Psalms 119

Cǒmara tûjû̌pwa̤ ta̤sû̌ǐta̤tòwòǐ

1Kòyò dǒ a ta̤sǔ ô̌ dǒ Cǒmara tûjû̌pwa̤ alô̤mô̤̌ tô̤̌, a ganǎ̤de Cǒmara tûjû̌pwa̤ ta̤sû̌ǐta̤tòwòǐ tokhlǒnu a nǐ̤bǎ ta̤ǐshôwî̤. ^a

2Kòyò dǒ a gû̌ma̤ pô̤̌ Cǒmara ta̤sû̌ǐta̤tòwòǐ, a kè̌lǎ lû̌û kû̌ sǎphlǒ tômèbò tokhlǒnu a nǐ̤bǎ ta̤ǐshôwî̤.

3Asî ma̤ ta̤phû̌mò̤̌shǐhtô tôkhò̌ tô̤̌.

A gû̌ pô̤̌ Cǒmara aklè̌aklò pwǎ.

4Na hî̌nǎ yô̤̌sǎ kû̌ pa tôbǎ ganǎ̤de tě̤tě̤mè̤̌mè̤̌ bò na ta̤sû̌ǐtòwòǐ.

5He sǎ phlǒshû̌ mî̌ca dǒ he gû̌ma̤ bò na ta̤hî̌bǎlò̤.

6He kè̌ bè̌sû̌bè̌sǎ bò na ta̤mǎlò̤ tokhlǒ mî̌, he gǔ shòwò̤̌ nô̌ tôkhò̌ tô̤̌.

7Bǎ he sî̌ganǎ̤hè na ta̤mǎlò̤ tokhlǒ akhanu, he hî̌bwǐhî̌sîrîhtò̌ na kû̌ ta̤sǎphlǒcǒsǎphlǒtè̤ pě.

8He ganǎ̤de na ta̤mǎlò̤ pě.

Khòsǎdô wîkè tǎ̤ he tîkî̌ tǎ̤mǎ̤.

Ganǎ̤de Cǒmara tûjû̌pwa̤ ta̤sû̌ǐta̤tòwòǐ

9Pwa̤nějǎphû̌nu, a glè̌ ô̌htûpwa̤ mṳ̂̌plîjò hětè?

A bǎ ganǎ̤de bò nalě̤nayô̤̌.

10He kè̌lǎ cǒ na kû̌ he sǎphlǒ lǒ̤bò.

No cû̌sǔ cû̌tepheyî̤kè tǎ̤ he kû̌ na ta̤mǎlò̤ tǎ̤mǎ̤.

11Pô̤̌khô he ma̤sǔma̤plě na tô̤̌ ayanu, he dô̌bǎtûklû̌, he bè̌nṳ̌ nalě̤nayô̤̌ dǒ hesǎphlǒkû hǒ.

12Ǒ Cǒmara tûjû̌pwa̤, he htû̌sò̌htò̌ na.

Sû̌ǐtòwòǐ he kû̌ na ta̤hî̌bǎlò̤.

13Hekhû̌phě glè shôbǐǐlṳ̌ hî̌le̤le̤ hî̌gege sô̌ bò ta̤mǎlò̤ dǒ na ǐlò̤ nutokhlǒ.

14He ô̌htûpwa̤ pô̤̌ na ta̤sû̌ǐnu akhû̌akhî, he sǎlě̤sǎlò̤ khlo pe kû̌ he ta̤dû̌yò̤̌htò̌sa lǒ̤ bò.

15He gènè̤tě̤mè̤̌ǐ na ta̤sû̌ǐtòwòǐ.

He bè̌sû̌bè̌sǎǐ naklè̌naklò.

16He sǎphlǒô̌ na ta̤hî̌bǎlò̤.

He shôpe̤ pè̤̌ pe nalě̤nayô̤̌ tô̤̌.

Ta̤sǎlě̤sǎlò̤ dǒ Cǒmara ta̤sû̌ǐta̤tòwòǐ akû

17Ma̤mô̤ma̤wô̌ pû najû̌ amè̤̌kû̌ henu.

Htodě he ô̌htûpwa̤ jûǎ nayô̤̌. ^b

18Pô̤̌khô he kè̌shǐ na ta̤ma̤ cô̌klǐcô̌sè tokhlǒ dǒ na ta̤sû̌ta̤tòwòkû ayanu, bǔmô bǎmò̌ he mǐ̤sǎ.

19Bǎ hǎkhû̌ nî̌ he htûpwǎ shǐtèmè̤ pwǎ. ^c

Dǐsî̌ganǎ̤ he kû̌ na ta̤mǎlò̤ tokhlǒ nî̌.

20He sǎyṳ sǎganǎ̤ mî̌ca na ta̤mǎlò̤ tokhlǒ pṳ̂̌꤮ plǎ.

21Na sǎhtǎdû̌da kòyò dǒ a bè̌dû̌bè̌pwǎ̤ anǎ̤ nutokhlǒ.

Na ǐsho kòyò dǒ a jûlě̤phǐ na ta̤mǎlò̤ tô̤̌ nutokhlǒ.

22He jûǎ na ta̤hî̌bǎ akhû̌akhî, ta̤pi̤jî̌ǐsho he bǎbǎ, ta̤hî̌bǎ tukutakǎ he bǎbǎ, no kè̌shǐtṳ̌bǎ tǎ̤ he mǎ̤.

23Pwa̤pǒta̤ tokhlǒ hǎnòò̌ plǒbò lû̌û dě a dô̌bò he yô̤.

