Psalms 25

Ta̤kwicaba dǒ ta̤nè̌klè̌nè̌klò aya kû̌ ta̤tugǔtakaǐ aya

1Khwǐdawi̤ ata̤sǎwǐ Ǒ Cǒmara tûjû̌pwa̤, he hè dǒ na ô̌ dě kwicabahtò̌ na kû̌ he sǎphlǒtômèbò.

2He Cǒmaradû̌, he nǎla̤ǐ tǒ̤꤮ na nô̤̌pwǎ.

No htûhtò̌ pû ta̤sòwò̤̌ dǒ heya mǎ̤.

No sǎle̤sǎlò̤ ma̤pè̤̌kè pû he kû̌ he khuwè̤ tokhlǒ mǎ̤.

3No htûhtò̌ pû ta̤sòwò̤̌ dǒ kòyò ô̌pǒ̤kè̌shuǐ na nutokhlǒ ayamǎ̤.

Tûlû̌꤮ no sòwò̤̌ pû kòyò dǒ a lô̌ǐplò̤ǐ kò nutokhlǒ.

4Ǒ꤮ Cǒmara tûjû̌pwa̤, nè̌lṳ̌bǎ he naklè̌.

Sû̌ǐtòwòǐ bǎ he naklè̌cǒklè̌tè̤. ^a

5Na mî̌ Cǒmaradû̌ dǒ pwa̤ma̤hǎplǎge he akhû̌akhî, nè̌klè̌nè̌klò he dǒ na ta̤cǒta̤tè̤ akû, sû̌ǐtòwòǐ he.

Pṳ̂̌plǎplǎ he ǒpǒ̤kè̌shuǐ na.

6Ǒ Cǒmara tûjû̌pwa̤, gènè̤htò̌ sô̌ na ta̤gwèbǎǐ kû̌ na ta̤mô̤ǐ dǒ ahǎbòjò tô̤̌ dě na dǔlè̌lṳ̌htò̌ hto dǒawǐnukha nutokhlǒ. ^b

7Plûkè he ta̤sǔta̤plě kû̌ he ta̤ma̤takǎ na dǒ he nějǎ pe akha nutokhlǒ nî̌꤮.

Ǒ Cǒmara tûjû̌pwa̤, pô̤̌꤮ na ô̌ kû̌ ta̤mô̤ǐ dǒ ahǎbòjò tô̤̌ kû̌ ta̤wô̌nu akhû̌akhî, gènè̤htò̌ǐ he. ^c

8Cǒmara tûjû̌pwa̤ lǒbe kû̌ ta̤cǒta̤tè̤, ta̤wô̌ pṳ̂̌꤮ tôcǒ.

A nè̌klè̌nè̌klò ta̤ma̤sǔphû̌ kû̌ klè̌tôklè̌bǎ.

9A sûcû̌tô kòyò dǒ ashò̌lò̤ asǎphlǒ tokhlǒ dǒ klè̌tôklè̌bǎ.

A sû̌ǐtòwòǐ padô̌ asî pô̤̌ aklè̌aklò ô̌nu.

10Lǒ̤bò꤮ kòyò dǒ a cǒtè̤ kû̌ Cǒmara ata̤olò̤, ata̤mǎlò̤ nutokhlǒ mî̌ Cǒmara tûjû̌pwa̤ nè̌klè̌nè̌klò lû̌û kû̌ ata̤mô̤ǐ dǒ ahǎbòjò tô̤̌ kû̌ acǒtè̤ kû̌ ayô̤̌nu. ^d

11Ǒ꤮ Cǒmara tûjû̌pwa̤, he ta̤sǔta̤plě dû̌ tûlû̌꤮ shû̌lě akhû̌akhî, dǒ ta̤bè̌dubè̌nǎ̤ na mi̤dû̌ ayanu, plûkè pû he ta̤ma̤sǔ nutokhlǒ.

12Mî̌mò̌pè tôpwa̤ ǐsha bè̌dubè̌nǎ̤ Cǒmara tûjû̌pwa̤ alǎ̤ pě?

Asî tôbǎ gû̌ klè̌ hî̌tènu a gǔ sû̌ǐtòwòǐ tûû̌ asî pě.

13Asî gǔ bwǐdû̌sîrîhtû.

Aphû̌ali̤ sîtokhlǒ nî̤̌bǎ pû shigǎ. ^e

14Cǒmara tûjû̌pwa̤ mî̌ pwa̤ǐsha bè̌dubè̌nǎ̤ lû̌û nutokhlǒ asû̌khô.

A dǐsî̌yalṳ̌ bǎ asî kû̌ ata̤olò̤.

15Cǒmara tûjû̌pwa̤ ma̤lû̌htò̌ he khò̌lôpô̤̌ dǒ yṳ̌glǒkû akhû̌akhî, he kè̌htò̌ pwǎ dǒ a ô̌ pṳ̂̌shěpṳ̂̌khǎ. ^f

16Htû̌tiwǐ kè̌getîkhî he dě gwèbǎǐ he.

He ô̌kè tûû̌ pwǎ dě ajî̌꤮ mî̌ca he. ^g

17Ma̤phikè bǎ he sǎphlǒ gû̌gè̌.

Ma̤hǎplǎge he dǒ ta̤jî̌ta̤jû̌ akû.

18Gènè̤kè̌ bǎ he ta̤jî̌ta̤jû̌ kû̌ ta̤pò̤̌ta̤sha. ^h

Plûkè padô̌ he ta̤sǔta̤plě lǒ̤꤮ bò.

19Gènè̤kè̌mò̌ lô̌khô, he khuwè̤ tokhlǒ ô̌plṳ̂ mî̌ca.

Asî khû̌khwè mî̌ca he.

20He ô̌tûdû dǒ na ô̌ akhû̌akhî, tugǔtakaǐ he, ma̤hǎplǎge he.

No htûhtò̌ tǎ̤ ta̤sòwò̤ dǒ heya mǎ̤. ⁱ

21He ô̌pǒ̤kè̌shuǐ pwǎ tǒ̤꤮ dǒ na ô̌ akhû̌akhî, ta̤cǒta̤tè̤ kû̌ ta̤wô̌ tugǔtakaǐ he pě. ^j

22Ǒ Cǒmaradû̌, ma̤hǎplǎ Isôrěla khlilèphû̌nu dǒ asî ta̤pò̤̌ta̤sha lǒ̤꤮ bò akû nî̌. ^k