Psalms 141
Ta̤kwicaba dǒ ta̤takabǐ aya
Khwǐdawi̤ ata̤sǎwǐ htû̌sò̌htò̌
1Ǒ꤮ Cǒmara tûjû̌pwa̤, he kwisǎyṳhtò̌ na, ma̤jè̌ phwèmò̌ he. He kwihtò̌ nata̤ma̤jè̌ akhanu, ganǎ̤de kû̌ he. 2He ta̤kwihtò̌ nanuno htûtû̌ a kû̌ ta̤numò̤̌wǐ. He yṳ̂̌htò̌ cǔde dě kwicabahtò̌ nanu a gǔ ma̤mô̤sû̌mô̤sò̌ tû̌ nasǎphlǒ pô̤̌꤮ lṳmṳ̌hǎ ata̤lṳhtò̌ nunî̌. a 3Ǒ꤮ Cǒmara tûjû̌pwa̤, pǒǐ heta̤hî̌bǎ, ô̌pṳ̂̌kè̌ǐ hekhû̌phě. 4No cû̌ ma̤ tǎ̤ he ta̤phû̌mò̤̌shǐhtô mǎ̤, mè̤̌tô̤̌dě no cû̌ ma̤phû̌mò̤̌shǐhtô wô̤̌wô̤ pû he kû̌ kòyòphû̌mò̤̌ nutokhlǒ mǎ̤. No ǎcuôcu kû̌ tǎ̤ he kû̌ asî shǎǎshǎô numǎ̤mǎ̤. 5No plè he kû̌ kòyòcǒkòyòtè̤ nu, hǒmî̌ a gǔ htû ta̤ma̤mô̤ma̤wô̌ dǒ heya. No sû̌ǐtô he kû̌ a nu, hǒmî̌ asô̌sô̌kû̌ kòyò plṳ̌ mò̤û̌shi dǒ heikǒlô̤. He htè̌shěshu nô̌ asî ta̤sû̌ǐtòwòǐ tô̤̌. heta̤kwicaba nu a shěshǔshu mè̤̌caca pwa̤ma̤ta̤phû̌mò̤̌shǐhtô nutokhlǒ a ta̤ma̤. 6Bǎ kòyò wîtě̤kè pwa̤pǒ asî nutokhlǒ dǒ lǒ̤plò̤kla akhanu, asî gǔ sî̌ganǎ̤ kû̌ heta̤hî̌bǎ tokhlǒ numî̌ atô. 7Asî akhwǐakhû̌ tokhlǒ lûcû̌peshe nṳ̌ bò dǒ lṳ̌gǎnǎdo sô̌sô̌ kû̌ kòyò po̤mǔ lǒ̤nu. 8Ǒ꤮ Cǒmara tûjû̌pwa̤ he Běcǎ Cǒmara tûjû̌pwa̤, he kè̌shǔ nǎla̤ǐ tǒ̤꤮ na pwǎ. Na mî̌ he lǎ̤ô̌tûdû agûlǎ̤, no ma̤si kè tǎ̤ he kû̌ asî mǎ̤. 9Takatě̤tṳ̌ǐ he kû̌ sumṳ dǒ asî dò̌nǎ he, sumṳ dǒ kòyòphû̌mò̤̌ dò̌nǎ he nutokhlǒ. 10Bǎ na ma̤hǎplǎ he akhanu, no po̤bò̌ lǒ̤bò gesô̌ asî kû̌ anò̌glô tûû̌ nutokhlǒ.
Copyright information for
KxfSCKXF