He mî̌ na jû̌ dě he gènè̤tě̤mè̤̌ pwǎ na ta̤hî̌bǎlò̤ tokhlǒ.

24Na ta̤hî̌bǎ tokhlǒnu a ma̤mô̤ mî̌ca he sǎphlǒ.

A ǐsî̌yajè̌ he. ^d

Bè̌lò̤ sǎphlǒ dǒ lǎ̤jûǎ Cǒmara ta̤sû̌ǐta̤tòwòǐ

25He glè̌ si tè̤tè̤̌ hǒ.

Pô̤̌ nalě̤nayô̤̌ hî̌nu, dǐ htûpwa̤ pô̤̌ he.

26He ta̤ô̌htûpwa̤ awe̤akènu he shôbǐǐlṳ̌ bǎ na dě na hî̌shǔ hto he hǒ.

Sû̌ǐtòwòǐ he kû̌ na ta̤hî̌bǎlò̤. ^e

27Pô̤̌khô he sî̌yaphlôphǎ nata̤sû̌ǐtòwòǐ tokhlǒ yô̤̌mûyô̤̌sǎ ayanu, ma̤jè̌mò̌ he.

Htodě he gènè̤tě̤mè̤̌ǐ jò na ta̤ma̤ cô̌klǐcô̌sè tokhlǒ pě.

28He sǎplǎ̤ mî̌ca dě alò̤dô̌lò̤de jî̌ he.

Ǐshû̌ ǐshò̌htò̌ sô̌mò̌ he pô̤̌ nata̤mǎlò̤ hî̌nu.

29No cû̌tephekè he kû̌ ta̤lô̌ǐplò̤ǐ aklè̌.

Sû̌ǐtòwòǐ wô̌ he kû̌ na ta̤sû̌ta̤tòwònu.

30He rû̌htò̌ ta̤cǒ kû̌ yô̤̌ nuhǒ.

He bè̌lò̤ sǎphlǒ kû̌ he gû̌ kû̌ na ta̤mǎlò̤.

31Ǒ Cǒmara tûjû̌pwa̤, he pṳ̂̌měǐ na ta̤hî̌bǎ.

No htûhtò̌ tǎ̤ ta̤shòwò̤̌ dǒ heya mǎ̤.

32Na dǐsî̌yaphlôphǎ lǒlǒbebe he akhû̌akhî, he sǎphlǒshû̌ ganǎ̤de na ta̤mǎlò̤.

Ta̤kwicaba dǒ lǎ̤sî̌yaphlôphǎwô̌ aya

33Ǒ Cǒmara tûjû̌pwa̤, sû̌ǐ he kû̌ na ta̤hî̌bǎlò̤ aklè̌aklò.

Dě he gû̌ ma̤ gutṳ̌tṳ̌ pě.

34Dǐsî̌yaphlôphǎ wô̌ he dě he ganǎ̤de na ta̤sû̌ta̤tòwò.

He jûǎ kû̌ he sǎphlǒ tômèbò.

35He kè̌lû̌htò̌ǐ ta̤sǎlě̤sǎlò̤ dǒ na ta̤mǎlò̤ akûnu akhû̌akhî, nè̌klè̌nè̌klò he.

36Na ta̤hî̌bǎnu, no mô̤ǐ khlo he kû̌ he sǎyṳsǎbǎ ruhtanu.

37No kè̌khô̌kè he kû̌ ta̤ dǒ atṳ̌dè nutokhlǒ.

Dǐ ô̌htûpwa̤ tě̤tě̤mè̤̌mè̤̌ he pô̤̌ nalě̤nayô̤̌ ô̌nu.

38Pô̤̌ na olò̤ hto pwa̤ dǒ a ǐsha bè̌dubè̌nǎ̤ na tokhlǒ ayanu, ma̤lǒbe bǎmò̌ he amè̤̌kû̌ na pwa̤ma̤ta̤phû̌nu.

39Ta̤ma̤sòwò̤̌ dǒ he ǐshanu ma̤tephe bǎ he.

Na ta̤mǎlò̤ tokhlǒnu awô̌ mî̌ca.

40He sǎphlǒshû̌ jûǎ mî̌ca na ta̤sû̌ǐtòwòǐ.

Dǒ nacǒnatè̤ akhû̌akhî, ǐ he ta̤ô̌htûpwa̤ dǒ acǒatè̤.

Ta̤nǎla̤ǐ Cǒmara ta̤sû̌ǐta̤tòwòǐ

41Ǒ Cǒmara tûjû̌pwa̤, pô̤̌ na olò̤ henu bè̌lṳ̌mò̌ he na ta̤mô̤ dǒ ahǎbòjò tô̤̌ kû̌ na ta̤ma̤hǎplǎgenu.

42He yṳ̌ǎnǎla̤ǐ nalě̤nayô̤̌ akhû̌akhî, he gǔ hî̌shěshu jò sô̌ kòyò dǒ a pî̤jî̌ǐsho he tokhlǒ hǒ.

43He nǎla̤ǐ na ta̤mǎlò̤ tokhlǒ akhû̌akhî, ma̤jè̌ he dǒ he hî̌bǎ cǒcǒtè̤tè̤ pṳ̂̌꤮ plǎ.

44He glè̌ ganǎ̤de na ta̤sû̌ta̤tòwò tûjû̌pwa̤ talakhǎ.

45He jî̌pwǐ̤ jûǎ na ta̤sû̌ǐtòwòǐ tokhlǒ akhû̌akhî, he cû̌ bǎtè bǎbǎ, ta̤dǐkhû̌dǐdò ô̌ tě̤tṳ nô̌ he tôcǒ꤮ tô̤̌.

