Psa 148 | KxfSCKXF | STEP | Htû̌sò̌htò̌ lô̌khô Cǒmara tûjû̌pwa̤. Ta̤bô̌lò̤ ô̌ dǒ mǒkhû̌ tokhlǒ htû̌sò̌htò̌ mò̌ Cǒmara tûjû̌pwa̤. Ta̤bô̌lò̤ ô̌ dǒ mǒkhû̌ htò̌yô̤̌lǒ tokhlǒ htû̌sò̌htò̌ mò̌ yǎ.

a Mǒhtûlû̌hǎhtûsa 1:6-7

Psalms 148

Ta̤bǎbô̌ lǒ̤꤮ bò sî htû̌sò̌htò̌ Cǒmara tûjû̌pwa̤

1 Htû̌sò̌htò̌ lô̌khô Cǒmara tûjû̌pwa̤.

Ta̤bô̌lò̤ ô̌ dǒ mǒkhû̌ tokhlǒ htû̌sò̌htò̌ mò̌ Cǒmara tûjû̌pwa̤.

Ta̤bô̌lò̤ ô̌ dǒ mǒkhû̌ htò̌yô̤̌lǒ tokhlǒ htû̌sò̌htò̌ mò̌ yǎ.

2 A tanamǒkhû̌phû̌ lǒ̤꤮ bò kû̌ aklisaprṳ̂ ô̌ dǒ mǒkhû̌ lǒ̤꤮ bò sî, htû̌sò̌htò̌ lô̌khô yǎ.

3 Lṳmṳ̌, la kû̌ shǎ dǒ alîkakha lǒ̤꤮ bò sî, htû̌sò̌htò̌ lô̌khô yǎ.

4 Mǒkhû̌ htò̌yô̤̌lǒ nutôkû kû̌ shi ô̌ dǒ mǒkhû̌ tokhlǒ sî, htû̌sò̌htò̌ lô̌khô yǎ. ^a

5 Bǎ a hî̌bǎlò̤ ayô̤̌ akhanu, asî htûhtò̌ bò akhû̌akhî, no htû̌sò̌htò̌bò asî kû̌ Cǒmara tûjû̌pwa̤ ami̤. ^{▼▼Cǒmara tûjû̌pwa̤ ami̤ mî̌ Ya̤we̤, Hǎplǎkè 3:11-13}

6 A bè̌měbè̌gle ta̤bô̌lò̤ lǒ̤꤮ bò tûjû̌pwa̤.

Ata̤mǎlò̤nu a pî̌kèjò tô̤̌.

7 Ta̤ ô̌ dǒ hǎkhû̌, ta̤bô̌lò̤ ô̌ dǒ shidû̌tewe̤kû, shi lò̤yô̤̌kû lǒ̤bò sî, 8 Mî̌ kû̌ siwǐ̤jǐ, shicòphô kû̌ poǒlṳ̌, gili̤sǎdû̌hè dǒ a ganǎ̤de lû̌ûyô̤̌ lǒ̤bò sî, 9 Khôlôdû̌khôlôhtû, khôplǔ, sǒmṳ̌ dǒ a sǎhtò̌jò, sǒmṳ̌ lǒ̤꤮ bò sî, 10 Lǒ̤bò ta̤mi̤ta̤mò̤̌ dǒ aplò̤, ta̤phû̌ta̤wè̤ dǒ anò̤, lǒ̤bò ta̤phû̌ta̤wè̤ dǒ adû̌dû̌ apî̌tî̌tî̌, htû̌patǐ dǒ awi̤ lǒ̤bò sî, 11 Khwǐ, pwa̤htû ikǒlǒkò, pwa̤pǒshipǒgǎ kû̌ khlilèphû̌ ô̌ dǒ hǎkhû̌ lǒ̤꤮ bò sî, 12 Pwa̤khûphû̌sǎ, pwa̤mǒ̤phû̌sǎ, mǒ̤khumǒ̤pwǎ̤ kû̌ phijǎphû̌ sî, htû̌sò̌htò̌ lô̌khô Cǒmara tûjû̌pwa̤.

13 No htû̌sò̌htò̌bò asî kû̌ Cǒmara tûjû̌pwa̤ ami̤nu.

Mi̤ dǒ adû̌ahtû numî̌ tǒ̤꤮ pwǎ ami̤ hǒo nô̤̌ hǒ.

A mî̌ asîrîdû̌sîrîhtû khlo kû̌ hǎkhû̌ kû̌ mǒkhû̌.

14 Pô̤̌khô kòyò glè̌ bè̌dubè̌nǎ̤ Cǒmaradû̌ a kòyò Isôrě̤laphû̌ dǒ a cǒ kû̌ ayô̤̌ sî, a ô̌phǔ kû̌ lû̌û nutokhlǒ ayanu, a ma̤ shohtò̌shû̌htò̌ nǐ̤ asî.

Htû̌sò̌htò̌ lô̌khô Cǒmara tûjû̌pwa̤.