Psalms 27
Ta̤sǎwǐ htû̌sò̌htò̌ kû̌ ta̤kwicabahtò̌
Khwǐdawi̤ ata̤sǎwǐ
1Cǒmara tûjû̌pwa̤ mî̌ he ta̤lî, pwa̤ma̤hǎplǎge he. He bǎ ǐsha pe mò̌pè pěya? Cǒmara tûjû̌pwa̤ mî̌ he la̤ô̌tûdû dǒ aměagle. He bǎ ǐsha pe mò̌pè pěya? 2Bǎ kòyò phû̌mò̤̌ glè̌ hè ma̤si ě ǎtaǎ kèbò hephěheyî̌, pwa̤khû̌khwè he glè̌ hè shě he akhanu, asî gǔ shî̌tikhlǐ, lòkhǔpo̤kè bò pě. a 3Kliphû̌sî bôte̤we̤ bò he bǎbǎ, ama̤ sò̌gònò̤̌ ǐsha nô̌ he sò̌phlǒ tîkî̌꤮ tô̤̌. Asî glè̌ hèshě he bǎbǎ, he sò̌phlǒkhu sò̌phlǒhe nòpě pwǎ. b 4He kwi ta̤ tôcǒ dǒ Cǒmara tûjû̌pwa̤ a ô̌ numî̌ dǒ he ta̤ô̌htûpwa̤ tûjû̌pwa̤ akûnu, he sǎyṳ ô̌ dǒ Cǒmara tûjû̌pwa̤ ahǐdǒkû, bǎ ata̤lṳhtò̌hô nutôkû. He sǎyṳ kè̌shǐ Cǒmara tûjû̌pwa̤ ata̤wî̤ta̤wô̌, he sǎyṳ cubucabahtò̌ yǎ. 5Bǎ ta̤pò̤̌ta̤sha hètǒ̤ akhanu, a gǔ takabǐǐ he dǒ gûlǎ̤ lǎ̤ô̌tûdû akû. A gǔ dǒhǔdǒbǐ ǐ he dǒ ata̤lṳhtò̌hôkû. A gǔ bè̌htò̌mǒ pô̤̌ he dǒ lǒ̤dû̌ kò hèma̤jî̌ma̤jû̌jò pe he tô̤̌ nutômè akhû̌. 6Bǎbǎ he ma̤pè̤̌kè bò pwa̤khû̌khwè he dǒ a ô̌ te̤we̤ bò kû̌ he nu. He kaǎgǔ sǎlě̤sǎlò̤ lṳ̌htò̌ ta̤lṳhtò̌ kû̌ Cǒmara tûjû̌pwa̤ dǒ ta̤lṳhtò̌hôkû pě. He gǔ htû̌sò̌htò̌ Cǒmara tûjû̌pwa̤ kû̌ ta̤sǎmò̤̌mṳ, ta̤dǒta̤ǔ. 7Ǒ Cǒmara tûjû̌pwa̤, bǎ he kwihtò̌ na akhanu, ganǎ̤de he ta̤hî̌bǎnu. Gwèbǎǐ he dě kǒshǔ mò̌ he. 8Bǎ na hî̌ kû̌, “Hè cubucaba mò̌ he” akhanu, he hî̌shǔ na dǒ he sǎphlǒkû kû̌, “Ǒ Cǒmara tûjû̌pwa̤, he gǔ cubucabahtò̌ mî̌caca na.” 9Tiwǐkhô̌kè pû nami̤sǎ kû̌ he mǎ̤. Dǒ ta̤sǎphlǒdû̌ akhû̌akhî, sûcû̌ te̤pheyî̤ pû najû̌ mǎ̤. Na mî̌ pwa̤ dǒ a ma̤jè̌ he. Ǒ Cǒmaradû̌, na mî̌ pwa̤ma̤hǎplǎge hto he akhû̌akhî, bè̌kè pû he mǎ̤, wîkè pû he mǎ̤. c 10Hemǒ̤hepha kè̌ wîkè he bǎbǎ, Cǒmara tûjû̌pwa̤ khwè̌ǐ tûû̌ he pě. d 11Ǒ Cǒmara tûjû̌pwa̤, sû̌ǐtòwòǐ ǐ he kû̌ naklè̌naklò. Pwa̤khû̌khwè he tokhlǒ ô̌ akhû̌akhî, sûcû̌tô he dǒ naklè̌cǒklè̌tè̤. e 12Pwa̤khû̌khwè he sî tokhlǒ sǎyṳma̤ he hî̌tètè̌꤮ bǎbǎ, plûkè tǎ̤ asî mǎ̤. Asî pè̤̌wǎ̤ phô̌phô̌ bò he. Asî sò̌gònò̤̌ ǐshabò he. 13He yṳǎ mî̌ca kû̌ he gǔ kè̌shǐ Cǒmara tûjû̌pwa̤ ata̤mô̤ta̤wô̌ dǒ he ta̤ô̌htûpwa̤ khònò̤̌khanu pě. 14Ô̌pǒ̤ kè̌shuǐ ta̤ dǒ Cǒmara tûjû̌pwa̤ aô̌ nu. Bè̌shû̌bè̌sho sǎphlǒ dě khuhe lô̌khô. Ô̌pǒ̤ kè̌shuǐ ta̤ dǒ Cǒmara tûjû̌pwa̤ aô̌ nunî̌. f
Copyright information for
KxfSCKXF