46He glè̌ shôbǐǐlṳ̌ na ta̤hî̌bǎyô̤̌sǎ tokhlǒ dǒ khwǐ tokhlǒ alô̤mô̤̌.

He hǎplǎkè pû kû̌ ta̤shòwò̤̌.

47He mô̤ǐ na ta̤mǎlò̤, a ma̤sǎlě̤sǎlò̤ he.

48He bè̌dû̌ jûǎ na ta̤mǎlò̤ dǒ he mô̤nṳ̌nu.

He gènè̤tě̤mè̤̌ na ta̤hî̌bǎlò̤.

Ta̤yṳ̌ǎ Cǒmara alě̤ayô̤̌

49Gènè̤̌htò̌ bǎ nayô̤̌ dǒ na hî̌nǎ na pwa̤ma̤ta̤phû̌ amè̤̌kû̌ henu.

A ǐ he ta̤kè̌shuǐ mî̌ nayô̤̌ nô̤̌ pwǎ.

50Cǒmara ata̤olò̤ ǐ he ta̤ô̌htûpwa̤ tě̤tě̤mè̤̌mè̤̌ akhû̌akhî, bǎ he kè̌shǐbǎ kû̌ ta̤pò̤̌ta̤sha akhanu, a ma̤mô̤ma̤wô̌ǐ he sǎphlǒ.

51Pwa̤ dǒ a bè̌dû̌bè̌pwǎ̤ anǎ̤ nutokhlǒ pî̤jî̌ǐsho jî̌ he bǎbǎkǎlè he cû̌tephekè kû̌ na ta̤sû̌ta̤tòwò tô̤̌.

52Ǒ Cǒmara tûjû̌pwa̤, bǎ he gènè̤htò̌ bǎ na ta̤mǎlò̤ dǒ awǐnu tokhlǒ akhanu, a ma̤mô̤ma̤wô̌ǐ he sǎphlǒ.

53Kòyòkhu phû̌mò̤̌ tokhlǒ wîkèbò na ta̤sû̌ta̤tòwò akhû̌akhî, he sǎphlǒdû̌ jî̌ asî.

54Bǎ he htû shǐtè̤mè̤ dǒ hǎkhû̌ akhanu, he wě̤htò̌ lî̤sǎwǐ dǒ na ta̤hî̌bǎlò̤ awe̤akè.

55Ǒ Cǒmara tûjû̌pwa̤, bǎ lṳmṳ̌khǐ akhanu, he gènè̤̌htò̌ bǎ nami̤ akhû̌akhî, he jûǎ na ta̤sû̌ta̤tòwò. ^f

56He ganǎ̤de na ta̤sû̌ǐtòwòǐ akhû̌akhî, he nǐ̤bǎ ta̤ǐshôwî̤.

Ta̤ǐlò̤sǎphlǒ dǒ Cǒmara ta̤sû̌ǐta̤tòwòǐ akû

57Ǒ Cǒmara tûjû̌pwa̤, he sǎmǒla̤htò̌ pwǎ na nô̤̌.

He olò̤ kû̌ he ganǎ̤de nalě̤nayô̤̌.

58Dǒ na lǎ̤kè̌dû̌ǐ he aya, he kè̌lǎsi kè̌lǎô̌ na.

Pô̤̌ na ta̤olò̤wṳ̂̌lò̤ ô̌nǎnu, gwèbǎ ǐ pû he.

59He gènè̤tě̤mè̤̌ he ta̤ô̌htûpwa̤, he tiwǐ gesô̌ dǒ na ta̤hî̌bǎ a ô̌.

60Pô̤̌khô he gǔ jû na ta̤mǎlò̤ ayanu, he jî̌khô̌jî̌yò bǎtô̤̌, he ma̤ phwèphwè pwǎ.

61Kòyòphû̌mò̤̌ tokhlǒ coměbò he kû̌ sǒpli̤ tokhlǒ bǎbǎ, he shôpe̤ nô̌ na ta̤sû̌ta̤tòwò tô̤̌.

62Na ta̤hî̌bǎ tokhlǒ nî̌ acǒatè̤ akhû̌akhî, he ihtǒ htû̌sò̌htò̌ na bǎ lṳmṳ̌khǐ klama.

63He bô̌sû̌khǎkhô kû̌ lǒ̤bò kòyò dǒ a ǐsha bè̌dubè̌nǎ̤ na, a ma̤gû̌ na ta̤sû̌ǐtòwòǐ nutokhlǒ.

64Ǒ Cǒmara tûjû̌pwa̤, na ta̤mô̤ dǒ ahǎbòjò tô̤̌nu, a ô̌ be kû̌ hǎkhû̌.

Sû̌ǐtòwòǐ pû he kû̌ na ta̤hî̌bǎlò̤.

Cǒmara ta̤sû̌ta̤tòwò dǒ alě̤dû̌pwî̤dû̌

65Ǒ Cǒmara tûjû̌pwa̤, pô̤̌ na olò̤ htonu na ma̤mô̤ma̤wô̌ pû na pwa̤ma̤ta̤phû̌ amè̤̌kû̌ henu nî̌.

66He yṳ̌ǎnṳ̌ na ta̤mǎlò̤ akhû̌akhî, sû̌ǐtòwòǐ bǎ he ta̤sî̌khû̌sî̌ya kû̌ ta̤sî̌ta̤jò̌ dǒ awô̌.

67Bǎ na shò̌lò̤ he sǎphlǒ khôtô̤̌ akhanu, he cû̌sǔcû̌tò̤̌ taga klè̌.

