Psalms 145

Ta̤sǎwǐ htû̌sò̌htò̌

Khwǐdawi̤ ata̤sǎwǐ htò̌sò̌htò̌.

1Ǒ he Cǒmaradû̌, hekhwidû̌, he shôbǐǐlṳ̌ nata̤sîrîdû̌sîrîhtû awe̤akè.

He htû̌sò̌htò̌ nami̤ tûjû̌pwa̤ talakhǎ.

2He gǔ htû̌sò̌htò̌ na pṳ̂̌ni̤pṳ̂̌sa.

He gǔ htû̌sò̌htò̌ nami̤ tûjû̌pwa̤ talakhǎ.

3Cǒmara tûjû̌pwa̤ mî̌ asîrîdû̌sîrîhtû jî̌le, a gwǎ htû̌sò̌htò̌ mè̤̌caca.

Asîrîdû̌sîrîhtû pwǐ tènu, kòyò sî̌yahtû tôpwa̤ tô̤̌.

4Kòyò tôhtu hto tôhtu gǔ htû̌sò̌htò̌bò nata̤ma̤.

Asî gǔ pwe̤ǐ shôbǐǐbò nata̤ma̤ dǒ apô̤aphǎ.

5He gǔ gènè̤ pwǎ tǒ̤ nata̤sîrîpô̤phǎ, nata̤sîrîdû̌sîrîhtû ata̤lîta̤kakha kû̌ nata̤ma̤ dǒ acô̌klî̌cô̌sè.

6Asî gǔ shôbǐǐbò nata̤pô̤ta̤phǎ dǒ na ma̤ ta̤cô̌klǐ ǒò̌.

He gǔ pwe̤ǐlò̤ bǎ kòyò kû̌ nata̤ma̤ dǒ adû̌ayô̤̌.

7Asî gǔ pwe̤ǐlṳ̌bò lô̌khô nata̤wô̌ dǒ adû̌ayô̤̌ awe̤akè.

Asî gǔ sǎlě̤sǎlò̤ sǎwǐhtò̌ lô̌khô nata̤cǒta̤tè̤ awe̤akè.

8Cǒmara tûjû̌pwa̤ mî̌ a sǎyṳgwèbǎ, ma̤bwǐma̤sîrî kòyò.

A sǎphlǒhtû lǒbe kû̌ ta̤mô̤ dǒ ahǎbòjò tô̤̌. ^a

9Cǒmara tûjû̌pwa̤ mî̌ a ma̤wô̌ ta̤ dǒ kòyò pṳ̂̌ tôpwa̤ aya.

A sǎyṳgwèbǎǐ tû̌ lǒ̤bò ta̤ dǒ a bô̌lò̤.

10Ǒ Cǒmara tûjû̌pwa̤, lǒ̤bò ta̤ dǒ na bô̌lò̤ tokhlǒ gǔ htû̌sò̌htò̌bò na.

Lǒ̤bò nakòyò cǒtè̤ ayô̤̌ sîtokhlǒ gǔ hî̌bwǐhî̌sîrî na.

11– 12Pô̤̌khô kòyò pṳ̂̌ tôpwa̤ gǔ sî̌ganǎ̤bò nata̤ma̤, nata̤pô̤ta̤phǎ kû̌ nashilǎ̤gǎkû ata̤sîdû̌sîrîhtû ayanu, asî shôbǐǐbò nashilǎ̤gǎkû ata̤sîdû̌sîrîhtû awe̤akè.

Asî shôbǐǐ lô̌khô nata̤pô̤ta̤phǎ awe̤akè.

13Nashilǎ̤gǎkû numî̌ a ô̌gleshomě tûjû̌pwa̤, na pǒǐbò kòyò tôhtu hto tôhtu. ^b

Cǒmara tûjû̌pwa̤ mî̌ acǒtè̤ kû̌ ata̤olò̤ lǒ̤bò, a ma̤ta̤ pṳ̂̌ tôcǒ kû̌ ata̤mô̤ dǒ ahǎbòjò tô̤̌.

14Cǒmara tûjû̌pwa̤ ma̤jè̌ kòyò ô̌ dǒ ta̤pò̤̌ta̤shakû.

A ma̤jè̌ kòyò dǒ ashò̌lò̤ asǎphlǒ.

15Ta̤ dǒ ata̤htûpwa̤ ô̌ pṳ̂̌ tôcǒ kè̌shu sǎmǒ nǎla̤htò̌ dǒ naô̌.

Bǎ ta̤shěta̤khǎ bǎnu na dǐǎdǐô asî. ^c

16Na yṳ̂̌htò̌ nacǔde dě na dǐǎdǐô, na ma̤lǒma̤be bǎ bò ta̤ dǒ ata̤htûpwa̤ ô̌ pṳ̂̌ tôcǒ ata̤sǎyṳ. ^d

17Cǒmara tûjû̌pwa̤ ma̤tô̤ma̤bǎ ta̤pṳ̂̌ tôcǒ dě a ma̤ta̤ pṳ̂̌ tôcǒ kû̌ ata̤mô̤ dǒ ahǎbòjò tô̤̌.

18Lǒ̤bò kòyò dǒ akwisǎyṳhtò̌ Cǒmara tûjû̌pwa̤ kû̌ sǎphlǒcǒsǎphlǒtè̤ tokhlǒnu Cǒmara ô̌phǔtinǐ̤ kû̌ asî.

19A ma̤lǒma̤be bǎ bò kòyò dǒ a ǐsha dě bè̌dubè̌nǎ̤ lû̌ nutokhlǒ ata̤sǎyṳ.

A ganǎ̤de asî kwisǎyṳhtò̌ ta̤ma̤jè̌ dě a ma̤hǎplǎ asî.

20Cǒmara tûjû̌pwa̤ takabǐǐ lǒ̤bò kòyò dǒ a mô̤ǐ lû̌û.

A gǔ ma̤pî̌kè lǒ̤꤮ bò kòyòphû̌mò̤̌.

21He gǔ htû̌sò̌htò̌ Cǒmara tûjû̌pwa̤.

Lǒ̤꤮ bò ta̤ dǒ a bô̌lò̤ tokhlǒ nutô htû̌sò̌htò̌ Cǒmara mi̤plò̌shǐ tûjû̌pwa̤ talakhǎ.