Psalms 139

Cǒmara ô̌cu kû̌ pa pṳ̂̌ tôplǎ

Khwǐdawi̤ ata̤sǎwǐ htû̌sò̌htò̌. Ta̤sǎwǐ hǒomî̌ ta̤sǎwǐ ta̤ tokhlǒ a ikǒlǒkò dǒ ta̤lṳhtò̌hôkû nutôpwa̤ aya.

1Ǒ Cǒmara tûjû̌pwa̤, na ma̤kè̌kè̌ hesǎphlǒ, na sî̌ganǎ̤ lǒ̤bò hewe̤hekè.

2He hǎnòò̌ bǎbǎ, he ihtǒ bǎbǎ, na sî̌ganǎ̤ lǒ̤bò.

Na ô̌ dǒ mǒkhû̌ bǎbǎ, na sî̌ganǎ̤ lǒ̤bò heta̤gènè̤.

3He cû̌ bǎtè bǎbǎ, he ô̌kǔ bǎtè bǎbǎ, na kè̌shǐbò.

He ma̤ titètè̌ bǎbǎ na sî̌ganǎ̤bò.

4Ǒ Cǒmara tûjû̌pwa̤, he hî̌bǎhtò̌ hǐ tômṳ̂̌ tô̤̌ bǎbǎkǎlè na sî̌ganǎ̤ ô̌nǎ htobò hǒ.

5Na ô̌pṳ̂̌kè̌ǐ he, na tugutakaǐ he kû̌ nacǔde dǒ apô̤phǎshû̌sho.

6Na ta̤sî̌ta̤jò̌nu a cô̌klǐcô̌sè mî̌ca dǒ heya.

He sî̌ganǎ̤ htû pe tô̤̌ hǒ.

7He gǔ cû̌tephe jò kû̌ na hî̌tè?

He gǔ kòyòcû̌tephekèjò kû̌ na hî̌tè?

8He htò̌ dǒ mǒkhû̌ bǎbǎ na ô̌ bǎnu.

He lò̤tě̤ dǒ lṳ̌gǎnǎdo bǎbǎ na ô̌ bǎnu. ^a

9He wi̤ cû̌ dǒ lṳmṳ̌htò̌ tôkhô bǎbǎ, he cû̌lò̤ô̌kû̌ dǒ lṳmṳlò̤ nutôkhô bǎbǎ, 10Nacǔde gǔ pǒsûcû̌ǐ he.

Nata̤sîrîpô̤phǎ gǔ ma̤jè̌ tûû̌ he.

11He kè̌ hî̌ kû̌, “Ta̤khǐ ô̌bǐtewe̤ lǒ̤bò he, ta̤lî dǒ aô̌te̤we̤ he htûhtò̌bò ta̤khǐ,” mî̌, 12Dǒ ta̤khǐsiwi̤ akû cǒ bǎbǎ he ô̌hǔô̌sè̌ jò nô̌ nalǎ̤ tô̤̌.

Lṳmṳ̌khǐ nuata̤lî sô̌sô̌kû̌ lṳmṳ̌sha, ta̤khǐ bǎbǎ, ta̤lî bǎbǎ, dǒ naya nuasô̌sô̌bò lû̌û pwǎ.

13Pwa̤ dǒ a bô̌lò̤ henǎ̤glǒkrǐkrû̌ lǒ̤ bò mî̌ na hǒ.

Na bè̌ô̌ icuwô̌ he dǒ hemǒ̤hǐphukû. ^b

14Na bô̌lò̤ henu a sû̌pi̤sò̌pi̤ ǒò̌ kati̤kaa, a cô̌klǐcô̌sè jî̌le akhû̌akhî, he hî̌bwǐhî̌sîrîhtò̌ na.

He sî̌ganǎ̤ tě̤tôbò kû̌ Cǒmara ma̤ ta̤ lǒ̤bò numî̌ acô̌klî̌cô̌sè.

15Bǎ hekhwǐhekhû̌ tokhlǒ htûhtò̌ tṳ̌plǒhǔ dǒ hemǒ̤hǐphukû akhanu, na kè̌shǐ lǒ̤bò hekhwǐhekhû̌. ^c

16He ô̌ pe pwǎ dǒ hemǒ̤ hǐphukû bǎbǎkǎlè na kè̌shǐ he.

Bǎ he ô̌lò̤ khôtô̤̌ akhanu, na ma̤mǎma̤dònǎ lǒ̤bò heta̤ô̌htûpwa̤ lṳmṳ̌ni̤ lṳmṳ̌sa dǒ nalî̤bǎkû.

17Ǒ Cǒmaradû̌, nata̤gènè̤ nuahtǒayô̤̌ jî̌le dǒ heya.

Nata̤gènè̤ tokhlǒ mî̌ dô̌bòpè̤̌ pe tô̤̌.

18He kè̌ dô̌kè̌ nata̤ma̤ tokhlǒ mî̌, a ô̌dû̌wî̤ klope kû̌ lǒ̤simǐ.

He hǎmôô̌ dě he sî̌ya akhanu, he ô̌ kû̌ na.

19Ǒ Cǒmaradû̌, he sǎyṳ no ma̤si kèbò na kû̌ kòyòphû̌mò̤̌.

Kòyò dǒ a ma̤si kòyò tokhlǒ, no cû̌ tapheyi̤ kèmò̌ kû̌ he.

20Ǒ Cǒmaradû̌, pwa̤sǎkhě na tokhlǒ hî̌bǎ takǎ lǒ̤bò na.

A hî̌ phû̌mò̤̌bò lô̌khô nami̤.

21Ǒ Cǒmara tûjû̌pwa̤, he tôbǎ sǎkhě nô̌ kòyò dǒ a sǎkhě na nutokhlǒ tô̤̌ya?

He tôbǎ ma̤yǒ̤khû̌khwè nǒ kòyò dǒ a shěshǔ na nutokhlǒ tô̤̌ya?

22He sǎkhě mè̤̌caca asî, he bè̌ asî pô̤̌ pwa̤sǎkhě henu.

23Ǒ Cǒmaradû̌, ma̤kè̌kè̌ he dě sî̌ganǎ̤ tû̌ hesǎphlǒ.

Ma̤kè̌kè̌ he dě sî̌ganǎ̤ bò heta̤gènè̤. ^d

24He cû̌ dǒ klè̌phû̌mò̤̌shǐhtô ya mè̤̌tô̤̌yanu, kè̌mò̌ he dě sûcû̌ he dǒ klè̌ tûjû̌pwa̤ talakhǎ akû.