Khònò̤̌ dě he jû nalě̤nayô̤̌ hǒ.

68Na wô̌ mî̌ca, na ma̤ ta̤ tokhlǒ mî̌ awô̌ bò.

Sû̌ǐtòwòǐ he kû̌ na ta̤hî̌bǎlò̤.

69Kòyò bè̌dû̌bè̌pwǎ̤ anǎ̤ tokhlǒ dô̌ lòhǎlòhô bò heyô̤.

He khû̌dayadě he ganǎ̤de tǒ̤ na ta̤sû̌ǐtòwòǐ tokhlǒ kû̌ he sǎphlǒ tômèbò.

70Asî mî̌ kòyò ǒò̌phuhtò, a sî̌yaphlôphǎ na ta̤sû̌ǐtòwòǐ tô̤̌.

He khû̌dayadě he mô̤ǐ mî̌ca na ta̤sû̌ta̤tòwò.

71Pô̤̌khô he phî̌nṳ̌ ta̤sû̌ǐ dǒ na ta̤hî̌bǎlò̤ akû nu, na shò̌lò̤ hesǎphlǒ nî̌ awô̌ dǒ heya pwǎ.

72Dǒ heya na ta̤sû̌ta̤tòwò mî̌ alě̤dû̌pwî̤dû̌ khlo pe kû̌ ruhta lǒ̤bò. ^g

Cǒmara ta̤sû̌ta̤tòwò dǒ atôabǎ

73Na bô̌lò̤tèlò̤ he kû̌ na cǔde.

Pô̤̌khô he gǔ ma̤lû̌ǐ na ta̤sû̌ta̤tòwò ayanu, ǐ he ta̤sî̌yaplôphǎ. ^h

74Bǎ kòyò dǒ a ǐsha bè̌dubè̌nǎ̤ na tokhlǒ kè̌shǐ kû̌ he kè̌shu nǎla̤ǐ nalě̤nayô̤̌ akhanu, asî gǔ sǎlě̤sǎlò̤ lô̌khô pě.

75Ǒ Cǒmara tûjû̌pwa̤, he sî̌ganǎ̤ kû̌ na cî̌htò̌cǒ cî̌htò̌tè̤.

Na cǒkû̌ nayô̤̌ akhû̌akhî, na shò̌lò̤ he sǎphlǒ.

76Pô̤̌ na olò̤ hto na pwa̤ma̤ta̤phû̌ amè̤̌kû̌ he hǒo, ma̤mô̤ma̤wô̌ǐ he kû̌ na ta̤mô̤ dǒ ahǎbòjò tô̤̌ hǒo.

77He mô̤nṳ̌ na ta̤sû̌ta̤tòwò akhû̌akhî, pô̤̌khô he gǔ ô̌htûpwa̤bò̌ ayanu, gwèbǎǐ he.

78Kòyò dǒ a bè̌dû̌bè̌pwǎ̤ anǎ̤ nutokhlǒ ma̤jî̌ma̤jû̌ bò he akhû̌akhî, no sòwò̤bò asî.

He khû̌dayadě he gènè̤tě̤mè̤̌ nata̤sû̌ǐtòwòǐ tokhlǒ.

79Pô̤̌khô kòyò dǒ a ǐsha bè̌dû̌bè̌htûǐ na tokhlǒ sî̌ganǎ̤ na ta̤hî̌bǎ aya, no getîkhîtô asî dǒ he ô̌.

80Pô̤̌khô he gǔ hǎplǎge kû̌ ta̤shòwò̤̌ ayanu, he ganǎ̤de tě̤tě̤mè̤̌mè̤̌ bò nata̤hî̌bǎlò̤ pě nî̌.

Ta̤kwicaba dǒ ta̤ma̤hǎplǎge aya

81He kè̌shǔǐ na ta̤ma̤hǎplǎge, alòdô̌lòde mî̌ca he.

He sǎmǒla̤ǐ nalě̤nayô̤̌.

82He ô̌pǒ̤kè̌shuǐ na ta̤olò̤ lǒbehtò̌ aya, agayǎ̤ bò he mi̤sǎphlǒ hǒ.

He gwè̌ kû̌, “Na ma̤mô̤ǐ he sǎphlǒ bǎkhò̌tè pě?”

83He ô̌lǒô̌khlo sô̌sô̌kû̌ shiôkobě dǒ kòyò wîkè yǎ nupwǎ bǎbǎkǎlè he shôpe̤ kè na ta̤hî̌bǎlò̤ tô̤̌.

84He mî̌ na pwa̤ma̤ta̤phû̌ bǎ ô̌pǒ̤ yî̤ pô̤̌ pwǐtè pě?

Na glè̌ cî̌htò̌ kòyò dǒ a ma̤jî̌ he nutokhlǒ bǎ khòtèpě?

85Kòyò dǒ a phǐhtò̌yô̤̌ǐ anǎ̤, a ganǎ̤de na ta̤sû̌ta̤tòwò tô̤̌ tokhlǒnu, a pho lô̌khô hǎkûyô̤̌ dǒ he lǎ̤lò̤tě̤ aya.

86Nata̤mǎlò̤ lǒ̤bò tokhlǒnu lǎ̤yṳ̌ǎ nǎla̤ǐ lǒ̤bò.

Ma̤jè̌mò̌ he nî̌, he ma̤si nô̌ tôcǒ tô̤̌ bǎbǎkǎlè asî ma̤ jî̌ma̤jû̌ lǒ̤bò he.

