ htû̌sò̌htò̌ Cǒmara tûjû̌pwa̤ ami̤. 18He ma̤lǒma̤be he ta̤olò̤ heyô̤̌ kû̌ Cǒmara tûjû̌pwa̤ nutokhlǒ dǒ akòyò lǒ̤bò alô̤mô̤̌ pě. 19Ǒ Wî̤̌yarǔshôlephû̌ sî, he glè̌ ma̤lǒbe he ta̤olò̤ he yô̤̌nu dǒ Cǒmara tûjû̌pwa̤ ata̤lṳ̌htò̌hô ô̌ wî̤̌ kǎmakû nupě. Htû̌sò̌htò̌ Cǒmara tûjû̌pwa̤.
Copyright information for
KxfSCKXF