Psalms 130
Ta̤kwicaba dǒ ta̤ma̤jè̌ aya
Bǎ kòyò tokhlǒ gehtǒ lô̌khô dǒ Wî̤̌yarǔshôle ta̤lṳhtò̌hôkû akhanu, a sǎwǐ lô̌khô ta̤sǎwǐ nutôshǒ.
1Ǒ Cǒmara tûjû̌pwa̤, he kè̌shǐbǎ dû̌wî̤ ta̤pò̤̌ta̤sha akhû̌akhî, he kwisǎyṳhtò̌ na ta̤ma̤jè̌. 2Ǒ Běcǎdû̌, ganǎ̤de mò̌ he ta̤kwigwèbǎhtò̌. He kwisǎyṳhtò̌ na nî̌ dò̌ mò̌ he na nò̌ku. 3Ǒ Běcǎ Cǒmara tûjû̌pwa̤, na kè̌ wě̤mǎnǎ bò ta̤sǔta̤plě tokhlǒ mî̌, Mò̌pè tôpwa̤ khòbò̌ jò na ta̤cî̌htò̌ ya? 4Pô̤̌khô pa ǐsha dě bè̌dubè̌nǎ̤nǐ̤ na nudě na plûkè hto ta̤sǔta̤plě hǒ. 5He ô̌pǒ̤ Cǒmara tûjû̌pwa̤ ata̤ma̤jè̌. He ô̌yṳ̂̌ yṳ̌ǎnǎla̤ǐ alě̤ayô̤̌. 6He ô̌pǒ̤kè̌shuǐ Běcǎdû̌nu a lǒkhlo pe kû̌ pwa̤ô̌pǒ̤ô̌shu ta̤ tokhlǒ kè̌shu lṳ̌mṳ̌lîbû. A lǒkhlo pe kû̌ pwa̤ô̌pǒ̤ô̌shu ta̤ tokhlǒ kè̌shu lṳ̌mṳ̌lîbû. 7Ǒ Isôrě̤laphû̌ sî, Cǒmara ata̤mô̤ numî̌ ahǎbòjò tô̤̌. A sǎphlǒô̌ ma̤hǎplǎkè kòyò pṳ̂̌ tôplǎ akhû̌akhî, kè̌shǔǐ mò̌ Cǒmara tûjû̌pwa̤. 8A gǔ ma̤hǎplǎge a kòyò Isôrě̤laphû̌ dǒ asî ata̤sǔta̤plě lǒ̤bò akû. a
Copyright information for
KxfSCKXF