87Asî glè̌ ma̤si tè̤tè̤̌kè he.

He dě he wîkè nô̌ na ta̤sû̌ǐtòwòǐ tô̤̌.

88Dǐ htûpwa̤ pô̤̌ he kû̌ na ta̤mô̤ dǒ ahǎbòjò tô̤̌ akûnu.

He gû̌ma̤ pô̤̌ nata̤mǎlò̤ nupě.

Ta̤yṳ̌ǎnǎla̤ǐ Cǒmara ta̤mǎlò̤

89Ǒ Cǒmara tûjû̌pwa̤, nalě̤nayô̤̌nu aô̌měô̌gle tûjû̌pwa̤, a ô̌měô̌gle tǒ̤dǒ mǒkhû̌.

90Na ta̤cǒ kû̌ yô̤̌ nî̌, a ô̌měô̌gle tôhtu hto tôhtu.

Na no ô̌htûhtò̌ hǎkhû̌ dě a ô̌měô̌gle pṳ̂̌꤮ plǎ. ⁱ

91Hǎkhû̌ gû̌ma̤ bò pô̤̌ na ta̤hî̌bǎlò̤nu.

Na ta̤mǎlò̤nu a ô̌měô̌glebò tǒ̤ lṳmṳ̌ khò̌tini̤.

92Na ta̤sû̌ta̤tòwò tokhlǒ kè̌ ma̤sǎlě̤sǎlò̤ he tô̤̌ hî̌mî̌, he sikè bǎ he kè̌shǐbǎ kû̌ ta̤pò̤̌ta̤sha akha.

93He shôpe̤shônǎ nô̌ na ta̤sû̌ǐtòwòǐ nutokhlǒ tîkî̌꤮ tô̤̌.

Dǒ na ta̤sû̌ǐtòwòǐ akhû̌akhîdě na ǐ he ta̤ô̌htûpwa̤ dǒ atě̤amè̤̌.

94He mî̌ na pwa̤ma̤ta̤phû̌ tôpwa̤.

He jî̌pwǐ̤ kè̌lǎ na ta̤sû̌ǐtòwòǐ akhû̌akhî, ma̤hǎplǎkè mò̌ he.

95Kòyòkhu phû̌mò̤̌ ô̌pǒ̤ ma̤si he.

He khû̌dayadě he gènè̤tě̤mè̤̌ na ta̤mǎlò̤ tokhlǒ.

96He kè̌shǐ sî̌ya kû̌ ta̤pṳ̂̌꤮ tôcǒ mî̌ a gutṳ̌ bòjò, bǎbǎkǎlè na ta̤mǎlò̤nu agutṳ̌ tô̤̌.

Mô̤nṳ̌ Cǒmara ta̤sû̌ta̤tòwò

97He mô̤nǐ jî̌jî̌ na ta̤sû̌ta̤tòwò tokhlǒ.

He gènè̤tě̤mè̤̌ǐ lû̌û tônǐ̤mṳ̌hǎ

98He sî̌yaphlôǐ na ta̤mǎlò̤ pṳ̂̌tôplǎ akhû̌akhî, he sî̌jò̌ khlo kû̌ pwa̤sǎkhě henu.

99He gènè̤ tě̤tě̤mè̤̌mè̤̌ǐ na ta̤hî̌bǎlò̤nu akhû̌akhî, he gènè̤phlô gènè̤phǎ khlo kû̌ he sara lǒ̤bò tokhlǒ.

100He jû na ta̤sû̌ǐtòwòǐ akhû̌akhî, he bè̌yòjò khlo ta̤ kû̌ mǒ̤phimǒ̤pwǎ̤ tokhlǒ.

101Pô̤̌khô he glè̌ jûǎ nalě̤nayô̤̌ tokhlǒ ayanu, lǒ̤bò ta̤phû̌mò̤̌shǐhtô tokhlǒnu he cû̌ tephe kèbò.

102Na sû̌ǐtòwòǐ tě̤tě̤mè̤̌mè̤̌ wô̌ mî̌ca he akhû̌akhî, he cû̌ tephekè nô̌ na ta̤mǎlò̤ tô̤̌.

103Nalě̤nayô̤̌nu ashukuu.

Ashukhlo pe kû̌ wè̌khû̌shi. ^j

104Na ta̤sû̌ǐtòwòǐ ma̤jè̌ he dě he bè̌yòjòta̤ akhû̌akhî, he sǎkhî̌ kè bò klè̌sǔ nutokhlǒ.

Ta̤lî ô̌ dǒ Cǒmara ta̤sû̌ta̤tòwò ahè

105Nalě̤nayô̤̌ mî̌ asô̌sô̌kû̌ mî̌ko tômè dǒ a shělî cû̌ bǎ helǎ̤kha.

Asô̌sô̌kû̌ ta̤lî tôcǒ dǒ a gǔ ma̤lî bǎ heklè̌.

106Pô̤̌ he olò̤ hto heyô̤̌nu he ganǎ̤de tě̤tě̤mè̤̌mè̤̌ nata̤mǎlò̤ dǒ acǒatè̤ pě. ^k

107Ǒ Cǒmara tûjû̌pwa̤, he khòbǎjî̌ khòbǎjû̌ mî̌ca ta̤pò̤̌ta̤sha.

Pô̤̌ na olò̤ hto nayô̤̌nu ma̤hǎplǎkèmò̌ he.

108Ǒ Cǒmara tûjû̌pwa̤, phî̌shǔ he ta̤htû̌sò̌htò̌ na kû̌ he sǎphlǒtômèbònu.

Sû̌ǐtòwòǐ he kû̌ na ta̤mǎlò̤.

109He kè̌shǐtṳ̌bǎ kû̌ ta̤sita̤hǎmǎ pṳ̂̌tôplǎ bǎbǎkǎlè he shôpe̤shônǎ bǎ na ta̤sû̌ta̤tòwò tô̤̌.

110Kòyòkhu phû̌mò̤̌ dò he kû̌ sumṳ bǎbǎkǎlè he cû̌tûlû̌ khatili̤ nô̌ na ta̤sû̌ǐtòwòǐ tô̤̌.

111Na ta̤hî̌bǎlò̤ tokhlǒnu, a ma̤ sǎlě̤sǎlò̤ he sǎphlǒ.

A htû he û̌tě̤û̌ca tûjû̌pwa̤.

112He olò̤ hesǎphlǒ kû̌ he jû na ta̤hî̌bǎlò̤ tǒ̤ he si.

113He sǎkhě kòyò dǒ asǎphlǒ wò̌wè̌ lûhtôlûlò̤nu.

He mô̤nṳ̌ na ta̤sû̌ta̤tòwò.

114Na mî̌ he lǎ̤ô̌tûdû agûlǎ̤, he lǎ̤taka.

He kè̌shu pwǎ tǒ̤ nalě̤nayô̤̌ nô̤̌.

115Ǒ kòyòkhu phû̌mò̤̌ sî, cû̌tephe yî̤kè kû̌ he.

He ganǎ̤de he Cǒmaradû̌ ata̤mǎnǎlò̤ pě.

116Pô̤̌ na ta̤olò̤ ô̌nu, ǐ he ta̤khû̌ta̤ǎ dě he ô̌htûpwa̤ pě.

Dǒ he ta̤kè̌shuǐnu akhû̌akhî, no htûhtò̌ tǎ̤ ta̤shòwò̤̌ dǒ heya mǎ̤.

117Pô̤̌khô he glè̌ hǎplǎ ayanu, ma̤jè̌ he.

He gǔ bè̌dubè̌nǎ̤ na ta̤hî̌bǎlò̤ pṳ̂̌꤮ tôplǎ.

118Na wîkè bò kòyò dǒ a cû̌tûlû̌ khati̤li̤kè na ta̤hî̌bǎlò̤.

Asî tili̤tôlô̌ tokhlǒnu, lǎ̤nǎla̤ǐ tôcǒ tô̤̌.

119Na wîkèbò kòyòkhu phû̌mò̤̌ asô̌sô̌kû̌ kòyò wîkè ta̤wè̤̌ta̤sô̌.

He mô̤ǐ na ta̤mǎlò̤.

120He ǐsha mî̌ca nalǎ̤ dě he gònò̤̌gòglè.

He ǐsha mî̌ca na ta̤cî̌htò̌.

Ta̤jûlě̤phǐ Cǒmara alě̤ayô̤̌

121He ma̤pwǎ ta̤ dǒ atôabǎ, acǒatè̤.

Wîkè tǎ̤ he dǒ pwa̤ma̤jî̌ma̤jû̌ acǔdekû mǎ̤.

122Olò̤mò̌ he mî̌ na pwa̤ma̤ta̤phû̌nu kû̌ na glè̌ tugǔtaka ma̤jè̌ǐ he.

No ma̤jî̌ma̤jû̌ tǎ̤ he kû̌ kòyò bè̌dû̌bè̌htò̌lǒ anǎ̤ nutokhlǒ tǎ̤mǎ̤ nî̌.

123He ô̌pǒ̤kè̌shuǐ mî̌ca na ta̤ma̤hǎplǎge, na ta̤olò̤ cǒtè̤ nudě a gayǎ̤bò he gô̌bô.

124Ma̤mô̤ma̤wô̌ǐ na pwa̤ma̤ta̤phû̌ kû̌ na ta̤mô̤ dǒ ahǎbòjò tô̤̌.

Sû̌ǐtòwòǐ he kû̌ na ta̤hî̌bǎlò̤.

125He mî̌ na pwa̤ma̤ta̤phû̌ tôpwa̤.

Pô̤̌khô he sî̌ganǎ̤ na ta̤mǎlò̤ ayanu, ǐ he ta̤sî̌yaphlôphǎ.

126Ǒ Cǒmara tûjû̌pwa̤, kòyò hǎkhû̌phû̌ ganǎ̤de pe na ta̤sû̌ta̤tòwò tô̤̌ akhû̌akhî, ashěakhǎ tô dǒ na tô ma̤ta̤ tôcǒcǒ.

127Na ta̤mǎlò̤ hǒonu, he mô̤ǐ jî̌jî̌ khlo pe lû̌û kû̌ htacè̌.

128He gû̌ mè̤̌caca bò na ta̤sû̌ǐtòwòǐ.

He sǎkhě bò ta̤lòhǎlòhô aklè̌aklò.

Sǎyṳ ganǎ̤de Cǒmara ta̤sû̌ta̤tòwò

129Na ta̤mǎlò̤nu acô̌klî̌cô̌sè mî̌ca, he jû ganǎ̤de lǒ̤bò.

130Nalě̤nayô̤̌ ata̤sû̌ǐtòwòǐ ǐ kòyò ta̤lî.

A ǐphlôǐphǎ kòyò ǒò̌phuhtò tokhlǒ. ^l

131He sǎmǒlaǐ mî̌ca na ta̤mǎlò̤ dě he lò̤dô̌lò̤de hǒ.

132Pô̤̌ na lǎ̤klô ma̤jè̌ kòyò dǒ a mô̤nṳ̌ nami̤nu, htû̌ti̤wǐ̤ kè̌tô pû he, ma̤bwǐma̤sîrî he.

133Pô̤̌ nalě̤nayô̤̌ ô̌nu, nè̌klè̌nè̌klò bǎ he khǎlǎlǎ̤kha.

No tǒ̤ tǎ̤ he dǒ ta̤sǔta̤plě akû tǎ̤mǎ̤.

134Pô̤̌khô he jûǎbò̌ na ta̤sû̌ǐtòwòǐ ayanu, ma̤hǎplǎmò̌ he dǒ pwa̤ma̤jî̌ma̤jû̌ acǔdekû.

135Kè̌wî̤kè̌wô̌ na pwa̤ma̤ta̤phû̌ amè̤̌kû̌ henu.

Sû̌ǐtòwòǐ he kû̌ na ta̤hî̌bǎlò̤. ^m

136Kòyò ganǎ̤de na ta̤sû̌ta̤tòwò tô̤̌ akhû̌akhî, he hǎ mǐ̤sǎshilò̤ asô̌sô̌kû̌ shilô̤̌mǒ̤ lò̤.

Cǒmara alě̤ayô̤̌ ata̤cǒta̤tè̤

137Ǒ Cǒmara tûjû̌pwa̤, na mî̌ pwa̤cǒpwa̤tè̤.

Nata̤hî̌bǎlò̤ mî̌ atôabǎbò.

138Na ta̤mǎlò̤nu, atôabǎ, atô yṳ̌ǎ nǎla̤ǐ.

139Pwa̤sǎkhě he tokhlǒ shôpe̤ kèbò nalě̤nayô̤̌ akhû̌akhî, he sǎphlǒdû̌ gû̌gè̌ mî̌ca.

140Nalě̤nayô̤̌nu kòyò ma̤kè̌kè̌ dě acǒatè̤ mî̌ca akhû̌akhî, napwa̤ma̤ta̤phû̌ amè̤̌kû̌ he nî̌ mô̤nǐ̤ mî̌ca yǎ. ⁿ

141Kòyò kè̌tô he tô̤̌, kòyò gènè̤pî̌tî̌ he.

Bǎbǎkǎlè he shôpe̤ nô̌ na ta̤sû̌ǐtòwòǐ tô̤̌.

142Na ta̤cǒta̤tè̤nu acǒatè̤ tûjû̌pwa̤.

Na ta̤sû̌ta̤tòwònu atě̤amè̤̌.

143Ta̤pò̤̌ta̤sha, ta̤gû̌ta̤gè̌ hèbǎ he bǎbǎkǎlè na ta̤mǎlò̤ ama̤ sǎlě̤sǎlò̤ he.

144Na ta̤mǎlò̤nu acǒatè̤ tûjû̌pwa̤.

Ǐ he ta̤sî̌yaphlôphǎ dě he ô̌htûpwa̤ tě̤tě̤mè̤̌mè̤̌.

Ta̤kwicaba dǒ ta̤hǎplǎ aya

145Ǒ Cǒmara tûjû̌pwa̤, he kwisǎyṳhtò̌ na kû̌ he sǎphlǒ tômèbò, kǒshǔmò̌ he.

He ganǎ̤de na ta̤hî̌bǎlò̤.

146Pô̤̌khô he ganǎ̤de gû̌ma̤ na ta̤mǎlò̤ ayanu, he kwisǎyṳhtò̌ na dǒ na glè̌ ma̤hǎplǎ he.

147Bǎ lṳ̌mṳ̌lîbû khôtô̤̌ akhanu, he ihtǒ kwihtò̌ na ta̤ma̤jè̌.

He nǎla̤ǐ tǒ̤ nalě̤nayô̤̌ nô̤̌. ^o

148He sòklò tônǎ̤mṳ̌shǐ, he gènè̤tě̤mè̤̌ nalě̤nayô̤̌ awe̤akè. ^p

149Ǒ Cǒmara tûjû̌pwa̤, na ta̤mô̤nu ahǎbòjò tô̤̌ akhû̌akhî, ganǎ̤de he ta̤kwisǎyṳhtò̌.

Dǒ na ma̤tôma̤bǎ ma̤cǒma̤tè̤ akhû̌akhî, dǐ ô̌htûpwa̤ pô̤̌ he.

150Kòyò dǒ a sǎyṳma̤ ta̤phû̌mò̤̌ tokhlǒ glè̌ hèshě he hǒ.

Kòyò nutokhlǒ ô̌ tepheyî̤kè kû̌ na ta̤sû̌ta̤tòwò.

151Ǒ Cǒmara tûjû̌pwa̤, na ô̌phǔ kû̌ he.

Lǒ̤bò na ta̤mǎlò̤nu, atôabǎbò.

152Na ta̤mǎlò̤ ô̌měô̌gle tûjû̌pwa̤nu, he sî̌ganǎ̤ dǒněhǎlau pe hǒ.

Ta̤kwisǎyṳhtò̌ ta̤ma̤jè̌ aya

153He shôpe̤shônǎ nô̌ na ta̤sû̌ta̤tòwò tô̤̌ akhû̌akhî, kè̌mò̌ he ta̤pò̤̌ta̤sha dě ma̤hǎplǎkèmò̌ he.

154Tugutakaǐ he dě ô̌cu dǒ he tôkhô.

Pô̤̌ na olò̤ hto nayô̤̌nu ma̤hǎplǎkèmò̌ he.

155Kòyòkhu phû̌mò̤̌ ganǎ̤de yṳ̌ǎ Cǒmara ata̤hî̌lò̤yô̤̌ tô̤̌ akhû̌akhî, a ma̤hǎplǎge asî tô̤̌.

156Ǒ Cǒmara tûjû̌pwa̤, na gwèbǎǐ jî̌ kòyò.

Pô̤̌ nata̤mǎlò̤ ô̌nu ma̤hǎplǎge he ta̤ô̌htûpwa̤.

157Pwa̤ma̤jî̌ma̤jû̌ he tokhlǒ bǎbǎ, pwa̤sǎkhě he tokhlǒ bǎbǎ, a ô̌ dû̌wî̤ jî̌jî̌.

He htû̌tiwǐkhô̌kè nô̌ na ta̤hî̌bǎlò̤yô̤̌ tô̤̌.

158Kòyò dǒ a cǒ kû̌ ayô̤̌ tô̤̌ tokhlǒ jûǎ nalě̤nayô̤̌ tô̤̌ akhû̌akhî, he kè̌ dě he ma̤yǒ̤ asî.

159Ǒ Cǒmara tûjû̌pwa̤, kè̌mò̌, he mô̤nṳ̌ wô̌ na ta̤sû̌ǐtòwòǐ.

Nata̤mô̤nu a hǎbòjò tô̤̌ akhû̌akhî, dǐ ô̌htûpwa̤ pô̤̌ he.

160Nalě̤nayô̤̌ lǒ̤bò mî̌ acǒatè̤.

Lǒ̤bò na ta̤hî̌bǎlò̤nu acǒatè̤, a ô̌měô̌gle tûjû̌pwa̤ talakhǎ.

Ta̤bè̌plò̌shǐ dǒ Cǒmara ta̤sû̌ta̤tòwò aya

161He ma̤sǔma̤bǎ pwa̤pǒta̤ tôcǒ tô̤̌ bǎbǎkǎlè asî ma̤jî̌ma̤jû̌ he.

He ǐsha bè̌dubè̌nǎ̤ nalě̤nayô̤̌ pwǎ.

162Dǒ nalě̤nayô̤̌ akhû̌akhî, he sǎlě̤sǎlò̤ jî̌, asô̌sô̌kû̌ kòyò kè̌shǐ ta̤lě̤dû̌pwî̤htû.

163He mô̤nṳ̌ na ta̤sû̌ta̤tòwò akhû̌akhî, he sǎkhěkhû̌khwè mî̌ca ta̤hî̌bǎ lòhǎlòhô.

164Na ta̤hî̌bǎlò̤nu acǒatè̤ akhû̌akhî, he htû̌sò̌htò̌ na tôni̤ mî̌ susô̌tôplǎ.

165Kòyò dǒ a mô̤nṳ̌ na ta̤sû̌ta̤tòwònu, a nǐ̤bǎ mè̤̌mî̌ca ta̤ô̌mô̤ô̌bǎ.

Ta̤tôcǒ sûcû̌jò asî dǒ klè̌sǔklè̌bǎ akû tô̤̌.

166Ǒ Cǒmara tûjû̌pwa̤, he ô̌pǒ̤kè̌shuǐ na ta̤ma̤hǎplǎge.

He ganǎ̤de na ta̤mǎlò̤.

167He jû mô̤nṳ̌ mî̌ca na ta̤hî̌bǎlò̤yô̤̌.

168He jûǎ na ta̤sû̌ta̤tòwò kû̌ na ta̤mǎlò̤.

He ma̤kwè̌ mî̌titènu na sî̌ganǎ̤ lǒ̤bò.

Ta̤kwicaba dǒ ta̤ma̤jè̌ aya

169Ǒ Cǒmara tûjû̌pwa̤, he ta̤kwisǎyṳhtò̌ na dě a htò̌ tǒ̤dǒ na ô̌.

Pô̤̌ na ta̤olò̤ ô̌ htohǒnu, ǐ he ta̤sî̌yaphlôphǎ.

170Ganǎ̤de he ta̤kwicabahtò̌ na.

Pô̤̌ na olò̤ htohǒnu, ma̤hǎplǎmò̌ he.

171Na sû̌ǐtòwòǐ he kû̌ na ta̤hî̌bǎlò̤ akhû̌akhî, he gǔ htû̌sò̌htò̌ na pṳ̂̌plǎ.

172Nata̤mǎlò̤nu atôabǎ lǒ̤bò akhû̌akhî, he gǔ sǎwǐhtû̌sò̌ǐ nalě̤nayô̤̌.

173He gû̌ma̤ na ta̤sû̌ǐtòwòǐ akhû̌akhî, tiwǐtòwò nǎ dǒ na gǔ ma̤jè̌ he.

174Ǒ Cǒmara tûjû̌pwa̤, he kè̌shu nǎla̤ǐ na ta̤ma̤hǎplǎge.

Nata̤sû̌ta̤tòwò ma̤ sǎlě̤sǎlò̤ he.

175Pô̤̌khô he htû̌sò̌htò̌ bò̌ na ayanu, dǐ ô̌htûpwa̤ pô̤̌ he.

Nata̤hî̌bǎlò̤ ma̤jè̌ pû he nî̌.

176He sô̌sô̌kû̌ sû̌phû̌ dǒ shôpe̤ dě a cû̌sǔklè̌ nu.

He shôpe̤shônǎ nô̌ na ta̤mǎlò̤ tôkhò̌ tô̤̌ akhû̌akhî, cû̌ kè̌lǎgesô̌ na pwa̤ma̤ta̤phû̌ amè̤̌kû̌ henu. ^q